Job ni weliy e kireban’ rok ngak Got

1 Me mang Job e non nge yibil ni nge buch wa’athan e rofen nni gargaleg riy.

Job

2-3 Got, mu bucheg wa’athan e rofen ni ba’aram nni gargelegeg riy;mu bucheg wa’athan e re nep’ i n’en nni parnigeg.

4 Got, mu thiliyeg e re rran nem nge ngal’ ni nep’;ma ga pag e binem e rran ndab ku mu leamnag;ma dab ku mu pag e tamilang nge yib ngay.

5 Mu tay ni reb e rran nib lumolang ma rib talumor;mu upunguy ko manileng ma ga thang e yal’ riy.

6 Mu chuweg e re nep’ nem u lan e duw,ma dakriy bi’id ni ngan mathe’eg ngay;

7 mu tay nreb e nep’ ni dariy ban’en riy ni felan’uy ngay.

8 Mog ngak e pi’in yad ma pig ngar bucheged wa’athan e re rran nem,ni pi’in yad manang rogon ni ngar nonod ngak e Leviathan.

9 Mu tay e fasuran ndabki yan ra’en;mu tay e binem e nep’ ndab ki i leamnag ni ku ra puf e woch.

10 Mu bucheg wa’athan e re nep’ nem ni bochan e pag ngan gargel nigeg,me teg nga fithik’ e buchbuchan’ nge biligt’ay e gafgow.

11 Fa’an manga gum’ u yin e chitinag ma kabfel’,ara gum’ ko ngiyal’ ni ba’aram nni gargelegeg riy.

12 Mang ni i dibeyeg e chitinag?Mang ni i tathuth nigeg?

13 Fa’an mang e gum’ e ngiyal’nem,ma chiney e gu bay u fithik’ e gapas,

14 ni gu be mol ni bod e pi pilung nge pi’in yad ma gagiyeg,ni yad e ku ra toyed bayay e pi naun ko pilung ni kakrom.

15 Mu gu mol ni bod e pi’in pifak e pilungni kar suguyed e pi naun rorad ko gol nge silber,

16 fa gu mol ni bod e bitir nni gargeleg ma ba yam’.

17 Girdi’ ni kireb u lan e low ko yam’ e kar talgad ndakurir ngongliyed e kireb,ma pi’in ke aw porowrad ko maruwel e fin aram e gin kar toffangad riy.

18 Ku aram e gin nra toffan e pi kalbus riy,ndakurir rung’aged e n’en ni ngar rin’ed u fithik’ e wa’achar.

19 Gubin thal e girdi’ ma bay u rom, ni pi’in ntolang nge pi’in sobut’,ma pi sib e fin aram e kar pufgad e pi masta rorad.

20 Mang ni nge par e girdi’ ngi i gafgow?Mang ni ngan pi’ e tamilang ngak e girdi’ ni be par u fithik’ e kireban’?

21 Yad be sonnag e yam’, ma der yib ngorad;kabfel’ ba low ko yam’ u wun’rad ko machaf.

22 Dariy e felfelan’ rorad nge yan i mada’ ko ngiyal’ ni karm’ad ka ni k’eyagrad;

23 Tin bay nga m’on ni bay fini yib ngorad e ke tay Got nib mith,ir e ke ning lanin’rad.

24 Ku gu thilyeg e abich ko meyor;ma da gur tal ko gel’gel’.

25 Urngin e tin gu be tamdag ngay ma gu be rus ngay e ke yib ngog.

26 Dariy e gapas nge toffan rog,ma der m’ay e gafgow rog.