Iehova ese Ieremia e boiria

1 Ieremia, Hilkia natuna, hahelaḡa taudia Anatoto ai, Beniamina tanona ai, e nohova edia orea tauna ta, ena hereva.

2 Iehova ena hereva na ia dekenai e kau, Iosia Amon, Iuda pavapavana, ena nega ai, ena lohia laḡanina ihagwauta-toina lalonai;

3 ma e kau Iou, Iehoiakim Iosia, Iuda pavapavana, ena nega ai, ela bona Sedekia Iosia, Iuda pavapavana, ena lohia laḡanina ihagwauta-tana dokona, ela bona hua iha-imana ai Ierusalem taudia e ḡuidia.

4 Iehova ena hereva na egu ai e kau, eto:

5 Sinamu bogana ai do asina hadudumu negana ai na dibamu,bona do so vara negana ai na hahelagamu;bona na duanaimu, peroveta tauna ai baola,basileia idau-idau ediai.

6 Bena lau nato, Ḡaubada Iehova e, a itagu, lau na asi dibagu ede baina hereva toma, badina be lau na tauhau mo.

7 A Iehova ese e haere henigu, eto:Basioto “Lau na tauhau mo”;badina be dekediai baina siaimu taudia iboudiai ediai baola,bona baina haḡanilai henimu herevadia ba gwaurai.

8 Idia garidia basio gari,badina be lau na oi ida, bena baina harohomu mauri.Iehova na e herevamu.

9 Bena Iehova ese imana e toia roro, udugu e daua toho. Bena Iehova ese e hereva henigu, eto:A itaia, egu hereva na udumu ai vada na atodia,

10 a itaia, hari dina ai vada na haginimu,bese idau-idau bona basileia idau-idau daediai,ba butu oho bona ba ḡiḡi dobi,ba hahebua tari bona ba hahedarere,ba hagini-hagini bona ba hadohado totona.

11 Iehova ena hereva egu ai ma e kau, eto, Ieremia e, dahaka o itaiamu! Bena lau nato, Sakada auna rigina ta na itaiamu.

12 Bena Iehova ese ma e hamaorogu, eto, O itaia balahenimu, badina be lau ese egu hereva na balaia henimu, anina baina karaia totona.

13 Iehova ena hereva na nega iharuana ai egu ai e kau, eto, Dahaka o itaiamu? Bena lau nato, E daidaimu urona na itaiamu, bona lahi ihahemetaina na mirigini kahana ai.

14 Bena Iehova ese e hamaorogu, eto, Mirigini kahana amo dika baine daidaia dobi, ina tano e noholaiamu taudia iboudiai latadiai.

15 Badina be Iehova na e tomu, A itaia, mirigini kahana basileiadia besedia iboudiai na boiridiamu; bena idia na baema, ta ta ese ena terono ena terono bae haginidia, Ierusalem ikoukoudia raka-vareaidia ai, bona e haheḡeḡea daemu maḡudia iboudiai hevaira-henidia ai, bona Iuda hanuadia iboudiai hevaira-henidia ai.

16 Bona egu hahemaoro herevadia na idia latadiai baina gwaurai, edia kara dika iboudiai ikaradia ai e rakatanigu dainai. Idia ese muramura mai bonadia vada e gabu, dirava idaudia ediai, bona idia sibodia imadia amo e kara ḡaudia vada e toma henidia diho.

17 A oi na emu rami ba hekasilaia; ba tore isi, na haḡanilaimumu herevadia iboudiai ba hamaorolaidia. Kudoumu basine hetaha idia daidiai, lau ese idia vairadiai oi kudoumu baina hahetahaia na garina.

18 A itaia, hari dina ai lau ese hanua aukana bona auri au-tubuana bona auri-laboralabora maḡudia heḡereḡeredia ai baina halaomu, tano idoinai ilodu-henina bona Iuda tanona pavapavadia bona lohiadia bona ena hahelaḡa taudia bona ena taunimanima iboudiai iloduhenidia totona.

19 Idia ese bae tuari henimu; to basie hadareremu, badina be lau na oi ida, bena baina hamaurimu. Iehova na e herevamu.