GOSPEL ROK
JOHN

Fare Gospel rok John e be dag ni Jesus e ir fare Thin rok Got ni immoy ko tabolngin, ni yib i ngal’ nib girdi’ nge yib i par ngodad. Re Gospel ney e kan yoloy ni bochan e pi’in yad ra be’eg e nge yag ni mich u wun’rad ni Jesus e ir fare Messiah, ni fa’anem ni Fak Got, ni aram u daken e michan’ rorad ngak e rayag e yafos ngorad (John 20:31).

Fare Gospel rok John e bay riy murung’agen boch e maang’ang ni be dag ni Jesus e ir fare Tabiyul ni Fak Got ni micheg Got ni bayi pi’, ma ku bay riy rogon ni i weliy Jesus fan e pi maang’ang nem. Boch e girdi’ e mich Jesus u wun’rad kar manged pi gachalpen, ma boch e girdi’ e de mich u wun’rad miyad togopluw ngak. Yu guruy ni 13–17 e bay riy murung’agen Jesus ni i fonownag pi gachalpen u fithik’ e runguy nge t’ufeg rok ngorad, ma ki weliy murung’agen e maruwel ko Kan Nthothup ni bayi pow’iyrad, me ki yibilayrad ngak Got u m’on ko ngiyal’ nni kol riy. Yu guruy ntomur e be weliy murung’agen Jesus nni kol min pufthinnag min kuruthnag, nge fos ko yam’ ni tay nge rogon ni i m’ug ngak pi gachalpen nga tomuren nike fos ko yam’.

John e ri be weliy murung’agen fare tow’ath ni aram e yafos ndariy n’umngin nap’an ni nge yag ngak e pi’in ke mich Jesus u wun’rad, ya ir e kanawo’, me ir e tin riyul’, me ir e yafos.

I John e i weliy murung’agen Jesus ni i susunnag Jesus ir ko ran, nge flowa, nge tamilang, nge be’ ni tagafaliy e saf nge saf rok, nge kenggin e grape nge wom’ngin, yu daken e pin’ey e i fil Jesus ngak e girdi’ rogon ni ngar thapgad ngak Got, nge rogon ni ngar ta’ab girdi’gad Jesus ngi i ayuwegrad.

Tin ni bay riy

• Tabolngin 1:1–18

• John nma tawfe nge tin som’on pi gachalpen Jesus 1:19–51

• Jesus ni be machib ma be ayuweg e girdi’ 2:1–12:50

• Tin tomur e rran ni immoy Jesus u Jerusalem nge pi binaw nib chugur ngay 13:1–19:42

• Fos ko yam’ ni tay Jesus nge rogon ni i m’ug u fithik’ girdi’en 20:1–31

• Jesus ni m’ug bayay u Galile 21:1–25