PJS, Marcos 9:3 (idilig iti Marcos 9:4)
(Adda idi ni Juan a Mammuniag iti Bantay a Nagbalbaliwan iti Langa.)
3 Ket nagparang kadakuada da Elias ken Moises, wenno iti sabali a pannao, da Juan a Mammuniag ken Moises; ket makisasaoda ken ni Jesus.
PJS, Marcos 9:40–48 (idilig iti Marcos 9:43–48)
(Maidilig ti panangputed iti ima wenno saka a nagbasol ti panangisardeng iti pannakilangen iti mangiturong iti pannakasayyasayya.)
40 Ngarud, no nagbasol kenka ti imam, putdem; wenno no nagbasol kenka ti kabsatmo ket saan a nagpudno ken saanna a lipaten, maikkatto. Nasaysayaat a sumrekka iti biag a lugpi, ngem ti addaan iti dua nga ima, a mapan iti impierno.
41 Ta nasaysayaat para kenka nga agbiag nga awanan iti kabsat, ngem ti agpadakayo iti kabsatmo a maipuruak iti impierno; iti apuy a dinto pulos masebseban a di pakatayan dagiti iggesda, ken di pakasebseban ti apuy.
42 Ket manen, no agbasol kenka ti sakam, putdem; ta no asino ti kapadam, isu ti surotam, no agbalin a managbasol, maisinanto.
43 Nasaysayaat para kenka, a di agbiag, ngem ti addaan iti dua a saka a maipuruak iti impierno; iti apuy a dinto pulos masebseban.
44 Ngarud, agtakder koma ti tao wenno matnag, a bukbukodna, a saan a para iti sabali; wenno saan nga agtalek iti sabali.
45 Agdawatka iti Amak, ket maitedto a dagus kenka ti dawatem, no agdawatka a sipapammati, a mamati nga umawatkanto.
46 Ket no dayta matam a para kitam, isu a tinudingam a mangaywan kenka a mangipakita kenka iti lawag, agbalin a managbasol ket agbasol kenka, suatem.
47 Nasaysayaat a sumrekka iti pagarian ti Dios, a maymaysa ti matam, ngem ti addaan iti dua a mata no maipuruakka met iti impierno nga apuy.
48 Ta nasaysayaat para kenka a maisalakan, ngem ti maipuruak iti impierno a kaduam ti kabsatmo, a di pakatayan ti iggesda, ken di pakasebseban ti apuy.