HJS, Marcos 14:20–25 (itandi sa Marcos 14:22–25; HJS, Mateo 26:22, 24–25)
(Si Jesus mipasiugda sa sakramento.)
20 Ug samtang sila nangaon, si Jesus mikuha og pan ug mipanalangin niini, ug mipikas, ug mihatag ngadto kanila, ug miingon, Dawata kini, ug kan-a.
21 Tan-awa, kini alang kaninyo sa pagbuhat agi og handumanan sa akong lawas; kay kon kamo magbuhat niini sa kanunay kamo mahinumdom niini nga takna nga Ako nag-uban kaninyo.
22 Ug siya mikuha sa kopa, ug sa diha nga siya nakahatag na ug pasalamat, siya mihatag niini ngadto kanila; ug tanan sila miinom gikan niini.
23 Ug siya miingon ngadto kanila, Kini ang agi og handumanan sa akong dugo diin gipaagas alang sa daghan, ug sa bag-ong tugon diin Ako mihatag nganha kaninyo; kay kanako kamo mopamatuod ngadto sa tibuok kalibutan.
24 Ug ingon nga kamo nagbuhat niini nga ordinansa sa kanunay, kamo mahinumdom kanako niini nga takna nga Ako nag-uban kaninyo ug miinom uban kaninyo niini nga kopa, bisan sa katapusan nga higayon diha sa akong pagpangalagad.
25 Sa pagkatinuod Ako moingon nganha kaninyo, mahitungod niini kamo mopamatuod; kay Ako dili na moinom sa bunga sa ubas uban kaninyo, hangtud niana nga adlaw nga Ako moinom niini pag-usab didto sa gingharian sa Dios.
HJS, Marcos 14:36–38 (itandi sa Marcos 14:32–34)
(Didto sa Getsemani, bisan ang uban sa Napulog Duha wala makasabut sa hingpit sa tahas ni Jesus isip nga Mesiyas.)
36 Ug sila miadto ngadto sa usa ka dapit nga ginganlan og Getsemani, nga usa ka tanaman; ug ang mga tinun-an misugod sa hilabihan nga pagkahibulong, ug paglibug kaayo, ug sa pagmulo diha sa ilang mga kasingkasing, natingala kon kini ba ang Mesiyas.
37 Ug si Jesus nga nasayud sa ilang mga kasingkasing, miingon ngadto sa iyang mga tinun-an, Lingkod kamo dinhi, samtang Ako mag-ampo.
38 Ug siya midala uban kaniya, ni Pedro, ug Santiago, ug Juan, ug mibadlong kanila, ug miingon ngadto kanila, Ang akong kalag hilabihan kamagul-anon, gani ngadto sa kamatayon; paghulat kamo dinhi ug pagbantay.