JS—Ukok, Luk 12:9–12. Keidi Luk 12:9–10; lale barāinwōt JS—Ukok, Matu 12:37–38 im K&B 132:26–27
Jisōs ej kōmmeļeļeik bwe blaspim ņae Jetōb Kwōjarjar jamin jeorļo̧k bōd jān e.
9 A eo ej kaarmejjete Eō im̧aan mejān armej raņ, naaj kaarmejjete im̧aan mejān enjeļ raņ an Anij.
10 Kiiō ro rikaļooran raar jeļā bwe Eaar ba men in, kōnke rekar kōnono ņae E im̧aan mejān armej ro; bwe rekar mijak n̄an kam̧ool kake E im̧aan mejān armej ro.
11 Im raar ļōmņak ilubwiljier make, im ba, E ejeļā buruōd, im E ej kōnono n̄an liaakeļo̧k eo ad, im kōj jeban bōk jeorļo̧k bōd. A E eaar uwaake er, im ba n̄an er,
12 Jabdewōt enaaj kōnono juon naan ņae eo Nejin armej, im ukeļo̧k, men in naaj jeorļo̧k jān e; a n̄an eo ej blaspim ņae Jetōb Kwōjarjar, men in naaj ban jeorļo̧k bōd jān e.
JS—Ukok, Luk 12:41–57. Keidi Luk 12:37–48
Jisōs ej katakin bwe ro ri karejeran reaikuj iien otemjej pojak n̄an itok eo An.
41 Bwe, lo, Ej itok ilo kōmja eo kein kajuon ilo bon̄, im E naaj barāinwōt itok ilo kōmja eo kein karuo, im bar juon alen E naaj itok ilo kōmja eo kein kajilu.
42 Im em̧ool Ij ba n̄an kom̧, E ededeļo̧k an itok, āinwōt ekar jeje jān E; im bar juon alen n̄e E naaj itok ilo kōmja eo kein karuo, ak itok ilo kōmja eo kein kajilu, em̧ōņōņō ro rikarejeran rein n̄e Ej itok, bwe E naaj lo rej kōm̧m̧an āindein;
43 Bwe Irooj eo an rikarejar rein enaaj kan̄ōrn̄ōr ipin, im kajijet er n̄an m̧ōn̄ā, im naaj itok im naajdik er.
44 Im kiiō, em̧ool Ij ba men kein n̄an kom̧, bwe kom̧in maron̄ jeļā men in, bwe itok eo an Irooj ej āinwōt juon riko̧o̧t ilo bon̄.
45 Im ej āinwōt juon armej eo im̧ōn m̧weo, eo, eļan̄n̄e ej jab lali men ko m̧weiien, riko̧o̧t ej itok ilo awa eo me ej jab ekkōljake, im bōki men ko m̧weiien, im ajeji ilubwiljin ro m̧ōttan.
46 Im raar ba ilubwiljier, Eļan̄n̄e em̧m̧aan in m̧wiin eaar jeļā awa ōt riko̧o̧t enaaj kar itok, enaaj kar ekkōl, im jab kar kōtļo̧k bwe m̧weo im̧ōn en rup im en jako m̧weiuk ko m̧weiien.
47 Im Eaar ba n̄an er, Em̧ool Ij ba n̄an kom̧, kōn menin kom̧in pojak barāinwōt; bwe eo Nejin armej ej itok ilo awa eo n̄e kom̧ ij jab ļōmņake.
48 Innām Piter eaar ba n̄an E, Irooj, kwōj kōnono būrabōļ in n̄an kōm, ak n̄an aolep?
49 Im Irooj eba, Ij kōnono n̄an ro im Irooj enaaj kōm̧m̧an bwe ren ripepe ioon m̧weo im̧ōn, n̄an leļo̧k n̄an ro nejin kōj eo aer in m̧ōn̄ā eo ilo iien eo ejejjet.
50 Im raar ba, Innām wōn ej rikarejar eo etiljek im mālōtlōt?
51 Im Irooj eba n̄an er, E ej rikarejar eo ej kōmja, n̄an leļo̧k kōj eo an in m̧ōn̄ā ilo iien ejejjet.
52 Em̧ōņōņō rikarejar eo Irooj eo an enaaj loe, n̄e ej itok, ej kōm̧m̧an āindein.
53 Kake m̧ool eo Ij ba n̄an kom̧, bwe Enaaj kairooj e ioon aolep men ko an.
54 A rikarejar eo enana ej e eo jab lo an kōmja. Im eļan̄n̄e jab lo an rikarejar in kōmja, enaaj ba ilo būruōn, Aō Irooj ej karum̧wijļo̧k an itok; im naaj jino den̄ļo̧ke ro rikarejeran m̧aan, im ro rikarejeran kōrā, im n̄an m̧ōn̄ā, im idaak, im n̄an kadek.
55 Irooj eo an rikarejar in enaaj itok ilo raan eo e ejjab kōtmāne, im ilo awa eo n̄e e ej jab ekkōljake, im naaj jeklaļļo̧k e, im naaj jitōn̄ e ājinkōj eo an ippān ro rej jab tōmak.
56 Im rikarejar eo ekar jeļā ankilaan Irooj eo an, im kar jab kōppojak n̄an itok eo an Irooj eo an, im jab kōm̧m̧an ekkar n̄an ankilaan, naaj den̄ļo̧ke kōn elōn̄ jenkwan ko.
57 A eo ekar jab jeļā ankilaan Irooj eo an, im ar kōm̧m̧ani men ko rej tōllo̧ke jenkwan den̄den̄ ko, naaj den̄ļo̧ke kōn jet wōt. Bwe n̄an jabdewōt eo eļap kar leļo̧k, jān e naaj kōtmāne eļap; im n̄an eo Irooj eaar leļo̧k eļap, jān e armej renaaj kajjitōk eļapļo̧k.