JST, Hibrus 7:3. Komperem long Hibrus 7:3
Melkesedek i wan pris folem oda blong Pikinini blong God. Olgeta evriwan we oli kasem prishud ia oli save kam olsem Pikinini blong God.
3 From Melkesedek ia, God i bin odenem hem folem oda blong Pikinini blong God; mo oda ia, i no gat papa, mo i no gat mama, i no pas tru long laen blong papa, mo i no gat stat blong hem, mo i no gat en blong laef blong hem. Mo olgeta evriwan we oli odenem olgeta long prishud ia, oli kam olsem Pikinini blong God, we oli stap wan pris we i no gat en samtaem.
JST, Hibrus 7:19–21. Komperem Hibrus 7:19–21
Loa i mekem ol pipol oli rere from Jisas, we hem nao i meksua se i gat wan promes we i moa gud i stap.
19 From se loa i bin stap be i no gat wan promes i kam wetem, mo i no mekem eni samting i kam stret evriwan, be loa ia i bin givim nomo wan hop we i gud moa, we tru long hem, bae yumi kam kolosap moa long God.
20 Semmak olsem we hae pris ia i kam hae pris tru long wan promes, nao Jisas i kam blong meksua se i gat wan promes we i moa gud i stap.
21 (From ol pris ia oli kam pris be oli no gat promes; be pris ia i kam pris tru long wan promes we i talem long hem: “Lod i bin mekem strong promes mo bambae hem i no jenisim tingting blong hem; Yu yu wan pris blong oltaem folem oda blong Melkesedek.”)
JST, Hibrus 7:25–26. Komperem long Hibrus 7:26–27
Jisas i givim Hemwan olsem wan sakrifaes we i no gat sin, from ol sin blong yumi.
25 From se i gat wan hae pris we i bin kam long mifala, we i tabu, i no save mekem nogud long man, i no gat mak, i no pat blong ol man blong mekem sin, mo God i mekem hem i rula ova long ol heven;
26 I no olsem ol hae pris ia we oli stap mekem sakrifaes evri dei, faswan from ol sin blong olgeta bakegen, mo afta, from ol sin blong ol pipol; from man ia i no nidim blong mekem wan sakrifaes from ol sin blong hem, from hem i no bin mekem eni sin; be nomo from ol sin blong ol pipol. Mo hem i bin mekem hemia wan taem nomo, taem hem i bin givim laef blong hem.