ປຈສ, ປະຖົມມະການ 9:4–6. ປຽບທຽບໃສ່ກັບ ປະຖົມມະການ 8:20–22
ຫລັງຈາກນ້ຳຖ້ວມ, ໂນອາໄດ້ທູນຂໍພຣະຜູ້ເປັນເຈົ້າບໍ່ໃຫ້ສາບແຊ່ງແຜ່ນດິນໂລກອີກ.
4 ແລະ ໂນອາໄດ້ສ້າງແທ່ນບູຊາແທ່ນໜຶ່ງຖວາຍແກ່ພຣະຜູ້ເປັນເຈົ້າ, ແລະ ໄດ້ເອົາສັດ ແລະ ນົກ ທີ່ບໍ່ມີມົນທິນ ແນວລະໂຕ, ແລະ ໄດ້ເຜົາຖວາຍເທິງແທ່ນບູຊາ; ແລະ ໄດ້ຂອບພຣະໄທພຣະຜູ້ເປັນເຈົ້າ, ແລະ ເພິ່ນມີຄວາມປິຕິຍິນດີຢູ່ໃນໃຈ.
5 ແລະ ພຣະຜູ້ເປັນເຈົ້າໄດ້ກ່າວກັບໂນອາ, ແລະ ພຣະອົງໄດ້ອວຍພອນໂນອາ. ແລະ ໂນອາໄດ້ກິ່ນຫອມຫວນ, ແລະ ເພິ່ນໄດ້ກ່າວຢູ່ໃນໃຈ;
6 ຂ້າພະເຈົ້າຈະອ້ອນວອນໃນພຣະນາມຂອງພຣະຜູ້ເປັນເຈົ້າ, ເພື່ອວ່າພຣະອົງ ຈະບໍ່ສາບແຊ່ງແຜ່ນດິນໂລກອີກຕໍ່ໄປ ເພື່ອເຫັນແກ່ມະນຸດ, ເພາະການມະໂນພາບຢູ່ໃນໃຈຂອງມະນຸດ ເປັນຄວາມຊົ່ວຮ້າຍ ນັບແຕ່ເວລາເຂົາຍັງນ້ອຍ; ແລະ ວ່າພຣະອົງຈະບໍ່ ທຳລາຍທຸກສິ່ງທີ່ມີຊີວິດອີກ, ດັ່ງທີ່ ພຣະອົງ ໄດ້ກະທຳ, ຕາບໃດທີ່ແຜ່ນດິນໂລກຍັງຄົງດຳລົງຢູ່;
ປຈສ, ປະຖົມມະການ 9:10–15. ປຽບທຽບໃສ່ກັບ ປະຖົມມະການ 9:4–9
ມະນຸດມີຄວາມຮັບຜິດຊອບຕໍ່ການຫລັ່ງເລືອດຂອງສັດສາວາສິ່ງ ແລະ ມະນຸດ. ພຣະເຈົ້າໄດ້ສະຖາປະນາພັນທະສັນຍາກັບໂນອາ ແລະ ລູກໆຂອງເພິ່ນ ອັນດຽວກັນກັບທີ່ພຣະອົງໄດ້ເຮັດໄວ້ກັບເອນົກ.
10 ແຕ່ ເລືອດຂອງທຸກເນື້ອໜັງ ຊຶ່ງເຮົາໄດ້ມອບໃຫ້ແກ່ພວກເຈົ້າເພື່ອເປັນອາຫານ, ຈະຕ້ອງຫລັ່ງລົງເທິງດິນຈາກສັດທີ່ຖືກຂ້າ, ແລະ ພວກເຈົ້າບໍ່ຄວນກິນເລືອດຂອງມັນ.
11 ແລະ ແນ່ນອນ, ຈະບໍ່ຕ້ອງຫລັ່ງເລືອດ, ນອກຈາກຈະເປັນເພື່ອອາຫານ, ເພື່ອຄ້ຳຈູນຊີວິດຂອງພວກເຈົ້າເທົ່ານັ້ນ; ແລະ ເລືອດຂອງສັດທຸກໂຕ ເຮົາຈະຮຽກຮ້ອງຈາກມືຂອງພວກເຈົ້າ.
12 ແລະ ຄົນໃດກໍຕາມທີ່ຫລັ່ງເລືອດຂອງມະນຸດ, ມະນຸດກໍຈະຫລັ່ງເລືອດຄົນນັ້ນຄືກັນ; ເພາະມະນຸດບໍ່ຄວນຫລັ່ງເລືອດຂອງມະນຸດ.
13 ເພາະພຣະບັນຍັດຂໍ້ໜຶ່ງເຮົາໃຫ້ໄວ້, ວ່າອ້າຍນ້ອງຂອງມະນຸດຄົນໜຶ່ງຈະປົກປັກຮັກສາຊີວິດຂອງມະນຸດ, ເພາະໃນຮູບລັກສະນະຂອງເຮົາເອງ ທີ່ເຮົາໄດ້ສ້າງມະນຸດຂຶ້ນ.
14 ແລະ ພຣະບັນຍັດຂໍ້ໜຶ່ງເຮົາໃຫ້ໄວ້ແກ່ເຈົ້າ, ຈົ່ງມີລູກເຕົ້າໃຫ້ມາກຫລາຍ; ໃຫ້ອອກແມ່ແຜ່ລູກຈົນເຕັມແຜ່ນດິນໂລກ, ແລະ ແຜ່ຜາຍຂະຫຍາຍພັນໃນນັ້ນ.
15 ແລະ ພຣະເຈົ້າໄດ້ກ່າວກັບໂນອາ, ແລະ ກັບພວກລູກຊາຍຂອງເພິ່ນ, ກ່າວວ່າ, ແລະ ເຮົາ, ຈົ່ງເບິ່ງ, ເຮົາ ຈະ ສະຖາປະນາພັນທະສັນຍາຂອງເຮົາກັບພວກເຈົ້າ, ຊຶ່ງເຮົາໄດ້ເຮັດໄວ້ກັບເອນົກ ບັນພະບຸລຸດຂອງພວກເຈົ້າ, ກ່ຽວກັບລູກຫລານຂອງພວກເຈົ້າ ຕໍ່ຈາກພວກເຈົ້າ.
ປຈສ, ປະຖົມມະການ 9:21–25. ປຽບທຽບໃສ່ກັບ ປະຖົມມະການ 9:16–17
ພຣະເຈົ້າຕັ້ງຮຸ້ງກິນນ້ຳໄວ້ໃນທ້ອງຟ້າ ເພື່ອເປັນສິ່ງເຕືອນເຖິງພັນທະສັນຍາຂອງພຣະອົງຕໍ່ເອນົກ ແລະ ຕໍ່ໂນອາ. ໃນຍຸກສຸດທ້າຍ ການຊຸມນຸມໃຫຍ່ຂອງສາດສະໜາຈັກຂອງພຣະບຸດຫົວປີ ຈະຮ່ວມຄົນທີ່ຊອບທຳຢູ່ເທິງແຜ່ນດິນໂລກເຂົ້າກັນ.
21 ແລະ ຮຸ້ງຈະຢູ່ໃນເມກ; ແລະ ເຮົາຈະຫລຽວເບິ່ງມັນ, ເພື່ອວ່າເຮົາຈະລະນຶກເຖິງພັນທະສັນຍາອັນເປັນນິດ, ຊຶ່ງເຮົາໄດ້ເຮັດໄວ້ກັບເອນົກບັນພະບຸລຸດຂອງພວກເຈົ້າ; ເພື່ອວ່າ ເມື່ອມະນຸດຮັກສາພຣະບັນຍັດຂອງເຮົາທັງໝົດ, ຊີໂອນຈະຄືນມາຍັງແຜ່ນດິນໂລກອີກ, ເມືອງຂອງເອນົກ ຊຶ່ງເຮົາໄດ້ຮັບຂຶ້ນໄປໄວ້ກັບເຮົາ.
22 ແລະ ນີ້ຄືພັນທະສັນຍາອັນເປັນນິດຂອງເຮົາ, ຄືເມື່ອລູກຫລານຂອງພວກເຈົ້າຈະຮັບເອົາຄວາມຈິງ, ແລະ ແຫງນໜ້າເບິ່ງ, ຈາກນັ້ນຊີໂອນຈະຫລຽວລົງມາ, ແລະ ຟ້າສະຫວັນທັງປວງຈະສັ່ນສະເທືອນ ດ້ວຍຄວາມຍິນດີ, ແລະ ແຜ່ນດິນໂລກຈະສັ່ນດ້ວຍຄວາມຊື່ນຊົມ;
23 ແລະ ການຊຸມນຸມໃຫຍ່ຂອງສາດສະໜາຈັກຂອງພຣະບຸດຫົວປີ ຈະສະເດັດລົງມາຈາກສະຫວັນ, ແລະ ຄອບຄອງແຜ່ນດິນໂລກ, ແລະ ຈະມີສະຖານທີ່ຢູ່ຈົນກວ່າທີ່ສຸດຈະມາເຖິງ. ແລະ ນີ້ຄືພັນທະສັນຍາອັນເປັນນິດຂອງເຮົາ, ຊຶ່ງເຮົາໄດ້ເຮັດໄວ້ກັບເອນົກ ບັນພະບຸລຸດຂອງພວກເຈົ້າ.
24 ແລະ ຮຸ້ງຈະຢູ່ໃນເມກ, ແລະ ເຮົາຈະສະຖາປະນາພັນທະສັນຍາຂອງເຮົາກັບພວກເຈົ້າ, ຊຶ່ງເຮົາໄດ້ເຮັດໄວ້ລະຫວ່າງເຮົາ ແລະ ພວກເຈົ້າ, ເພາະມະນຸດທັງປວງທີ່ມີຊີວິດໃນເນື້ອໜັງ ຈະໄດ້ຢູ່ເທິງແຜ່ນດິນໂລກ.
25 ແລະ ພຣະເຈົ້າໄດ້ກ່າວກັບໂນອາວ່າ, ນີ້ຄືເຄື່ອງໝາຍຂອງພັນທະສັນຍາ ຊຶ່ງເຮົາໄດ້ສະຖາປະນາລະຫວ່າງເຮົາ ແລະ ເຈົ້າ; ເພື່ອເນື້ອໜັງທັງປວງຈະໄດ້ຢູ່ເທິງແຜ່ນດິນໂລກ.