24 Pea naʻe pehē ʻe Siosefa ki hono ngaahi tokouá, te u mate, peá u ʻalu ki heʻeku ngaahi tamaí; pea te u ʻalu hifo ki hoku faʻitoká ʻi he fiefia. Ke ʻiate kimoutolu ʻa e ʻOtua ʻo ʻeku tamai ko Sēkopé, ke fakahaofi ʻa kimoutolu mei he faingataʻa ʻi he ngaahi ʻaho ʻo hoʻomou nofo pōpulá; he kuo ʻaʻahi mai ʻa e ʻEikí kiate au, pea kuó u maʻu ha talaʻofa mei he ʻEikí, ʻe fokotuʻu hake ʻe he ʻEiki ko e ʻOtuá mei he fua ʻo hoku manavá, ha vaʻa māʻoniʻoni mei hoku manavá; pea kiate kimoutolu, ʻa ia naʻe fakahā ʻe heʻeku tamai ko Sēkopé ko ʻIsileli, ha palōfita; (ka ʻoku ʻikai ko e Mīsaia ʻa ia ʻoku ui ko Sailó;) pea ʻe fakahaofi ʻe he palōfita ko iá ʻa hoku kakaí mei ʻIsipite ʻi he ngaahi ʻaho ʻo hoʻomou nofo pōpulá.

25 Pea ʻe hoko ʻo pehē ʻe toe fakamoveteveteʻi ʻa kinautolu; pea ʻe motuhi atu ha vaʻa, pea ʻe ʻave ia ki ha fonua mamaʻo; ka neongo iá ʻe manatuʻi ʻa kinautolu ʻi he ngaahi fuakava ʻa e ʻEikí, ʻi he hāʻele mai ʻa e Mīsaiá; he ʻe fakahā ia kiate kinautolu ʻi he ngaahi ʻaho fakaʻosí, ʻi he Laumālie ʻo e mālohi; pea ʻomi ʻa kinautolu mei he fakapoʻulí ki he māmá; mei he poʻuli matolú, pea mei he nofo pōpulá ki he tauʻatāina.

26 ʻE fokotuʻu hake ʻe he ʻEiki ko hoku ʻOtuá ha tangata kikite; ʻa ia ʻe hoko ko ha tangata kikite mahuʻinga ki he fua ʻo hoku manavá.

27 Pea naʻe folofola pehē ʻa e ʻEiki ko e ʻOtuá kiate au ʻo kau ki heʻeku ngaahi tamaí; Te u fokotuʻu hake ha tangata kikite mahuʻinga mei he fua ʻo hoku manavá, pea ʻe fakaʻapaʻapaʻi lahi ia ʻi he fua ʻo hoku manavá; pea te u tuku kiate ia ʻa e fekau ke ne fai ha ngāue maʻa e fua ʻo ho manavá, ʻa ia ko hono kāingá.

28 Pea te ne ʻomi kiate kinautolu ʻa e ʻilo ki he ngaahi fuakava ʻa ia naʻá ku fai mo hoʻo ngaahi tamaí; pea te ne fai ʻa e ngāue kotoa pē ʻa ia te u fekau kiate iá.

29 Pea te u hakeakiʻi ia ke māʻolunga ʻi hoku ʻaó, he te ne fai ʻa ʻeku ngāué; pea ʻe lahi ia ʻo tatau mo ia ʻa ia kuó u pehē te u fokotuʻu hake kiate koé, ke ne fakahaofi ʻa hoku kakaí, ʻE fale ʻo ʻIsileli, mei he fonua ʻo ʻIsipité; he te u fokotuʻu hake ha tangata kikite ke fakahaofi ʻa hoku kakaí mei he fonua ʻo ʻIsipité; pea ʻe ui ia ko Mōsese. Pea te mou ʻilo ʻi he hingoá ni ko e haʻu ia mei homou falé; he ʻe tauhi hake ia ʻe he ʻofefine ʻo e tuʻí, pea ui ia ko hono foha.

30 Pea ko e tahá, te u fokotuʻu hake ha tangata kikite mei he fua ʻo ho manavá; pea te u foaki kiate ia ʻa e mālohi ke ne ʻomi ʻa ʻeku ngaahi leá ki ho hako ʻo ho manavá; pea ʻe ʻikai te ne akoʻi ʻeku ngaahi leá pē, ʻoku folofola ʻe he ʻEikí, ka te ne ngaohi foki ʻa kinautolu ke nau tui ki heʻeku lea, ʻa ia kuo ʻosi ʻalu atu ʻi honau lotolotongá ʻi he ngaahi ʻaho fakaʻosí;

31 Ko ia, ʻe tohi ʻe he fua ʻo ho manavá, pea ʻe tohi ʻe he fua ʻo e manava ʻo Siutá; pea ko e meʻa ʻa ia ʻe tohi ʻe he fua ʻo ho manavá, pea mo ia ʻa ia ʻe tohi ʻe he fua ʻo e manava ʻo Siutá, ʻe tupu fakataha hake ia ki hono veuveuki ʻo e ngaahi tokāteline halá, pea fakangata ʻa e ngaahi fakakikihí, pea fokotuʻu ʻa e melinó ʻi he fua ʻo ho manavá, pea fakahā kiate kinautolu ʻa e ʻilo ki heʻenau ngaahi tamaí ʻi he ngaahi ʻaho fakaʻosí; kae ʻumaʻā foki mo e ʻilo ki heʻeku ngaahi fuakavá, ʻoku folofola ʻe he ʻEikí.

32 Pea ʻi he vaivaí ʻe fakamālohi ia, ʻi he ʻaho ko ia ʻe kamata ai ʻa ʻeku ngāué ʻi hoku kakai kotoa pē, pea ʻe toe fakafoki ʻa kinautolu, ʻa ia ʻoku ʻo e fale ʻo ʻIsilelí, ʻi he ngaahi ʻaho fakaʻosí.

33 Pea ko e tangata kikite ko iá te u tāpuakiʻi, pea ʻilonga ʻa kinautolu ʻe feinga ke fakaʻauha iá ʻe veuveuki ʻa kinautolu; he ko e talaʻofa ʻeni ʻoku ou fai kiate koe; he te u manatuʻi koe mei he toʻu tangata ki he toʻu tangata; pea ʻe ui hono hingoá ko Siosefa, pea ʻe tatau ia mo e hingoa ʻo ʻene tamaí; pea te ne tatau pē mo koe; koeʻuhi ko e meʻa ʻe fakahoko ʻe he ʻEikí ʻi hono nimá ʻe ʻomi ai ʻa hoku kakaí ki he fakamoʻuí.

34 Pea naʻe fuakava ʻa e ʻEikí kia Siosefa te ne maluʻi hono hakó ʻo taʻengata, ʻo pehē, Te u fokotuʻu hake ʻa Mōsese, pea ʻe ʻi hono nimá ha tokotoko, pea te ne tānaki fakataha ʻa hoku kakaí, pea te ne tataki ʻa kinautolu ʻo hangē ha tākanga sipí, pea te ne taaʻi ʻa e ngaahi vai ʻo e Tahi Kulokulá ʻaki hono tokotokó.

35 Pea te ne fai ʻa e fakamaau, pea te ne tohi ʻa e ngaahi folofola ʻa e ʻEikí. Pea ʻe ʻikai te ne lea ʻo lahi, ka te u tohi ʻeku fonó maʻana ʻaki ʻa e tuhu ʻo hoku nima ʻoʻokú. Pea te u foaki ha tangata lea maʻana, pea ko hono hingoá ʻe ui ia ko ʻĒlone.

36 Pea ʻe fai kiate koe ʻi he ngaahi ʻaho fakaʻosí foki, ʻo hangē ko ia kuó u fuakavaʻakí. Ko ia, naʻe pehē ʻe Siosefa ki hono ngaahi tokouá, Ko e moʻoni ʻe ʻaʻahi ʻa e ʻOtuá kiate kimoutolu, pea ʻoatu ʻa kimoutolu mei he fonua ko ʻení, ki ha fonua ʻa ia kuó ne fuakava kia ʻĒpalahame, pea kia ʻAisake, pea kia Sēkope.

37 Pea naʻe fakamoʻoniʻi ʻe Siosefa mo e ngaahi meʻa lahi kehe ki hono ngaahi tokouá, pea naʻe fai ʻa e fuakava ʻe he fānau ʻa ʻIsilelí, ʻo pehē kiate kinautolu, Ko e moʻoni ʻe ʻaʻahi ʻa e ʻOtuá kiate kimoutolu, pea te mou fetuku hoku ngaahi huí mei heni.

38 Ko ia naʻe pekia ʻa Siosefa ʻi hono teau mā hongofulu taʻu ʻo hono motuʻá; pea naʻa nau fakatolonga ia, pea nau ʻai ia ki ha puha ʻi ʻIsipite; pea naʻe ʻikai telio ia ʻe he fānau ʻa ʻIsilelí, koeʻuhí ke nau lava ʻo ʻave ia ʻo telio ʻi he fonualoto fakataha mo ʻene tamaí. Pea naʻa nau manatuʻi ai ʻa e fakapapau ʻa ia naʻa nau fuakava ʻaki kiate iá.