LSS, Sēnesi 17:3–7, 11–12 (fakafehoanaki mo e Sēnesi 17:3–12)
(Naʻe fokotuʻu ʻe he ʻOtuá ha fuakava ʻo e kamú mo ʻĒpalahame. Naʻe fakahā kia ʻĒpalahame ʻa e ouau ʻo e papitaisó mo e taʻu motuʻa ʻa ia ʻe hoko ai ʻa e fānaú ʻo feʻunga ke ʻekeʻi meiate kinautolu ʻa e ngaahi meʻa ʻoku nau faí.)
3 Pea naʻe hoko ʻo pehē, naʻe tō foʻohifo ʻa ʻEpalame ʻi hono fofongá, peá ne ui ki he huafa ʻo e ʻEikí.
4 Pea naʻe folofola mai ʻa e ʻOtuá kiate ia, ʻo pehē ange, Kuo hē ʻa hoku kakaí mei heʻeku ngaahi akonakí, pea kuo ʻikai te nau tauhi ʻeku ngaahi ouau, ʻa ia kuó u tuku ki heʻenau ngaahi tamaí;
5 Pea kuo ʻikai te nau tauhi ʻa ʻeku paní; pea mo e tanu, pe ko e papitaiso ʻa ia kuó u fekau kiate kinautolú;
6 Ka kuo nau tafoki mei he fekaú, pea toʻo kiate kinautolu ʻa e fufulu ʻo e fānaú, pea mo e luluku ʻo e totó;
7 Pea nau pehē ko e toto ʻo e tokotaha māʻoniʻoni ko ʻĒpelí naʻe lilingi ia koeʻuhi e ngaahi angahalá; pea ʻikai te nau ʻilo pe ʻe fēfē haʻanau fakamatala ʻi hoku ʻaó.
11 Pea te u fokotuʻu ha fuakava ʻo e kamú mo koe, pea ʻe hoko ia ko ʻeku fuakava ʻiate au mo koe, pea mo ho hako ʻi mui ʻiate koé, ʻi honau ngaahi toʻu tangatá; koeʻuhí ke ke ʻiloʻi ai ʻo taʻengata ʻoku ʻataʻatā ʻa e fānaú ʻi hoku ʻaó kae ʻoua kuo nau taʻu valu.
12 Pea te ke feinga ke tauhi ʻeku ngaahi fuakava kotoa pē ʻa ia kuó u fuakava ai mo hoʻo ngaahi tamaí; pea te ke tauhi ʻa e ngaahi fekau ʻa ia kuó u foaki kiate koe ʻi hoku ngutu ʻoʻokú, pea te u hoko ko ha ʻOtua kiate koe pea mo ho hako ʻi mui ʻiate koé.
LSS, Sēnesi 17:23 (fakafehoanaki mo e Sēnesi 17:17)
(Naʻe fiefia ʻa ʻĒpalahame ʻi hono fakahā ʻe fanauʻi mai ʻa ʻAisaké.)
23 Pea toki tō foʻohifo ʻa ʻĒpalahame ʻi hono fofongá ʻo fiefia, peá ne pehē ʻi hono lotó, ʻE fanauʻi mai ha tama kiate ia kuo teau taʻu hono motuʻá, pea ʻe fanau ʻa Sela ʻa ia ʻoku hivangofulu hono taʻú.