25 Pea naʻe hiki hake ʻe Melekisēteki ʻa hono leʻó ʻo tāpuakiʻi ʻa ʻEpalame.

26 Ko ʻeni ko Melekisētekí ko ha tangata tui lahi ia, ʻa ia naʻe fai ʻa e māʻoniʻoni lahi; pea talu mei heʻene kei siʻí mo ʻene manavahē ki he ʻOtuá, mo tāpuni ʻa e ngutu ʻo e fanga laione, pea fuʻifuʻi ʻa e kakaha ʻo e afi.

27 Pea ko ia, hili hono tali ia ʻe he ʻOtuá, naʻe fakanofo ia ko ha taulaʻeiki lahi ʻo fakatatau ki he hokohoko ʻo e fuakava kuo fai ʻe he ʻOtuá pea mo ʻĪnoké.

28 Pea naʻe fakatatau ia ki he lakanga ʻo e ʻAlo ʻo e ʻOtuá; ʻa ia ko e lakanga, naʻe ʻikai tupu ʻi he tangata, pe ʻi he faʻiteliha ʻa e tangata; pe ʻi ha tamai pe ha faʻē; pe ʻi he kamataʻanga ʻo e ngaahi ʻahó pe ʻi he ngataʻanga ʻo e ngaahi taʻú; kae ʻi he ʻOtuá;

29 Pea naʻe foaki mai ia ki he tangatá ʻi he folofola ʻo hono leʻo ʻoʻoná, ʻo fakatatau ki hono finangalo ʻoʻoná, kiate kinautolu kotoa pē ʻe tui ki hono huafá.

30 He kuo fuakava ʻa e ʻOtuá kia ʻĪnoke pea ki hono hakó ʻaki ha fakapapau ʻiate ia pē; ko e meʻa kotoa pē kuo fakanofo ʻo fakatatau ki he lakanga mo e ui ko ʻení te nau maʻu ʻa e mālohi, ʻi he tui, ke holoki hifo ʻa e ngaahi moʻungá, ke vahevaheʻi ʻa e ngaahi tahí, ke ngaohi ke mōmoa ʻa e ngaahi vaí, pea fakatafoki mei honau ʻaluʻangá;

31 Ke ikunaʻi ʻa e ngaahi kau tau ʻo e ngaahi puleʻangá, ke vahevaheʻi ʻa e māmaní, ke maumauʻi ʻa e haʻi kotoa pē, ke tuʻu ʻi he ʻao ʻo e ʻOtuá; ke fai ʻa e ngaahi meʻa kotoa pē ʻo fakatatau ki hono finangaló, ʻo fakatatau ki heʻene fekaú, ke fakavaivaiʻi ʻa e ngaahi tofiʻa fakapilinisi mo e ngaahi mālohi; pea ke fai ʻeni ʻo fakatatau ki he finangalo ʻo e ʻAlo ʻo e ʻOtuá ʻa ia naʻe ʻi ai talu mei muʻa ʻi he teʻeki ke fokotuʻu ʻa e māmaní.

32 Pea ko e kakai ko ia kuo maʻu ʻa e tui ko ʻení, mo kau ki he lakanga ko ʻeni; ʻo e ʻOtuá, naʻe liliu ʻa kinautolu pea ʻohake ki he langí.

33 Pea ko ʻeni, ko Melekisētekí ko ha taulaʻeiki ʻi he lakanga ko ʻení; ko ia naʻá ne maʻu ʻa e melino ʻi Sēlemi pea naʻe ui ia ko e Pilinisi ʻo e melino.

34 Pea naʻe fai ʻe hono kakaí ʻa e māʻoniʻoni, pea nau maʻu ʻa e langí, pea nau kumi ki he kolo ʻo ʻĪnoké ʻa ia naʻe ʻave ʻe he ʻOtuá ki muʻá, ʻi heʻene ʻave ia mei he māmaní, pea fakatatali ia ki he ngaahi ʻaho fakaʻosí, pe ko e ngataʻanga ʻo e māmaní;

35 Pea kuó ne folofola, mo fuakava ʻi ha fakapapau, ʻe fakataha ʻa e ngaahi langí mo e māmaní; pea ʻe siviʻi ʻa e ngaahi foha ʻo e ʻOtuá ʻo hangē ka fai ia ʻaki ʻa e afi.

36 Pea ko e Melekisēteki ko ʻení, hili ʻene fokotuʻu ʻa e māʻoniʻoní, naʻe ui ia ʻe hono kakaí ko e tuʻi ʻo e langí, pe, ʻi hono ʻai ʻe tahá, ko e Tuʻi ʻo e melino.

37 Pea naʻá ne hiki hake hono leʻó, pea naʻá ne tāpuakiʻi ʻa ʻEpalame, ʻi heʻene hoko ko e taulaʻeiki lahi mo e tauhi ʻo e fale tukuʻanga koloa ʻo e ʻOtuá.

38 Ko ia kuo fili ʻe he ʻOtuá ke maʻu ʻa e ngaahi vahehongofulú maʻá e masivá.

39 Ko ia, naʻe totongi ʻe ʻEpalame kiate ia ʻa e ngaahi vahehongofulu ʻo e ngaahi meʻa kotoa pē naʻá ne maʻú, ʻo e ngaahi koloa kotoa pē naʻá ne maʻú, ʻa ia kuo foaki ʻe he ʻOtuá kiate ia ʻo lahi hake ʻi he meʻa naʻá ne fie maʻú.

40 Pea naʻe hoko ʻo pehē, naʻe tāpuakiʻi ʻe he ʻOtuá ʻa ʻEpalame, mo foaki kiate ia ʻa e ngaahi koloa, mo e lāngilangi, mo e ngaahi fonua ke hoko ko haʻane koloa ʻo lauikuonga; ʻo fakatatau ki he fuakava ʻa ia naʻá ne faí, pea fakatatau ki he tāpuaki ʻa ia naʻe tāpuakiʻi ʻaki ia ʻe Melekisētekí.