JST, Eksodas 34:1–2, 14. Komperem long Eksodas 34:1–2, 14; D&K 84:21–26
God i raetem bakegen loa long ol flat ston we Moses i mekem rere be i karem Melkesedek Prishud mo ol odinens blong prishud ia aot long ol pikinini blong Isrel. Be Hem i givim long olgeta loa blong ol komanmen long saed blong wol ia
1 Mo Lod i bin talem long Moses: “Yu katem tufala nara flat ston, semmak olsem hemia faswan, mo bambae mi raetem, long tufala ston ia tu, ol toktok blong loa, semmak folem olsem we mi bin raetem long tufala fas flat ston we yu bin brekem; be bae i no semmak olsem faswan, from se bae mi tekem prishud aot long medel blong olgeta; taswe, tabu oda blong mi, mo ol odinens blong hem, bae oli no go long fored blong olgeta; from se bae mi no stap long medel blong olgeta, blong mekem se bae mi no prapa spolem gud olgeta.
2 Be, bae mi givim olgeta loa semmak olsem faswan, be bae i folem loa blong ol komanmen blong wol ia; from se mi talem wan strong tok long bigfala nogud kros blong mi, se bambae oli no save kam long ples we mi stap long hem, oli no save kam long kingdom blong mi, long ol dei we bae oli stap wokbaot i go olbaot. From hemia, mekem olsem we mi bin givim oda long yu, mo yu mas rere long moning, mo kam antap, long moning, long Hil blong Sinae, mo soemaot yu long mi long ples ia, long top blong hil.”
Jehova i wan nem we ol pipol blong OlTesteman oli save Lod Jisas Kraes long hem.
14 From se yufala i no mas wosipim wan narafala god; from se Lod, we nem blong hem i Jehova, i wan God we i jalus.