Tej Kev Pab Kawm

Tej Daim Duab txog lub Koom Txoos zaj Keeb Kwm

Tej Yam Nyob Haud
Zaj Lus Piav
Zaj Lus Piav
1. Koog Ntoo Dawb Ceev
2. Pov Roob Khumaulas thiab Cheeb Tsam Palmyra-Manchester
3. Joseph Smith tus Laus lub Tsev Ntoo
4. Grandin Press thiab lub Tsev Luam Ntawv
5. Tus Dej Susquehanna
6. Peter Whitmer tus Laus lub Tsev
7. Newel K. Whitney thiab lub Koom Haum lub Tsev Muag Khoom
8. John Johnson lub Tsev
9. Lub Tuam Tsev Kirtland
10. Adas-oodais-Omas
11. Far West Qhov Chaw rau lub Tuam Tsev
12. Lub Tsev Kaw Liberty
13. Lub Tsev Loj hauv Nauvoo
14. Joseph Smith tus Hluas lub Tsev Muag Khoom uas Muab Thwv Cib Liab Ua
15. Lub Tuam Tsev Nauvoo
16. Lub Tsev Kaw Carthage
17. Khiav Dim Mus rau Sab Hnub Poob
18. Lub Tuam Tsev Salt Lake

Tej Daim Duab txog lub Koom Txoos zaj Keeb Kwm

Tej Daim Duab txog lub Koom Txoos zaj Keeb Kwm

Zaj Lus Piav
Cov duab ntawm tej chaw tseem ceeb rau lub Koom Txoos tej keeb kwm qhia txog tej av uas Tsoom Haiv Neeg Ntseeg hauv Hnub Nyoog Kawg tau mus kev, uas cov yaj saub niaj hnub nim no tau nyob thiab qhia, thiab muaj ntau qhov xwm txheej tshwm sim nyob hauv vaj lug kub.
Zaj Lus Piav
Daim qhia kev nram qab no qhia hais tias cov duab uas nyob hauv tshooj no yog yees nyob rau qhov twg. Nyob hauv cov nplooj ntawv lawv qab no, txhua daim duab uas muaj tus zauv yuav muaj ib zaj lus piav me ntsis txog qhov chaw ntawd. Tom qab ntawd, yuav sau txog tej uas tau muaj los uas tseem ceeb nyob hauv vaj lug kub uas tau tshwm sim ntawm qhov chaw ntawd, nrog rau cov nqe vaj lug kub xwv kom koj paub tias koj yuav mus nyeem qhov twg thiaj paub ntxiv txog tej ntawd.
1. Koog Ntoo Dawb Ceev
Koog Ntoo Dawb Ceev yog nyob hauv Palmyra thiab Pawg Zos Manchester, New York. Koog ntoo no nyob kiag ntawm sab hnub poob ntawm tsev neeg Smith lub tsev ntoo thaum xyoo 1820.
2. Pov Roob Khumaulas thiab Cheeb Tsam Palmyra-Manchester
Ntsia mus rau sab qaum teb, daim duab no yees tau lub Pov Roob Khumaulas nyob hauv Manchester, New York. Nyob hauv daim duab, lub roob pib ntawm ceg kaum sab xis nram qab mus txog rau saum ib nrab ntau ntawm daim duab uas yog lub ncov roob. Tus pej thuam dawb uas nyob sab qaum teb saum lub ncov roob yog muab sam xeeb rau tus tim tswv Maulaunais thiab qhov uas tau muab Phau Ntawv Maumoos ua tawm los. Lub Pov Roob Khumaulas nyob deb li 5 kilaumev sab qab teb hnub tuaj ntawm Koog Ntoo Dawb Ceev. Nyob rau saum toj hauv daim duab yog lub Zos Palmyra, uas deb li 6½ kilaumev. Tsev neeg Smith daim teb thiab Koog Ntoo Dawb Ceev nyob sab laug saum toj hauv daim duab.
3. Joseph Smith tus Laus lub Tsev Ntoo
Tus qauv ntawm Joseph Smith tus Laus lub tsev, ua nyob rau ntawm tib qho chaw ntawm lub tsev ntoo qub nyob ze Palmyra, New York. Tsev neeg Smith ua tau lub tsev ntoo qub uas muaj 1½ theem tsis ntev tom qab lawv los txog hauv Palmyra. Tsev neeg Smith nyob ntawm no thaum xyoo 1819 mus txog xyoo 1825.
4. Grandin Press thiab lub Tsev Luam Ntawv
Lub tsev luam ntawv uas tau kho kom zoo li qub, uas yog Egbert B. Grandin lub, nyob hauv Palmyra, New York, uas tau muab Phau Ntawv Maumoos luam tawm thawj zaug thaum xyoo 1830. Martin Harris muab nws daim teb coj mus yuam nqi txais nyiaj thiab muab ib feem muag kom tau nyiaj los them qhov nqi luam 5,000 Phau Ntawv Maumoos. Pib kho cov phiaj luam ntawv thaum lub Yim Hli Ntuj xyoo 1829, thiab luam tiav rau thaum lub Peb Hlis Ntuj hnub tim 26, xyoo 1830.
5. Tus Dej Susquehanna
Daim duab no yees tau tus Dej Susquehanna nyob hauv Pawg Zos Harmony, Pennsylvania.
6. Peter Whitmer tus Laus lub Tsev
Lub tsev ntoo no sawv cev rau Peter Whitmer tus Laus lub tsev qub nyob hauv Fayette, New York.
7. Newel K. Whitney thiab lub Koom Haum lub Tsev Muag Khoom
Newel K. Whitney lub tsev muag khoom yog ib qho chaw tseem ceeb nyob hauv lub Koom Txoos zaj keeb kwm nyob hauv Kirtland. Joseph thiab Emma Smith nyob ntawm no tau ib ntus. Tau txais ob peb zaj lus tshwm sim uas tseem ceeb nyob ntawm no. Cov Yaj Saub lub Koom Haum Kawm tuaj sib ntsib nyob hauv lub tsev muag khoom no txij thaum lub Ib Hlis Ntuj hnub tim 24, xyoo 1833, mus txog li lub Plaub Hlis Ntuj xyoo 1833.
8. John Johnson lub Tsev
John thiab Alice Johnson lub tsev nyob hauv Hiram, Ohio. Chav no yog nyob theem ob.
9. Lub Tuam Tsev Kirtland
Lub Tuam Tsev Kirtland yog nyob hauv Kirtland, Ohio.
10. Adas-oodais-Omas
Ntsia mus rau sab qab teb ntawm lub hav Adas-oodais-Omas, uas yog ib lub hav ntsiag to thiab zoo nkauj nyob rau sab qaum teb hnub pub hauv Missouri ze lub zej zog Gallatin.
11. Far West Qhov Chaw rau lub Tuam Tsev
Qhov chaw nyob ntawm Far West, Missouri, yog qhov chaw rau li 3,000 mus txog 5,000 tus Neeg Ntseeg nyob, cov uas nrhiav kev tiv thaiv tej kev tsim txom nyob hauv Ciaj Ciam Av Jackson thiab Clay. Thaum xyoo 1838 tus Tswv txib cov Neeg Ntseeg kom ua ib lub tuam tsev rau ntawm no (saib Q&K 115:7–8). Cov neeg phem tej kev tsim txom ua rau lawv ua tsis tau. Thaum lub Kaum Hli Ntuj hnub tim 31 xyoos ntawd, tus Yaj Saub Joseph Smith thiab lwm cov thawj coj ntawm lub Koom Txoos raug ntes, thiab tom qab hais plaub tiav nyob hauv Richmond, lawv raug kaw hauv lub Tsev Kaw Liberty. Thaum lub caij ntuj no xyoo 1838–1839, Tsoom Haiv Neeg Ntseeg hauv Hnub Nyoog Kawg raug ntiab ntawm Far West thiab lwm qhov chaw nyob hauv Missouri mus nyob rau Illinois.
12. Lub Tsev Kaw Liberty
Lub tsev kaw nyob hauv Liberty, Missouri, kwv yees li xyoo 1878. Joseph Smith thiab tsib tug kwv tij ntxiv raug kaw yam tsis raug cai hauv lub tsev no uas muaj phab ntsa tuab li 1.2 mev txij thaum lub Kaum Ob Hlis Ntuj hnub tim 1, xyoo 1838, mus txog lub Plaub Hlis Ntuj hnub tim 6, xyoo 1839. (Sidney Rigdon raug muab tso tawm thaum lub Ob Hlis Ntuj yuav luag tag.) Lawv raug kaw nyob hauv theem qes los yog qhov taub ntawm lub tsev ntawd, lawv pw saum daim plag tsev pob zeb txias txias, muaj quav nyab npleg pawg pes lug, tsis tshua pom kev thiab tsis muaj dab tsi tiv thaiv tej huab cua no.
13. Lub Tsev Loj hauv Nauvoo
Joseph Smith tus Hluas thiab nws tsev neeg tau tsiv mus nyob hauv lub lub Tsev Loj nyob hauv Nauvoo thaum lub Yim Hli Ntuj xyoo 1843. Tom qab no tau ua ib feem ntxiv rau sab hnub tuaj ntawm lub tsev loj thiaj muaj 22 chav. Pib thaum lub Ib Hlis Ntuj xyoo 1844, Ebenezer Robinson muab lub tsev siv ua ib lub tsev tos qhua, thiab tus Yaj Saub siv rau chav rau nws tsev neeg. Lub tsev no yog lub plawv ntawm kev sib fim nyob hauv Nauvoo lub sawm fem. Tus Yaj Saub tos txais cov nom tseem ceeb nyob ntawm no.
14. Joseph Smith tus Hluas lub Tsev Muag Khoom uas Muab Thwv Cib Liab Ua
Lub tsev uas ua dua tshiab kom zoo li Joseph Smith tus Hluas lub tsev muag khoom thiab chaw ua hauj lwm yog nyob hauv Nauvoo, Illinois. Lub tsev no yog ib lub tsev uas tseem ceeb tshaj plaws nyob hauv lub Koom Txoos thaum lub caij lawv nyob hauv Nauvoo. Tsis yog ib lub tsev muag khoom xwb, tiam sis lub tsev no yog lub plawv ntawm txhua yam kev sib tham, kev nyiaj txiag, kev tswj kav, thiab kev teev ntuj. Joseph Smith chav ua hauj lwm yog nyob rau theem ob.
15. Lub Tuam Tsev Nauvoo
Lub Tuam Tsev Nauvoo qub yog xuas cov pob zeb qaub xim txho uas nyob ntawm ib cheeb tsam nyob ze coj los ua. Lub tsev ntev li 39 mev thiab dav li 27 mev. Ntawm npoo av mus rau saum tus pej thuam xaus nkaus siab li 48 mev. Lub Koom Txoos cov mej zeej tau raug ntau yam kev txom nyem thiaj ua tau lub tuam tsev zoo nkauj no, pib ua thaum xyoo 1841. Ib txhia siv zog ua lub tsev tau ntau lub hlis; ib txhia qee lawv pob nyiaj los ua. Txawm tias ua tsis tau tiav tag nrho los, twb muaj cov mej zeej tuaj ua kab ke puv nkaus ob peb lub hlis ua ntej lawv mus rau Sab Hnub Poob. Txawm tias cov Neeg Ntseeg feem coob khiav tawm ntawm Nauvoo mus thaum lub caij nplooj ntoo hlav xyoo 1846 vim muaj tej pawg neeg yuav ua phem rau lawv los, muaj ib co neeg ua hauj lwm uas tshwj xeeb nyob tom qab ua tau lub tuam tsev tiav. Thaum lub Plaub Hlis Ntuj hnub tim 30, xyoo 1846, Txwj Laug Orson Hyde thiab Wilford Woodruff ntawm Pawg Kaum Ob tug Thwj Tim thiab li ntawm 20 tus neeg ntxiv tau muab tus Tswv lub tsev no fij tseg. Thaum cov mej zeej ntawm lub Koom Txoos uas tseem tshuav raug ntiab tawm ntawm Nauvoo thaum lub Cuaj Hlis Ntuj lawv tau tso tseg lub tuam tsev; ces pawg neeg phem ua qias rau lub tsev dawb ceev no. Thaum lub Kaum Hli Ntuj xyoo 1848, hluav taws ua rau sab haud kub hnyiab puas tsuaj tag. Lub tuam tsev uas rov ua dua tshiab (nyob hauv daim duab no), uas tau ua raws nraim li lub tuam tsev qub, tus Thawj Tswj Hwm Gordon B. Hinckley yog tus muab fij tseg thaum lub Rau Hli Ntuj hnub tim 27–30, xyoo 2002.
16. Lub Tsev Kaw Carthage
Lub tsev kaw neeg nyob hauv lub zos Carthage, Illinois.
17. Khiav Dim Mus rau Sab Hnub Poob
Txoj kev khiav tawm ntawm Nauvoo, Illinois mus, yog npaj rau thaum lub Peb–Plaub Hlis Ntuj, tiam sis vim tej pawg neeg yuav ua phem rau lawv Thawj Tswj Hwm Brigham Young thiaj pib coj cov Neeg Ntseeg hla tus Dej Mississippi thaum lub Ob Hlis Ntuj hnub tim 4, xyoo 1846. Thawj Tswj Hwm Young nyob tom qab muab vaj txiaj ntsim rau cov Neeg Ntseeg thiab tsis tau tawm ntawm Nauvoo mus txog ib nrab hli thaum lub Ob Hlis Ntuj.
18. Lub Tuam Tsev Salt Lake
Lub Tuam Tsev Salt Lake, ntsia pem sab qaum teb hnub tuaj tuaj. Ob peb hnub tom qab thawj pawg ntawm Tsoom Haiv Neeg Ntseeg hauv Hnub Nyoog Kawg los txog rau hauv lub Hav Salt Lake, Thawj Tswj Hwm Brigham Young muab nws tus pas nrig coj mus ntaus hauv av thiab hais tias, “Peb yuav ua peb tus Vajtswv lub tuam tsev nyob rau ntawm no.” Pib khawb av thaum lub Ib Hlis Ntuj hnub tim 14, xyoo 1853. Thaum lub Plaub Hlis Ntuj hnub tim 6, xyoo 1853, tau tso tej ncej zeb tiav. Ua tau lub tuam tsev tiav thiab muab fij tseg 40 xyoo tom qab thaum lub Plaub Hlis Ntuj hnub tim 6, xyoo 1893. Thawj Pawg Thawj Tswj Hwm thiab Pawg Kaum Ob tug Thwj Tim sib ntsib nyob ntawm no txhua lub lim tiam sib sab laj thiab nrhiav tus Tswv txoj kev coj lawv tej dej num thiab kev txhim tsa Vajtswv lub nceeg vaj.