Seksen 32
Revelesen we God i givim tru long Profet Josef Smit i go long Parli P. Prat mo Siba Piteson, long Manjesta, Niu Yok, long stat blong Oktoba 1830. Ol elda oli bin filim bigfala intres mo filing long saed blong Ol Man blong Leman, we Jos i bin lanem abaot ol blesing blong olgeta aot long ol profesi insaed long Buk blong Momon. From hemia, oli bin prea long Lod blong Hem i talemaot tingting blong Hem sapos ol elda bae oli aot long taem naoia i go long ol traeb blong Ol Indien we oli stap long Wes. Revelesen ia i kam afta.
1–3, Lod i bin singaotem Parli P. Prat mo Siba Piteson blong prij long Ol Man blong Leman mo blong go wetem Oliva Kaodri mo Pita Witma Junia; 4–5, Oli mas prea blong save andastanem ol skripja.
1 Mo naoia, long saed blong wokman blong mi, Parli P. Prat, luk, mi talem long hem se olsem we mi stap laef, mi wantem se bae hem i talemaot gospel blong mi mo lanem samting aot long mi, mo bae hem i no mas flas mo putum hat blong hem i stap daon.
2 Mo wok we mi bin givim long hem, i blong hem i go wetem tufala wokman blong mi, Oliva Kaodri mo Pita Witma Junia, long ples we i no gat plante man long hem long medel blong Ol Man blong Leman.
3 Mo Siba Piteson bae i go wetem olgeta; mo mi, bae mi go wetem olgeta mo stap long medel blong olgeta; mo mi mi loya blong olgeta long fored blong Papa, mo bae i no gat wan samting bae i win agensem olgeta.
4 Mo bae oli mas folem gud wanem we i stap finis long skripja, mo oli no mas traem blong talem se oli kasem sam moa revelesen; mo bae oli mas prea oltaem blong oli save andastanem ol toktok ia.
5 Mo bae oli folem gud ol toktok ia mo bae oli no pleiplei wetem olgeta, mo bae mi blesem olgeta. Amen.