1 Jinataj almaqa, pichus rey Noej kamachisninmanta ayqerqa, payqa juchasninmanta, sajra ruwasqasninmantawan Diosman kutirikorqa, runaspurapitaj pakayllapi purerqa, Abinadij parlasqanta yachachiyta qallarerqataj.

2 Arí, payqa yachacherqa imachus jamunanmanta, wañusqas kawsarimunankumanta, runas juchamanta kacharichisqas kanankumantawan, mayqentachus Cristo ruwanman, atiyninwan, ñak’ariyninwan, wañuyninwan, kawsarimuyninwan, janaj pachaman wichariyninwantaj.

3 Tukuy uyarejkunata payqa yachacherqa. Pakayllapitaj yachacherqa mana rey yachanampaj. Ashkha runastaj paypa parlasqampi creerqanku.

4 Jinataj tukuy creejkunaqa rerqanku Mormon sutichasqa lagarman. Cahy sutinta reymanta jap’erqa. Llajtaj kantumpitaj karqa, k’ita animalestaj chaypi tiyakorqanku wakin tiempospi.

5 Mormon lugarpi ch’uya yakuyoj pajyun karqa. Chaymampunitaj Alma rerqa, chaynejpi juch’uy sach’as kasqanrayku. Cahypitaj p’unchaypi Almaqa pakakorqa reypa mask’asqanmanta.

6 Jinataj, pikunachus payta creerqanku, chayman rerqanku parlasqanta uyarej.

7 Jinataj ashkha p’unchaymantawan ashkha runas Mormon lugarman tantakorqanku Almaj parlayninta uyarinankupaj. Arí, tukuy paypa parlasqanta creejkunaqa tantakorqanku payta uyarinankupaj. Paytaj paykunata yachacherqa, willarqataj Diosman kutirinankuta, juchamanta kacharisqas kanankuta, Señorpi feniyoj kanankuta ima.

8 Jinataj paykunaman nerqa: Qhawariychis, kaykuna Mormompa yakusnin kanku (imaraykuchus ajina sutichasqa karqanku): Kunantaj qankuna Diospa tropanman yaykuyta munaspa, paypa llajtan wajyasqa kayta munaspa, qankunapura yanapanakuyta munaspa, mana llasa q’epiyoj kanaykichispaj;

9 Arí, waqayta munaspa waqajkunawan, arí, sonqochayta munaspa tukuy sonqochay necesitajkunata, jinataj Diosmanta willanaykichispaj sayariyta munaspa ima horapipis, imamantapis, mayllapipis, wañunaykichiskama, Diosnejta kacharisqas kanaykichispaj, ñawpaj kaj kawsarejkunawan yupasqa kanaykichispaj, wiñay kawsayniyoj kanaykichispajtaj;

10 Kunantaj ñoqaqa qankunaman niykichis, kayqa sonqosniykichispa munaynin chayqa, ¿Imaraykutaj mana Señorpa sutimpi bautizakunkichischu, payman willanaykichispaj paywan tratochasqaykichista, payta sirvinaykichispaj, kamachisqasninta junt’anaykihispaj, astawanraj Espiritunta kachamusunaykichispaj?

11 Maypachachus runasqa chayta uyarerqanku, chaypacha kusiywan t’ajllakorqanku, nerqankutaj: Kayqa sonqosniykoj munaynin.

12 Jinataj Almaqa Helamta pusarqa, payqa ñawpaj paykunamanta ujnin kasqanrayku, yakupi sayarerqataj, qhaparerqataj nispa: O Señor, Espirituykita kacharimuy kamachiykiman, kay ruwanata ruwanampaj llimphu sonqowan.

13 Chayta parlasqantawan, Señorpa Espiritun payman uraykorqa, Almaqa nerqataj: Helam, qanta bautiqayki, tukuy atiyniyoj Diosmanta atiyniyoj kaspa, tukuy yachanankupaj tratochasqaykita Diosta sirvinaykipaj kay wañoj cuerpoyki wañunankama. Señorpa Espiritun qanman kachasqa kachun, qanman wiñay kawsayta qosuchun, Cristoj kacharischisqanrayku, pitachus payqa wakicherqa kay pachaj qallariyninmantapacha.

14 Alma chayta parlasqantawantaj, iskayninku, Almawan, Helamwan p’ampaykorqanku yakuman. Paykunataj yakumanta jatarerqanku, llojsimorqankutaj kusikuspa, Espirituwan junt’asqas.

15 ujtawan Almaqa waj runata pusarqa, yakuman yaykullarqankutaj, payta bautizallarqataj, imaynamantachus ñawpaj kajta bautizarqa, kikillantataj. Cahywampis Almaqa mana yakuman p’ampaykorqañachu.

16 Chay jinaspa, tukuy Mormon lugarman rejkunata bautizarqa. Paykunataj karqanku iskay pachaj tawayoj runas. Arí, paykuna Mormompa yakusnimpi bautizasqas karqanku, Diospa gracianwan junt’asqas karqankutaj.

17 Paykunataj sutichasqa karqanku Diospa iglesian, jinapis Cristoj iglesian, chay p’unchaymantapacha. Jinataj pichus Diospa atiyninwan, munayninwantaj bautizasqa karqa, payqa chay iglesiaman yapasqa karqa.

18 Jinataj Alma Diospa atiyniyoj kaspa sacerdotesta kamacherqa. Sapa phisqa chunka runaspaj uj sacerdoteta kamacherqa paykunaman willanampaj, yachachinampajtaj Diospa reinompi imasmanta.

19 Paytaj paykunata kamacherqa yachachinankuta imallatachus pay yachacherqa, mayqenkunachus llimphuchasqa profetas yachacherqanku, chaykunallata.

20 Arí, kamacherqa yachachinankuta Diosman kutirikuyta, Señorpi feniyoj kaytawan, pcihus llajtanta kacharicherqa.

21 Kamachillarqataj mana paykuna ukhupi churanakunankuta, astawanqa paykuna uj ñawillawan ñawpajman rikunankuta, uj feniyoj, uj bautismoyoj kaspa, sonqosninku kuska kaspa, ujllapi, munanakuypitaj.

22 ajinata pay kamacherqa yachachinankupaj. Chayta ruwaspa Diospa wawasninman tukorqanku.

23 Kamachillarqataj samarina p’unchayta waqaychanankuta, llimphuchanankupaj, sapa p’unchaypitaj Señor Diosninkuta agradecenankutawan.

24 Payqa kamachillarqataj chay sacerdotes, mayqenkunachus wajyarqa, paykuna kikin makisninkuwan llank’anankuta kawsanankupaj.

25 Sapa semanapi uj p’unchayta t’aqarqanku tantakunankupaj. Chay p’unchaypitaj runasta yachacherqanku, Señor Diosninkuta yupaycharqankutaj. Paykunataj sapa atispa tantakorqanku.

26 Sacerdotestaj mana wajkunaj llank’asqankumanta kawsanankuchu karqa. Llank’asqankumanta Diospa bendicionninta jap’inanku karqa, Espiritupi kallpayoj kanankupaj, Diosmanta yachanankupaj, yachachinankupajtaj Diospa atiyninwan, munayninwan ima.

27 Jinataj Alma iglesiapi kajkunata kamacherqa kapuyninkuta qonankuta, sapa ujnin kaj kapuyninman jina. Pichus astawan kaporqa, payqa astawan qonan karqa. Pitajchus pisilla kaporqa, payqa pisillata qonan karqa. Pejpatatajchus mana imapis kaporqachu, payman qosqa kanan karqa.

28 Ajinata paykuna munaspa qonanku karqa, Diosta kusichiyta munaspataj, chay sacerdotesman, mayqenkunachus necesitarqanku, rí, sapa runaman, mayqenchus q’ala kaspa ujmanta necesitan.

29 Kayta paykunaman nerqa Dios kamachisqanrayku. Paykunataj Diospa ñawpaqempi cheqanta purerqanku, paykuna ukhupi qonakuspa, yanapanakuspataj espiritumanta kajkunapi, kay jallp’amanta kajkunapiwan necesitasqakuman jina, munasqankuman jinataj.

30 Jinataj tukuy kaykuna ruwasqas karqanku Mormompi, arí, Mormompa yakusninnejpi, sach’as ukhupi, mayqenkunachus Mormompa yakusninnejpi karqanku. Arí, Mormon nisqa lugar, Mormompa yakusnin, Mormompa sach’asnintaj may k’achitu kanku pikunapajchus chaypi Salvadorninkumanta amañarqanku. Arí, may bendecisqa kanku, imaraykuchus wiñaypaj wiñayninkama payta yupaychaspa takenqanku.

31 Kaykunataj ruwasqas karqanku jallp’aj kantumpi mana rey yachanampaj.

32 Chaywampis reyqa yachaspa wakin runas waj jinayasqankuta, kacharqa kamachisninta paykunata qhawajta. Chayrayku maypachachus paykuna tantakorqanku Diospa nisqanta uyarinankupaj, chaypacha ruwasqasninkuta reyman willarqanku.

33 Chaypachataj reyqa nerqa Alma runasta paypa contranta jatarichisqanta. Chayrayku kacharqa maqanaku soldadosta paykunata wañuchejta.

34 Jinataj Alma, Señorpa llajtanwan yacharqanku reypa soldadosnin jamushasqankuta. Chayrayku carpasninkuta apaspa, familiasninkuwan llojserqanku ch’in pampasman.

35 Paykunataj karqanku casi tawa pachaj phisqa chunkayoj runas.