1 Kunantaj bautismomanta parlani. Qhawariychis, elderes, prebiteros, yachachejkunataj bautizasqas karqanku; jina kajtimpis mana bautizasqachu karqanku pikunachus mana rikhucherqankuchus ruwayninku allin kasqanta bautizanankupaj.

2 Mana pitapis saqerqankuchu bautizakojta mana llakisqa sonqoyoj, k’umuykusqa espirituyoj ima kajtin, tukuy imata iglesiaman willaspa tukuy juchasninkumanta cheqamanta Diosman kutirikunankuta.

3 Mana pipis bautizasqachu karqa mana Cristoj sutinta churakuspa, payta sirviyta munaspataj tukukuykama.

4 Bautizakusqankutawan Santo Espiritoj atiynin paykunaman jamorqa, paykunata llimphucharqataj. Chaypacha Cristoj iglesiampi kaj runaswan yupasqas karqanku. Sutisninkuta escriberqanku paykunata yuyarinankupaj, Diospa palabranwan mikhuchisqas kanankupajtaj, cheqan ñanninta rinankupaj, qhawaspalla kanankupaj Diosmanta mañakuspa, Cristoj ruwasqasnimpi kallpachakuspa, pichus feninkuta Ruwaj, tukuchajtaj.

5 Iglesiapi kajkunataj sapa kuti tantakorqanku, ayunanankupaj, Diosmanta mañakunankupaj, ujkuna wajkunawan parlanakunankupajtaj allin kanankupaj.

6 Paykunataj sapa kuti tantakorqanku t’antata, vinotawan jap’inankupaj, Jesucristota yuyarikuspa.

7 Paykunataj allinta qhawarqanku mana paykuna ukhupi juchallikunankupaj. Pichus juchallikorqa, kinsa iglesiapi kaj runasqa elderespa ñawpaqenkupi chayta willajtinkoqa, manachus juchayojqa Diosman kutirikorqachu chayqa, paypa sutin chinkachisqa karqa, manataj Cristoj llajtanwan yupasqachu karqa.

8 Paykunachus Diosman kutirikorqanku juchasninkuta pampachananta munaspa mana llullakuspa chayqa, paykunaj juchasninku pampachasqas karqanku.

9 Iglesiatataj pusarqanku Espiritoj nisqanman jina, Santo Espiritoj atiyninman jinataj; imaraykuchus imatachus Santo Espiritu ruwanankuta munarqa, yachachinanku kajtimpis, k’aminanku kajtimpis, Diosmanta mañakunanku kajtimpis, Diosta tapunanku kajtimpis, takinanku kajtimpis, ajinata ruwarqanku.