1. I taua mataiti rai kua tamaki akaou te ngati Niphai e te ngati Lamana. E tangata ou ua au, e maata ra toku kopapa, no reira, kua ikiia au e te ngati Niphai, ei arataki no ratou, me kore ra, ei arataki i to ratou nuku.

2. No reira, e tai ngauru ma ono oku mataiti, i riro ei au ei arataki i te nuku o te ngati Niphai, kia tamaki atu ki te ngati Lamana, no reira ka toru anere e rua ngauru ma ono mataiti i topa ki muri.

3. Kia tae ki te toru anere e rua ngauru ma itu o te mataiti, kua aere mai te ngati Lamana kia matou ma te mana maata, e na te reira i akamataku i toku nuku, no reira, kare ratou e tamaki, e kua akamata ratou i te oro ke atu ki te enua ki tokerau.

4. E kia tae atu matou ki te oire ko Anakola, e kua riro mai taua oire ra ia matou, e kua teateamamao matou no te paruru atu i te ngati Lamana. E kua patu iora matou i tetai punanga ketaketa no matou ki taua oire ra, ina ra, kare i puapingaia ta matou patu anga, kua tae mai te ngati Lamana e kua arumaki ia matou ki vao mai i te oire.

5. E kua arumaki katoaia matou ki vao i te enua o Davida.

6. E kua aere tika atura matou ki te enua o Iosua i te kotinga o te enua i te opunga o te ra i te pae taatai ra.

7. E kua akaputuputu viviki iora matou i to matou au tangata kia riro ei matou ei pupu okotai.

8. Ina ra, kua ki te enua i te keikeia e te ngati Lamana, e tei runga oki te mate maata i toku au tangata, ina ra, kare ratou e tataraara i ta ratou angaanga viivii i rave, no reira, i maringi ei te toto ki runga i te enua e kare e ngai toe, i te tua o te ngati Niphai e te tua o te ngati Lamana, e kua tupu iora te orureau ki runga i te enua katoatoa.

9. E ariki oki to te ngati Lamana e ko Aarona te ingoa, e kua aere mai aia kia matou ma tona nuku e a ngauru ma a tausani. E i na, kua tu atu au ki mua iaia ma te a ngauru ma rua tausani. Kua mate iora ratou iaku e toku nuku, e kua oro ke atura ratou. Kua tupu teia e kua topa atu te toru anere e toru ngauru o te mataiti.

10. Kua akamata akera te ngati Niphai i te tataraara i to ratou kino, e kua akamata oki i te aue, mei ta Samuela peroveta i totou takere ana. E i na, kare rava e rauka i te tangata kia akono i tei rauka iaia, no te maata o te keikeia, te ta tangata, te angaanga purepure e te angaanga a te vaerua kino, tei noo ki te enua nei.

11. I na, kua akamata iora te mii e te aue i runga i te enua, no taua au mea nei, e ko te maataanga o te aue ra, tei rotopu ïa i te ngati Niphai.

12. Kia kite ra au ko Momoni i te irieaanga e te mii maata e to ratou taitaia ki mua i te aroaro o te Atua, kua akamata akera toku ngakau i te rekareka i roto iaku, i te kite anga i te aroa ua, e akakoromaki anga roa o te Atua, no reira, e kua manako oki au e, ka aroa mai aia ia ratou, e kia riro akaou mai ratou ei aronga tuatua tika.

13. Ina ra, e puapinga kore ua rai toku rekarekaanga, kare oki to ratou taitaia i te tataraara no te meitaki o te Atua, mari ra, ko te taitaia ïa o te akaapaanga, no te mea, kare rava te Atua e akatika ia ratou kia rekareka i roto i te ara.

14. Kare rava oki ratou i aere mai kia Iesu ma te ngakau akaaka e te vaerua meitaki, mari ra, kua akakino ratou i te Atua, e kua inangaro oki kia mate ratou. Ina ra, kua tauta ratou i te paruru oki i to ratou oraanga na roto i te koke.

15. E kua oki akaou mai toku tumatetenga kiaku, e kua kite atura au e, kua riro ke te au ra o te aroa ua mei ia ratou, te pae kopapa e te pae vaerua, kua kite ana au i te tausani anga o ratou tei moe, i te kai tamaki atu ki te Atua, e kua ututua ua mei te putunga maniva i runga i te enua. E ope atura te toru anere e a ngauru ma a o te mataiti.

16. E kia tae akera ki te toru anere e a ngauru ma rima o te mataiti, kua akamata iora te ngati Niphai i te oro ke atu i mua i te ngati Lamana e kua aruia atu ratou e tae atu ki te enua ra ko Iatona i mua ake ka raukaʼi kia tāpū ia ratou, mei to ratou oro ke anga.

17. I na, te vaitata ua ra te oire o Iatona, ki te enua i uunaʼi a Amarona i te au papa a te Atu kia kore e takinga kinoia. E kua aere katoa au mei tei akaueia mai e Amarona, e rave iora i te au papa a Niphai e kua tata oki i te au mea mei tei tuatuaia mai e Amarona.

18. E kua tata au i te au angaanga kikino, e te rikarika ki runga i te au papa a Niphai, kareka i runga i teianei au papa kare au i tata ana i te au angaanga kikino e te rikarika, no te mea, kua vai ua ana teia angaanga ki mua i toku mata, mei te tuatau mai ka kite ei au i te au angaanga a te tangata nei.

19. E aue oki au nei, no to ratou kino, kua ki oki toku ngakau i te taitaia no to ratou kino i toku nei au ra, kua kite ra au e, ka akateiteiia au kia tae ki te ra openga.

20. I taua mataiti nei rai i kimiiaʼi te au tangata o Niphai, e i arumakiiaʼi. Kua arumakiia matou e tae ua mai matou ki apatokerau ki te enua ko Sema.

21. Kua patu iora matou i taua oire ra ko Sema, e kua akaputuputu mai i to matou tangata ki roto, penei ake ka ora ratou mei te mate.

22. E tae akera ki te toru anere a ngauru ma ono i te mataiti, kua oki akaou mai ratou ki runga ia matou.

23. Kua tuatua atu ra au ki toku au tangata, ma te akamaroiroi atu ia ratou, kia toa ratou i te tu anga ki mua i te ngati Lamana, ma te tamaki no ta ratou au vaine e ta ratou au tamariki, to ratou ngutuare e to ratou kainga.

24. Kua riro taku tuatua ei akatu ia ratou ei mea maroiroi, e kare atura ratou i oro ke mei mua i te aroaro o te ngati Lamana, e kua tu mei te toa tikai ratou ma te mataku kore.

25. E kua tu atu to matou nuku e toru ngauru tausani, e to ratou e rima ngauru tauasani. Kua tu matou ma te ngaueue kore, e kua oro ke atu ratou.

26. E te oro ra ratou, kua aru atu toku nuku ia ratou, e kua aravei akaou, e kua ta akaou ia ratou, kare te maroiroi o te Auta ia matou, ae, kua akarukeia matou kia matou uaorai, e kare oki te Vaerua o te Atua i noo ana kia matou, no reira kua paruparu matou mei to matou au taeake rai.

27. Kua taitaia tikai toku ngakau no teia mate maata o toku iti tangata, kare ra e ravenga, no to ratou kino oki e te au angaanga rikarika i rave. E teianei kua aru akaou atu matou i te ngati Lamana e te keikeia a Katianetona ra, e riro akaou mai ia matou te au enua i nooia e matou.

28. E ope akera te oru anere e ā ngauru ma iva o te mataiti. E kia tae akera ki te toru anere e rima ngauru o te mataiti, kua papau iora matou i tetai tuatua ki te ngati Lamana e te keikeia o Katianetona ra, i reira, kua vai matou i to matou enua i nooia e matou, no ratou.

29. E kua oronga mai ra te ngati Lamana i te enua ki tokerau no matou, ae, te ngai kokota rava e aere atu ei ki te enua i apatonga. E kua oronga atu matou ki te ngati Lamana i te katoatoaanga o te enua ki apatonga.