Mormompa Libron
Imaynatachus Rikhurimusqanmanta

Jose Smith — Diospa qoyninwan, atiyninwan ima unay escriturasta, Mormompa Libron rejsisqa, rikhurimusqantawan ingles parlayman tijrarqa — payqa kay imaynachus kasqanmanta escriberqa. Ña janaj pachamanta ancha jatun visitayta jap’ispaña, tutapi iskay chunka ujniyoj p’unchaypi septiembre killamanta, waranqa pusaj pachaj iskay chunka kinsayoj watapi (1823), tukuy sonqonwan Diosmanta mañakuspa Señorta mask’asqanta cheqatapuni kasqanta willarqa. Kayta willan:

“Diosmanta mañakushajtiy uj k’anchay rikhurerqa cuartoypi. K’anchaytaj astawanraj lliphipirerqa chawpi p’unchay intimanta. Asllamanta k’anchayniyoj runa rikhurerqa camaynejpi. Payqa altupi sayasharqa, chakisninrí pampamanta patapi.

“Paypa p’achasnin ancha yuraj karqanku. Tukuy kay mundopi kajkunamanta astawan yuraj. Mana kay mundopi kajkunasta chay jinata yurajchayta atikunmanchu. Makisnin q’ala karqanku maki ñañunmanta uj chhika patakama. Chakisninrí q’ala karqanku chaki ñañunmanta uj chhika patakama. Umampis kunkanwan q’alita kallarqankutaj. Mana aswan p’achayoj kajta rikorqani p’achan kicharisqa kasqanrayku pechonta rikunaypaj.

“Chay kikin runa, p’achasnin jina, ancha yuraj, relampago jina karqa. Imaynatachus lliphiperqa pay, chayta mana willayta atiymanchu. Cuartoypis ancha yurajman tukullarqataj, chaywampis chay runaj muyuynenqa astawanraj yuraj karqa. Ñawpajta rikuspa chay runata mancharikorqani, chaywampis mancharikuyniy usqhayta t’aqakuwarqa.

“Sutiymanta wajyawaspa willawarqa sutin ’Moroni’ kasqanta. Willawarqa Diospa willajnin kasqanta. Niwarqataj Dios payta kachamusqanta willaj imatachus ruwanay karqa. Nerqa, “Runasqa tukuy llajta, ayllu, tukuy parlaykuna sutiykita yupaychanqanku, mana chayrí sutiykita sajrapaj qhawanqanku.” Chay ninayan sapa laya runaqa munakuwanman, mana chayrí chejniwanman.

“Angel runaqa willawarqa qori planchas librota p’ampasqanta. Libroj willasqan kay America jallp’api unay tiyakoj runasmanta, maymantachus jamorqanku, chaytapis willallawarqataj. Chay libropi Jesuspa wiñay evangelion kasqanta willawarqa, kikin Jesus kaypi unay tiyakojkunawan parlasqanrayku. Niwarqataj iskay ch’uya rumis qori planchaswan p’ampasqa kasqanta. Chay rumis qolqe arospi kasqanta willawarqa, rumis pechuquera jina chalecoman watasqas kasqankutapis. Chaykunaj sutin Urin Tuminwan. Payqa niwarqa unay tiempospi pichus chaykunayoj karqa apaykachanampaj, payqa ’rikoj’ sutiyoj karqa. “Dios chaykunata ruwarqa yanapasunankupaj tijrajtiyki waj parlayman qori planchasta,” nillawarqataj.

· · · · · · ·

“Ñoqaman planchasta manaraj qonawanta willawarqa; qori planchasta qowajtintaj ni piman rikuchinaytataj. Planchasta rikuchejteyqa tukuchisqa kayman karqa (Planchasta rikuchiyta aterqani pimanchus Dios kamachiwanman rikuchinaypaj, payllaman). Planchasmanta parlawajtin yuyayniypi rikusqay karqa. Rikuyta aterqani maypichus planchas p’ampasqa karqanku, chayta. Chay rikusqay sut’ipuni karqa chay lugarta rejsinaypaj chayaspa chayman.

“Chaykunata willawasqantawan k’anchay payman tantakojta rikorqani. K’anchayqa payman tantakorqa cuartoy laphapi quedakunankama. Paynejllapi karqa k’anchay. Chantá asllamanta k’anchay ñanta rikorqani. Chay ñantaj janaj pachakama wicharejman rijch’awarqa. Payqa wicharerqa chay ñannejta chinkachikunankama. Wicharisqantawan cuartoy laqha karqa, manaraj rikhurimushajtin jina.

“Chayi sirisqa quedakorqani angelpa nisqasninmanta piensaspa. Chantá watejmanta cuartoy lliphipirerqa. Asllamantataj chay kikin angel rikhurerqa camaynejpi.

“Watejmanta kikin ñawpaj willasqanta willawayta qallarerqa, manataj cambiarqachu ni uj palabratapis. Chayta willawaytawan kay jallp’a juzgasqa kananta niwarqa jatun ch’inyachej yarqhaykunanejta, jatun maqanakus, onqoykunaswan kanankuta, chaytapis willallawarqataj. Chay jatun juicios kay miraypi jamunanta willawarqa. Chayta willawaytawan watejmanta wicharerqa ñawpaj kuti jina.

“Iskay kaj ripusqanmanta nisqasnillampi yuyayta aterqani, mana puñuyta atispalla. Rikusqaymanta, uyarisqaymantawan t’ukuspa kasharqani. Chaywampis astawanraj t’ukorqani kikin Diospa willajnin kinsa kutita kutimojtin. Kinsa kutipaj uyarerqani chay kikin palabrasninta. Chaymanta payqa niwarqa supay tentanawanta qori planchasta vendenaypaj, qhapajman tukunaypaj, tataypa familian ancha pobre kasqanrayku. “Chayta ama ruwankichu, planchasta jap’inki Diosta yupaychanaykipaj,” niwarqa. Diospa reinollanta jatunchayta munanay karqa. Waj mayqen imaspaj planchasta munaspaqa planchasta mana jap’iymanchu.

“Kinsa kaj uraykumuytawan wicharerqa janaj pachaman ñawpaj kutis jina. Watejmantataj chaypi quedakorqani piensaspa chay jatun ruwanaspi. Willajpa kinsa kaj wicharisqanmantapacha gallo waqajta uyarerqani. Sut’iyay kasqanta reparakorqanitaj. Angel kinsa kutita jamushajtin tukuy tutantin pasasqayku parlaspa.

“Pisi chaymanta jatarikorqani, llank’aj rerqanitaj waj p’unchaypi jinalla. Llank’ayta munaspataj anchata sayk’orqani. Mana imata ruwayta aterqanichu. Tatay ñoqaean llank’aspa sayk’ojta rikuwarqa, wasiykuman rinayta niwarqataj. Wasiyman rispataj chajrata jark’aj perqata wasaykunay karqa chajramanta llojsinaypaj. Chayta wicharejtiy kallpay mana karqachu. Mana kallpayoj kaspataj pampaman urmaykorqani.

“Chantá sutiymanta wajyawaj parlayta uyarisqayta yuyarini. Pataman qhawarispataj pataypi Diospa willajninta rikorqani. K’anchayniyoj karqa ñawpaj kutis jina. Imatachus willawarqa tuta, chaykunata watejmanta willawarqa. Kamachiwasqasmanta, rikusqasniymantawan tatayman willamojta kachawarqa.

“Payta kasorqani, kutiporqani tatayman. Tatayqa chajrapiraj kasharqa. Paymantaj willarqani tukuy rikusqaymanta. Tatay willawarqa chay rikusqay Diosmanta kasqanta. Imatachus kamachiwarqa willajqa, chayta ruwaj rinayta tatay niwarqa. Chajramanta llojserqani rispa chay lugarman, maypichus planchas p’ampasqa lugar kasqanta rikorqani, chayman. Rikusqayrayku chay lugarta rejserqani.

“Manchester llajtanejpi, Ontario nisqa provinciapi, Nueva York estadopitaj jatun orqo kan. Chay orqo tukuy chay lugarpi orqosmanta aswanraj jatun. Qori planchasqa rumi cajapi karqanku chay orqoj inti yaykoj qhatampi, patanejpi jatun rumi urapi. Chay rumej chawpin rakhu, morq’o jinataj karqa pata ladumpi. Ura ladusnin mana rakhuchu karqanku, jallp’a urapitaj karqanku. Chawpillan jallp’amanta rikuyta atikunman.

“Jallp’ata rumimanta pichaytawan k’aspiwan rumita oqharerqani. Cajata rikorqani, caja ukhupitaj rikorqani planchasta, Urin Tumintawan, pechuquera jina chalecotawan. Chaykunata rikorqani imaynatachus willaj rikunayta willawarqa. Caja rumis uj laya cementopi churasqas karqanku. Caja ukhupi iskay rumis cruzarqanku. Chay rumis patapitaj planchas, wajkunawan kasharqanku.

“Planchasta oqhariyta munarqani, chaywampis willaj mana oqharinayta niwarqa. Watejmantataj manaraj planchasta jap’inayta willawarqa. Niwarqa tawa watas pasananta planchasta jap’inaypaj. Chay kikin p’unchay, wata pasajtin, orqoman jamunayta tantakoj paywan willallawarqataj. Chayta ruwanayta spa wata planchasta jap’inaykama niwarqa.

“Sapa wata kikin p’unchay, iskay chunka iskayniyoj p’unchaypi, septiembre killamanta, orqoman rerqani kamachiwasqanman jina. Willajwan tantakorqani sapa watata, sapa tantakojtiykutaj payqa astawan yachachiwarqa. Tantakuyniykupi pay willawarqa imatachus Señor ruwananmanta, imaynatajchus paypa reinon kananmanta qhepa p’unchaykunapi.

· · · · · · ·

“Ña suyasqaytawan planchasta, Urin Tumintawan, pechuquera jina chalecotawan jap’inay tiempo chayamorqa. Wata pasajtin, iskay chunka iskayniyoj p’unchaypi septiembre killamanta, waranqa pusaj pachaj iskay chunka qanchisniyoj watapi (1827), ñoqa rerqani maymanchus planchas p’ampasqas karqanku. Kikin Diospa willajnintaj ñoqaman planchasta qowarqa. Ñoqata niwarqataj planchasta waqaychanayta. Planchasta chinkachejtiyrí, mana waqaychasqayrayku, tukuchisqa kayman karqa, chaytapis willallawarqataj. Tukuy sonqoywan planchasta waqaychajtiy willajman qopunaykama, Dios planchasta waqaychaysiwanman.

“Pisi tiempomanta reparakorqani imapajchus planchasta waqaychanayta niwarqa. Imapajchus pay niwarqa jamunanta planchasta jap’ikapoj ruwayta tukuchasqaytawan, chaytapis reparakorqani. Runas planchas kapuwasqata yachaspa tukuy sonqonkuwan planchasta ñoqamanta qhechuwayta munarqanku. Qhatiykachawarqanku astawanraj ñawpaj kutismanta. Ashkha runas planchasta ñoqamanta suwawayta munarqanku. Chaywampis Dios chay tukuyta yachaspa planchasta ñoqawan kacherqa. Ñoqa kamachiwasqanta junt’asqaytawan willajqa planchasta apakapoj jamorqa, niwasqanman jina. Payman planchasta jaywaporqani, paytaj planchasta jap’ishan kayta escribisqaykama, iskay kaj p’unchaypi mayo killamanta, waranqa pusaj pachaj kinsa chunka pusajniyoj watapi (1838).”

Kay willayta junt’asqata yachanaykipaj qhaway Jatun Precioyoj Perlata, páginas 44–56, jinataj Histria de la Iglesia de Jesucristo de los Santos de los ultimos Días, volúmen, 1, ñawpaj kaj capitulomanta hasta sojta kaj capitulokama.

Kay unay escribisqa kay jinamanta jallp’amanta llojsimun, llajtaj jallp’amanta qhapariynin jina. Diospa qoyninwan, atiyninwan ima kunan p’unchay parlayman tijrasqa K’anchayniyoj Kajpa cheqa nisqanman jina. Mormompa Libron mundoman rejsichisqa karqa waranqa pusaj pachaj kinsa chunkayoj watapi (1830).