Aj Tjatzlen Uʼj Te Mormón
José Smith, tuʼnju, tuʼn oyaj ix tipumal Dios, ex tuj spicʼan ix jatz tiʼn tuʼj yolbʼil Inglés aj ojtxa xjanxix yolbʼil tzʼiban maj Aj Uʼj te Mormón, bʼant jun ax t-xilen tuʼn, ix ax icytzaʼn obʼaj tiʼj jluʼ:
“Matok intina icju, tuʼntzan nnana tiʼj Dios, wila cyjaʼ ttzaj jun tkan spicʼan tuj ncuarto, ix cyujx jaw chʼiy tkan tspicʼmal tujxa tcyaj spicyʼan ictzaʼn chilcaj kʼij, te juratxix ul jlet jun xjal ttxlaj nwatbila, wal xjal tuj cykʼi, porque ke tkan ntiʼ nchi cuʼpan twitz txʼotxʼ.
“Toʼc jun tẍjoʼw pur sakxix tqueʼyinc. Atzan jun tsakix mas icytzan cywitzke cosas te twitz txʼotxʼ bʼajx wila jun maj icju mix jaca tzʼocx tuj nwiʼya ka at jun icju twitz txʼotxʼ tuʼn tpon tsakix ix tspicʼmal. Ke twiʼ tkʼaʼb sbaʼjke cyucʼaxkeʼ tibʼaj tmuñecal; ax icxke tkan tzanxke tcux, icy jawnix tibaj tmopal tkan. Ax icx twi ix tkan tkul ix el baj nnicʼa tiʼj que ntiʼx mas t-xbaln toc, oʼcx tẍjoʼw, porque catl tzanx tenca, ix ax wila tziʼ t-xuc.
“Nyaʼ oʼcx tẍjoʼw pur sakxix ax icx cyakil t-ximlal nkoptzʼaj, ntiʼ juntl yolbʼil te tuʼn tkʼamanjtz ix atzan twitz ictzan jun tkan kʼancyok. Purxix spicʼn oc tuj cuart, pero micx ictzan xjaljo nikayan t-txlaj. Taj twila tnejal maj, tzaj nxobʼala bixj nxobʼala el tiʼn tib jorat wiʼja. Inx txcoʼna tuʼn tuj nbicyʼa, ix tzaj tmaʼ weya que atzan jun sanjelal samaʼn te t-xel Dios, ix atzan tbʼi Moroni ix tma que at jun takʼan Dios te weya, ix cyxolke nasyon, cʼlojn xjal ix ke cyyolbil xjal cʼocl kʼoʼn nbʼiya te jun bʼaʼn bixmo te jun ploj, bixmo tuʼn cyyolan bʼaʼn bixmo ploj wiʼja cyxol cyakil tnam.
“Tma que at jun uʼj cʼuʼn, tzʼiban maj cywitzke sleʼw cʼuxl, aj ntmaʼn jun cyxilenke ojtxa xjal najal twitz txʼotxʼ tzaluʼ ax ntmaʼn jatuma tzajnake cyiyijil. Ax icx tma que ntman twitz jun tyol Dios tzʼakl twitz ix nimxix te jumajx aj Clol te ke otok txi tmaʼn cyekeʼ ojtxa najal twitz txʼotxʼ.
“Que ax icyxju, junx cyucʼ sleʼw cʼuxl teʼcx cabʼa xak cʼuʼnke, que seʼwke te pur plata, tuʼntzanju cyiwxax tten tuʼn jun cʼuxl toc txlaj txaʼn txuʼc. Atzanke noc Urim tucʼix Tumim; ix aj t-xilen ix macbʼil cyeke xak atzanju ncyilke bʼan tcyilon teke cosas te Dios cyujkeʼ ojtxa kʼij; ix tuʼntzn Dios otok bʼant tten tuʼn tocnen te tjawtz uʼj tuj juntl yolbʼil.
· · · · · · ·
“Icx juntl tzaj tmaʼn weya, oc ticʼ wiʼnake sleʼw cʼuxl aj otok yolan tiʼj, tuʼnj naʼntok tpon tyemp tuʼn ttenke wucʼala ntiʼ tuʼn t-xi, nyecʼana, mix txaʼn txuʼc cʼuxl tucʼx Urim tucʼx Tumim, sino que oʼcx bʼaʼn tuʼn t-xi nyecʼana cyeke xjal aj oc tzaj kʼamaʼn weya que baʼn tuʼn tcub nyecʼana cye, ka mi ma tzʼocx nnimna chin najala. Aj matok nyolan wucʼala cyiʼjkeʼ sleʼw cʼuxl, ul tuj nximbatza jun tilbʼilal que wil lugar jatuma cʼuʼke clarxix wila ix tzaʼn cyxilen que ax tten cyeʼyax lugar toj npona.
“Tbajlentzan yolbil luʼ, wila aj spicʼan tuj ncuarto oc tchmon tiʼb tiʼj xjal aj otok baj yolan wucʼala ix icy oc tkan spicʼn tajxa tcyaj juntl maj tuj klolj, pero miʼn aj txlaj taj twila que jurat jaket ictzan jun cay tuʼn tpon max tuj cyaʼj, jax tajxa tcuʼnaj jumax, ic cyaj ten cuart juntl maj ictzaʼn naʼntok tcub let aj tkan spicʼan tuj cyaʼj.
“In cyaj tena ximal tiʼj aj juʼncx otok bʼaj ix nimxix insecʼpaje tiʼj otok tzaj tmaʼn sanjelal weya ix matok tuj tmij nxiʼmtza jurat wila cyjaʼ ttzaj juntl maj tkan spicʼn, ictzaʼn te jurat-xix, ax ax sanjelal te tuj cyaʼj ul juntl maj txlaj nwatbʼila.
“Oc ten yolil juntl maj, ix axke cosas tma ictzaʼn tzaj tmaʼn weya tuj tnejl tbitzabʼil, ix ntiʼ bʼaj ttzacsan jun twitz til ix otzin tma cyiʼjke txkan jwisyo maʼxix cbajel twitz txʼotxʼ, tucʼx maʼxix bʼisbʼil tuʼn tlaj weʼyj, aj spad tucʼx ttzuʼwal yabl ix atzanke bisbil jwisyo chul twitz txʼotxʼ tuj ankʼibil luʼ. Tzajlentzan tmaʼn weya, jax juntl maj ictzan baj tnejal.
“Ix maʼxix jun wajbila otok ten tuj nximbatza, aj witzicʼ otok tzʼel tuj nwitza, ix otok chin cuʼ nactzʼaja tuʼnju otok wila ix aj otok nbicyʼa. Pero injawxix secʼpaj juntl maja toj tul txlaj nwatbila, ix ax tzaj tmaʼn icx tzaʼn tuj tnejal maj ix tzaj tmaʼn jun wocsabla, ntmaʼntok que chin xel kʼoʼna tuj il tuʼn Satanás (tuʼn tlaj tmebayil tfamilia nmane) que tuʼn cyocke sleʼw cʼuxl tuj nkʼaʼba tuʼntzan woca te kʼinan xjal. Intzaj tmayoʼn que oc cytenke sleʼw cʼuxl wucʼla nimxix cxeʼl nkʼona tzalajbil te Dios; que ntiʼx juntl cosa jaca tzʼocx tuj nximbatza oʼcx tuʼn tbant tnajbil. Ka miʼn milay chi tenke tbanal sleʼw cʼuxl wucʼala. Tbajlentzan toxan maj tbʼitzabil, jax juntl maj tuj cyaʼj ictzan tnejal, ix incyaj tena ximl aju juʼncx otok bʼaj oʼcx taj tjax sanjelal te tuj cyaʼj tuj toxn maj, tzaj bʼitzan tzecʼ, ix wila chʼixtok tjaʼwal, entons, exla konicʼan oyolna.
“Yajxatzan chʼintl injaw weʼya tuj ncoẍbla ix, icxtzaʼnx nbaj weya, inxa binchalke wakʼana aj nim tocnen tuj juʼn kʼij; pero wajbila ictzaʼn juʼn maj, el nnicʼa tiʼj que otok tzʼel bʼaj cyakil wipana. Aj nmana nakaʼyin nnakʼnan ntxlaje, nnoc tqueʼyin que nbʼaj wiʼje, ix tzaj tmaʼn tuʼn nxiʼya ja. Attak nchin nicʼtzana tuj ligar ajo tajtzan wexa tuʼn wetza tuj cʼul jatum otoʼya, bix el baj wipana te jumax, incuʼtzʼaka twitz txʼotxʼ ix ntiʼx inyucẍa ix nim tuj ntiʼx naʼn wuʼna.
“Aj tnejal ul tiʼj ncʼuʼja atzan jun nyolan weya, ntxocan wiʼja tuj nbʼiya. Jaw nqueʼyana ix wila ax aj sanjelal, tibaj nwiʼya, camoʼn tiʼj tuʼn spicʼan ictzaʼn tneja. Entons tzaj tmaʼn weya juntl maj aj otok tzaj tmaʼn weya konicʼan, ix inx tsamaʼn tucʼal nmane tuʼn txiʼ nmaʼne tiʼj aj tilbilal ix mandamyent otok tzicʼ wiʼne.
“Xi nnimana inaʼj meʼltzʼaj jatum taʼ nmane tuj cʼul ix xiʼ nmane cyakil aj otok bʼaj. Tzaj ntzaj ttzakʼwʼen que takʼn Dios ju, ix tzaj tmaʼn tuʼn nxiʼya ix tuʼn tbʼant aj otok tzaj tmaʼn sanjelal weya. Inxa tjaʼ cʼul aj tuj lugar jatum otma sanjelal que cʼuʼnkeʼ tbanal cʼuxl, ix tuʼnju clarxix tilbilal otok wila tuj t-xilen lugar, taj npone, elxix naj nnicʼa tiʼj.
“Nikayan txlaj aldey te Manchester, ax ttxʼotxʼal Ontario, estado te Nueva York njaw jun witz, aj mas maʼ twaʼl twitzkeʼ txkantl. Ttxlaj tcʼuʼj witz telax kʼij bix miyaʼ lekʼch tuj twiʼ, tjakʼ jun xak maʼxix, cycuʼxke sleʼw cʼuxl, tuj jun cax pur xak. Tuj tmij, ix tibʼaj pur pim jun xak ix sleʼw, per mas xaxj tpimal ttxaʼnla que kʼinchal tuj tmijal aj tjaw tibʼaj txʼotxʼ, ix atzanke txlaj cʼamoʼn tiʼj tuʼn txʼotxʼ.
“Tellentzun wiʼna txʼotxʼ, canet jun palanc ocx nkʼona tjakʼ txaʼn xak, ix tuʼn jun wipana jaw wuʼne. Cux nqueʼyana tuj cax, ix axix toc wila ke sleʼw cʼuxl, aj Urim tucʼx Tumim ix aj txaʼn t-xuʼc, ictzaʼn otok tma sanjelal. Aj cax jatum cycuʼx pur xak, binchaʼnmaj ictzaʼn tuʼn sement. T-xeʼpan cax, iteʼ cabʼa xak txalchke, ix cybʼajtzan cycuʼke sleʼw cʼuxl ix cabl cosas cycuʼx tuj.
“Wajbeya tuʼn tjatz wiʼna, per intzaj tmayoʼn sanjelala; ix tzaj tmaʼn juntl maj que naʼntok tcanan tiemp tuʼn cyjatz, ix mix tuʼn tpon tyemp sina tujxa cyaja abkʼi biʼx ckebʼil tajlal tuj kʼij jaʼlo per tzaj tmaʼn weya tuʼn nxiʼya tuj lugar tujxa juntl abkʼi ix c-ayol wiʼja atzo ix icxtzan tuʼn tbaʼj weya teju ocxa tcan tiemp tuʼn cyjatzke sleʼw cʼuxl.
“Icxtzaʼnx otok tzaj kʼamaʼn weya, inxa juʼn abkʼi, ix atzan tiemp nnʼoc nqueʼyana twitz sanjelal, ix oc koyolana juʼn maj, nnicʼ nnimna tconsej ix tiʼj t-xilen aj cbantel tuʼn Kajaw, ix ti tuʼn ttʼen tnajbʼil cyujke maʼncbʼil kʼij.
· · · · · · ·
“Tcanntzn tiemp tuʼn cyjatzke sleʼw cʼuxl, aj Urim tucʼix Tumim ix txaʼn txuʼc. Aj kʼij te tajlal 22 de septiembre te abkʼi 1827, otok chinx aja tuj juntl abkʼi, icxtzan juʼn maj, jatum cycuʼx, ax sanjelal te tuj cyaʼj tzaj kʼonte weya tuj jun tuʼmal: Que eʼ akina cwental cye, cheʼx; ka ma cheʼx naj bixmo tuʼn tcuʼ weʼwana, chin najala, katzn matzʼoc nkʼoʼna il tiʼj tuʼn cycʼuʼt wuʼna asta oc tul sanjelal tuʼn cylaj, entons chi xeʼl cʼuʼt-xix.
“Jurat nbicyʼa tikuʼn icyʼ ncʼamoʼna jun cyiwxix cawbil tiʼj tuʼn cyxiʼ cʼuʼt, ix ti kuʼn tzaj tmaʼn sanjelal weya que oc tbaj twiʼylal wucʼala, tzultzantl tuʼn cylaj. Porque cwanda binjtz ka akine kʼilte, taj cybantke cyiwxix ipumal tuʼn cyel kʼin weya, canet nimca t-xilen tuʼn cybantju.
“Bix nimca i oc lape bix jaw nim tnachal bix tcʼayal icytzanj tnejal. Ix nimca txkan xjal nchi cwentan tiʼj tuʼn cyel kʼiʼn tzaʼnke weya. Pero tuʼn tipumal Dios icyaj tenxix tuj segur tuj ncwenta tajxa wela twitz ictzaʼnxix tzaj kʼamaʼn tuʼn tbant wuʼna. Taj tpon sanjelal icxix tzaʼnx otok bʼant tiʼj, ijeʼx nkʼoʼna; ix atzan te sanjelal kʼilke cye tuj kʼij jaʼlo, 2 tajlal t-xjawal mayo te abkʼi 1838.”
Te jun cabalxix nabil baʼn tuʼn tcuʼx queʼyit tuʼj uʼj Perla de Gran Precio paginas 44–56, ix Storya Glesya tomo 1, 1 piʼẍ tiʼj uʼj ocxa tpon tiʼj kak (6).
Aj ojtxa storya etz twitz txʼotxʼ, ictzaʼn cywiʼ txkan xjal itzaj yolan tuj kuk, jatz kʼiʼn tuj kuk, jatz kʼiʼn tuj yolbʼil te jaʼla tuʼn tonbil ix tipumal Dios, ax icx tzaʼnx o tma Dios ix ex sipatke, yolbil tuj tnejal maj twitz txʼotxʼ tuj abkʼi 1830 que atzanjo Aj Uʼj Te Mormón.