1. E ope akera tetai au mataiti, kua aere maira tetai tangata ki rotopu i te ngati Niphai ra, ko Serema tona ingoa.

2. E kua akamata iora aia i te apii aere i rotopu i te au tangata ra, i te akakiteanga atu kia ratou e, kare e Mesia e tae mai. E kua apii oki aia i te au tuatua akapaapaa i te tangata ra; kua pera aia kia rauka iaia te akakore i te tuatua no te Mesia ra.

3. Kua angaanga pakari aia kia arataki ke i te ngakau o te tangata, e e manganui oki tei arataki keia e ïa, e kua kite oki aia e, e akarongo maata toku, to Iakoba, i te Mesia ra ko te ka tae mai, no reira kua kimi aia i te ravenga e aere mai ei aia kiaku nei.

4. E tangata apiiia oki aia, e tangata vaa tukatau oki aia i te reo o te iti tangata, e no reira kua tuatua aia i te tuatua taparu i te tangata, e e mana maata oki tona i tana tuatua, mei tei tau i te mana o te tiaporo ra.

5. E kua manako iora aia e, kia akangaueue mai aia iaku i te akarongo; kareka ra, i kite ana au i te au orama e te au eeuanga e manganui i taua au mea ra, e kite katoa ana au i te au angela, e kua matuapuru mai oki ratou iaku nei. E kua akarongo tikai oki au i te reo o te Atu i te tuatua anga mai kiaku i tera tuatau, i tera tuatau, no reira i kore ei au i akangaueueiaʼi.

6. E kua aere maira aia kiaku, e kua tuatua maira aia kiaku, na ko maira; E toku taeake, e Iakoba, i kimi marie ana au i tetai ra e pukapukaʼi taua; no te mea, kua akarongo e kua kite katoa oki au e, te tutu aere nei koe i te mea i tuatuaia e koe ko te evangelia, koia oki te tuatua a te Mesia ra.

7. E kua arataki ke oki koe i tetai pae maata o teianei iti tangata kia taruri ke ratou i te mataara tika o te Atua ra, e kia kore oki e akono i te ture a Mose, koia oki te mataara tika; e kua akaruke oki ratou i te ture a Mose kia akamori atu i tetai tangata taau i tuatua e, ka tae mai aia e ope akera te au anere mataiti e manganui. E teianei, i na, te akakite atu nei au, ko Serema, kia koe na e, e akakino Atua te reira, no te mea, kare rava te tangata i kite i taua au mea ra, kare oki e rauka iaia te akakite i te au mea e tupu a muri atu. Kua pera maira Serema i te karo mai iaku ra.

8. I na, kua riringi mai te Atu ra ko te Atua, i tona Vaerua ki roto i toku ngakau, e kua akamura iora au iaia i tana au tuatua katoatoa ra.

9. E kua tuatua atu au kiaia, te karanga ainei koe kare e Mesia e tae mai? E kua karanga maira aia, mei te mea e Mesia tetai, ka ariki au iaia, kua kite ra au e, kare e Mesia i teianei, kare oki i mua ana, e kare katoa e Mesia e tuatau ua atu.

10. Kua tuatua atura au kiaia, kua irinaki ainei koe i te au tuatua tapu i tataia ra? E kua tuatua maira aia, Ae.

11. E kua tuatua atura au kiaia, kare ra koe i marama i te reira, te akakite papu mai nei oki te reira i te Mesia ra. I na, e tuatua atu au kia koe, kare te au peroveta i tuatua me kore ra, i totou, mari ra, kua akakite mai i taua Mesia ra.

12. E kare ko teia anake, kua akakiteia mai kiaku, kua akarongo oki au e kua akara au, kua akakiteia mai kiaku e te mana o te Vaerua Tapu, no reira kua kite au e, naringa kare e tarangaara, ka ngaro te au tangata katoatoa e tikai.

13. E kua tuatua maira aia kiaku, e akakite mai ana i tetai akairo kiaku nei, na roto i taua mana o te Vaerua Tapu ra, no reira mai toou kite maata.

14. Kua tuatua atura au kiaia, koai au kia timata i te Atu kia akakite mai aia i tetai akairo i te mea taau e kite nei e, e tuatua mou oki ïa. Ka patoi ra koe i te reira, no te mea, no te tiaporo rai koe. Eiaa ra toku inangaro kia tupu, ina ra, mei te mea e ta mai te Atua ia koe na, ka riro te reira ei akairo e kite ei koe e, e mana tona i te rangi ra e te enua katoa nei, e ka tae mai oki te Mesia ra. E te Atua, kia tupu toou inangaro eiaa toku.

15. E tuatua akera au, ko Iakoba, i taua tuatua ra, kua tae maira te mana o te Atua ki rungao iaia ra, e inga iora aia ki raro i te one. E kua utuutuia iora aia i te au rā e manganui ra.

16. E kua karanga atura aia ki te au tangata, apopo e akaputuputu mai kotou, teia au ka mate; ka inangaro au i te tuatua atu ki teianei iti tangata i mua ake ka mate atu ei au.

17. E ao akera, putuputu maira te tangata katoatoa, e kua tuatua papu atura aia kia ratou, e kua akakore oki aia i te au mea tana i apii atu kia ratou; kua aaki iora aia i te Mesia, e te mana o te Vaerua Tapu, e te matuapuru anga o te au angela ra.

18. Kua tuatua papu oki aia kia ratou e, i vare ana aia e te mana o te tiaporo ra. Kua tuatua katoa atu aia i te tuatua no ade, e no te ora mutu kore, e no te mate mutu kore ra.

19. E kua na ko atura aia, Te mataku nei au ko te rave aea au i te ara matara kore ra, kua pikikaa oki au i mua i te Atua, no te mea kua patoi au i te Mesia, i te na ko anga e, kua irinaki au i te tuatua tapu i tataia ra; e te akakite papu mai nei te reira iaia. E no te mea i peraʼi au i te pikikaa i te Atua, e mataku rava au ko te rokoia aea au e te mea rikarika ra; kareka ra, te aaki nei au ki te Atua ra.

20. E tuatua akera aia i tana au tuatua ra, kare e rauka iaia te tuatua akaou, e kua tuku atura i tona vaerua.

21. E kia kite akera te urupu tangata i tana tuatua anga i taua au mea ra ka vaitataʼi aia i te mate, kua umere rava ratou; e kua tae mai te mana o te Atua ki rungao ia ratou, paruparu iora ratou, e kua inga ki raro i te one.

22. E teianei, kua mataora au, ko Iakoba, i te reira, no te mea i pati ana au i te reira ki toku Metua i te rangi ra; kua akarongo oki aia i toku reo, e kua akatika aia i taku pure.

23. Kua tupu akaou maira te au e te aroa o te Atua ki roto i te iti tangata; kua kimi oki ratou i te au tuatua tapu i tataia ra, kare ratou i akarongo akaou i te tuatua a taua tangata tuatua tika kore ra.

24. Kua kimiia iora te au ravenga e manganui e akaariu mai, e e akaoki mai ei te ngati Lamana ki te kite i te tuatua mou ra; puapinga kore atu rai te reira, no te mea kua rekareka ua ratou i te tamaki e te akamaringianga toto, e makitakita mutu kore to ratou ia matou, to ratou au taeake. E na roto i te mana o to ratou uaorai rima i titau ua atu ei ratou ia matou e ta.

25. E no reira i akamaroiroi ei te ngati Niphai ia ratou uaorai i to ratou au nuku, ma to ratou ririnui katoa, i te irinaki anga i te Atua, te mato o to ratou ora ra, no reira i autu ei ratou i to ratou au enemi.

26. E kua pakari iora au ko Iakoba, i tataia te akapapaanga tuatua no teianei iti tangata ki runga i tetai au papa ke ra; no reira te akaoti nei oki au i teianei akapapaanga tuatua, i na, te akakite atu nei au e, kua tata au i te reira mei tei tau i toku kite; te topa ua atu nei te au tuatau ia matou, e kua topa atu te au ra o to matou oraanga nei mei te mea ra e moemoeā ïa, e kua riro matou ei iti tangata maromaroā e te akaaka, ei iti tangata tuitarere mei Ierusalema mai, kua anau oki matou i roto i te au tumatetenga i te metepara, e kua makitakitaia matou e to matou au taeake tei akatupu mai i te tamaki e te māro; no reira i tumatetengaʼi matou e ope ua ake to matou puke rā i te ao nei. nei.

27. E kua kite oki au, ko Iakoba e, te vaitata mai nei te rā e aere ei au ki raro i te tanumanga, no reira, kua tuatua atura au ki taku tamaiti, ko Enosa, kia rave aia i teianei au papa; e kua akakite atura oki au kiaia i te au mea ta toku tuakana ra, ta Niphai, i tuatua mai kiaku ra, e kua tuatua maira aia e, ka akono meitaki aia i taua au akaueanga ra. Te akaoti nei au i taku tataanga i runga i teianei au papa, e meangiti oki taku i tata; e te tuatua atu nei au ki te aronga e tatau i teianei tuatua ra, kia orana kotou; e ko toku ïa inangaro, kia tatau toku au taeake e manganui i teianei tuatua. E taku au taeake, kia orana kotou.