1 Ia oqo, raica, oi kemudou na wekaqu, me vaka au a kaya vei kemudou ni’u na parofisai, raica, oqo na noqu parofisai—ni na yaco vakaidina na veika e a kaya na parofita oqo ko Sinosi me baleti ira na mataqali i Isireli, ka a vakatautauvatataki ira kina kei na dua na vu ni olive dina.

2 Ia na siga ena dodoka tale kina vakarua na ligana me vakasoqoni ira na nona tamata, sa i koya na siga, io, na iotioti ni gauna, e ra na lako yani kina na tamata dauveiqaravi ni Turaga ena nona kaukauwa, me ra vakabulabulataka ka coviraka na nona were ni vaini; ia ni sa oti ko ya sa voleka sara mai na ivakataotioti.

3 Ka sa kalougata ko ira sa cakacaka vagumatua ena nona were ni vaini; ia ena ca ko ira sa biu tani ki na nodra tikina! Ka na vakamai ko vuravura ena bukawaqa.

4 Ia sa yalololoma dina vei keda na noda Kalou, ni sa nanuma na mataqali i Isireli, na wakana kei na veitabana; ka sa dodoka yani na ligana ki vei ira ena siga taucoko; ia era sa tamata domodomoqa ka vosa suruya na ka; ia ko ira kecega sa sega ni vakaukauwataka na lomadra era na vakabulai ena matanitu ni Kalou.

5 O koya oqo, oi kemudou na wekaqu lomani, au sa vakamasuti kemudou ena vosa mai yaloqu dina sara mo dou veivutuni, ka lako mai ena lomamudou taucoko, ka kabita na Kalou me vaka na nona kabiti kemudou. Ia ni sa dodoka tiko yani na liga ni nona loloma cecere vei kemudou ena rarama ni siga, dou kakua ni vakaukauwataka na lomamudou.

6 Io, ena siga oqo, kevaka dou na rogoca na domona, dou kakua ni vakaukauwataka na lomamudou; se cava mo dou mate kina?

7 Ia raica, ni oti na nomudou vakabulabulataki ena vosa vinaka ni Kalou ena siga taucoko, dou na vuataka li na vua ca, mo dou tamusuki sobu kina ka biu ki na bukawaqa?

8 Raica, dou na cata li na vei vosa oqo? Dou na cata li na nodra vosa na parofita; ka dou na cata li na vosa kece sa tukuni oti me baleti Karisito, ni ra sa vosa oti e lewe vuqa sara me baleti koya; ka cakitaka na vosa vinaka i Karisito, kei na kaukauwa ni Kalou, kei na isolisoli ni Yalo Tabu, ka bokoca na Yalo Tabu, ka vakalialia na ituvatuva cecere ni veivueti, ka sa vakotori oti tu ena vukumudou?

9 Dou sa sega beka ni kila ni kevaka dou na kitaka na veika oqo, ni na kauti kemudou mai na kaukauwa ni veivueti kei na tucake tale sa tu vei Karisito mo dou tu kina ena madua kei na kila nona cala rerevaki ena itikotiko ni veilewai ni Kalou?

10 Ia me vaka na kaukauwa ni lewa dodonu, ni na sega ni rawa ni cakitaki na lewa dodonu, dou na lako tani kina ki na drano bukawaqa kei na sulifure, sa sega ni bokoci rawa na kena iyameyame, ka sa kuvu cake tikoga ka sega ni mudu na kena kubou, ia na drano bukawaqa kei na sulifure sa i koya na rarawa tawacava.

11 O koya oqo, oi kemudou na wekaqu lomani, mo dou veivutuni, ka curu yani ena matamata qiqo, ka ia tiko ga ena sala sa rabailailai, me yacova ni dou sa rawata na bula tawamudu.

12 Mo dou yalomatua sara; a cava tale me’u kaya?

13 Ia me’u tinia, au sa vakamoce vei kemudou, me yacova ni’u na sotavi kemudou ena mata ni itikotiko talei ni veilewai ni Kalou; sa i koya na itikotiko ni veilewai era sa rerevaka ka domobulataka na tamata caka ca. Emeni.