Fare Babyor ku Jacob
Fachaʼ Ni Walagen Nephi

1 Ya musap gaed, yibi buch ni ke gaman wugem nge lal e duw ni ke yaen ko ngiyalʼ ni chuw Lehi u Jerusalem; ere, Nephi e piiʼ ngog, gag Jacob, ba motochiyel ni morngaʼagen fapi yungi plates ni baʼachig yang, niʼir e kan ker e pinnʼey nga dakean.

2 Me piiʼ ngog, gag Jacob, ba motochiyel ni thingar gu yoloey nga dakean e tiney e plates buchʼuw banʼen ni gube lemnag ni thʼabi gaʼfan; ni thingar dab gu rinʼ banʼen ngay, ma kemus ni nggu yoloey buchʼuw, ni morngaʼagen fapi chep ko tiney e gidiiʼ ni kanoeg ni yaed fapi gidiiʼ ku Nephi.

3 Ya ire yoeg ni fapi chep ko gidiiʼ rokʼ e thingar ni ker nga dakean ku yug boech e plates rokʼ, ma thingar gu chaʼariy e pi plates ney mug piiʼ nge yib nga butʼ ngakʼ e gidiiʼ rog, nu rebe mfen ngo rebe mfen.

4 Ma faʼanra bay e machib nib thothup, ara yiʼiy nib gaʼfan, ara prophecy, ni thingar gu ker e tin thʼabi gaʼfan riy nga dakean e tiney e plates, mug yoloey morngaʼagen ni chirogon ni rayog, ni fan ngakʼ Kristus, nge ku fan ko gidiiʼ romow.

5 Ya bachan e mich nge magafaenʼ romow, min dag ngomow morngaʼagen e gidiiʼ romow, nge mange pinʼen ni thingari buch roraed.

6 Ma gamow e kub yoʼor e yiʼiy ni yib ngomow, nge nangaenʼ ko prophecy; ere, gamow manang morngaʼagen Kristus, nge gilʼilungun ni bay yib.

7 Ere ʼug muruwel gow ni rib lʼagaenʼmow ngay u fithikʼ e gidiiʼ romow, ni gomanga gu pingegew laniyaenʼ raed ngar baed ngakʼ Kristus, mar thapeged boech e falʼngin rokʼ Got, ni gomanga yog ni ranoed nga tagilʼ e toffan rokʼ, ya gamow be rus nag ni richey me thʼaeb u waenʼ u fithikʼ e damomuw rokʼ ni nga dab gu ʼuned e ngaram, ni boed ni damomuw Got u lan e pi rran ni iyib e lumel u napʼan ni immoy e pi gidiiʼ ku Israel u lan wuruʼ e binaw.

8 Ere, gamow be athapeg ni nge ayuwegmow Got ni nge yog ni nggu pingegew laniyaenʼ gubin e gidiiʼ ni nga dab kur togopluw gaed ngakʼ Got, min makʼar damomuw ngakʼ, ni nge gubin e gidiiʼ ma nge yog ni michaenʼraed ngakʼ Kristus, mar guyed fan e yamʼ ni tay, mar uned i chibiy e kruth rokʼ mar paged fan e kuʼ ko gidiiʼ nu fayleng; ere, gag, Jacob, e kug fek nga dakeanag ni nggu muguʼuliy e motochiyel rokʼ walageg i Nephi.

9 Chiney e Nephi e kari pilibthir, me guy ni aram dab ki nʼuw napʼan ma nge yimʼ; ere, gapgep nag beeʼ nib moʼon ni nge mang pilung nge mitethin ko gidiiʼ rokʼ e chiney, ni rogon e lung ko pi pilung.

10 Fapi gidiiʼ e rib tʼuf Nephi roraed, ni bachan e ri ma ayuwegraed, ma kub salap i pilig e pi sayden ko farengi sayden rokʼ Laban u napʼan e cham ni ma yib ngoraed, nge ku bachan e muruwel ni i tay u napʼan e yafos rokʼ ni fan ko paer roraed—

11 Ere, fapi gidiiʼ e riyaed baʼadag ni nge paer fithingan u laniyaenʼ raed. Nge kuʼen ni thingari yinʼ luwan, e fapi gidiiʼ e tunguy fithingan, ni bin lʼagruw e Nephi, bin dalip e Nephi, nge aram rogon iyaen, ni woed rogon e lung ko pi pilung; ni aray rogon niʼ i pining raed fapi gidiiʼ, ma dariy fan ni ra bagyaed ma baʼ rogon fithingan.

12 Me yibi buch ni arame yibi yimʼ Nephi.

13 Chiney e gidiiʼ ni gathi yaed e Lamanites e yaed e Nephites; machane, yibe pining raed ni Nephites, Jacobites, Josephites, Zoramites, Lamanites, Lemuelites, nge Ishmaelites.

14 Machane gag, Jacob, e dab gurinʼ e chiney iyaen e ngaram ni nggu kiiʼeg raed u rogon e pi ngochol ney, machane bay ʼug piningraed ni Lamanites ni piʼin ni yaed be gay rogon ni ngar gatheayed fapi gidiiʼ rokʼ Nephi, nge piʼin ni yaed e bafelʼ thilraed Nephi e bay gu pining raed ni Nephites, ara fapi gidiiʼ rokʼ Nephi, u rogon e lung ko pi pilung.

15 Ere chiney e yibi buch ni fapi gidiiʼ ku Nephi, u tan e lung ko fabin lʼagruw e pilung, e ra tabab gaed i ʼelʼel nag gumʼirchaʼraed, mar paged yaed ngar uned i rinʼ e ngongol nib kireb, ni boed rogon David ni kakrom ni baʼadag ni nge yoʼor pi leʼengin nge ppin ni yarif rokʼ, nge ku aram rogon ngakʼ Solomon, ni fak.

16 Arragon, ma arame kur tabab niged i gay e gol nge silber ni yoʼor, ma arame ra tabolngin niged i ʼufʼuf niged yaed ngalang.

17 Ere gag, Jacob, e gu piiʼ e pi thin ney ngoraed ko ngiyalʼ ni gube fil morngaʼagen ngoraed u temple, u tomuren ni kug muʼ i fek rokʼ Somoel e tin ni nggu rinʼ.

18 Ya gag, Jacob, nge walageg i Yosef e kan bangbeng nagmow ni nggu mangew priest nge teacher ko pi gidiiʼ ney, u tanpaʼ Nephi.

19 Ma gamow ba yulʼyulʼ i rinʼ e muruwel romow ngakʼ Somoel, mug dugiliyew gamow ngay ni nge mang muruwel romow, ni pi denen ko pi gidiiʼ e ra yaeni aw ni gamow e kireb romow ni faʼanra dab gu filew ngoraed fapi thin rokʼ Got nib felʼ rogon; ere, gamow ra muruwel u poloʼ i gelingmow ma rayog ni rachaʼraed e dabi aw ko mad romow; ma faʼanra dangay ma rachaʼrad e ra ʼaw ko mad romow, ma dabiyog nni pirʼegmow ni dariy thibngimow ko bin tomur e rran.