1 ’E i muri a’era, i te ha’amatara’a nō te toru ’ahuru ’e ma ono o te matahiti nō te fa’aterera’a a te mau ha’avā i ni’a i te mau ta’ata o Nephi, ’ua rave ihora Sibelona i taua mau mea mo’a ra ’o tā Alama i hōro’a atu ia Helamana.

2 ’E e ta’ata parauti’a ho’i ’oia, ’e ’ua haere ’oia ma te parauti’a i mua i te Atua ; ’e ’ua tāmau māite ’oia i te ha’apa’o i te ’ohipa maita’i, i te ha’apa’o i te mau fa’auera’a a te Fatu tōna Atua ; ’e ’ua nā reira ato’a tōna ra taea’e.

3 ’E i muri a’era, ’ua pohe ato’a ihora Moroni. ’E ’o te hope’a te reira nō te toru ’ahuru ’e ma ono o te matahiti nō te fa’aterera’a a te mau ha’avā.

4 ’E i muri a’era, ’ia tae a’era i te toru ’ahuru ’e ma hitu o te matahiti nō te fa’aterera’a a te mau ha’avā, tē vai ra te hō’ē pupu ta’ata rahi roa, ’oia ho’i e pae tauatini ’e e maha hānere tāne, ’e tā rātou mau vahine ’e tā rātou mau tamari’i, ’o tei fa’aru’e mai i te fenua ra nō Zarahemela nō te haere atu i te fenua i te pae apato’erau ra.

5 ’E i muri a’era, e ta’ata tītau ’ite roa ’o Hagota, nō reira ’ua haere atu ra ’oia ’e ’ua hāmani ihora i te hō’ē pahī rahi i te hiti o te fenua ra nō ’Auhune, i pīha’i iho i te fenua ra nō Ano, ’e ’ua tu’u atu ra i te reira i roto i te moana i te pae tō’o’a o te rā, i pīha’i iho i te fenua iti oaoa e tae atu ai i te fenua i te pae apato’erau.

6 ’E inaha, e rave rahi ta’ata o te mau ’āti Nephi tei tomo atu i roto, ’e ’ua reva atu ’e te mau mau huru mā’a e rave rahi, ’e e rave rahi ato’a mau vahine ’e mau tamari’i ; ’e ’ua reva atu rātou i tō rātou tere i te pae apato’erau. ’E ’o te hope’a te reira nō te toru ’ahuru ’e ma hitu o te matahiti.

7 ’E ’ia tae a’era i te toru ’ahuru ’e ma va’u o te matahiti, ’ua hāmani taua ta’ata nei i te tahi atu ā mau pahī. ’E ’ua ho’i mai te pahī mātāmua, ’e ’ua tomo atu e rave rahi atu ā mau ta’ata i roto i te reira ; ’e ’ua rave ato’a rātou i te mau huru mā’a e rave rahi, ’e ’ua tere fa’ahou atu ra i te fenua i te pae apato’erau.

8 ’E i muri a’era, ’aita roa te hō’ē parau i fa’aro’o-fa’ahou-hia nō ni’a ia rātou. ’E ’ua mana’o mātou ē, ’ua paremo rātou i roto i te hōhonura’a nō te moana. ’E i muri a’era, ’ua tere fa’ahou atu ra te tahi fa’ahou ā pahī ; ’e te vāhi i haerehia e te reira, ’aita roa mātou i ’ite.

9 ’E i muri a’era, i taua matahiti ra, e rave rahi mau ta’ata i haere atu i te fenua i te pae apato’erau. ’E ’o te hope’a te reira nō te toru ’ahuru ’e ma va’u o te matahiti.

10 ’E i muri a’era, ’ia tae a’era i te toru ’ahuru ’e ma iva o te matahiti nō te fa’aterera’a a te mau ha’avā, ’ua pohe ato’a ihora Sibelona, ’e ’ua tere atu Korianetona i te fenua i te pae apato’erau nā ni’a i te pahī, nō te hōpoi atu i te mā’a i te mau ta’ata i haere atu i taua fenua ra.

11 Nō reira e mea ti’a roa ia Sibelona ’ia hōro’a atu i taua mau mea mo’a ra, hou ’oia e pohe ai, i te tamaiti a Helamana, ’o tei pi’ihia o Helamana, ’e ’ua pi’ihia ho’i ’oia i te i’oa o tōna ra metua tāne.

12 I teienei, inaha, ’ua pāpa’ihia taua mau ’ō’otira’a ato’a ra ’o tei vai na ia Helamana, ’e ’ua hāponohia atu i rotopū i te mau tamari’i a te ta’ata nei i te mau fenua ē ’ati noa a’e, maori rā taua mau tufa’a i fa’auehia e Alama ē ’eiaha roa ’ia fa’a’itehia.

13 ’Āre’a rā, ’ia ha’apa’ohia teie mau mea ’ei mea mo’a e ti’a ai, ’e ’ia hōro’ahia atu i terā u’i ’e i terā u’i ; nō reira, i taua matahiti ra, ’ua hōro’ahia atu te reira ia Helamana, hou te pohera’a o Sibelona.

14 ’E i muri a’era, i taua matahiti ra, tē vai ra te tahi mau ta’ata ’ōrurehau ’o tei haere atu i rotopū i te mau ’āti Lamana ; ’e ’ua fa’ati’arepu i te riri i roto ia rātou i te mau ’āti Nephi.

15 ’E i roto ato’a i taua iho matahiti ra, ’ua haere mai rātou ’e te tahi mau nu’u fa’ehau rahi roa nō te ’aro i te mau ta’ata o Moroniha, ’oia ïa, i te nu’u fa’ehau o Moroniha, ’e ’ua vī rātou ’e ’ua tūra’i-fa’ahou-hia atu rātou i muri i tō rātou ihora mau fenua ma te pau rahi.

16 ’E ’o te hope’a te reira nō te toru ’ahuru ’e ma iva o te matahiti nō te fa’aterera’a a te mau ha’avā i ni’a i te mau ta’ata o Nephi.

17 ’E ’o te hope’a te reira nō te ’ā’amu a Alama, ’e tā tāna ra tamaiti o Helamana, ’e tā Sibelona ato’a ho’i, te tahi ato’a o tāna tamaiti.