1 ’E i muri a’era, te mau ta’ata ato’a ’o tei ’ore i fa’aro’o i te mau parau a Helamana ’e tā tōna ra ho’i mau taea’e, ’ua ’āmui-tāhō’ē-hia ïa rātou nō te ’aro atu i tō rātou mau taea’e.

2 ’E i teienei, inaha, ’ua riri roa rātou, ’e nō reira ’ua ’ōpua ihora rātou ’ia taparahi atu ia rātou.

3 I teienei, te ta’ata fa’atere o taua mau ta’ata ra i riri atu i tō rātou ra mau taea’e, ’o te hō’ē ïa ta’ata rahi ’e te pūai ho’i ; ’e ’o ’Amalikia tōna i’oa.

4 ’E ’ua hina’aro roa ’Amalikia ’ia riro ’ei ari’i ; ’e ’ua hina’aro ato’a te mau ta’ata i riri ’ia riro ’oia ’ei ari’i nō rātou ; ’e te pae rahi o taua mau ta’ata ra e mau ha’avā ri’i rātou nō te fenua ; ’e tē tītau noa ra rātou ’ia roa’a ia rātou te mana.

5 ’E ’ua arata’ihia ho’i rātou e te mau parau ha’avarevare a ’Amalikia, ’o tei nā ’ō ē, mai te mea e turu rātou iāna ’e e fa’ati’a ho’i iāna ’ei ari’i nō rātou, e fa’ariro ïa ’oia ia rātou ’ei mau tāvana i ni’a i te mau ta’ata.

6 Nō reira, ’ua arata’i-’ē-hia rātou e ’Amalikia i roto i te ’āmahamahara’a, noa atu ā te a’ora’a a Helamana ’e tōna ra mau taea’e, ’oia ïa, noa atu ā tā rātou tīa’i-māite-ra’a i te ’ēkālesia, e mau tahu’a rahi ho’i rātou nō te ’ēkālesia.

7 ’E tē vai ra e rave rahi i roto i te ’ēkālesia ’o tei ti’aturi i te mau parau tāvaimanino a ’Amalikia, nō reira ’ua tāiva atu ra rātou i te ’ēkālesia ; ’e nō reira ïa te huru o te pāpū ’ore e te pe’ape’a rahi nō te mau ’ohipa i rotopū i te mau ta’ata o Nephi, noa atu ā te rē rahi tā rātou i fāri’i i ni’a a’e i te mau ’āti Lamana, ’e te ’oa’oa rahi ho’i tā rātou i fāri’i nō tō rātou fa’aorara’ahia e te rima o te Fatu.

8 Nō reira, tē ’ite nei tātou e mea ’oi’oi roa te mau tamari’i a te ta’ata nei i te ha’amo’e i te Fatu tō rātou Atua, ’oia ïa, e mea ’oi’oi roa rātou i te rave i te mau ’ohipa ’ī’ino, ’e i te arata’i-’ē-hia e te diabolo.

9 ’Oia ïa, tē ’ite ato’a nei tātou i te parauti’a ’ore rahi e ti’a i te hō’ē ta’ata parauti’a ’ore e fa’atupu i rotopū i te mau tamari’i a te ta’ata nei.

10 ’Oia ïa, tē ’ite nei ho’i tātou ē, tē fa’a’ohipa nei ’Amalikia i te mau rāve’a ha’avare ’e i te mau parau tāvaimanino, ’ia ti’a iāna ’ia arata’i ’ē atu i te ’ā’au o te mau ta’ata e rave rahi ’ia rave i te parauti’a ’ore ; ’oia ïa, ’e ’ia tītau ho’i ’ia ha’amou i te ’ēkālesia a te Atua, ’e ’ia ha’amou i te niu o te ti’amā tā te Atua i tu’u mai ia rātou ra, ’e ’aore rā i te ha’amaita’ira’a tā te Atua i fa’atae mai i ni’a i te fenua ’ei maita’i nō te feiā parauti’a.

11 ’E i teienei, i muri a’era, ’ia fa’aro’o a’era Moroni, te ra’atira rahi o te mau nu’u fa’ehau o te mau ’āti Nephi, i teie mau ’ohipa tāivara’a, ’ua riri ihora ’oia ia ’Amalikia.

12 ’E i muri a’era, ’ua pahae ihora ’oia i tōna ra perēue, ’e ’ua rave ihora ’oia i te hō’ē vāhi iti nō te reira, ’e ’ua pāpa’i ihora i ni’a iho i te reira—’Ei ha’amana’ora’a i tō tātou ra Atua, ’e tā tātou ha’apa’ora’a, ’e tō tātou ti’amāra’a, ’e tō tātou hau, ’e tā tātou mau vahine, ’e tā tātou mau tamari’i—’e ’ua tā’amu ihora ’oia i te reira i ni’a i te hope’a nō te hō’ē rā’au.

13 ’E ’ua ha’amau ihora ’oia i tōna pāruru upo’o, ’e tōna pāruru ’ōuma, ’e tōna pāruru tama’i, ’e ’ua tātua ihora i tōna ha’ana tama’i i tōna tau’upu ; ’e ’ua rave ihora ’oia i te rā’au i tā’amuhia tōna ra perēue i te hope’a nō te reira, (’e ’ua ma’iri ihora ’oia i te i’oa nō te reira, te tāpa’o nō te ti’amāra’a) ’e ’ua tīpapa ihora ’oia i raro i te repo, ’e ’ua pure māite atu ra i tōna ra Atua nō te mau ha’amaita’ira’a nō te ti’amāra’a i ni’a iho i tōna ra mau taea’e, mai te mea tē vai ra te hō’ē pupu Cherisetiano e pārahi ra i ni’a i te fenua—

14 ’O te reira ho’i tei ma’irihia i ni’a iho i te mau ta’ata ato’a ’o tei ti’aturi mau i te Mesia, ’e tei ’āmui i te ’ēkālesia a te Atua, e taua i’oa ra ’ua topahia ïa i ni’a ia rātou e te feiā nō rāpae mai i te ’ēkālesia.

15 ’E ’ua ha’apa’o maita’i te mau ta’ata nō te ’ēkālesia ; ’oia ïa, ’ua rave rātou ato’a ’o tei ti’aturi mau i te Mesia i te i’oa o te Mesia i ni’a iho ia rātou ma te oaoa, ’oia ho’i ’ua parauhia rātou e mau Cherisetiano, nō tō rātou ti’aturi i te Mesia ’o tē tae mai.

16 ’E nō reira, i teie taime, ’ua pure atu ra Moroni, ’ia ha’amanuiahia te ’ohipa a te mau Cherisetiano ’e te ti’amāra’a o te fenua.

17 ’E i muri a’era, ’ia fa’aoti a’era ’oia i te pūpū atu i te hina’aro o tōna ’ā’au i te Atua, ’ua fa’ata’a atu ra ’oia i te mau fenua ato’a i te pae apato’a o te fenua ra ’o Ano ; ’oia ho’i i te mau fenua ato’a i te pae apato’erau ’e te pae apato’a ato’a ho’i—E fenua mā’itihia, ’e e fenua nō te ti’amāra’a.

18 ’E ’ua nā ’ō atu ra ’oia : ’Oia mau roa, ’aita roa te Atua e vaiiho noa ia tātou, ’o tei vahavahahia nō te mea ’ua rave tātou i ni’a ia tātou i te i’oa o te Mesia, ’ia ta’ata’ahihia ’e ’ia ha’amouhia, maori rā ’ia fa’atae mai tātou i te reira i ni’a ia tātou iho nō tā tātou iho mau hara.

19 ’E ’ia fa’aoti a’era Moroni i te parau atu i taua mau parau nei, ’ua haere ti’a atu ra ’oia i rotopū i te mau ta’ata, ma te tāhirihiri i te tufa’a i motu o tōna ra ’ahu i roto i te reva, ’ia ti’a i te mau ta’ata ato’a ’ia ’ite i te pāpa’ira’a ’o tāna i pāpa’i i ni’a i te tufa’a i motu ra, i te pi’ira’a atu ma te reo pūai, i te nā-’ō-ra’a ē :

20 Inaha, te feiā ’o tē pāruru i teie nei tāpa’o i ni’a i te fenua, ’ia haere mai ïa rātou ma te pūai o te Fatu, ’e ’ia fafau ho’i rātou ’ia pāruru i tō rātou ti’amāra’a, ’e tā rātou ha’apa’ora’a, ’ia ti’a i te Fatu te Atua ’ia ha’amaita’i mai ia rātou.

21 ’E i muri a’era, ’ia oti a’era tā Moroni porora’a atu i teie mau parau, inaha, ’ua horo ’āmui mai ra te mau ta’ata e tā rātou mau ha’ana tama’i i tātuahia i tō rātou tau’upu, e ma te pahae i tō rātou mau ’ahu ’ei tāpa’o, ’oia ho’i, ’ei fafaura’a ē ’aita roa rātou e fa’aru’e i te Fatu tō rātou Atua ; ’oia ho’i ïa, mai te mea e ’ōfati rātou i te mau fa’auera’a a te Atua, ’e mai te mea e topa rātou i roto i te hara, ’e mai te mea e ha’amā rātou ’ia rave i ni’a iho ia rātou i te i’oa o te Mesia, i reira e pahae te Fatu ia rātou mai tā rātou i pahae i tō rātou mau ’ahu.

22 I teienei, ’o te fafaura’a teie tā rātou i fafau mai, ’e ’ua huri atu ra rātou i tō rātou mau ’ahu i te pae ’āvae o Moroni, i te nā-’ō-ra’a ē : Tē fafau nei mātou i tō tātou Atua ē, e ha’amouhia mātou mai tō mātou mau taea’e i te fenua i te pae apato’erau, mai te mea e topa mātou i roto i te hara ; ’oia ïa, e riro ’oia i te huri ato’a ia mātou i te pae ’āvae o tō mātou mau ’enemi, mai tā mātou i huri i tō mātou mau ’ahu i tō ’oe pae ’āvae, ’ia ta’ata’ahihia e te ’āvae, mai te mea e topa mātou i roto i te hara.

23 ’Ua parau atu ra Moroni ia rātou : Inaha, e toe’a tātou nō te hua’ai o Iakoba ; ’oia ïa, e toe’a ho’i tātou nō te hua’ai o Iosepha, ’o tei pahae-f’ā’ahu’ahu’a-hia tōna perēue e tōna ra mau taea’e ; ’oia ïa, ’e i teienei, inaha, ’a ha’amana’o tātou i te ha’apa’o i te mau fa’auera’a a te Atua, ’ia ’ore rā e pahaehia ïa tō tātou mau ’ahu e tō tātou mau taea’e, ’e e hurihia tātou i roto i te fare tāpe’ara’a, ’e ’aore rā e ho’ohia ; ’e ’aore rā e taparahihia.

24 ’Oia ïa, ’a pāruru ana’e tātou, te hō’ē toe’a nō te hua’ai o Iosepha, i tō tātou ti’amāra’a ; ’oia ïa, ’a ha’amana’o tātou i te mau parau a Iakoba, hou ’oia i pohe ai, inaha ho’i, ’ua ’ite na ’oia ē, ’ua fa’ahereherehia te tahi tufa’a nō te toe’a o te perēue o Iosepha ’e ’aita te reira i marau. ’E tē nā ’ō ra ’oia ē—Mai teie toe’a nō te ’ahu o tā’u nei tamaiti ’o tei fa’ahereherehia, ’oia ato’a ïa e fa’ahereherehia te toe’a o te hua’ai o tā’u tamaiti e te rima o te Atua, ’e e ravehia atu iāna ra, ’a pohe noa atu ai te tahi toe nō te hua’ai o Iosepha, mai te toe’a o tōna ra ’ahu.

25 I teienei, inaha, tē ’oto nei tō’u ’ā’au nō te reira ; noa atu rā i te reira, ’ua ’oa’oa tō’u ’ā’au i tā’u tamaiti, nō te tahi tufa’a o tōna hua’ai ’o tē ravehia atu i te Atua ra.

26 I teienei, inaha, ’o teie ïa te reo o Iakoba.

27 ’E i teienei, ’o vai ho’i tei ’ite ē, penei a’e ’ua riro te toe’a o te hua’ai o Iosepha, ’o tei pohe atu mai tōna ’ahu i pāhaehia, ’ei mau ta’ata tei tāiva ’ē atu mai roto atu ia tātou nei ? ’Oia ïa, ’e ’o tātou iho ho’i taua feiā ra, mai te mea ē ’aita tātou e tāpe’a māite i te fa’aro’o i te Mesia.

28 ’E i teienei, i muri a’era, ’ia fa’aoti a’era Moroni i te parau i teie mau parau, ’ua haere atu ra ’oia, ’e ’ua tono atu ra i te ve’a i te mau vāhi ato’a o te fenua tē vai ra te mau mārōra’a i reira, ’e ’ua ha’aputuputu mai ra i te mau ta’ata ato’a ’o tei hina’aro ’ia pāruru i tō rātou ti’amāra’a, nō te ’aro atu ia ’Amalikia ’e ia rātou ho’i ’o tei tāiva, ’e ’o tei parauhia e mau ’āti ’Amalikia.

29 ’E i muri a’era, i tō ’Amalikia ’itera’a ē ’ua hau roa atu te rahi o te mau ta’ata o Moroni i tō te mau ’āti ’Amalikia—’e ’ua ’ite ato’a ho’i ’oia ē ’ua tapitapi te mana’o o te mau ta’ata nō ni’a i te parauti’a nō te ’ōpuara’a tā rātou i ha’amata i te rave—nō reira, ’ua mata’u ihora ’oia ’o te ’ore te reira e manuia, ’ua rave ihora ’oia i tōna mau ta’ata ’o tei hina’aro i te pe’e atu iāna ’e ’ua reva atu ra ’oia ’e rātou ato’a i te fenua ra nō Nephi.

30 I teienei, ’ua mana’o ihora Moroni ē, ’aita i au ’ia rahi atu ā te pūai o te mau ’āti Lamana ; nō reira ’ua mana’o ihora ’oia ’ia fa’ata’a ’ē i te mau ta’ata o ’Amalikia, ’e ’aore rā ’ia rave ia rātou ’e ’ia fa’aho’i mai, ’e ’ia taparahi ia ’Amalikia ; ’oia ïa, ’ua ’ite ho’i ’oia ē, e riro ’oia i te fa’ati’arepu i te mau ’āti Lamana ’ia riri atu ia rātou, ’e e ’aro mai ai ia rātou ; ’e ’ua ’ite ’oia ē, e nā reira ’Amalikia ’ia manuia tāna mau ’ōpuara’a.

31 Nō reira ’ua mana’o Moroni ē, e mea ti’a roa iāna ’ia arata’i i tōna mau nu’u fa’ehau, ’o tei ha’aputuputu mai ia rātou iho, ’e tei fa’a’ahu ho’i ia rātou iho i te mau mauha’a tama’i, ’e tei fa’aoti i te fafaura’a ’ia fa’atupu i te hau—’e i muri a’era, ’ua rave ihora ’oia i tōna nu’u fa’ehau ’e ’ua haere atu ra ’e tōna mau ti’ahapa i roto i te mēdēbara, nō te tāpū i te haere’a o ’Amalikia i roto i te mēdēbara.

32 ’E i muri a’era, ’ua rave mau ihora ’oia mai tāna i ’ōpua, ’e ’ua haere ti’a atu ra ’oia i roto i te mēdēbara, i mua roa nō te tāpe’a i te mau nu’u fa’ehau o ’Amalikia.

33 ’E i muri a’era, ’ua horo ’ē atu ra ’Amalikia ’e te tahi pae iti o tōna ra mau ta’ata, ’e ’ua riro ihora te toe’a i roto i te rima o Moroni ’e ’ua fa’aho’ihia mai ra rātou i te fenua ra nō Zarahemela.

34 I teienei, nō te mea ’ua fa’ata’ahia te ta’ata ra ’o Moroni e te mau ha’avā rahi ’e e te reo o te mau ta’ata, nō reira e mana tōna ’ia rave mai te au i tōna hina’aro i te mau nu’u fa’ehau o te mau ’āti Nephi, ’ia fa’anahonaho ’e ’ia fa’atere ia rātou.

35 ’E i muri a’era, te mau ta’ata o te mau ’āti ’Amalikia ’o tei ’ore i fafau ’ia turu i te tumu nō te ti’amāra’a, ’ia ti’a ho’i ia rātou ’ia ha’amau noa i te hō’ē hau ti’amā, ’ua fa’aue atu ’oia ’ia taparahihia rātou ; ’e e mea iti roa ho’i tei pāto’i i te fafaura’a nō te ti’amāra’a.

36 ’E i muri a’era, ’ua fa’aue atu ra ho’i ’oia ’ia hutihia te tāpa’o nō te ti’amāra’a i ni’a i te mau pare ato’a i te fenua i pārahihia e te mau ’āti Nephi ē hope roa a’e ; ’e ’ua nā reira ho’i Moroni i te fa’ati’a i te reva nō te ti’amāra’a i rotopū i te mau ’āti Nephi.

37 ’E ’ua tupu fa’ahou ihora te hau i ni’a i te fenua ; ’e ’ua nā reira rātou i te fa’atupu i te hau i ni’a i te fenua ē tae noa atu ra ’ua fātata i te hope’a nō te hō’ē ’ahuru ’e ma iva matahiti nō te fa’aterera’a a te mau ha’avā.

38 ’E ’ua nā reira Helamana ’e te mau tahu’a rahi i te fa’atupu noa ato’a i te hau i roto i te ’ēkālesia ; ’oia ïa, ’e nō te ārea e maha matahiti te maoro ’ua fāri’i noa rātou i te hau ’e te ’oa’oa rahi i roto i te ’ēkālesia.

39 ’E i muri a’era, e rave rahi tei pohe ma te ti’aturi māite ē, ’ua fa’aorahia tō rātou vārua e te Fatu ra e Iesu Mesia ; nō reira, ’ua reva ’ē atu ra rātou i teie nei ao ma te ’oa’oa.

40 ’E tē vai ra te tahi pae i pohe i te fīva, ’o tei tupu pinepine i te tahi mau tau ri’i o te matahiti i ni’a i te fenua—’aita re’a rā i rahi tei pohe i te fīva, nō te mea tē vai ra te mau rā’au maitata’i i roa’a ia rātou nō roto mai i te mau tumu rā’au e rave rahi ’e te mau a’a, ’o tā te Atua i fa’aineine nō te fa’a’ore i te tumu o te mau ma’i i tae mai i ni’a i te mau ta’ata nō te huru o te fenua—

41 ’Āre’a rā e rave rahi tei pohe nō te ruhiruhiāra’a ; ’e ’o rātou tei pohe ma te fa’aro’o i te Mesia ra, tē ’oa’oa ra ïa rātou iāna ra, ’e ’ia nā reira tātou i te mana’o e ti’a ai.