1 Asin ngonian, sakuyang aki, igwa pa akong sasabihon saimo na orog pa kan sinabi ko sa saimong tugang; huli nanggad, dai mo daw namasdan an pagkasarig kan saimong tugang, an saiyang pagkamaimbod, asin an saiyang pagkamaigot sa pagsunod sa manga tugon kan Dios? An hapot ko, bakong nagtao siya nin marahay na halimbawa saimo?

2 Huli ta dai ka man nagdangog sa sakuyang manga tataramon siring sa saimong tugang, sa katiripunan kan manga tawo kan Zoramite. Ngonian iyo ini an habo ko saimo; ika nagpadagos sa paghambog kan saimong kusog asin kan saimong kadunungan.

3 Asin ta bako pa ini an gabos, sakuyang aki. Saimong ginibo idto na nakakapamundo sakuya; huli ta binayaan mo an pagbalangibog, asin ta nagduman sa daga kan Siron sa manga gilid kan manga Lamanite, sa pagsunod ki Isabel na parapasambay.

4 Iyo, saiyang binihag an manga puso nin kadakol; alagad bako ining dahilan para sa saimo, sakuyang aki. Kaipuhan na naglingkod ka sa pagbalangibog na ipinagkatiwala saimo.

5 Dai mo daw aram, sakuyang aki, na an manga bagay na ini karumpotan sa paghiling kan Kagurangnan; iyo, pinakamarumpot sa gabos na kasalan apuera sa pagpabulos nin dugo nin manga inosente o pag-inda sa Espiritu Santo?

6 Huli nanggad, ta kun saimong pig-indahan an Espiritu Santo kan ini igwa pa nin lugar sa saimo, asin aram mo na pig-indahan mo idto, totoo nanggad, na ini kasalan na daing kapatawaran; iyo, asin an siisay man na manggadan na nasa ilaw asin kaaraman kan Dios, bakong madali para sa saiya na makakua nin kapatawaran; iyo, sinasabi ko saimo, sakuyang aki, na bako madali para sa saiya na makakua nin kapatawaran.

7 Asin ngonian, sakuyang aki, minamawot ko sa Dios na dai ka nagkasala kan dakula na pagkakasala na ini. Dai ako magpaparataram kan saimong manga kasalan, tanganing paribokon an saimong kalag, kun bako ini para sa ikakarahay mo.

8 Alagad totoo, dai mo ikakatago an saimong manga pagkakasala sa Dios; asin sagkod na ika magsolsol an manga idto matindog bilang patotoo laban saimo sa huring aldaw.

9 Ngonian sakuyang aki, minamawot ko na ika magsolsol na asin bayaan na an manga kasalan, asin dai na magparasunod sa pagkaara kan saimong manga mata, alagad irayo mo an saimong sadiri sa manga bagay na ini; huli ta sagkod na gibohon mo ini dai ka nanggad makakapanunod kan kahadean kan Dios. O, magrumdom, asin darahon mo sa saimong sadiri, asin irayo an sadiri mo sa manga bagay na iyan.

10 Asin ipinagboboot ko saimo na akoon mong makipaghumatol sa saimong matuang manga tugang sa gabos mong gigibohon; huli magdangog, ika nasa saimong pagkaaki pa, asin nangangaipo pa nin pag-ataman kan saimong manga tugang. Asin sunodon an saindang manga hatol.

11 Dai pagtugoting madara an saimong sadiri sa ano man na daing kamugtakan o kalokohan na bagay; dai pagtugoting madara giraray kan demonio an saimong puso sa pagsunod kaidtong manga mararaot na parapasambay. Saimong saboton, sakuyang aki, dakulang gayo na kasumbikalan an saimong dinara sa manga Zoramite; huli ta kan mahiling ninda an saimong gawi-gawi dai na sinda nagturubod sa sakuyang manga tataramon.

12 Asin ngonian an Espiritu kan Kagurangnan nagsabi sa sakuya: Pagbotan mo an saimong manga aki na maggibo nin marahay, tibaad na madara ninda an manga puso nin kadakol na manga tawo sa pagkarumpag; kaya pinagbobotan ko ika, sakuyang aki, sa pagkatakot sa Dios, na bayaan na an saimong manga kasumbikalan.

13 Na ika magbirik sa Kagurangnan sa bilog mong isip, makakaya, asin kusog; na dai mo na madara an manga puso nin siisay man sa paggibo nin mararaot; alagad magbalik ka sa sainda, asin akoon mo an saimong manga kakundian asin an sala na saimong naginibo.

14 Dai maghanap kan manga kayamanan o kan manga daing kamugtakan na manga bagay sa mundong ini; huli ta totoo, dai mo an manga iyan madadara.

15 Asin ngonian, sakuyang aki, sakuyang sasabihon saimo an manunungod sa pag-abot ni Cristo. Nanggad, an sabi ko saimo, na siya nanggad an maabot na mahali kan kasalan kan mundo; iyo, siya maabot sa pagbalangibog kan maogmang manga bareta nin kaligtasan sa saiyang manga tawo.

16 Asin ngonian, sakuyang aki, iyo ini an paglingkod na inapodan sa saimo, na ipagbalangibog ining maogmang manga bareta sa manga tawong ini, tanganing makahanda an saindang manga isip; o kaya na an kaligtasan umabot sa sainda, tanganing maihanda ninda an manga isip kan saindang manga aki sa pagdangnog kan tataramon sa panahon kan saiyang pag-abot.

17 Asin ngonian sakuyang papagianon an saimong isip sa temang ini. Totoo, magngangalas ka kun ngata an manga bagay na ini kaipuhan na maaraman haloy pa bago umabot. Alagad totoo nanggad, sakuyang sasabihon sa saimo, bako daw na an sarong kalag sa panahon na ini mahalaga sa Dios siring man an kalag sa panahon kan saiyang pag-abot?

18 Bako daw kaipuhan na an plano kan pagtubos ipaaram sa manga tawo na ini asin siring man sa saindang manga aki?

19 Bako daw siring kadali sa panahon na ini para sa Kagurangnan na magpadara nin sarong anghel na magbalangibog kaining maogmang manga bareta sa satuya siring sa satuyang manga aki, o siring sa pagkatapos kan panahon kan saiyang pag-abot?