1 ’E i muri a’era, ’ua fa’aue ihora te ari’i ra ’o Lamoni ’ia ti’a mai tōna mau tāvini ’e ’ia fa’a’ite pāpū mai i te mau mea ato’a tā rātou i ’ite nō ni’a i te ’ohipa i tupu.

2 ’E ’ua fa’a’ite pāpū mai rātou ato’a i te mau mea tā rātou i ’ite, ’e ’ua fa’aro’o a’era ’oia i tō Amona ha’apa’o maita’i i te pārurura’a i tāna ra mau nana māmoe, ’e i tōna ho’i mana rahi ’a ’aro pūai atu ai ’oia ia rātou ’o tei tītau ’ia taparahi mai iāna, ’e ’ua māere roa ihora te ari’i, ’e ’ua nā ’ō mai ra : E ’ere teie i te ta’ata ana’e. Inaha, e ’ere ānei teie te Vārua Rahi tei fa’atae mai i te utu’a rahi i ni’a iho i teie nei feiā, nō tā rātou mau taparahira’a i te ta’ata ?

3 ’E ’ua pāhono atu ra rātou i te ari’i, nā ’ō atu ra : ’Aita mātou i ’ite, e Vārua Rahi ānei ’oia ’e ’aore rā e ta’ata ānei ; ’ua ’ite rā mātou ē, ’aita roa e ti’a i te mau ’enemi o te ari’i ’ia taparahi iāna, ’e ’aita ho’i e ti’a ia rātou ’ia ha’apurara ’ē atu i te mau nana māmoe a te ari’i ’a fa’aea ai ’oia i pīha’i iho ia mātou, nō tōna ’aravihi ’e te pūai rahi ho’i ; nō reira, ’ua ’ite mātou e hoa ’oia nō te ari’i. ’E i teienei, e te ari’i, ’aita roa mātou i ti’aturi ē tē vai nei te hō’ē ta’ata e mana rahi tōna mai te reira, ’e ’ua ’ite ho’i mātou ē, ’aita e ti’a iāna ’ia taparahihia.

4 ’E i teienei, ’ia fa’aro’o a’era te ari’i i teie mau parau, ’ua parau mai ra ’oia ia rātou : I teienei, tē ’ite nei au ē, ’o te Vārua Rahi teie, ’e ’ua haere mai ’oia i raro nei nō te fa’aora ia ’outou, ’ia ’ore au e taparahi ia ’outou mai tā’u i nā reira i tō ’outou ra mau taea’e. I teienei ’o te Vārua Rahi teie tei parauhia mai e tō tātou ra mau metua.

5 I teienei ’o te peu tumu teie i fāri’ihia e Lamoni nō ’ō mai i tōna ra metua tāne, ’oia ho’i, tē vai noa ra te Vārua Rahi. Noa atu ē ’ua ti’aturi noa rātou i taua Vārua Rahi ra, ’ua mana’o rā rātou ē, e mea ti’a te mau mea ato’a tā rātou e rave ra ; terā rā, ’ua rurutaina ihora Lamoni ma te mata’u, i te mea ē ’ua hape ’oia i te taparahira’a i tōna ra mau tāvini :

6 E rave rahi ho’i tō rātou ’o tāna i taparahi, nō te mea i ha’apurara na tō rātou mau taea’e i tā rātou mau nana māmoe i te vāhi nō te pape ra ; ’e nō reira, nō te mea ’ua ha’apurara rātou i tā rātou mau nana māmoe i taparahihia ai rātou ra.

7 I teienei, e peu mātauhia teie nā teie mau ’āti Lamana ’ia tīa’i i pīha’i iho i te mau pape nō Sebusa nō te ha’apurara ’ē atu i te mau nana māmoe a te mau ta’ata, ’ia ti’a ia rātou ’ia fa’ahaere atu e rave rahi ’o tei ha’apurarahia i roto i tō rātou iho fenua, ’o teie tā rātou peu harura’a i rotopū ia rātou.

8 ’E i muri a’era, ’ua ui mai ra te ari’i ra ’o Lamoni i tōna mau tāvini, i te nā-’ō-ra’a mai ē : Tei hea roa teie ta’ata, tei iāna te reira huru mana rahi ?

9 ’E ’ua parau atu ra rātou iāna : Inaha, tē fa’a’amu ra ’oia i tā ’oe mau pua’ahorofenua. I teienei, i fa’aue na ho’i te ari’i i tōna mau tāvini, hou te taime nō te fa’ainura’a i tā rātou mau nana māmoe, ’ia fa’aineine rātou i tāna mau pua’ahorofenua ’e te mau pere’o’o ho’i, ’e ’ia ’āfa’i atu iāna i te fenua ra nō Nephi ; nō te mea tē fa’atupuhia ra te hō’ē fa’a’amu’a rahi i te fenua ra nō Nephi ’e te metua tāne o Lamoni, te ari’i nō te fenua pā’āto’a.

10 I teienei ’ia fa’aro’o a’era te ari’i ra ’o Lamoni ē tē fa’aineine ra Amona i tāna mau pua’ahorofenua ’e tōna ra mau pere’o’o, ’ua rahi atu ra tōna māere nō tō Amona ha’apa’o maita’i, ’e ’ua nā ’ō ihora ’oia : ’Oia mau roa, ’aita roa e tāvini i rotopū i tō’u ato’a ra mau tāvini mai teie nei ta’ata i te ha’apa’o maita’i ; ’e ’ua ha’amana’o ho’i ’oia i tā’u ato’a ra mau fa’auera’a ’ia ravehia te reira.

11 I teienei ’ua ’ite pāpū vau ē, ’o te Vārua Rahi teie, ’e tē hina’aro nei au ’ia haere mai ’oia iā’u nei, ’ua mata’u rā vau.

12 ’E i muri a’era, ’ia oti a’era tā Amona fa’aineinera’a i te mau pua’ahorofenua ’e te mau pere’o’o nō te ari’i ’e tōna mau tāvini, ’ua haere atu ra ’oia i te ari’i ra, ’e ’ua ’ite atu ra ’oia ē ’ua taui roa te hōho’a mata o te ari’i ; nō reira ’ua fātata roa ihora ’oia i te ho’i atu i rāpae mai mua mai i tōna ra aro.

13 ’E ’ua parau mai ra te hō’ē o te mau tāvini o te ari’i iāna, e Rabana, tōna aura’a ’ia ’īritihia, ’oia ho’i, e ari’i mana ’e ’aore rā e ari’i rahi ; nō te mea ’ua ’ite rātou ē, e mana rahi tō tō rātou mau ari’i ; ’e ’ua nā ’ō mai ra ’oia i te parau mai iāna : E Rabana, ’ua hina’aro te ari’i ’ia fa’aea mai ’oe i’ō nei.

14 Nō reira, ’ua fāriu atu ra Amona i ni’a i te ari’i, ’e ’ua nā ’ō atu ra iāna : E aha tā ’oe i hina’aro iā’u ’ia rave nā ’oe na, e te ari’i ? ’E ’aita te ari’i i pāhono mai iāna nō te ārea e hō’ē hora te maoro, mai te au i te fāito nō tā rātou taime, ’e ’aita roa ho’i ’oia i ’ite i te mea tāna e ti’a ’ia parau atu iāna.

15 ’E i muri a’era, ’ua parau fa’ahou atu ra Amona iāna : E aha tā ’oe i hina’aro iā’u nei ? ’Aita rā te ari’i i pāhono mai iāna.

16 ’E i muri a’era, ’ua ’ī ihora Amona i te Vārua o te Atua, nō reira ’ua ’ite atu ’oia i te mau mana’o o te ari’i. ’E ’ua parau atu ra ’oia iāna : Nō te mea ānei ’ua fa’aro’o ’oe ē, ’ua pāruru vau i tō ’oe mau tāvini ’e tā ’oe mau nana māmoe, ’e ’ua taparahi ho’i i nā taea’e e hitu nō rātou i te mā’a ’e i te ’o’e, ’e ’ua tāpū ’ē ho’i i te rima o vetahi ’ē atu, ’ia ti’a iā’u ’ia pāruru i tā ’oe mau nana māmoe ’e tō ’oe mau tāvini ; inaha, nō teie ānei mea i tupu ai tō ’oe māere ?

17 Tē parau atu nei au ia ’oe na, e aha ïa te mea i tupu ai tō ’oe māere rahi ? Inaha, e ta’ata ho’i au, ’e e tāvini ho’i nō ’oe ; ’e nō reira, ’o te mea ti’a tā ’oe e hina’aro, ’o tā’u ïa e rave.

18 I teienei, ’ia fa’aro’o a’era te ari’i i teie mau parau, ’ua māere fa’ahou ihora ’oia, ’e ’ua ta’a iāna ē, ’ua ’ite Amona i tōna mau mana’o ; ’e noa atu ā i te reira, ’ua hāmama ihora te ari’i Lamoni i tōna vaha, ’e ’ua nā ’ō mai ra iāna : ’O vai ho’i ’oe na ? ’O taua Vārua Rahi ra ānei ’oe ’o tei ’ite i te mau mea ato’a ?

19 ’Ua parau atu ra Amona iāna, nā ’ō atu ra : E ’ere ïa vau.

20 ’E ’ua parau mai ra te ari’i : E mea nāhea ’oe i ’ite ai i te mau mana’o o tō’u nei ’ā’au ? ’A parau mai ’oe ma te mata’u ’ore, ’e ’a fa’a’ite mai i teie mau mea iā’u nei ; ’e ’a fa’a’ite ato’a mai ho’i iā’u nei ē nā roto i tō vai mana i taparahi ai ’e i tāpū ’ē atu ai ’oe i te mau rima o tō’u ra mau taea’e tei ha’apurara ’ē atu i tā’u ra mau nana māmoe—

21 ’E i teienei, mai te mea e fa’a’ite mai ’oe i teie mau mea iā’u nei, e hōro’a atu ïa vau ia ’oe na i te mau mea ato’a tā ’oe e hina’aro ; ’e mai te mea e hina’arohia, nā tō’u ïa mau nu’u fa’ehau e pāruru ia ’oe ; ’ua ’ite rā vau ē, ’ua rahi atu tō ’oe mana i tō rātou ato’a ra ; terā rā, te mau mea ato’a tā ’oe e hina’aro mai iā’u nei, nā’u ïa e hōro’a atu ia ’oe na.

22 I teienei, nō te ’aravihi ’e te hapa ’ore o Amona, ’ua parau atu ra ’oia ia Lamoni : E fa’aro’o ānei ’oe i tā’u nei mau parau, mai te mea e fa’a’ite atu vau ia ’oe ē nā roto i tō vai mana i rave ai au i teie mau mea nei ? ’E teie te mea tā’u i hina’aro ia ’oe na.

23 ’E ’ua parau mai ra te ari’i iāna, nā ’ō mai ra : ’Ē, e ti’aturi au i tā ’oe mau parau ato’a. ’E e mea nā reira ’oia i te noa’ara’a nā roto i te hō’ē rāve’a ’aravihi.

24 E ha’amata ihora Amona i te parau atu iāna ma te mata’u ’ore, ’e ’ua nā ’ō atu ra iāna : Tē ti’aturi ra ānei ’oe ē, tē vai ra te hō’ē Atua ?

25 ’E ’ua pāhono mai ra ’oia, ’e ’ua nā ’ō mai ra iāna : ’Aita vau i ’ite i te aura’a nō te reira.

26 ’E i muri iho ’ua nā ’ō atu ra Amona : Tē ti’aturi ra ānei ’oe ē, tē vai ra te hō’ē Vārua Rahi ?

27 ’E ’ua parau mai ra ’oia, ’Ē.

28 ’E ’ua nā ’ō atu ra Amona : ’O te Atua ïa. ’E ’ua parau fa’ahou atu ra Amona iāna : Tē ti’aturi ra ānei ’oe ē, nā teie Vārua Rahi, ’oia ho’i nā te Atua, i hāmani i te mau mea ato’a i te ra’i ra ’e i te ao ato’a nei ?

29 ’E ’ua parau mai ra ’oia : ’Ē, ’ua ti’aturi au ē, nāna i hāmani i te mau mea ato’a i te ao nei ; ’aita rā vau i ’ite nō ni’a i te mau ra’i.

30 ’E ’ua parau atu ra Amona iāna : Te mau ra’i, ’o te vāhi ïa tei reira te Atua ’e tāna mau melahi mo’a i te pārahira’a.

31 ’E ’ua parau mai ra te ari’i ra ’o Lamoni : Tei nia a’e ānei te reira i te ao nei ?

32 ’E ’ua parau atu ra Amona : ’Ē, ’e tē hi’o noa mai ra ho’i ’oia i te mau tamari’i a te ta’ata nei ; ’e ’ua ’ite ’oia i te mau mana’o ato’a ’e te mau hina’aro ato’a o te ’ā’au nei ; ’e nā tōna rima ho’i i hāmani ia rātou pā’āto’a mai te mātāmua mai ā.

33 ’E ’ua nā ’ō mai ra te ari’i ra ’o Lamoni : Tē ti’aturi nei au i teie mau mea ato’a tā ’oe i parau iho nei. ’Ua tonohia mai ānei ’oe nō ’ō mai i te Atua ra ?

34 ’Ua parau atu ra Amona iāna : E ta’ata ho’i au ; ’e ’ua hāmanihia ho’i te ta’ata i te mātāmua ra ’ia au i te hōho’a o te Atua ra, ’e ’ua pi’ihia vau e tōna ra Vārua Mo’a ’ia ha’api’i atu i teie nei mau mea i teie mau ta’ata, ’ia fa’afāriuhia mai rātou i te ’ite i te parauti’a ’e te parau mau ;

35 ’E tei roto iā’u nei te hō’ē tufa’a nō taua Vārua ra i te pārahira’a, ’e tē hōro’a mai nei te reira i te ’ite iā’u, ’e te mana ato’a ho’i mai te au i tō’u fa’aro’o ’e tō’u hina’aro i te Atua.

36 I teienei, ’ia oti a’era tā Amona paraura’a i teie mau parau, ’ua ha’amata ihora ’oia nō ni’a i te hāmanira’ahia o te ao nei, ’e te hāmanira’ahia o Adamu, ’e ’ua fa’a’ite atu ’oia iāna i te mau mea ato’a nō ni’a i te hi’ara’a o te ta’ata ; ’e ’ua tuatāpapa māite atu ra ’oia ’e ’ua tu’u ihora ho’i i mua iāna te mau pāpa’a parau ’e te mau pāpa’ira’a mo’a nō te mau ta’ata, ’o tei parauhia e te mau peropheta ē tae roa a’e i te taime i reva mai ai tō rātou metua tāne ’o Lehi mai Ierusalema mai.

37 ’E ’ua tuatāpapa ato’a ihora ’oia ia rātou, (i te ari’i ’e tōna ra mau tāvini) i te mau haere’a o tō rātou mau metua nā roto i te mēdēbara, ’e tō rātou mau ’ati ato’a i te po’ia ’e te po’ihā, ’e tō rātou māuiui ’e tē vai atu ra.

38 ’E ’ua tuatāpapa ato’a atu ra ho’i ’oia ia rātou i te mau ’ōrurehaura’a a Lamana rāua ’o Lemuela, ’e te mau tamaiti a Isema’ela, ’oia ïa, ’ua tuatāpapa atu ’oia i tā rātou mau ’ōrurehaura’a ato’a ia rātou ; ’e ’ua ha’amāramarama atu ’oia ia rātou i te mau pāpa’a parau ’e te mau pāpa’ira’a mo’a mai te taime i fa’aru’e ai Lehi i Ierusalema ē tae roa a’e i teie nei taime.

39 E ’ere rā te reira ana’e ; ’ua ha’amāramarama ato’a atu ho’i ’oia ia rātou i te ’ōpuara’a nō te fa’aorara’a, ’o tei fa’aineinehia mai te ha’amatara’a mai ā o te ao nei ; ’e ’ua fa’a’ite ato’a atu ’oia ia rātou nō ni’a i te taera’a mai o te Mesia, ’e ’ua fa’a’ite ato’a atu ’oia ia rātou nō ni’a i te mau ’ohipa ato’a a te Fatu.

40 ’E i muri a’era, ’ia oti a’era tāna paraura’a i teie mau mea, ’e i te ha’amāramaramara’a atu i te ari’i, ’ua ti’aturi ihora te ari’i i tāna ato’a ra mau parau.

41 ’E ’ua ti’aoro atu ra ’oia i te Fatu, i te nā-’ō-ra’a atu ē : E te Fatu, ’a aroha mai ; mai te au i te rahi o tō ’oe aroha ’o tā ’oe i hōro’a mai i te mau ta’ata o Nephi ra, ’ia fa’atae ato’a mai i te reira i ni’a iho iā’u ’e i tō’u ato’a ra mau ta’ata.

42 ’E i teienei, ’ia fa’aoti a’era ’oia i te parau i te reira, ’ua topa ihora ’oia i raro i te repo, mai te mea ra ē, ’ua pohe roa ’oia.

43 ’E i muri a’era, ’ua rave ihora tōna mau tāvini iāna ’e ’ua ’āfa’i atu ra rātou iāna i roto i mua i tāna ra vahine, ’e ’ua tu’u ihora iāna i ni’a iho i te ro’i ; ’e ’ua tārava noa ’oia mai te mea ra ē, ’ua pohe ’oia nō te ārea e piti ao ’e e piti ru’i te maoro ; ’e ’ua ’oto rahi ihora tāna vahine, ’e tāna mau tamaiti, ’e tāna ho’i mau tamāhine nōna, ’ia au i te peu a te mau ’āti Lamana, ’ua ’oto rahi rātou nō tōna ra pohe.