1. Ucatsti Criston jutatapatjja tunca sojjtan marana, uca oraken Laconeo sarayiripajja mä kellkat catokäna, uca lunthata taman irpir sarayiripata. Kellkat arunacasti aqhäm sänwa:

2. Laconeo sinti jachʼa jilïr oraken sarayiripa, nayajj aca kellkäw jumatac kellkanta. Amuyunacamarjamaw cuntejj lurañ wactʼctamjja, antutäwimarjam wactʼctamsa ucanacatac thurtʼasitamata, jakenacaman thurtʼasitapata walpin nayajj jumanacar wakaychapjjsma. Jïsa, mä diosan amparapajj jumanacar wäyjjäsipquiristams uqhäm wali sum saytʼapjjtajja, antutäwina, yänacama, orakem arjjatasiñamataqui, cunjämtejj jumanacajj sapctas uqhäma.

3. Sinti jachʼa Laconeo, nayan sarayat sinti walja kamasan jakenacajj-jjar nuwasir saytʼapcasmas uqhäm juman tʼajjmar aytat lupʼiñamajj nayataquejj mä llaquiwa. Jakenacajjajj jichpachaw armanacapamp saytʼapjje. Jachʼa suyañampiw suyapjjaraqui aqhäm sir arujjaru: Nefi jakenacjjar sarakapjjam, ucatsti jupanacar tucqhapjjam.

4. Nayasti jupanacan jan atipcay chuymanacanïtap yat-twa. Nuwasïw pampanjja jupanacar yantʼaractwa. Jupanacan jan tucusir jumanacar uñisiñap yatiractwa, jumanacan walja jan walinac jupanacar lurapjjatam laycu. Ucat jupanacatejj jumanacjjar sarakanipjjeristamjja, kʼal tucqhapjjeristamjja.

5. Uca laycuw aca kellkat kellkansma. Quipca amparajjampiw acjj sellantjja. Cunatejj amuyumarjam asquïqui juman ucar jachʼa iyawsañam laycu, nuwasiñ pampansti juman jachʼa thurtʼasiñ chuymam laycu, nayajj juman sumancañam munta.

6. Ucat jumar kellkansma. Marcanacama, orakenacama, yänacam nayan jakenacajjar catuyañam munirista, jupanacan jumanacjjar espadamp jan sartʼañapataqui, uca tucqhäwin jan jumanacjjar puriñapataqui.

7. Ucajj sañ muni, nanacarojj jumanac pachpaw catuyasipjjetäta; nanacar maqhatjjapjjeta; jamas luräwinacajjat yatekapjjam; nanacan jilanacajjar tucupjjam, jumanacan nanacjam tucuñamataqui, jan mitʼanïsa, antisasinsa nanacan jilanacajjäsina, take yänacajj nanacamp chic catokasa.

8. Nayasti jumanacaruw jurament lurta. Jumanacatejj uqhäm lurapjjätajja, juramentorjamajja, janiw tucqhatäpcätati. Ucampis janitejj uc lurapcätajja, jurament jumanacatac lurarapipjjsma, jutir phajjsinjja camächit churä nuwasiri tamanacajjan jumanacjjar nuwasir sarakañapataqui. Jupanacasti janiw amparanacap jarcʼasipcaniti, janiraquiw qhuyapayapcätamti, antisas jumanacaruw jiwarayapjjätam; espadampiw jumanacar jawkʼantapjjätam, jumanacan chhaktañamcama.

9. Nayajj Gidianïtwa. Aca Gadianton jamas arustʼäwin sarayiripätwa. Aca jamas arustʼäwimpin ucan luräwinacapampin sumätap yatiracta. Nayra nayrapachat ucanacajj utjäna. Ucapachat ucanacajj nanacar catuyatawa.

10. Aca kellkatjja juma Laconeoruw kellkansma. Juman jan wil wartasac orakenacamamp yänacamamp catuyañam munta, aca nayan jakenacajjan wactʼäwinacaparu, sarayäwinacapar wastat catokañataqui. Jupanacasti jumanacat mistupjje jupanacan sarayäwipajj wactʼcän ucjj jumanacan ñankhäsin apakatam laycu. Janitejj jumanacajj uc lurapcätajja, uca jan walit timasï. Nayajj Gidianïtwa.

11. Ucatsti uca kellkat catokasinjja Laconeojj sint muspharäna, Gidianin kamasamp Nefi jakenacan orakep churit satap laycu, jakenacar ajjsarayañ munatap laycu, ni cuna jan wal catokapcän ucanacan jan wal catokatapat nuwasiñ munatap laycu. Uca jakenacajj janiw cunsa jan waljj catokapcänti, jan ucajja, uca ñankha ajjtcañ lunthatanacar sarjjasajja, jupanac pachpaw jan wal lurasipjjäna.

12. Uca sarayir Laconeojja asqui jakënwa. Janiraquiw mä lunthatan satanacapata ajjsarayatapat ajjsarcänti. Ucat janiw lunthatanacan Gidiani sarayiripan kellkatapar yäkcänti. Antisas jakenacapan Tatitur artʼasiñapataquiw mayïna, chʼam catokañapataqui, cunürutejj lunthatanacajj jupanacjjar jutapcaspa ucürutaqui.

13. Jïsa, take jakenac taypiruw mä yatiyäw apayäna, jupanacan warminacapa, wawanacapa, uywa tamanacapa, take yänacap mayawjar apthapiñapataqui, orakenacapac jan apthapipjjañapäcänti.

14. Jupanacar muyuntir pucaranac jupajj lurayäna, ucanacan chʼamapajj sinti jachʼäñapataqui. Ucatsti, Nefi jakenacampin Laman jakenacampin nuwasiri tamanacapjja, jan ucajja, Nefi jakenacamp jaqhutäpcän take ucanacan nuwasiri tamanacapjj uñjirinacjam muytawjanacan uchayäna, urus arumasa, jupanacar lunthatanac contra saytʼasiñataqui.

15. Jïsa, jupajj jupanacarojj sänwa: Diosajj chekpachaw jaqui. Uca pachpa chekampi, janitejj jumanacajj take ñankha luratamat cutiquipstapcätajja Tatitur artʼasipcaraquïtajja, janiw cunjämats uca Gadianton lunthatanacan amparapat khespiyatäpcätati.

16. Laconeon arunacapamp yatiyäwinacapampejja, sinti jachʼa muspharcañänwa, take jakenacar ajjsarayañapcama. Jupanacasti take chʼamampiw chʼamtʼapjjäna Laconeon arunacaparjam lurañataqui.

17. Ucatsti Laconeojj take Nefi jakenacan nuwasiri tamanacapjjarojj jilïrinac ut-tʼayäna, lunthatanacajj wasarat jupanacamp nuwasir jutapcaspas ucapachajj nuwasiri tamanacar sarayañataqui.

18. Ucatjja yakha capitananacat sipan Nefi jakenacan nuwasiri tamanacapjjarojj jachʼa sarayiriw ut-tʼayatäna. Jupan sutipasti Gidgidoni satänwa.

19. Diosan yatiyir ajayuns jutir urunacat yatiyir ajayuns mä jaker jilïrinacapatac ajlliñajj take Nefi jakenac taypin lurasirïna. (Ucampis ñankha tucupcän ucapachanacanjja janiw ucjj lurapcänti). Ucat uca Gidgidonejja jupanac taypin jachʼa arjirïnjja. Jilïr taripiris uqhäm jachʼa arjiriraquïnwa.

20. Ucat jakenacajj Gidgidonir sapjjäna: Tatitut mayim, kollunacar wasarar maqhatañanacasataqui, lunthatanacar chhucjjatañanacasataqui, quipca orakenacapan jupanacar tucqhañanacasataqui.

21. Ucampis Gidgidonejj jupanacarojj sänwa: Tatitojj uca lurañat jarcʼakpan. Jiwasanacatejj jupanacamp nuwasir maqhatapjjsnajja, Tatitojj amparanacaparuw jiwasanac catuyapjjestaspa. Ucalaycu, orakenacas taypin waquichasipjjañäni; take nuwasiri tamanacasar apthapipjjañäni, janiw jupanacamp nuwasirejj sarapcañäniti, antisas suytʼapjjañäni, jupanac jiwasanacamp nuwasir jutapcan ucapachcama. Tatitojj chekpachaw jacasqui. Uca pachpa chekampejja, jiwasanacatejj ucjj lurapjjañänejja, jupaw amparanacasar jupanac catuyapjjestani.

22. Ucatsti, tunca pakallkon maranjja, uca mar tucuyataquiw Laconeon yatiyäwipajj uc-chʼpach orakjjar niy sarjjäna. Jupanacasti caballonacapa, carronacapa, vacanacapa, take uywa tamanacapa, yarananacapa, take yänacap apthapisin sarapjjäna, warankat warankata, tunca warankat tunca warankata, cawqhatejj timanacapat arjjatasiñapataqui, mayachthapisiñapatac ajllitäcän uca chekaru, take jupanacan puriñanacapcama.

23. Ajllitäcän uca orakejj Zarahemla orakënwa, Jilarquir orakeraquïnwa. Jïsa, Jilarquir orakemp Chʼusa Jaytanucut orakemp jaljcäns uca korpacama.

24. Walja walja warankanacaw Nefi sat jakenacajj uca oraken mayachthapisipjjäna. Laconeosti aynach tokenquir oraken mayachthapiyäna, alay tokenquir orakjjaru, uca jachʼa ñankhachäwin utjatap laycu.

25. Timanacapar jarcʼañataquiw jupanacajj chʼamañchasipjjäna. Mä orakena, mä taman jupanacajj utjasipjjaraquïna. Laconeon arsut arunacaparuw ajjsarapjjaraquïna, ucat take juchanacapat cutiquipstapjjäna. Mayisïwinacapansti Dios Tatituparuw artʼapjjaraquïna, jupan jupanacar khespiyañapataqui cunapachatejj timanacapajj jupanacamp nuwasir jutapcaspajj ucapachana.

26. Timanacap laycojja, jupanacajj walpin llaquisipjjäna. Gidgidonisti jupanacarojj take casta nuwasiñ armanac lurayäna, nuwasiñ isimpi, jarcʼakanacampi, wacʼanacampiw jupanacar chʼamañchasiyäna, jupan yatichäwinacaparjama.