1 Ne biakalua ne bu muvua bayidi ba Yezu bavua bikala benza ngendu ne bavua bikala bayisha bintu bivuabu bumvua ne bamona, ne bavua bikala batambuisha mu dîna dia Yezu, biakalua ne bayidi bavua bikala badisangisha pamua ne bavua bikala ne bobumua mu disambila dia bukitu ne mu dijila.

2 Ne Yezu wakadileja kabidi kudibu, bualu bavua bikala basambila Tatu mu dîna dienda; ne Yezu wakalua ne wakimana munkatshi muabu, ne wakabambila ne: Nudi basua ne nupesha ntshinyi?

3 Ne bakamuambila ne: Mukalenga, tudi basua bua ne utuambila dîna dituabikila ekelezia ewu; bualu kudi matandu munkatshi mua bantu bitangila bualu ebu.

4 Ne Mukalenga wakabambila ne: Bulelela, bulelela, ndi nnuambila ne, bua tshinyi bidi bikala ne bantu badi banungana ne batandangana bua bualu ebu?

5 Kabena babala mifundu ya Nzambi, idi yamba ne nudi ne tshia kuangata dîna dia Kilisto, didi dikala dîna dianyi anyi? Bualu ku dîna edi nenubikidibua ku dituku dia ndekelu;

6 Ne ewu yonsu udi wangata dîna dianyi, ne udi unanukila tô ne ku ndekelu, yeya muina neapandishibua ku dituku dia ndekelu.

7 Bua nanku, tshionsu tshinuenza, nenutshienza mu dîna dianyi; bua nanku nenubikila ekelezia mu dîna dianyi; ne nenubikila Tatu mu dîna dianyi bua abenesha ekelezia buanyi.

8 Ne munyi mudiyi ekelezia wanyi amu pa kumbusha yeya ubikidibua mu dîna dianyi? Bualu pikala ekelezia ubikidibua mu dîna dia Mose nanku udi muikala ekelezia wa Mose; anyi pikalaye ubikidibua mu dîna dia muntu nanku udi ekelezia wa muntu; kadi pikalaye ubikidibua mu dîna dianyi nanku udi ekelezia wanyi, pikalaye muibakibua pa lumu luimpa luanyi.

9 Bulelela ndi nnuambila ne, nudi bibakibua pa lumu luimpa luanyi; bua nanku nenuinyika tshionsu tshinudi nuinyika, ne dîna dianyi; bua nanku panuabikila Tatu, bua ekelezia, pikalabi mu dîna dianyi Tatu neanuteleja;

10 Ne pikala ekelezia muibakibua pa lumu luimpa luanyi nanku Tatu nealejamu midimu yenda nkayenda.

11 Kadi pikalayi kayi muibakibua pa lumu luimpa luanyi to, ne udi muibakibua pa midimu ya bantu, anyi pa midimu ya diabulu, bulelela ndi nnuambila ne bobu badi ne disanka bua midimu yabu bua tshikondu tshipi, ne ndekelu udi ulua ku kakesa ku kakesa, ne badi bupudibua ne bedibua mu kapia, mudi kamuyi dipingana to.

12 Bualu midimu yabu idi ibalonda, bualu badi bupudibua bua midimu yabu; bua nanku vulukayi bintu binganuambidi.

13 Monayi nganupeshi lumu luimpa luanyi, ne elu ludi lumu luimpa lunganupeshi—ne mvua mulua pa buloba bua kuenza disua dia Tatu wanyi, bualu Tatu wanyi uvua muntuma.

14 Ne Tatuanyi wakantuma bua ne mbandishibua pa mutshi mutshiamakana; ne kunyima kua mema muikala mubandishibua pa mutshi mutshiamakana, bua ne nkoka bantu bonsu kundi, bua ne bu mumvua mubandishibua kûlu kudi bantu, mena nanku bantu nebabandishibua kûlu kudi Tatu, bua kuimanabu kumpala kuanyi, bua kulumbuluishibua bua bienzedi biabu, ne bidi bikala bimpa anyi ne bidi bikala bibi—

15 Ne bua bualu ebu mvua mubandishibua kûlu; bua nanku, bilondeshila ku bukola bua Tatu nenkoka bantu bonsu kundi, bua ne balumbuluishibua bilondeshila bienzedi biabu.

16 Ne nebilua ne, ewu yonsu udi ukudimuna mutshima ne utambuishibua mu dîna dianyi neuwujibua; ne biananukilaye tô ne ku ndekelu, monayi, yeya ntshiakumupîsha to kumpala kua Tatu wanyi ku dituku adi pangimana bua kulumbuluisha ba pa buloba.

17 Ne udi kayi unanukila tô ne ku ndekelu to, yeya ki udi kabidi upudibua ne wedibua mu kapia, kudibu kabayi mua kupingana kabidi to, bua bululama bua Tatu.

18 Ne edi didi dîyi diakambilaye bana ba bantu. Ne bua bualu ebu udi ukumbaja mêyi avuaye mubambila, ne kena ushima to, kadi udi ukumbaja mêyi enda onsu.

19 Ne tshintu tshia bukoya nansha tshimua katshiena mua kubuela mu bukalenga buenda to; bua nanku tshintu nansha tshimua katshiena tshibuela mu dienda to amu pa kumbusha badi basukula bilamba biabu mu mashi anyi, bua ditabuja diabu, ne dikudimuna dia mutshima bua mibi yabu yonsu, ne lulamatu luabu ne ku ndekelu.

20 Mpindiewu etshi ki mukenji: Kudimunayi mutshima, nuenu ndekelu ya buloba yonsu, ne luayi kundi ne nutambuishibua mu dîna dianyi, bua ne nujididibua ku dipeta dia Nyuma wa Tshijila, bua ne kanuikadi ne ditoba kumpala kuanyi ku dituku dia ndekelu to.

21 Bulelela, bulelela, ndi nnuambila ne, elu ludi lumu luimpa luanyi; ne nudi bamanya bintu binudi ne tshia kuenza mu ekelezia wanyi; bualu midimu inuammonyi ngenza ayi nenuyenza penu; bualu tshinuamonyi ngenza mena atshi nenutshienza;

22 Bua nanku, panuenza bintu ebi nudi babeneshibua, bualu nenubandishibua ku dituku dia ndekelu.

23 Fundayi malu anuamonyi ne anumvu, pa kumbusha adi makandikibua.

24 Fundayi bienzedi bia bantu aba, bikalaku, mena bu mudibi bifundibua bua ebi bivua bienzeka.

25 Bualu monayi, bantu aba nebalumbuluishibua mu mikanda ivua mifundibua, ne yafundibua, bualu ku yoyi, bienzedi biabu nebimanyika kudi bantu.

26 Ne monayi, bintu bionsu bidi bifundibua kudi Tatu; bua nanku ba pa buloba nebalumbuluishibua mu mikanda yafundibua.

27 Ne manyayi ne nenuikala balumbuluishi ba bantu aba, bilondeshila ku tshilumbuluilu tshinganupesha, tshikala tshiakana. Bua nanku, mushindu kayi wa bantu unudi ne tshia kuikala? Bulelela ndi nnuambila, mena bu mundi.

28 Ne mpindiewu ndi nya kudi Tatu. Ne bulelela ndi nnuambila ne, bintu bionsu binualomba Tatu mu dîna dianyi, nebifidibua kunudi.

29 Bua nanku, lombayi, ne nenupeta; kokolayi, ne netshiunzuludibua kunudi; bualu udi ulomba, udi upeta; ne udi ukokola, netshiunzuludibua.

30 Ne mpindiewu, monayi, disanka dianyi dinena, mena ne ku tshiwudi tshia disanka, bua bualu buenu, ne bua lukongu lua bantu elu kabidi; eyowa, ne Tatu mena udi usanka, ne banjelu bansantu bonsu kabidi, bualu buenu ne bua lukongu lua bantu elu; bualu nansha umua wabu kena mujimina to.

31 Monayi, ndi musua ne numvua; bualu bua ndi ngamba bua ba lukongu lua bantu elu badi ne moyo mpindiewu; ne nansha umua wabu kena mujimina to; ne ndi ne tshiwudi tshia disanka buabu.

32 Kadi monayi, bidi binyingalaja bua lukongu lua bantu luinâyi kumbukila ku lukongu lua bantu elu, bualu badi balombolodibua bakuatshibu kudiye mena bu muvua muana wa dibutuka; bualu nebampana bua mpalata ne ngolo, ne bua tshidi musuasua ubipisha ne tshidi bivi babuela ne bîba atshi. Ne mu dituku adi nembanyoka, mena mu kupingaja kua bienzedi biabu pa mitu yabu nkayabu.

33 Ne biakalua ne pakajikija Yezu mêyi â wakambila bayidi benda ne: Buelelayi ku tshibuelelu tshifinakana; tshibuelelu tshidi tshifinakana, ne njila udi mubumbakana ki udi ulombola ku moyo, ne kudi bakesa badi bamumona; kadi tshibuelelu tshialabakana, ne njila udi munena ki udi ulombola ku lufu, ne kudi ba bungi badi bendelamu, tô ne padi butuku bulua, budi muntu nansha umua kayi mua kuenza mudimu to.