1 Jinataj maypachachus Jesus parlayta tukucharqa, chaypacha ashkha runasman qhawarqa, nerqataj: Uyarerqankichisña imatachus yachacherqani manaraj Tatayman wicharishaspa. Chayrayku pichus nisqasniyta yuyarin, ruwantaj, qhepa p’unchaypi payta oqharisaj.

2 Jinataj maypachachus Jesus chaykunata parlarqa, chaypacha yacharqa wakinkuna t’ukusqankuta, imtachus ruwanman Moisespa leyninwan, chayta parlanakorqanku. Imaraykuchus mana entienderqankuchu nisqata, mayqenchus nin ñawpaj kajkuna pasasqaña, tukuy imataj mosojyachisqa.

3 Paykunaman nerqa: Ama t’ukuychischu nisqayrayku, nishajtiy ñawpaj kajkuna pasasqaña, tukuy imataj mosojyachisqa nispa.

4 Noqaqa qankunamana niykichis, leyqa, mayqenchus Moisesman qosqa karqa, chayqa junt’asqa kasqanta.

5 uyariychis, ñoqa kani leyta qojqa, ñoqataj Israel nisqa llajtaywan tratocharqani, chayrayku ñoqapi chay ley junt’asqaña. Ñoqaqa jamuni leyta junt’aj, chayrayku tukukun.

6 Manataj profetasta chinkachinichu, imaraykuchus imatachus profetizarqanku, haykunas manaraj junt’asqaschu chayqa, niykichis, chaykuna junt’asqas kanqanku.

7 Nispataj ñawpaj kajkuna pasasqaña kasqankuta, mana chinkachinichu imachus parlasqaña karqa jamojkunamanta.

8 Imaraykuchus llajtaywan tratochasqayqa manaraj tukuy junt’asqachu. Chaywampis Moisesman qosqa ley ñoqapi tukukun.

9 Ñoqaqa ley, k’anchaytaj kani. Ñoqaman qhawankichis, tukukuykama allinta sayankichistaj chayqa, kawsankichis; imaraykuhcus pichus allinta sayan tukukuykama, payma wiñay kawsayta qosaj.

10 Ñoqa kamachisqasniyta qorqaykichis; chayrayku kamachisqasniyta junt’aychis. Kaykunataj ley, profetaspis kanku imaraykuchus cheqamanta ñoqamanta willarqanku.

11 Jinataj Jesus kaykunata parlaytawampacha, chunka iskayniyoj ajllasqasninman nerqa:

12 Qankuna yachachisqasniy kankichis; kay llajtapaj k’anchay kankichistaj, mayqen llajtachus Josej wawasninmanta puchun.

13 Kay jallp’ataj qankunapaj chayaqe jallp’a. Tataqa jallp’ata qosorqachis.

14 Manataj ni jayk’aj Tata kamachiwarqachu Jerusalempi hermanosniykichisman kayta willanayta.

15 Mana jayk’ajpis Ttaqa kmachiwarqachu paykunaman willanayta Israelpa wawasnimpa familiasninmanta, pikunatachus Tata pusarqa jaqay jallp’amanta.

16 Kayta Tataqa kamachiwarqa paykunaman willanaypaj:

17 Waj ovejas tiyapullawantaj, chaykunaqa mana kay t’aqamantachu kanku. Chay ovejastapis pusamunallaytaj tiyan. Paykunataj uyarenqanku parlasqayta; uj t’aqallataj kanqanku, uj sapan michejniyojtaj.

18 Paykunataj rumi sonqoyoj kasqankurayku, mana creesqankuraykutaj mana parlasqayta entienderqankuchu. Chayrayku Tataqa kamachiwarqa mana astawan kaymanta paykunaman ninayta.

19 Chaywampis cheqamanta niykichis, Tataqa kamachiwarqa, ñoqataj niykichis paykunamanta t’aqasqa kasqaykichista juchallikusqankurayku. Juchallikusqankuraykutaj paykuna mna yachankuchu qankunamanta.

20 Cheqamanta nillaykichistaj waj familiasta Tataqa paykunamanta t’aqasqanta. Juchallikusqankuraykutaj mana yachankuchu waj familiasmanta.

21 Cheqamanta nillaykichistaj qankunamanta parlasharqani kayta nishaspa: Waj ovejas tiyapullawantaj, chaykunataj mana kay t’aqamantachu kanku. Chay ovejastapis pusamunallaytaj tiyan. Paykunataj uyarenqanku parlasqayta; uj t’aqallataj kanqanku, uj sapan michejniyojtaj.

22 Manataj entiendiwarqankuchu. Paykunataj gentileschá kanku nispa nimakorqanku. Imaraykuchus mana entienderqankuchu gentiles Diosman kutirikojkunaman kutipunankuta paykunaj yachachisqankurayku.

23 Manataj entiendiwarqankuchu parlasqayta uyarinawankuta. Manataj entiendiwarqankuchu gentiles mna jayk’aj parlasqayta uyarinankuta, astawanqa paykunawan rikuchikuyman Santo Espiritunejllata.

24 Chaywampis, qankuna parlasqayta uyarinkichisña, rikuwankichisñataj. Qankuna ovejasniy kankichis, yupasqastaj kankichis Tataj qowasqasninwan.