1 ’A fa’aro’o mai na iā’u nei, ’outou ’o tei tītau i te parauti’a. Hi’o mai i te mato i paohia mai ai ’outou na ; ’e te vāhi po’opo’o o te ’āpo’o i ’ōhia mai ai ’outou.

2 ’A hi’o na i tō ’outou metua tāne ia Aberahama, ’e ’ia Sara, i fānau mai ia ’outou na ; ’ua pi’i au iāna ana’e iho, ’e ’ua ha’amaita’i ho’i iāna.

3 E tāmāhanahana ho’i te Fatu ia Ziona, e tāmāhanahana ’oia i tōna mau vāhi ano ato’a ; ’e e fa’ariro ’oia i tōna mēdēbara mai te ’ō Edene ra, ’e tōna vāhi pāpāmarō ra mai te ’ō a te Fatu. ’E e ’itea te ’oa’oa ’e te poupou i roto i te reira, te ha’amāuruurura’a ’e te reo hīmene ra.

4 ’A fa’aro’o mai na iā’u nei, e tō’u mau ta’ata ; ’e ’a fa’afāriu mai i tō ’outou tari’a iā’u nei, e tō’u nūna’a ; e nā ’ō nei atu te ture iā’u nei, ’e e fa’atae atu vau i tā’u parau mau ’ei ti’arama nō te mau ta’ata.

5 ’Ua fātata mai te parauti’a nā’u ra, ’e ’ua reva ’ē atu tā’u fa’aorara’a, ’e nā tō’u rima e ha’avā i te mau ta’ata. E tīa’i mai tō te mau motu iā’u, ’e e ti’aturi mai ho’i rātou i tō’u nei rima.

6 ’A nānā na i tō ’outou mata i ni’a i te mau ra’i, ’e ’a hi’o ai i raro i ni’a i te fenua ; ’e e pe’e ho’i te mau ra’i mai te au auahi ra, ’e e marau ho’i te fenua mai te ’ahu ra ; e pohe ho’i rātou ’o tē pārahi i roto mai te reira ato’a ra. ’Āre’a te fa’aorara’a nā’u ra, e ti’a ïa i te vaira’a ē a muri noa atu, ’e e ’ore roa ho’i te parauti’a nā’u ra e ha’amouhia.

7 ’A fa’aro’o mai na iā’u nei, ’outou tei ’ite i te parauti’a, te feiā tei tō ’outou ’ā’au te ture nā’u i te pāpa’ira’ahia, ’eiaha ’outou e mata’u i te fa’a’ino a te ta’ata nei ; ’eiaha ato’a ’outou e mata’u i tā rātou mau parau fa’a’ino.

8 E pau ho’i rātou i te ’amuhia e te huhu mai te ’ahu ra, ’e e ’amuhia ho’i rātou e te tu’a mai te huruhuru māmoe ra. ’Āre’a te parauti’a nā’u ra, e ti’a ïa i te vaira’a ē a muri noa atu, ’e te fa’aorara’a nā’u ra mai terā u’i i terā u’i.

9 ’A ara, ’a ara ! ’A fa’a’ahu na ia ’oe i te pūai, e te rima o te Fatu ē ; ’a ara mai tei te mau mahana i muta’a ihora. E ’ere ānei ’o ’oe tei tāpūpū ia Rahaba, ’e tei pātia i te teni ra ?

10 E ’ere ānei ’o ’oe tei ha’amārō i te tai, i te mau pape o te vāhi hōhonu rahi ; ’e ’o tei fa’ariro i te mau vāhi hōhonu o te moana ’ei ’ē’a nō te haere’a o te feiā i fa’aorahia ra ?

11 Nō reira, e ho’i fa’ahou mai tō te Fatu feiā i fa’aorahia, ’e e haere mai rātou ma te hīmene ia Ziona ; ’e e fa’akoronahia tō rātou upo’o i te ’oa’oa ’e te mo’a mure ’ore ; e ma’ue ’ē atu ho’i te ’oto ’e te autā.

12 ’O vau nei ho’i ’oia, ’oia ïa, ’o vau nei ho’i ’oia ’o tei tāmāhanahana ia ’outou. Inaha, ’o vai ho’i ’oe, i mata’u ai ’oe i te ta’ata nei, ’o tē pohe, ’e i te tamaiti a te ta’ata nei ’o tē riro mai te ’aihere ra ?

13 ’A ha’amo’e ai ho’i i te Fatu i tei hāmani ia ’oe ra, ’oia tei hohora i te mau ra’i, ’e ’ua hāmani ho’i i te fenua, i tāmau ho’i ’oe i te mata’u ’aita e mahana tu’ua, i te riri ’ū’ana o te ta’ata hāmani ’ino ra, mai te mea ra ē, ’ua fātata ’oia i te rave mai e taparahi ? ’E tei hea ho’i te riri ’ū’ana o te ta’ata hāmani ’ino ra ?

14 Tē rū nei te ta’ata fa’atītīhia i fa’ata’a-’ē-hia ra, ’ia matara ’oia, ’e ’ia ’ore ’oia ’ia pohe i roto i te tāpe’ara’a ra, ’e ’ia ’ore ’oia ’ia ’ere i te mā’a.

15 ’O vau ho’i te Fatu tō Atua ; ’o tei fa’aharuru i te mau ’are miti ra ; ’o te Fatu Sabaota tō’u nei i’oa.

16 ’E ’ua tu’u vau i tā’u mau parau i roto i tō vaha na, ’e ’ua tāpo’i au ia ’oe i te maru o tō’u nei rima, ’ia ti’a iā’u ’ia fa’atupu i te mau ra’i ’e ’ia hāmani i te fenua, ’e ’ia parau ia Ziona : ’O ’oe tō’u ra mau ta’ata.

17 ’A ara, ’a ara, ’a ti’a i ni’a, e Ierusalema, ’o tei inu i te rima o te Fatu i te ’āu’a o tōna ra riri ’ū’ana—’ua tae ho’i tā ’oe inura’a i te ota i tāvirihia nō te ’āu’a rurutaina ra—

18 ’Aore roa te hō’ē e arata’i iāna i rotopū i te mau tamari’i tamāroa tāna i fānau ra ; ’e ’aore ato’a te hō’ē e mau i tāna rima, nō te mau tamari’i tamāroa ato’a tāna i ha’api’i ra.

19 ’Ua haere mai teie nā pu’e tamāroa e to’opiti ia ’oe na ; ’e nā vai e aroha atu ia ’oe na—’o tō ’oe pau ’e tō ’oe pohe, ’e te po’ia ’e te ’o’e—’e nā roto ’ia vai e tāmāhanahana atu ai au ia ’oe na ?

20 ’Ua matapōirihia tā ’oe mau tamari’i tamāroa, maori rā ’o teie nei e to’opiti ; ’ua tārava noa rāua i raro i te ’ōmuara’a o te mau purūmu ra, mai te pua’atoro ’ōviri i te ’ūpe’a ra, ’ua ’ī rāua i te riri ’ū’ana o te Fatu, ’e i te a’o a tō ’oe ra Atua.

21 Nō reira, ’a fa’aro’o mai i teie i teienei, ’o ’oe tei ’ati i te pohe, ’e tei ta’ero, e ’ere rā i te uaina :

22 Tē nā ’ō mai ra tō ’oe Fatu, te Fatu tō ’oe Atua, ’o tei pāruru i tōna ra mau ta’ata : Inaha, ’ua rave au i te ’āu’a rurutaina i tō ’oe na rima ; te ota o te ’āu’a o tō’u ra riri ’ū’ana ; e ’ore roa ’oe e inu fa’ahou i te reira.

23 E tu’u rā vau i te reira i roto i te rima o te feiā e hāmani ’ino mai ia ’oe ; ’o tei parau mai i tō ’oe vārua ē : ’A pi’o i raro, ’ia haere tātou nā ni’a iho ia ’oe—’e ’ua tu’u ’oe i tō tino i raro mai te repo ra ’e mai te purūmu nō te feiā e haere nā ni’a iho.

24 ’A ara, ’a ara, ’a ’ahu na i tō pūai, e Ziona ; ’a ’ahu na i tō mau ’ahu nehenehe, e Ierusalema, ’e te ’oire mo’a ē ; ’e mai teie taime atu ’eiaha roa te feiā peritome ’ore ’e te vi’ivi’i e tomo mai i roto ia ’oe na.

25 ’A ueue na ia ’oe i te repo ra ; ’a ti’a i ni’a ; ’a pārahi i raro, e Ierusalema ; e tātara na ia ’oe i te mau tā’amu i ni’a i tō ’a’ī na, ’e te tamāhine fa’atītīhia nō Ziona ē.