Udiana Akpa Ŋwed Nephi

1 Ndien idahaemi edikem ete ke ini ami, Nephi, mma nketre ndikpep nditɔ eka mi iren, ete nnyin, Lehi, ŋko ama etiŋ ediwak ŋkpɔ ɔnɔ mmɔ, onyuŋ afiak etiŋ ɔnɔ mmɔ, utɔ ikpɔ ŋkpɔ Jehovah akanamde ɔnɔ mmɔ ke ndida mmɔ ŋwɔrɔ ke isɔŋ Jerusalem.

2 Ndien enye etiŋ ɔnɔ mmɔ kabaŋa mme nsɔŋ ibuot mmɔ ke mme enyɔŋ mmɔŋ, ye mme mbɔm Abasi ke ndisuhɔ uwem mmɔ, man inyaŋ okumen mmɔ.

3 Ndien enye ŋko ama etiŋ ɔnɔ mmɔ kabaŋa isɔŋ eŋwɔŋɔ, emi mmɔ ekenyenede—nte Jehovah ekenyenede mbɔm ke nditeme nnyin ete yak nnyin ifehe iwɔrɔ ke isɔŋ Jerusalem.

4 Koro, sese, enye ɔdɔhɔ ete, ami mmokut ŋkukut, ke emi ami mfiɔkde nte ke esobo Jerusalem; ndien ke ekpedi ke nnyin ima idu ke Jerusalem ke nnyin ŋko ikpitak.

5 Edi, enye ama ɔdɔhɔ ete, okposuk edi mme ukut nnyin, nnyin ima ibɔ isɔŋ eŋwɔŋɔ, isɔŋ emi emekde esio ke mme isɔŋ efen; isɔŋ emi Jehovah Abasi ekediomide ye ami ete ke eyedi isɔŋ inyene ɔnɔ ubon mi. Iŋ, Jehovah ama odiomi isɔŋ emi ɔnɔ mi, ye nditɔ mi ke nsinsi, ndien ŋko kpukpru mbon emi edidade iwɔrɔ ke mme idut efen oto ke ubɔk Jehovah.

6 Ke ntre, ami, Lehi, ntiŋ prophecy ntiene mme ndausuŋ Spirit emi odude ke ami, nte ke owo ndomokiet ididukke ke isɔŋ emi ibɔhɔke ubɔk Jehovah edida mmɔ idi.

7 Ke ntre, esio isɔŋ emi enim enɔ enye emi enye edidade idi. Ndien edieke edide nte ke ana mmɔ enam utom enɔ enye etiene mbet emi enye ɔnɔde, enye eyedi isɔŋ uwɔrɔ ufin ɔnɔ mmɔ; ke ntre, owo ididaha mmɔ isuhɔre iduk ke nkpɔkɔbi; edieke edide ntre, edidi ke ntak ukwaŋ-ŋkpɔ; koro edieke ukwaŋ-ŋkpɔ edidude eyesuŋi isɔŋ ke ntak mmɔ, edi ke ntak ndinen owo eyediɔŋ enye ke nsinsi.

8 Ndien sese, edi ifiɔk ete yak edip mme idut efen ifiɔk kabaŋa isɔŋ emi ke ini emi; koro sese, ediwak idut eyetara eyɔhɔ isɔŋ emi, tutu ete ke ebiet ididuhe inɔ se enyenede.

9 Ke ntre, ami, Lehi, mma mbɔ eŋwɔŋɔ, nte kadaŋa ini emi mbon emi Jehovah Abasi edidade iwɔrɔ ke isɔŋ Jerusalem edinimde mbet esie, mmɔ eyeforo ke iso isɔŋ emi; ndien eyedip mmɔ kabaŋa mme idut efen, man mmɔ eda isɔŋ emi enyene enɔ idem mmɔ. Ndien edieke edide nte ke mmɔ eyenim mbet esie eyediɔŋ mmɔ ke iso isɔŋ emi, ndien owo ndomo kiet ididuhe ndifina mmɔ, mme ndimen isɔŋ inyene mmɔ mfep; ndien mmɔ eyedu ke emem ke nsinsi.

10 Edi sese, ke ini edide ŋte ke mmɔ eyetaha ke unana edinim, ke ini mmɔ ema ekebɔ mme ata akamba edidiɔŋ eto ubɔk Jehovah—ke ema ekenyene ifiɔk ebaŋa edibot ererimbot, ye kpukpru owo, ke efiɔkde ebaŋa akwa ye mme utibe utom Jehovah tɔŋɔ ke edibot ererimbot; ke ekenyenede odudu emi ɔnɔde mmɔ ndinam kpukpru ŋkpɔ ke mbuɔtidem; ke ekenyenede kpukpru mme mbet tɔŋɔ ke eritɔŋɔ, ke ema ekeda anana utit mfɔn esie eda mmɔ edi ke isɔŋ eŋwɔŋɔ emi ekemekde—sese, ami ndɔhɔ nte, edieke usen edidide ete ke mmɔ esin Edisana Abasi Israel, Messiah akpanikɔ, Andifak mmɔ ye Abasi mmɔ, sese, mme ubiere ikpe eke enyemi edide edinen eyedoro mmɔ ke idem.

11 Iŋ, enye ayada mme idut efen ɔnɔ mmɔ, ndien enye ɔyɔnɔ mmɔ odudu, ndien enye eyebɔ mmɔ mme isɔŋ emi mmɔ ekenyenede, ndien enye ayanam esuan enyuŋ emia mmɔ.

12 Iŋ, nte emana kiet ebede esim efen mme uduɔk iyip eyedu, ye akamba ufen ke ufɔt mmɔ; ke ntre, nditɔ mi iren, ami nyom nte yak mbufo eti; iŋ, ami nyom nte yak mbufo ekpaŋ utɔŋ enɔ mme ikɔ mi.

13 O ete yak mbufo edemede; edemede ke ntɔtuŋɔ idap, iŋ, kpa ke idap hell, enyuŋ ekibi mme idiɔk ŋkpɔkɔbi emi ebɔpde mbufo, emi edide mme ŋkpɔkɔbi emi ebɔpde nditɔ owo, man etaŋ mmɔ ewɔrɔ nte mbon ŋkpɔkɔbi esuhɔre eka ke nsinsi ukpe ukut ye idiɔkŋkpɔ.

14 Edemede! enyuŋ edaha eda ke ntɔŋ, enyuŋ ekop mme ikɔ ete emi idem enyekde, ndido esie emi mbufo ke midibihike ana nte mbufo enim ke mbit mbit ye ndobo udi, ebiet emi asaŋa isaŋ ndomo kiet mikanke inyɔŋ idi; usen ifaŋ ɔsuhɔ ndien ami ŋka usuŋ ofuri ererimbot.

15 Edi sese, Jehovah afak ukpɔŋ mi osio ke hell; ami mmokut ubɔŋ esie, ndien mme ubɔk ima esie ekanare mi ekuk ke nsinsi.

16 Ndien ami nyene udɔŋ nte yak mbufo eti ndinam mme ewuhɔ ye mme ubiere ikpe Jehovah; sese, emi ekedi udɔŋ ukpɔŋ mi tɔŋɔ ke eritɔŋɔ.

17 Esit mi ɔfuhɔ ye ndutuhɔ ke ini ke ini, koro ami mma mfehe ndik, nte ke ntak isɔŋ esit mbufo Jehovah Abasi mbufo ɔyɔwɔrɔ edi ke uyɔhɔ iyaresit esie kabaŋa mbufo, man esibe mbufo osio enyuŋ esobo ke nsinsi;

18 Mme, ete yak isuŋi esim mbufo ke ufaŋ ediwak emana; ndien ofut, ye akaŋ, ye usua, esim mbufo, ndien eda mbufo usuŋ etiene uduak ye ŋkpɔkɔbi eke andidiɔk.

19 O nditɔ iren mi, ete man mme ŋkpɔ emi ekusim mbufo, edi ete man mbufo edi mme owo emi Jehovah emekde onyuŋ amade. Edi sese, ayanam uduak esie; koro mme usuŋ esie edi nnen nnen ke nsinsi.

20 Ndien enye ɔkɔdɔhɔ ete: Adaŋa nte mbufo edinimde mme mbet mi mbufo eyeforo ke isɔŋ oro; edi kadaŋa nte mbufo midinimke mme mbet mi eyesibe mbufo esio ke iso mi.

21 Ndien idaha emi man ukpɔŋ mi enyene idaresit ke mbufo, ndien man esit mi ɔkpɔŋ ererimbot emi ye inemesit ke ntak mbufo, man mfuhɔ ye ndutuhɔ edida mi esuhɔde uduk ke udi, edaha eda ke ntɔŋ, nditɔ mi iren, enyuŋ edi irenowo, enyuŋ esɔŋɔ ke ekikere kiet ye esit kiet, ediana kiet ke kpukpru ŋkpɔ, man mbufo idisuhɔre iduk ke nkpɔkɔbi;

22 Man owo edisuŋi mbufo ye idiɔk isuŋi; ndien ŋko, man mbufo edida iyaresit edinen Abasi inɔ idem mbufo, tutu esim nsobo, iŋ, nsinsi nsobo eke ukpɔŋ ye obukidem.

23 Edemede, nditɔ mi iren; esine ŋkpɔ-ekɔŋ edinen ido. Ekibi mme nkpɔkɔbi emi ebɔpde mbufo, enyuŋ ewɔrɔ ke ebiet emi etiede nnan-nnan, enyuŋ edaha eda ke ntɔŋ.

24 Ekusɔŋ ibuot aba ye eyen eka mbufo, emi ekikere esie edide eti, ye emi ekenimde mme mbet tɔŋɔ ke ini emi nnyin ikikpɔŋde Jerusalem; ye emi ekedide ŋkpɔ utom ke ubɔk Abasi, ke ndida nnyin ndiduk ke isɔŋ eŋwɔŋɔ; koro ekpedi ikedihe ke ntak esie, nnyin ikpitak ye biɔŋ ke ikɔt; edi, mbufo eyom ndimen uwem esie mfep; iŋ, ndien enye ɔyɔ ediwak ndutuhɔ ke ntak mbufo.

25 Ndien ami mfehe ndik ata eti eti nnyuŋ nnyek idem ke ntak mbufo, mbak enye edifiak ɔbɔ ndutuhɔ; koro sese, mbufo emedɔhɔ ete ke enye oyom odudu ye unen ndikara mbufo; edi ami mmɔfiɔk nte ke enye iyomke odudu ye unen ndikara mbufo, edi enye oyom ubɔŋ Abasi, ye nsinsi uwam mbufo.

26 Ndien mbufo emekuni ke ntak emi enye edide inwaŋ-inwaŋ ye mbufo. Mbufo edɔhɔ ete ke enye ada nsɔŋ-ido; mbufo edɔhɔ ete ke enye ayat esit ye mbufo; edi sese, nsɔŋ-ido esie ekedi nsɔŋ-ido odudu ikɔ Abasi, emi okodude ke enye; ndien enyemi mbufo ekotde iyaresit ekedi akpanikɔ, nte enyemi odudu ke Abasi, emi enye mikikanke ikpan, ayarade ye uko kabaŋa mme ukwaŋ-ŋkpɔ mbufo.

27 Ndien enye ana edi nte ke odudu Abasi ana odu ye enye, kpa ke enye ndinɔ mbufo uyo ete ana mbufo esuk ibuot. Edi sese, ikidihe enye, edi ekedi Spirit Jehovah emi okodude ke enye, emi ɔkɔkubɔre inua esie nditiŋ ikɔ ndien enye ikikanke ikibi enye.

28 Ndien idahaemi eyen mi, Laman, ndien ŋko Lemuel ye Sam, ndien ŋko nditɔ mi iren emi edide nditɔ iren Ishmael, sese, edieke mbufo edikpaŋde utɔŋ inɔ uyo Nephi mbufo iditakke. Ndien edieke mbufo edikpaŋde utɔŋ inɔ enye ami mkpɔŋ mbufo ye edidiɔŋ, iŋ, kpa akpa edidiɔŋ mi.

29 Edi edieke mbufo midikpaŋke utɔŋ inɔ enye ami mmen akpa edidiɔŋ mi mfep, iŋ, kpa edidiɔŋ mi, ndien enye eyedoro enye ke idem.

30 Ndien idahaemi, Zoram, ami ndɔhɔ fi nte: Sese, afo edi eyen ufɔk Laban; edi, eda fi ewɔrɔ ke isɔŋ Jerusalem, ndien ami mefiɔk nte ke afo edi eti ufan ɔnɔ eyen eren mi, Nephi, ke nsinsi.

31 Ke ntre, ke ntak emi afo ɔbuɔtde idem eyediɔŋ ubon fo ye ubon esie, man mmɔ eduŋ ebihi ke uforo ke iso isɔŋ emi; ndien ŋkpɔ ndomokiet, ibɔhɔke ukwaŋ-ŋkpɔ ke ufɔt mmɔ, edibiat mme edifina uforo mmɔ ke iso isɔŋ emi ke nsinsi.

32 Ke ntre, edieke afo edinimde mme mbet Jehovah, Jehovah osio isɔŋ emi enim ɔnɔ ndikpeme ubon fo ye ubon eyen eren mi.