1 Edi, ŋkim-ŋkim ididihe nte ukut emi okodude ke enye, nte ke akpa ini emi enye eke anamde ukut isɔŋ Zebulum efere, ye isɔŋ Naphtali, ndien ke ini iso eyenam ata ukut ke usuŋ Ididuot Inyaŋ ke ema ebe Jordan ke Galilee mme idut.

2 Mme owo emi ekesaŋade ke ekim ekut akwa uŋwana; mmɔ emi eduŋde ke isɔŋ mfut mkpa, ke mmɔ ke uŋwana ayama.

3 Afo amanam idut ɔtɔt, onyuŋ anam idaresit okpon—mmɔ edat esit ke iso fo kpa nte edatde esit ke ini ukpeŋe, ŋko nte mme owo edatde esit ke ini mmɔ edemede mbume.

4 Koro afo omobuŋ ɔkpɔnɔ mbiomo esie, ye eto afara esie, ye esaŋ andifik enye.

5 Koro kpukpru ekɔŋ ekeŋwana ekɔŋ edi ye uyom ntime, ndien mme ɔfɔŋ ewere ke iyip; edi emi eyedi ye se edifɔpde ye udia ikaŋ.

6 Koro eyen amana ɔnɔ nnyin, enɔ nnyin eyen-eren; ukara onyuŋ odoro enye ke afara; enyuŋ ekot enye enyiŋ, Utibe, Ɔnɔ-item, Ɔkpɔsɔŋ Abasi, Nsinsi Ete, Ɔbɔŋ Emem.

7 Nkɔri ukara ye emem inyeneke utit, ke ebekpo David, ye ke itie ubɔŋ esie man enim enye, enyuŋ esiak enye ye ubiere ikpe ye nnen nnen ido tɔŋɔ ke emi ye ke nsinsi. Ufup Jehovah mme Udim ayanam emi.

8 Jehovah ama ɔnɔ ikɔ esie esɔk Jacob ndien enye odoro ke Israel.

9 Ndien kpukpru owo eyefiɔk, kpa Ephraim ye mme andiduŋ ke Samaria, emi edɔhɔde ke ntaŋidem ye odudu esit ete:

10 Mme brick eduɔ ke isɔŋ, edi nnyin iyebɔp ye mme itiat emi esɔide; esibe mme sycamore eduɔŋɔ, edi nnyin iyekpuhɔ mmɔ isin ke mme cedar.

11 Ke ntak oro Jehovah eyemenede mme asua Rezin abaŋa enye, onyuŋ adian mme asua esie kiet;

12 Mme Syrian ke iso ye mme Philistine ke edem; ndien mmɔ eyeŋwaŋade inua eta Israel. Koro inamke ofuri iyaresit esie afiak edem, edi ubɔk esie osuk anyanyan.

13 Koro mbio emi ikabakede ibine enye emi akamiade mmɔ, ndien mmɔ itieneke Jehovah mme Udim.

14 Ke ntak oro ke Jehovah edisibe ibuot ye isim isio ke Israel, ŋkɔk ye mkpɔŋ-isɔŋ ke usen kiet.

15 Ebio-owo, enye edi ibuot; ndien prophet emi ekpepde mme nsu, enye edi isim.

16 Koro mmɔ emi edade mme owo emi usuŋ enam mmɔ edue; ndien esobo mmɔ emi mmɔ edade usuŋ.

17 Ke ntak oro Jehovah idinyeneke idaresit ke mkparawa mmɔ, ndien idinyeneke mbɔm ibaŋa nditɔ-akpa mmɔ ye mme ebekpa mmɔ; koro kpukpru mmɔ kiet kiet edide oburobut ye mme anam idiɔk, ndien kpukpru inua etiŋ ndisime. Koro inamke ofuri iyaresit esie afiak edem, edi ubɔk esie osuk anyanyan.

18 Koro ibak asakde nte ikaŋ; enye ayata mme akpap ye mme ŋkukim, onyuŋ obubede ke mfuhɔ mme akai, ndien mmɔ eyedɔk ke enyɔŋ nte nsuŋikaŋ emi emenede.

19 Oto ke iyaresit Jehovah mme Udim ke enam isɔŋ ekim, ndien mme owo eyebiet udia ikaŋ; owo ndomo kiet iyakke eyen eka esie ɔbɔhɔ.

20 Ndien enye eyewabade ɔbɔ ye ubɔk nnasia edi etie biɔŋ; ndien enye ayadia ye ubɔk ufien ndien mmɔ idikopke uyuhɔ; mmɔ kiet kiet ayata obuk ubɔk esie—

21 Manasseh, Ephraim; ye Ephraim, Manasseh; mmɔ mbiba eyenam ikɔ ye Judah. Koro inamke ofuri iyaresit esie afiak edem, edi ubɔk esie osuk anyanyan.