1 Kunantaj yachanaykichista munayman tatayqa wawasninmanta sut’inchasqantawan, Señorqa watejmanta paymana parlarqa nispa mana allin kasqanta paypaj, Lehi, sapan amilianta ch’in pampasman pusanampaj. Astawanqa qhari wawasnin warmista pusamunanku karqa paykunawan kasarakunankupaj, wawasta Señorpaj mirachinankupaj prometisqa jallp’api.

2 Jinataj Señorqa payta kamacherqa ñoqa, Nefi, hermanosniywan, watejmanta Jerusalen jallp’aman kutinaykuta Ismaelta, familiantawan ch’in pampasman pusanaykupaj.

3 Jinataj ñoqa, Nefi, hermanosniywan watejmanta ch’in pampasnejta puererqayku, Jerusalenman wicharinaykupaj.

4 Jinataj Ismaelpa wasinman rerqayku. Ismaeltaj allinta jap’iwarqayku, chayrayku Señorpa nisqanta payman yachacherqayku.

5 Jinataj Señorqa ismaelpa sonqonta, wasipi kajkunaj sonqonkutawan llamp’uyacherqa. Chayrayku paykuna ch’in pampasnejta tataypa carpanman ñoqaykuwan uraykorqanku.

6 Jinataj ch’in pampasnejta purejtiyku Lamanqa, Lemuelwan iskay Ismaelpa warmi wawasninwan, iskay ismaelpa qhari wawasninwan familiasninkuwan ima, ñoqaykoj contraykuta ch’ajwarqanku. Arí, ñoqaj, Nefi, Sampa, tatankoj, Ismaelpa, warmimpa, kinsa warmi wawasnimpawan contraykuta ch’ajwarqanku.

7 Jinataj ch’ajwayninkupi paykuna Jerusalen jallp’aman kutipuyta munarqanku.

8 Chantaqa ñoqa, Nefi, phutikorqani rumi sonqoyoj kasqankurayku. Chayrayku paykunaman parlarqani, arí, Lamanman, Lemuelmampis parlarqani nispa: Uyariychis, qankuna kuraj hermanosniy kankichis. ¿Imajtintaj ñoqa, sullk’a hermanoykichista, necesitawankichis parlasunaykichispaj, imaynatachus kawsayta rikuchisunaykichispajtaj rumi sonqoyoj, yuyayniykichispi ciegoyasqataj kasqaykichisrayku?

9 ¿Imaynataj mana Señorpa parlasqanta uyarinkichisri?

10 ¿Imaynataj Señorpa angelninta rikusqaykichista qonqankichisri?

11 Arí, ¿Imaynataj Señorpa ñoqanchispaj allin ruwasqasninta qonqankichis Labampa makisninmanta ayqeyta yanapawasqanchista, escribisqasta jap’isqanchistawan?

12 Arí, ¿Imaynataj qonqawajchis Señor tukuy imata ruwananta munayninman jina, runaspa wawasninkupaj, paypi feniyoj kajtiku? Chayrayku paypi feniyoj kasunchis.

13 Ñoqanchischus paypi feniyoj kanchis chayqa, prometisqa jallp’ata jap’isunchispuni. Yachallankichistaj uj jamoj p’unchaypi Señorpa nisqan Jerusalen tukuchisqa kananmanta, chay junt’asqa kanqa. Imaraykuchus tukuy Señorpa Jerusalen tukuchisqa kananmanta nisqasnin junt’asqas kanqanku.

14 Imaraykuchus usqhayta Señorpa Espiritun manaña paykunawan churanakunchu, profetasta qhesachasqankurayku, Jeremiastapis presochasqankuraykutaj. Paykunataj tatayta wañuchiyta munarqanku payta jallp’amanta qharqonkukama.

15 Kunantaj uyariychis, imaraykuchus niykichis qankunachus Jerusalen jallp’aman kutipunkichis chayqa, qankunapis paykunawan tukuchisqas kankichis. Kunantaj ajllayta atispaqa, kutipuychis Jerusalen jallp’aman, ñoqaj parlasusqaykichista yuyariychistaj, nispa chay jallp’aman kutipunkichis hayqa, tukuchisqas kankichis. Imaraykuchus ajinata Santo Espiritu parlachiwan.

16 Jinataj ñoqa, Nefi, chaykunata hermanosniyman parlasqaytawan, paykuna ñoqawan phiñakorqanku. Jinataj ñoqata jap’iwarqanku, ancha phiñasqa kasqankurayku. Waskhaswantaj watawarqanku, wañuchiwayta munasqankurayku ch’in pampaspi saqenawankupaj, animales mikhunawankupaj.

17 Chaywampis Señormanta mañakorqani nispa: O Señor, qampi feniyoj kasqayman jina, hermanosniypa makisninkumanta ayqeyta yanapariway. Arí, kallpachariway kay waskhasta p’itinaypaj, mayqen waskhaswanchus watasqa kani.

18 Jinataj chay jinata parlasqaytawan, waskhasqa makisniymanta, chakisniymantawan kacharikorqanku. Ñoqataj watejmanta hermanosniypa ñawpaqenkupi sayarerqani, paykunaman parlarqanitaj.

19 Jinataj watejmanta ñoqawan phiñakorqanku, makisninkuwantaj ñoqata jap’iyta munarqanku. Chaywampis Ismaelpa warmi wawasninmanta ujnin kaj, arí, mamanwan, Ismaelpa qhari wawasninmanta ujnin kajwan ima, hermanosniymanta mañakorqanku. Chayrayku sonqosninkuta llamp’uyacherqanku. Paykunataj manaña wañuchiwayta munarqankuchu.

20 Jinataj sonqosninku nanarqa sajrata ruwasqankurayku. Chayrayku paykuna ñawpaqeypi k’umuykuspa mañakuwarqanku juchasninkuta pampachanayta.

21 Jinataj ñoqaqa sut’inta tukuy paykunaj sajra ruwasqasninkuta pampacharqani. Ñoqataj paykunaman parlarqani Señor Diosninkumanta mañakunankupaj juchasninkuta pampachanampaj. Jinataj ajinata ruwarqanku. Señormanta mañakusqankutawan watejmanta purerqayku tataypa carpannejman.

22 Jinataj tataykoj carpanman chayarqayku. Ñoqaqa, hermanosniywan, tukuy Ismaelpa wasinmanta kajkunawan tataypa carpanman chayasqaykutawan, chaypacha paykunaqa Señor Diosninkuman agradecerqanku; paykunataj sacrificiosta, ruphachina uywastawan payman jaywarqanku.