Ma Suhmuhslah
1 Nephi 6


Sapta 6

Nephi el sihmihs ke ma luhn God—Srihpac lal Nephi pa in kwacfe mwet uh in tuhkuh nuh yurun God lal Abraham ac in moliyucklac. Sahp ke yac 600–592 Met Liki Kraist.

1 Ac inge nga, Nephi, tiacna sang tahk in sucu luhn pahpah tuhmuhk nuh ke ip se inge ke ma sihmlac luhk; nga ac fah tiacna pac ke kuhtwena pacl fahlac sang ma inge nuh fin plwet inge ma nga sihm kac; tuh ma inge ituckyang nuh ke ma sihmlac ma karihngihnyuck sin pahpah tuhmuhk; ohinge, nga tiac sihmihs ma inge ke orekma se inge.

2 Tuh fal nuh sihk in fahk lah kuht fihlin mwet lal Joseph.

3 Ac tiac ma se nuh sihk tuh nga in arulacna sollac in oruh sie sramsram ma fohnlah ke ma nuhkwewa luhn pahpah tuhmuhk, tuh ma inge tiacna kuh in sihmlac fin plwet inge, tuh nga kena in mwesahs nga in kuh in sihmihs ke ma luhn God.

4 Tuh kena yohk luhk uh pa lah nga in kuh in kwacfe mwet uh in tuhkuh nuh yurun God lal Abraham, ac God lal Isaac, ac God lal Jacob, ac in moliyucklac.

5 Ohinge, ma wo nuh facluh uh nga tiac sihmihs, tuhsruhk ma wo nuh sin God ac nuh selos suc tiac ma ke facluh uh.

6 Ohinge, nga fah sang masap nuh sin fihtac luhk, tuh elos fah tiac nwacklah plwet inge ke ma suc wacngihn srihpac nuh sin tuhlihk nuhtin mwet.