1 Ne biakalua ne kunyima kua tuetu bapueka mu tshipela kudi tatuetu, monayi, wakuwujibua ne disanka, ne mamuanyi, Saliya, kabidi, uvua ne disanka menamena, bualu uvua bulelela mudila bua bualu buetu.

2 Bualu uvua mutshinka ne tuvua bafua mu tshipela; ne uvua kabidi mudiwula tatuanyi, umuambila ne uvua muntu wa bimônyi; wamba ne: Mona watupatuishi ku bulaba bua bupianyi buetu, ne bana banyi ba baluma kabatshienaku to, ne tudi tufua mu tshipela.

3 Ne ku mushindu wa ngakuilu ewu ki muvua mamuanyi mudiwula tatuanyi.

4 Ne bivua bikala bilua ne tatuanyi wakakula kudiye, wamba: Ndi mumanya ne ndi muntu wa bimônyi; bualu bu ntshiyi mumona malu a Nzambi mu tshimônyi to, ntshivua mmanya buimpa bua Nzambi to, kadi mvua kushala ku Yelushalema, ne kufua ne bana betu.

5 Kadi mona, ndi mupeta bulaba bua mulayi, mu malu â ndi musanka; eyowa, ne ndi mumanya ne Mukalenga neupatuisha bana banyi ba baluma mu bianza bia Labana, ne neabapuekesha kabidi kutudi mu tshipela.

6 Ne ku mushindu wa ngakuilu ewu tatuanyi, Lehi, wakasamba mamuanyi, Saliya, bitutangila, patutshivua tuenza luendu mu tshipela tubanda ku bulaba bua Yelushalema, bua kupeta miandiku ya Bena Yuda.

7 Ne patuakapingana ku ntenta wa tatuanyi, monayi disanka diabu divua diwula ntenta, ne mamuanyi wakasambibua.

8 Ne wakakula, wamba: Mpindiewu ndi mumanya bushuwa ne Mukalenga udi mupesha bayanyi mukenji bua kunyema mu tshipela; eyowa, ne ndi kabidi mumanya bushuwa ne Mukalenga udi mukuba bana banyi ba baluma, ne mubupatuisha mu bianza bia Labana, ne mubapesha bukola bua kukumbaja tshintu tshivua Mukalenga mubapesha mukenji. Ne wakakula ku mushindu wa ngakuilu ewu.

9 Ne biakalua ne bakasanka menamena, ne bakafila mulambu ne milambu miôsha kudi Mukalenga; ne bakasakidila Nzambi wa Isalele.

10 Ne kunyima kua bobu bakasakidila Nzambi wa Isalele, tatuanyi, Lehi, wakangata miandiku ivua mikanunyibua pa bitata bia tshiamua tshia kalabi, ne wakayikebulula kumbukila ku mbangilu.

11 Ne wakamona ne ivua ne mikanda itanu ya Mose, ivua ilonda mulubu wa bufuki bua buloba, ne kabidi bua Adama ne Eva, bavua bikala baledi betu ba kumpala;

12 Ne kabidi miandiku ya Bena Yuda ya katshia ku mbangilu, mena ne ku ntuadijilu wa bumfumu bua Sedekiya, mfumu wa Yuda;

13 Ne kabidi mêyi a buprofete a baprofete bansantu, katshia ku mbangilu, mena ne ku ntuadijilu wa bumfumu bua Sedekiya; ne kabidi mêyi a bungi a buprofete avua mikala makudibua mu mukana mua Yelemiya.

14 Ne biakalua ne tatuanyi, Lehi, wakasangana kabidi pa bitata bia tshiamua tshia kalabi bulondanganyi bua batatuenda; bua nanku wakamanya ne uvua kankanunuina ka Yosefe; eyowa, mena Yosefe awu uvua muana wa Yakoba wa baluma, uvua mupanyibua mu Ejipitu, ne uvua mukubibua kudi tshianza tshia Mukalenga, bua akuba tatuenda, Yakoba, ne ba mu nzubu muenda bonsu ku difua ne tshiyola.

15 Ne bavua kabidi bakapatudibua mu bukuatshibu ne mu bulaba bua Ejipitu, kudi Nzambi awu umua uvua mubakuba.

16 Ne nanku tatuanyi, Lehi, wakajandula bulondanganyi bua batatuenda. Ne Labana kabidi uvua kankanunuina ka Yosefe, bua nanku yeya ne batatuenda bavua balama miandiku.

17 Ne mpindiewu pakamona tatuanyi malu onsu â, wakujibua ne Nyuma, ne wakabanga kuamba mêyi a buprofete bitangila ndelanganyi yenda—

18 Ne bitata bia tshiamua tshia kalabi ebi nebiya kudi bisamba bionsu, bîsa bionsu, miakulu yonsu, ne bantu bonsu badi bikala ba ku ndelanganyi yenda.

19 Pananku, wakamba ne bitata ebi bia tshiamua tshia kalabi kabiakujimina nansha; anyi dibalakana diabi kadiakututuka kabidi kunyima kua bikondu to. Ne wakamba mêyi a buprofete pa malu a bungi bitangila ndelanganyi yenda.

20 Ne biakalua ne tô ne apa mema ne tatuanyi tuvua balama mikenji ivua Mukalenga mutupeshela mukenji.

21 Ne tuakapeta miandiku ivua Mukalenga mutupeshela mukenji, ne tuakayikebulula ne tuakasangana ne ivuabu mua kujinga; eyowa, mena ivua ne mushinga munena kutudi, bua ne tuvua mua kukuba mikenji ya Mukalenga bua bana betu.

22 Bua nanku, bivua lungenyi mu Mukalenga ne tuya nayi, bu mutuvua tuenza luendu mu tshipela batangila ku bulaba bua mulayi.