1 Pea ko e tahá: Tokanga mai, ʻA kimoutolu ʻe fale ʻo ʻIsileli, ʻa kimoutolu kotoa pē kuo motuhi atú, pea kuo kapusi ki tuʻa koeʻuhi ko e fai angahala ʻa e kau taki fakalotu ʻo hoku kakaí; ʻio, ʻa kimoutolu kotoa pē kuo motuhi atú, ʻa ia kuo fakamovetevetea holo ʻi he ngaahi tukui fonua, ʻa ia ʻoku ʻo hoku kakaí, ʻE fale ʻo ʻIsileli. Fanongo, ʻA e ngaahi motú, kiate au, pea tokanga mai ʻa kimoutolu ʻa e kakai mei he mamaʻó; kuo ui au ʻe he ʻEikí mei he manavá; talu ʻeku ʻi he fatu ʻo ʻeku faʻeé mo ʻene folofola ʻaki hoku hingoá.

2 Pea kuó ne ngaohi hoku ngutú ke hangē ko ha heletā māsila; ʻi he malumalu ʻo hono toʻukupu kuó ne fufuuʻi au, mo ngaohi au ko ha ngahau ngingila; kuó ne fufuuʻi au ʻi hono hōfangahaú;

3 Peá ne folofola mai kiate au: Ko ʻeku tamaioʻeiki koe, ʻE ʻIsileli, ʻa ia ʻe fakalāngilangiʻi ai au.

4 Pea naʻá ku pehē ange, Kuó u ngāue taʻeʻaonga, kuó u fakamoleki hoku iví ʻi he meʻa noa mo taʻeʻaonga; ko e moʻoni ʻoku ʻi he ʻEikí ʻa ʻeku fakamāú, pea mo ʻeku ngāué ʻi hoku ʻOtuá.

5 Pea ko ʻeni, ʻoku folofola ʻe he ʻEikí—ʻa ia naʻá ne fakatupu au mei he manavá ke u hoko ko ʻene tamaioʻeiki, ke toe ʻomi ʻa Sēkope kiate ia—neongo ʻoku teʻeki tānaki ʻa ʻIsileli, kā te u ongoongolelei pē ʻi he ʻao ʻo e ʻEikí, pea ʻe hoko ʻa hoku ʻOtuá ko hoku mālohi.

6 Pea naʻá ne folofola: Ko e meʻa maʻamaʻa hoʻo hoko ko ʻeku tamaioʻeiki ke fokotuʻu hake ʻa e ngaahi faʻahinga ʻo Sēkopé, pea fakafoki ʻa e kakai ʻo ʻIsileli kuó u fakahaofí. Te u foaki foki koe ko ha maama ki he kau Senitailé, koeʻuhi ke ke hoko ko ʻeku fai fakamoʻui ki he ngaahi ngataʻanga ʻo e māmaní.

7 Ko ia ʻoku folofola ʻe he ʻEiki, ko e Huhuʻi ʻo ʻIsilelí, ko hono Tokotaha Māʻoniʻoní, kiate ia ʻoku fehiʻa ki ai ʻa e tangatá, kiate ia ʻoku fakaliliʻa ki ai ʻa e ngaahi puleʻangá, ki he tamaioʻeiki ʻa e kau pulé: ʻE mamata ʻa e ngaahi tuʻí pea nau tuʻu hake, ʻe hū foki ʻa e kau pilinisi kiate ia, koeʻuhi ko e ʻEiki, ʻa ia ʻoku faitotonu.

8 Ko ia ʻoku folofola ʻe he ʻEikí: Kuó u fanongo kiate koe ʻi hono taimi totonu, ʻE ngaahi motu ʻo e tahí, pea ʻi ha ʻaho ʻo e fakamoʻuí kuó u tokoni ai kiate koe; pea te u fakatolonga koe, pea foaki kiate koe ʻa ʻeku tamaioʻeiki ke hoko ko ha fuakava ʻo e kakaí, ke nofoʻi ʻa e māmaní, pea fakafoki kiate koe ʻa e ngaahi fonua kuo lalá ke hoko ko ho ngaahi tofiʻa;

9 Koeʻuhi ke ke pehē ki he kau pōpulá: ʻAlu atu; kiate kinautolu ʻoku nofo ʻi he fakapoʻulí: Fakahā ʻa kimoutolu. Te nau kai tauʻatāina ʻi he ngaahi hala, pea ʻe ʻi he ngaahi potu māʻolunga kotoa pē ʻa honau ngaahi ngoue maʻuiʻuí.

10 ʻE ʻikai te nau fiekaia pe fieinua, pea ʻe ʻikai foki teʻia ʻa kinautolu ʻe he velá pe ko e laʻaá; he ko ia ʻokú ne ʻaloʻofa kiate kinautolu te ne tataki ʻa kinautolu, ʻio te ne tataki ʻa kinautolu ʻi he ngaahi veʻe matavaí.

11 Pea te u ngaohi hoku ngaahi moʻungá kotoa pē ko e hala, pea ʻe hakeakiʻi hoku ngaahi hala lalahí.

12 Pea ko ia, ʻE fale ʻo ʻIsileli, vakai, ʻe haʻu ʻa kinautolú ni mei he mamaʻó; pea vakai, ko kinautolu ní mei he tokelau, pea mei he lulungá; pea mo kinautolú ni mei he fonua ʻo Sinimí.

13 Hiva, ʻE ngaahi langi; pea fiefia, ʻE māmani; he ʻe fokotuʻu maʻu ʻa e vaʻe ʻo kinautolu ʻoku ʻi he potu hahaké; pea pā mai ʻi he hiva, ʻE ngaahi moʻunga; koeʻuhi ʻe ʻikai toe teʻia ʻa kinautolu; he kuo fakafiemālieʻi ʻe he ʻEikí ʻa hono kakaí, pea te ne ʻaloʻofa ki hono kakai kuo faingataʻaʻiá.

14 Kae, vakai, kuo pehē ʻe Saione: Kuo liʻaki au ʻe he ʻEikí, pea kuo fakangaloʻi au ʻe hoku ʻEikí—ka te ne fakahā kuo ʻikai.

15 He ʻoku lava koā ʻe ha fefine ʻo fakangalongaloʻi ʻa ʻene tama ʻoku kei huhú, ʻo ʻikai ai te ne maʻu ha ʻofa mamahi ki he tama ʻo hono manavá? ʻIo, te nau faʻa fakangaloʻi, ka ʻe ʻikai te u fakangaloʻi koe, ʻE fale ʻo ʻIsileli.

16 Vakai, kuó u tohi tongi koe ʻi hoku ongo ʻaofi nimá; ʻoku ou manatu maʻu ai pē ki ho ngaahi ʻaá.

17 ʻE fai vave hoʻo fānau ke langa hake ʻa ia kuo fakaʻauhá; pea ko kinautolu naʻe maumauʻi koe te nau ʻalu ʻiate koe.

18 Hiki hake ho matá pea vakai; ko kinautolú ni kotoa pē ʻoku fakataha maí, te nau haʻu kiate koe. Pea hangē ʻoku ou moʻuí, ʻoku folofola ʻe he ʻEikí, te ke fakakofuʻi moʻoni koe ʻaki ʻa kinautolu kotoa pē, ʻo hangē ko ha meʻa teuteu, ʻo ʻai ia ʻo hangē ko ha taʻahine taʻane.

19 He ko ho ngaahi potu maumau mo lalá, pea mo ho fonua kuo fakaʻauhá, ʻe hoko ni ʻo fuʻu siʻisiʻi koeʻuhi ko e tokolahi ʻo e kakai ʻoku nofo aí; pea ko kinautolu naʻe nofo ʻi aí, te nau mamaʻo atu.

20 Ko e fānau te ke maʻu ʻo ka hili ʻa e mole ʻiate koe ʻa e ʻuluakí, te nau toe pehē ʻi ho telinga: kuo fāsiʻi ʻa e potú ni kiate au; foaki mai ha potu lahi ange maʻaku ke u nofo ai.

21 Pea te ke toki pehē ʻi ho lotó: Ko hai kuó ne fakatupu kiate au ʻa kinautolu ní, he kuo mole ʻiate au ʻeku fānaú, pea ʻoku ou paʻa, ko ha pōpula, ʻo feʻaluʻaki fano holo pē? Pea ko hai kuó ne tauhi ʻa kinautolú ni maʻakú? Vakai, naʻe liʻekina toko taha pē au; ka ko kinautolu ní, naʻa nau ʻi fē?

22 Ko ia naʻe folofola ʻe he ʻEiki ko e ʻOtuá: Vakai, te u hiki hake hoku nimá ki he kau Senitailé, pea fokotuʻu ʻeku fuká ki he kakaí; pea te nau ʻomi ho ngaahi fohá ʻi honau nimá, mo ho ngaahi ʻofefiné ʻe fua ʻi honau umá.

23 Pea ʻe hoko ʻa e ngaahi tuʻí ko hoʻo ngaahi tamai tauhi, pea ko honau ngaahi kuiní ko hoʻo ngaahi faʻē tauhi; te nau punou hifo kiate koe ʻaki honau matá ki he kelekelé, pea ʻemo ʻa e efu ʻo ho vaʻé; pea te ke ʻiloʻi ko au ko e ʻEikí; koeʻuhi ʻe ʻikai mā ʻa kinautolu ʻoku tatali kiate aú.

24 He ʻe toʻo ʻa e moʻulaloá mei he mālohí, pe tukuange ʻa e kau pōpula totonú?

25 Ka ʻoku folofola ʻe he ʻEikí, naʻa mo e kau pōpula ʻo e kakai mālohí ʻe ʻave ʻa kinautolu, pea ʻe tukuange ʻa e moʻulaloa ʻo e tokotaha fakamanavaheé; koeʻuhi te u tau mo ia ʻoku tau mo koé, pea te u fakahaofi ʻa hoʻo fānaú.

26 Pea te u fafanga ʻa kinautolu ʻoku fakamamahiʻi koé ʻaki honau kakano ʻonautolú; te nau konā ʻi honau toto ʻonautolú ʻo hangē ha uaine melie; pea ʻe ʻiloʻi ʻe he kakai kotoa pē, ko au ko e ʻEikí, ko ho Fakamoʻui mo ho Huhuʻí, ko e Tokotaha Māfimafi ʻo Sēkopé.