Tej Kev Pab Kawm

Phau Npaivnpaum tej daim Duab

Phau Npaivnpaum tej daim Duab

Phau Npaivnpaum tej daim Duab

Zaj Lus Piav
Cov duab ntawm tej qhov chaw tseem ceeb qhia txog tej thaj av uas Yexus taug kev, tej qhov chaw uas cov yaj saub nyob hauv phau Npaivnpaum nyob, thiab tej qhov chaw uas muaj xwm txheej tshwm sim nyob hauv cov vaj lug kub.
Zaj Lus Piav
Daim qhia kev nram qab no qhia hais tias cov duab uas nyob hauv tshooj no yog yees nyob rau qhov twg. Nyob hauv cov nplooj ntawv lawv qab no, txhua daim duab uas muaj tus zauv yuav muaj ib zaj lus piav me ntsis txog qhov chaw ntawd. Tom qab ntawd, yuav sau txog tej uas tau muaj los uas tseem ceeb nyob hauv vaj lug kub uas tau tshwm sim ntawm qhov chaw ntawd, nrog rau cov nqe vaj lug kub xwv kom koj paub tias koj yuav mus nyeem qhov twg thiaj paub ntxiv txog tej ntawd.
1. Tus Dej Nailes thiab Iyiv
Cov nrog tsuag uas tuaj rau ntawm ntug Dej Nailes. Nyob rau ib qho chaw zoo li no Mauxes niam muab nws tus me nyuam mos liab zais cia. Dhau ntawm no mus yog tiaj suab puam uas nyob puv Iyiv.
2. Roob Xinais (Haulenpes) thiab Roob Moj Sab Qhua Xinais
Muaj ob peb qho chaw uas tej zaum yog lub Roob Xinais. Ib qho chaw uas tib neeg xav tias yog, yog Yenpes Muxas (Mauxes lub Roob), uas yog nyob hauv daim duab no.
3. Roob Moj Sab Qhua Yudais
Roob moj sab qhua Yudais nyob ntawm Yeluxalees sab hnub tuaj thiab mus rau nram Hiav Txwv Tuag.
4. Kades-npane-as
Nov yog ib daim duab uas ntsia mus rau sab qaum teb hnub tuaj ntawm lub hav tiaj suab puam loj (uas yog ib lub kwj ha) ntawm qhov chaw Kades-npane-as. Thaum lub caij ntuj nag tus dej ntws uas nyob ntawm no ua rau qhov chaw no muaj dej thiab txi txiv ntau nyob hauv roob moj sab qhua Xee.
5. Cov Yawg Suab lub Ntxa
Lub tsev no, uas yog lub tsev muaj npe tshaj plaws nyob hauv Thaj Av Dawb Huv, yog tus Vaj Ntxwv Helauj ua rau hauv Henploos rau ntawm qhov chaw uas ib txwm hais tias yog lub qhov tsua Makepelas, uas Anplaham yuav, los ua qua ntxa rau nws tsev neeg (Chk. 23).
6. Yudais tej Laj Roob
Yudais tej laj roob ntev li 56 kilaumev thiab dav li 27 kilaumev. Thaj av no feem ntau muaj pob zeb thiab nyuaj ua liaj ua teb. Nyob kem cov toj roob no muaj cov kwj ha uas qoob loo kuj tawg paj txi txiv thiab. Cov Neeg Ixayees puag thaum ub nyob hauv cov toj roob no, es siv cov toj roob no thaiv cov neeg uas tuaj tawm tsam lawv.
7. Npelehees
Nyob pem hauv ntej ntawm daim duab no yog cov toj roob thiab cov neeg yug yaj tej teb, nyob nram qab yog lub nroog Npelehees niaj hnub nim no.
8. Yeluxalees
Saib mus rau sab qaum teb Yeluxalees. Nyob hauv nruab nrab ntawm daim duab yog ib lub tsev teev tiam Muslim uas muaj lub ruv tsev kheej xim kub, hu ua lub Ruv Tsev Kheej ntawm lub Roob. Thaum ub cov Neeg Yudais teev tiam nyob hauv lub tuam tsev uas nyob ntawm no. Daim ntsa loog uas nyob ze lub Ruv Tsev Kheej ntawm lub Roob nyob puag ncig lub nroog Yeluxalees qub. Nyob sab xis ntawm daim ntsa loog yog lub Hav Kiloos. Nyob puag sab xis, uas tsis pom hauv daim duab, yog lub Roob Txiv Ntoo Roj. Mus rau sab qaum teb, uas dhau ntawm lub Ruv Tsev Kheej ntawm lub Roob mus, tej zaum yog qhov chaw Khaulakhauthas.
9. Helauj lub Tuam Tsev
Daim duab no yog ib qho qauv qhia hais tias Helauj lub tuam tsev (muaj kev sib piv 1:50) zoo li cas thaum xyoo 67 tom qab Yexus yug los. Daim ntsa loog uas ncig thaj chaw ntawm lub tuam tsev puav leej vij qhov chaw pe hawm uas muaj Qhov Chaw Dawb Huv Tshaj Plaws, qhov chaw dawb huv, thiab peb lub tshav loj.
10. Ntaiv Mus rau lub Tuam Tsev
Lub tuam tsev muab cais ua tej tshav, thiab tej tshav uas nyob rau sab nraud yog nyob rau tej av uas qes tshaj plaws. Muaj ntau lub qhov rooj rau cov neeg teev tiam nkag los, xws li tej qhov rooj uas nce ntawm no mus rau cov tshav sab nraud ces mam li mus rau cov tshav sab haud. Ntau txhiab tug neeg tau nce cov ntaiv no, nrog rau Vajtswv Leej Tub. Thaum Titus pab tub rog ua rau lub tuam tsev puas tsuaj thaum xyoo 70 tom qab Yexus yug los, tej khoom puas tsuaj npog cov ntaiv no tag. Cov kws kawm txog yav thaum ub nrhiav tau cov ntaiv no thaj tsam xyoo 1970 thaum lawv khawb av ntawm lub nroog Yeluxalees qub.
11. Roob Txiv Ntoo Roj
Nov yog ntsia mus rau sab hnub tuaj ntawm lub Roob Txiv Ntoo Roj. Ntawm lub tsev uas nyob pem hauv ntej tej zaum yog qhov chaw ntawm lub Vaj Khexemanes. Thaum lub Kaum Hli Ntuj hnub tim 24, xyoo 1841, Txwj Laug Orson Hyde ntawm Pawg Kaum Ob tug Thwj Tim nce mus rau saum lub Roob Txiv Ntoo Roj thiab thov Vajtswv qhia tias yuav muaj dab tsi los yav tom ntej muab thaj av fij tseg rau Anplaham cov xeeb leej xeeb ntxwv txoj kev rov qab los thiab kev ua lub tuam tsev.
12. Lub Vaj Khexemanes
Daim duab uas muaj ib tsob ntoo txiv roj laus laus no yog yees nyob rau ntawm qhov chaw uas ib txwm xav tias yog lub Vaj Khexemanes. Tus Cawm Seej thov Vajtswv nyob ze ntawm no tom qab nws tau tawm ntawm chav txheej saud thaum hmo uas muaj neeg ntxeev siab rau Nws.
13. Khaulakhauthas
Lub pob tsuas no, uas zoo li lub pob txha taub hau thiab nyob kiag sab nraud ntawm lub Rooj Vag Damaxes hauv Yeluxalees (Yhs. 19:17, 20), tej zaum yog qhov chaw hu ua Khaulakhauthas, uas yog qhov chaw Ntsia Rau Saum Ntoo Khaub Lig.
14. Lub Ntxa hauv lub Vaj
Tej zaum yog qhov chaw rau Yauxej ntawm Alimatas lub vaj ntxa. Ib co yaj saub niaj hnub nim no xav hais tias tus Cawm Seej lub cev raug muab tso pw rau hauv lub ntxa uas nyob hauv daim duab no.
15. Yelikaus
Daim duab no yog cov nroj tsuag nyob hauv Yelikaus niaj hnub no. Puag thaum ub ntawm no yog ib lub nroog uas muaj ntsa loog ib puag ncig nyob hauv lub hav ntawm tus Dej Yauladees, 252 mev qes dua li hiav txwv. Yog ib qho chaw zoo ua liaj ua teb uas muaj txiv ntoo qab zib thiab ntoo txiv kab ntxwv tawg paj txi txiv. Nyob nram qab yog qhov chaw uas txwm xav tias yog lub Roob ntawm Kev Ntxias (Mat. 4:1–11).
16. Silaus
Raws li pom tau los ntawm sab hnub poob, lub nroog Silaus puag thaum ub uas raug puas tsuaj tas nyob sab laug ntawm qhov nruab nrab.
17. Sekhees
Yog qhov chaw rau lub nroog Sekhees puag thaum ub. Nyob pem hauv ntej yog lub Roob Nkelixees, thiab dhau ntawd mus yog lub Roob Enpales. Sekhees nyob nruab nrab ntawm ob lub roob no.
18. Dauthas nyob hauv Xamalis
Dauthas muaj tej laj roob thiab tej kwj ha. Yog ib thaj av uas muaj zaub zoo rau tsiaj txhu noj. Thaum cov neeg Ixayees los nyob hauv thaj av no, tau muab thaj tsam no rau Manaxes.
19. Xixaleyas thiab Tiaj Nrag Saloos Mus rau Kalemees
Ntsia mus rau sab qaum teb dhau qhov chaw nres nkoj puag thaum ub hu ua Xixaleyas thiab Tiaj Nrag Saloos. Nyob hauv daim duab sab saud kuj pom tau tej laj roob Kalemees.
20. Yaupas
Ntsia mus rau qaum teb sab hnub poob pom lub nroog nres nkoj Yaupas.
21. Lub Hav Yexelees
Nyob saum lub ncov Roob Tanpaus ntsia mus rau qab teb sab hnub poob pom ib feem ntawm lub Hav Yexelees, uas kuj muaj npe hu ua Tiaj Nrag Exala-eloos. Txawm tib neeg xav tias lub Hav Yexelees yog ib lub hav loj loj, qhov tseeb tiag nws yog ib co kwj ha uas muab lub Tiaj Nrag Akaus txuas nrog lub kwj ha Yauladees thiab thaj tsam ntawm Hiav Txwv Kalilais. Xws li lub hav Menkidaus, yog nyob sab hnub poob ntawm lub hav no. Lub Hav Yexelees yog txoj kev loj uas hla Thaj Av Dawb Huv, nyob nruab nrab ntawm Hiav Txwv Mediatalenias uas nyob sab hnub poob thiab lub Hav Yauladees uas nyob sab hnub tuaj.
22. Roob Tanpaus
Ntsia mus rau qaum teb sab hnub poob ntawm lub Roob Tanpaus. Thaj av qes uas nyob ib puag ncig ntawm lub Roob Tanpaus yog ib feem ntawm lub Hav Yexelees. Naxales nyob hauv cov toj roob nyob ze lub Roob Tanpaus.
23. Hiav Txwv Kalilais thiab lub Roob ntawm cov Lus Foom Koob Hmoov
Ntsia mus rau qab teb sab hnub poob pom lub ceg kaum qaum teb sab hnub poob ntawm Hiav Txwv Kalilais, uas yog ib lub pas dej ntshiab. Lub toj uas nyob nruab nrab pem hauv ntej yog qhov chaw uas tib neeg ib txwm xav tias yog lub Roob ntawm cov Lus Foom Koob Hmoov. Kapena-us yog nyob ntawm sab laug, tsis pom hauv daim duab. Tinpelias nyob deb zog mus rau sab qab teb ntawm tus ntug dej sab hnub poob.
24. Kapena-us
Kapena-us, uas nyob sab qaum teb ntawm ntug Hiav Txwv Kalilais, yog lub plawv ntawm Yexus txoj kev qhuab qhia hauv Kalilais (Mat. 9:1–2; Mak. 2:1–5). Yog ib qho chaw tseem ceeb rau kev nuv ntses thiab kev ua lag luam uas vam meej heev, puav leej yog qhov chaw nyob rau Lwm Haiv Neeg thiab cov Neeg Yudais huv tib si. Thawj ib puas xyoo tom qab Yexus yug los, tej zaum twb tsis muaj ntau tshaj 1,000 tug neeg nyob ntawm no. Kapena-us yog nyob ntawm qhov chaw uas tej kev ua lag luam tuaj sib tshuam, thiab muaj tej av uas zoo ua qoob loo nyob ib puag ncig. Cov tub rog Loos ua tau tej tsev da dej thiab tej tsev rau khoom nyob ntawm no. Txawm tias Yexus tau ua ntau yam txuj ci tseem ceeb nyob ntawm no, los cov neeg feem coob tseem xyeej tus Cawm Seej txoj kev qhuab qhia. Yog li ntawd Yexus foom tsis zoo rau lub nroog no (Mat. 11:20, 23–24). Tom qab no, Kapena-us raug puas tsuaj thiab tsis muaj neeg mus nyob.
25. Tus Dej Yauladees
Tus Dej Yauladees pib pem sab qaum teb ntawm Hiav Txwv Kalilais, ntws mus rau hauv Hiav Txwv Kalilais, ces ntws mus rau sab qab teb mus rau hauv Hiav Txwv Tuag. Daim duab no yog yees ze ntawm qhov chaw uas tus dej tawm ntawm Hiav Txwv Kalilais mus.
26. Xixaleyas Filipis
Xixaleyas Filipis nyob ntawm taw Roob Helemoos. Tus dej no yog ib feem ntawm cov dej uas ntws mus rau hauv tus Dej Yauladees. Helauj Filis, uas kav cheeb tsam no, ua tau ib lub nroog nyob ntawm no ua sam xeeb rau Xixas (uas yog nws tus huab tais) thiab nws tus kheej; thaum ub lub nroog no yog hu ua Phanias thiab niaj hnub no hu ua Panias thiab Xixaleyas Filipis.
27. Naxales
Daim duab uas pom lub nroog Naxales niaj hnub no, ntsia mus rau sab qab teb. Naxales yog ib lub zos me me thaum ub.
28. Das
Ua ntej cov neeg Ixayees kov yeej thaj av no, lub nroog Das puag thaum ub yog hu ua Laises (Yas. 19:47) los sis La-isas (Ctt. 18:7, 14) ua ntej cov Ixayees kov yeej thaj teb no. Cov me nyuam dej nyob ntawm qhov chaw no, nrog rau cov me nyuam dej nyob ntawm Xixaleyas Filipis, yog lub hauv paus ntawm tus Dej Yauladees. Nyob hauv daim duab no yog Yelaunpau-as lub tuam tsev.
29. Athees
Daim duab no, uas yog nyob saum Alepankus yees, qhia txog lub Tsev Akaupaulis nyob hauv Athees, uas yog ib qho chaw so rau ntau tus vaj tswv cuav. Athees yog lub tuam nroog Kilis ntawm Athikas thiab nyob hauv Phau Tshiab lub nroog no nyob hauv lub xeev Loos uas hu ua Akhayas. Cov neeg tis npe li no rau lub nroog vim xav muab sam xeeb rau cov neeg Kilis tus poj niam tswv ntuj Atheenas. Thaum txog Vaj Lug Kub Phau Tshiab lub caij nyoog, Athees twb poob tej koob meej thiab yeeb koob uas thaum ub tau muaj, tiam sis tseem muaj ntau tus mlom thiab pej thuam txog ntau tus tswv ntuj thiab poj niam tswv ntuj, nrog rau “Tus Vaj Tswv uas [Neeg] Tsis Paub” (Teh. 17:23).
30. Kauleethaus
Kauleethaus yog lub tuam nroog nyob hauv cov neeg Loos lub xeev uas hu ua Akhayas. Lub nroog no nyob ntawm thaj av nqaim uas muab thaj av Pelaupaunexus txuas rau thaj av Kilis loj, thiab puav leej muaj chaw nres nkoj ntawm sab hnub tuaj thiab sab hnub poob. Lub nroog no yog ib lub nroog nres nkoj uas muaj nyiaj thiab muaj hwj chim heev.
31. Efexus
Tej khoom puas tsuaj ntawm cov neeg Kilis lub tshav ua yeeb yam nyob hauv Efexus, uas yog qhov chaw tus Thwj Tim Povlauj qhia txoj moo zoo. Thauj cov vaj lug kub Phau Tshiab lub caij nyoog, Efexus muaj npe nto moo thoob plaws lub ntiaj teb vim muaj lub tuam tsev zoo nkauj heev uas yog ua los muab sam xeeb rau cov Neeg Loos tus poj niam tswv ntuj hu ua Alatemis. Tam sim no Efexus twb puas tsuaj tas, tiam sis thaum ub yog lub tuam nroog ntawm cov neeg Loos lub xeev uas hu ua Axias thiab yog ib qho chaw ua lag ua luam loj heev. Cov neeg ntaus nyiaj nyob hauv lub nroog tej kev ua lag luam vam meej heev vim lawv muag tus mlom Alatemis.
32. Pov Txwv Pamaus
Pamaus, yog ib lub pov txwv nyob hauv Hiav Txwv Azias uas Yauhas raug yuam mus nyob (Tsm. 1:9). Raws li neeg ib txwm hais, nws tau ua hauj lwm ntawm no nyob hauv tej qhov av khawb pob zeb.