11. Tè Sen an nan Epòk Nouvo Testaman an

Tir ak Sidon Jezi te konpare Korazen ak Betsayida avèk Tir ak Sidon (Mat. 11:20–22). Li te beni pitit fi yon fi ki se yon Janti (Mat. 15:21–28).

Mòn Transfigirasyon Jezi te transfigire devan Pyè, Jak, ak Jan, epi yo te resevwa kle wayòm yo (Mat. 17:1–13). (Kèk moun kwè mòn Transfigirasyon an se mòn Èmon an; lòt moun kwè se mòn Tabò.)

Sezare Filipi Pyè te deklare Jezi se Kris la, epi Sovè a te pwomèt li kle wayòm nan (Mat. 16:13–20). Jezi te anonse pwòp lamò Li ak rezirèksyon Li (Mat. 16:21–28).

Rejyon Galile a Jezi te pase majorite lavi mòtèl li ak ministè l nan Galile (Mat. 4:23–25). Se nan kote sa Li te bay Diskou sou Mòn nan (Mat. 5–7); Li te geri yon lepre (Mat. 8:1–4); epi L te chwazi, òdone, epi voye Douz Apot yo, epi sanble nan pami yo tout, sete sèl Jida Iskaryòt ki pa t Galileyen (Mak 3:13–19). Nan Galile, Kris resisite a te parèt devan Apot yo (Mat. 28:16–20).

Lanmè Galile, pita yo te rele l lanmè Tiberyas Jezi te anseye nan bato Pyè a (Lik 5:1–3) epi l te aple Pyè, Andre, Jak, ak Jan pou yo vin pechè lèzòm (Mat. 4:18–22; Lik 5:1–11). Li te kalme tanpèt la tou (Lik 8:22–25), li te anseye parabòl yo nan yon bato (Mat. 13), li te mache sou lanmè a (Mat. 14:22–32), epi Li te parèt devan disip Li yo apre rezirèksyon L lan (Jan 21).

Betsayida Pyè, Andre, ak Filip te fèt nan Betsayida (Jan 1:44). Jezi t ale an prive avèk Apot li yo tou pre Betsayida. Miltitid moun yo te suiv Li epi Li te nouri 5.000 moun yo (Lik 9:10–17; Jan 6:1–14). Nan kote sa a, Jezi te geri yon nonm avèg (Mak 8:22–26).

Kapènawòm Sete lakay Pyè (Mat. 8:5, 14). Nan Kapènawòm, vil Matye te di sete “pwòp vil” Jezi a, Jezi te beni yon nonm paralize (Mat. 9:1–7; Mak 2:1–12), Li te geri sèvitè yon santiryon, Li te geri manman madanm Pyè (Mat. 8:5–15), Li te rele Matye pou vin youn nan Apot Li yo (Mat. 9:9), Li te ouvri je avèg, li te chase yon dyab (Mat. 9:27–33), Li te geri men sèch yon nonm nan jou Saba a (Mat. 12:9–13), Li te fè diskou pen lavi a (Jan 6:22–65), epi L te aksepte pou peye taks, Li te di Pyè pou L pran lajan an nan bouch yon pwason (Mat. 17:24–27).

Magdala Sete lakay Mari Madlèn (Mak 16:9). Jezi te vini nan kote sa a apre l te fin nouri 4.000 moun yo (Mat. 15:32–39), Epi Farizyen yo ak Sadiseyen yo te mande pou L montre yo yon siy ki soti nan syèl la (Mat. 16:1–4).

Kana Jezi te fè dlo tounen diven (Jan 2:1–11) epi l te geri pitit gason yon grannèg ki te nan Kapènawòm (Jan 4:46–54). Kana sete kay Natanayèl tou (Jan 21:2).

Nazarèt Vizit anjelik Mari ak Jozèf la te fèt nan Nazarèt (Mat. 1:18–25; Lik 1:26–38; 2:4–5). Lè l te retounen soti an Ejip, Jezi te pase anfans Li ak jenès Li nan kote sa a (Mat. 2:19–23; Lik 2:51–52), Li te anonse Li se Mesi a, epi pèp pa Li a te rejte L (Lik 4:14–32).

Jeriko Jezi te fè yon nonm avèg wè (Lik 18:35–43). Li te dine avèk Zache tou, “chèf ki nan pami pibliken yo” (Lik 19:1–10).

Betabara Janbatis te temwaye li se “vwa moun ki t ap kriye nan dezè a” (Jan 1:19–28). Jan te batize Jezi nan rivyè Jouden an epi l te temwaye Jezikri se Ti Mouton Bondye a (Jan 1:28–34).

Dezè Jideya Janbatis te preche nan dezè sa a (Mat. 3:1–4), kote Jezi te jene 40 jou epi kote dyab la te tante l (Mat. 4:1–11).

Emayis Kris resisite a te mache sou wout Emayis la avèk de nan disip Li yo (Lik 24:13–32).

Bètfaje De nan disip yo te pote yon jèn bourik bay Jezi, sou li, Li te kòmanse antre triyonfal Li a nan Jerizalèm (Mat. 21:1–11).

Betani Sete lakay Mari, Mat, ak Laza (Jan 11:1). Mari te tande pawòl Jezi yo, epi Jezi te pale avèk Mat konsènan chwazi “bon pati” a (Lik 10:38–42); Jezi te leve Laza nan pami mò yo (Jan 11:1–44); epi Mari te wen pye Jezi (Mat. 26:6–13; Jan 12:1–8).

Bètleyèm Jezi te fèt epi yo te mete l kouche nan yon pak bèt (Lik 2:1–7); zanj te anonse bèje yo nesans Jezi (Lik 2:8–20); yon zetwal te dirije dèzòm saj kote Jezi (Mat. 2:1–12); epi Ewòd te touye timoun yo (Mat. 2:16–18).