Agtutubo
Pili ken Kaadda ti Sungsungbatan

Pili ken Kaadda ti Sungsungbatan

Agpilikayo ita nga aldaw no siasino ti pagserbianyonto;…ngem siak ken ti balayko agserbikamto ken ni Jehova (Joshua 24:15).

Piliekto ti nasayaat manipud iti dakes ket awatekto ti pagrebbengan para kadagiti pangngeddengko.

Dagiti Naidawat a Kasapulan a Padas nga Ik-ikkan Pateg

Leppasem dagiti sumaganad a tallo a naidawat a kasapulan a padas nga ik-ikkan pateg. Papirmaam ken paikkam iti petsa iti naganak kenka wenno lidermo ti tunggal padas kalpasan a malpasmo.

  1. Makaaramid ti maysa nga anak a babai ti Dios kadagiti masirib a pangngeddeng ken makarisut kadagiti parikut. Basaem ti 1 Nephi 15:8; 2 Nephi 32:3; Alma 34:19–27; Ether 2–3; ken Doktrina ken Katulagan 9:7–9. Surotem ti pagtuladan ti kanayon a panagadal iti nasantuan a kasuratan ken panagkararag tapno umawat iti tulong iti panangaramid kadagiti bukod a pangngeddeng a kas iti panangpili kadagiti nasayaat a gagayyem, panagbalin a naasi kadagiti dadduma, panagriing a nasapa, wenno dadduma pay a pangngeddeng. Ilawlawagmo iti maysa a naganak wenno lider no kasano a nakatulong kenka ti kanayon a panagadal iti nasantuan a kasuratan ken panagkararag iti panagaramidmo kadagiti umno a pangngeddeng.

  2. Basaem ti polieto a Para iti Pigsa dagiti Agtutubo. Ilistam iti diurnalmo ti tunggal pagrukodan ti nalinteg nga ugali a nabalabala iti polieto, ken isuratmo no apay a napateg a pilien ti agbiag kadagita a pagrukodan. Sanayem ti agbiag kadagiti nalinteg a pagrukodan babaen ti panangpili kadagiti tallo a pagrukodan a kasapulam a padur-asen. Mabalinmo a pilien ti agbalin nga ad-adda a managpili maipapan iti telebision, musika, libro, wenno dadduma pay a media, wenno mabalin a padur-asem ti kinaemma, panagsasao, wenno kinapudnom. Kalpasan ti tallo a lawas, ibinglaymo ti panagdur-asmo iti pamiliam, iti klaseyo wenno iti maysa a lider.

  3. Ti kinawaya nga agpili, wenno ti kabaelan nga agpili, ket maysa kadagiti kaindaklanan a sagut ti Dios kadagiti annakna. Basaem ti maipapan iti kinawaya nga agpili iti Josue 24:15; 2 Nephi 2; ken Doktrina ken Katulagan 82:2–10. Kaduam ti maysa a naganak wenno lider, paglilinnawaganyo dagiti bendision ken pagrebbengan ti kinawaya nga agpili. Isuratmo iti diurnalmo ti pannakaawatmo iti kinawaya nga agpili ken dagiti bunga dagiti pili ken aramid.

Dagiti Mainayon a Padas nga Ik-ikkan Pateg

Leppasem dagiti tallo a mainayon a padas nga ik-ikkan pateg. Mabalinmo a pilien manipud kadagiti sumaganad a pagpilian wenno isuratmo agingga iti dua a bukodmo. Nasken nga anamongan ti naganak kenka wenno lidermo dagiti insuratmo a mismo sakbay a mangrugika. Papirmaam ken paikkam iti petsa iti naganak kenka wenno lidermo ti tunggal padas kalpasan a malpasmo.

  1. Basaem ti maipapan iti panagbabawi itiIsaias 1:18; Alma 26:22; 34:30–35; Moroni 8:25–26; ken Doktrina ken Katulagan 19:15–20; 58:42–43. Isuratmo iti diurnalmo no ania ti kaipapanan kenka ti panagbabawi. Adalem ti proseso ti panagbabawi, agkararagka iti pannarabay, ken yaplikarmo dagiti pagbatayan ti panagbabawi iti biagmo.

  2. Tulongannakanto ti Espiritu Santo nga agaramid kadagiti umno a pili. Kaduam ti maysa a naganak, lider, wenno gayyem, sursuruem ti ad-adu pay maipapan iti Espiritu Santo babaen ti panangbasam ken panangilawlawagmo iti Ezequiel 36:26–27; Juan 14:26; 16:13; Taga-Galacia 5:22–25; 2 Nephi 32:5; Moroni 10:4–5; ken Doktrina ken Katulagan 11:12–14. Kalpasanna isuratmo iti diurnalmo no kasano a matulongannaka ti Espiritu Santo nga agaramid kadagiti nasayaat a pangngeddeng iti inaldaw a panagbiagmo. Ikararagam ken agbiagka a maikari iti kanayon a panangkadua kenka ti Espiritu Santo.

  3. Adalem ti tema ti Young Women ken no ania ti isursuro daytoy kenka maipapan iti kinasiasinom, no ania ti nasken nga aramidem, ken no apay a nasken nga aramidem daytoy. Ilistam iti diurnalmo no anianto ti aramidem iti tunggal aldaw maipanggep iti kinaemma, pannakisinnarak, ken iti media tapno agbalinka a nadalus iti moralidad ken maikarika a sumrek iti templo. Isuratmo iti diurnalmo no kasano a makatulongto kenka dagitoy a pili nga agtalinaed a nawaya ken naragsak.

  4. Ti panagaramid kadagiti pili ket paset ti plano ti Nailangitan nga Ama para kadatayo. Basaem ti Moises 4:1–4; 7:32; ken 2 Nephi 9:51. Mangparnuayka iti pagtuladan ti nasirib a panangimaton iti kuarta babaen ti panagaramid iti maysa a badyet para iti panagurnong ken pananggastos iti kuartam, agraman ti panagbayad iti apagkapullo. Busbosem ti kuartam a mainugot iti badyet nga inaramidmo iti uneg ti uray tallo laeng a bulan. Mangitudingka kadagiti prayoridad wenno ipangpangrunam a mangipalubos kenka tapno maipaaymo dagiti kaskenan a kasapulam sakbay ti panaggatangmo kadagiti kayatmo a dimo kasapulan. Isuratmo iti diurnalmo no ania ti nasursurom ken no kasano nga itultuloyto a bendisionan ti biagmo ti panangsurot kadagitoy a pagtuladan.

Dagiti Bukod a Padas nga Ik-ikkan Pateg

Proyekto nga Ik-ikkan Pateg

Kalpasan a naileppasmo dagiti innem a padas nga ik-ikkan pateg iti pili ken kaadda iti sungsungbatan, mangpartuatka iti maysa a proyekto a mangtulongto kenka a mangsanay iti nasursurom. Nasken a maysa daytoy a napateg nga aramid a mangbubosto iti uray sangapulo laeng nga oras a mangileppas. Sikakararag a dawatem ti pannarabay ti Espiritu Santo tapno pumili iti maysa a napateg a proyekto.

Paanamongam iti naganak kenka wenno lidermo ti proyekto sakbay a mangrugika. Mangisuratka iti ebalwasion kalpasan ti panangileppasmo. Adda iti baba dagiti sumagmamano a kapanunotan para iti maysa a proyekto nga ik-ikkan pateg.

  • Iti panangusarmo iti Para iti Pigsa dagiti Agtutubo ken babaen ti panangiturong dagiti nagannak kenka wenno dagiti lidermo, mangbukel wenno makiramanka iti maysa a grupo iti panaglilinnawag, fashion show, wenno sabali pay nga okasion a makatulong kenka ken iti sabali pay nga agtutubo nga agbiag kadagiti pagrukodan ti Apo.

  • Babaen ti panangiturong dagiti nagannak kenka wenno dagiti lidermo, tumulongka nga agplano ken mangiturong iti maysa a pasala dagiti agtutubo wenno sabali pay nga aktibidad a mangitampok iti mayannatup a panangisuro iti panagsala ken umno a musika, panagpasilaw, ken aglawlaw.

  • Amirisem ti panangusarmo iti media ken teknolohia. Mangparnuay ken mangipatungpalka iti maysa a plano a manglapped iti saan nga umno a media manipud iti iseserrekna iti pagtaenganyo. Siguraduem a ti planom ket mangyallukoy iti umno a pannakausar ti telebision, sine, musika, kompiuter, Internet, celfon, ken dadduma pay a kita ti media iti pagtaengan. Ibinglaymo ti kapanunotam iti pamiliam ken kadagiti dadduma.

  • Sursuruem ti pangrugian a wagas (teknik) iti panangbalbaliw iti estilo ti lupot ken panagritokar bayat ti panangibagaymo kadagiti kawesmo iti pagrukodan ti disente a kawes.

  • Sursuruem ti agbalin a nadaldalimanek iti pagtaenganyo babaen ti panangileppasmo iti maysa a proyekto ti panagdalus ken panagurnos. Isuratmo iti diurnalmo no kasano a natulongannaka daytoy a proyekto kadagiti dadduma pay a tay-ak ti biagmo.

Ti proyektok ket:

Ti planok a mangaramid iti proyektok ket:

Pannakaanamongna

Napattapatta a petsa ti pannakaileppas

Ti ebalwasionko iti proyekto ket (iramanmo no kasano ti panagriknam ken no kasano a dimmur-as ti pannakaawatmo iti pili ken kaadda ti sungsungbatan):

Pirma ti naganak wenno lider

Petsa

Dagiti oras a nabubos