Ծրագրել ճամբարը

«Կազմակերպվեք. նախապատրաստեք ամեն անհրաժեշտ բան» (ՎևՈւ 109.8):

Ճամբարում պետք է ամեն բան պարզ լինի և երիտասարդ կանանց ժամանակ տրամադրի Աստծո ստեղծագործությունները վայելելու և «հանգիստ» լինելու համար (ՎևՈւ 101․16)։ Ճամբարը չպիտի լինի բարդ կամ ներառի բեմականացումներ, միջոցառումներ ու ձևավորումներ, որոնք կշեղեն ճամբարի նպատակից։ Նաև խուսափեք փորձառություններից, որոնցում երիտասարդ կանայք կարող են շփոթել ուժեղ հուզական զգացողությունները, ինչպես օրինակ տխրությունը կամ զարմանքը, Հոգին զգալու հետ։ Պատշաճ միջոցառումները, օգտակար կենսուրախությունը և անկեղծ հաղորդակցությունը կհրավիրեն Սուրբ Հոգին։

girls at camp

Ճամբարը պետք է անցկացվի խաղաղ մի վայրում, որտեղ երիտասարդ կանայք կարող են զգալ Հոգին, կիսվել վկայություններով, սովորել հմտություններ և զվարճանալ։

Չափահաս և երիտասարդ ղեկավարների պարտականությունն է ուշադիր խորհել և կանխատեսել ճամբարի յուրաքանչյուր մանրուքը, յուրաքանչյուր մասնակցի կարիքներն ու անվտանգությունը:

• 10.8.6 Երիտասարդ Կանանց ճամբարը

• 10.8.9 Միջոցառումների ֆինանսավորումը

• 13.2.4 Չափանիշներ

• 13.6.8 Սեփական միջոցներով անցկացվող միջոցառումներ

• 13.6.9 Ապահովագրություն

• 13.6.12 Շուրջօրյա միջոցառումներ

• 13.6.12 Ծնողների թույլտվությունը

• 13.6.17 Վարձակալել Եկեղեցուն չպատկանող շինություններ միջոցառումների համար

• 13.6.20 Անվտանգության նախազգուշական միջոցները, արձագանքը պատահարներին և հաշվետվության ներկայացումը

• 13.6.24 Ճամփորդություն

Բոլոր երիտասարդ կանանց ճամբարում տվեք պարտականություններ և հանձնարարություններ (տես Ձեռնարկ 2, 3.3.4)։ Երբ երիտասարդ կանայք ունենան ծառայելու, կերակուր պատրաստելու, մաքրելու, կազմակերպելու և առաջնորդելու հնարավորություններ, նրանք կսովորեն կազմակերպչական և կառավարման հմտություններ, որոնք կշարունակեն օրհնել նրանց ընտանիքներին և Եկեղեցին։ Համոզվեք, որ կիրառում եք հոգևոր պատրաստվածության և Քրիստոսանման ղեկավարման ու ծառայության սկզբունքները պլանավորման բոլոր փուլերում:

girl at camp

Ընտրել ճամբարի վայրը և օրը

Երիտասարդ Կանանց ճամբարի վայրը կփոփոխվի համաձայն ձեր տարածքի և կարիքների։ Սովորաբար ճամբարներն անցկացվում են տանից հեռու բացօթյա ապահով վայրերում։ Անկախ տեղանքից, ճամբարը պետք է անցկացվի խաղաղ մի վայրում, որտեղ երիտասարդ կանայք կարող են զգալ Հոգին, կիսվել վկայություններով, սովորել հմտություններ և զվարճանալ։ Այն վայրերում, որտեղ գիշերելը դժվար է կամ արգելված է, ցերեկային ճամբար պլանավորելը կարող է լավ տարբերակ լինել: Ցերեկային ճամբարներ կարելի է անցկացնել երիտասարդ կանանց տան մոտակայքում, ինչպես օրինակ զբոսայգում, զբոսախնջույքի տարածքում կամ հետնաբակում։

Ճամբարները կարող են ներառել միայն ձեր ծխի երիտասարդ կանանց կամ դրանք կարող են ներառել ցցի բոլոր երիտասարդ կանանց։ Դուք կարող եք ճամբար ծրագրել տարվա մեջ ցանկացած ժամանակ, սակայն համոզվեք, որ հաշվի եք առնում կլիման, տարվա եղանակը և ճամբարի տեսակը, որը դուք և երիտասարդ կանայք ցանկանում եք ունենալ։ Սովորաբար Երիտասարդ կանանց ճամբարը կազմակերպվում է տարին մեկ անգամ, սակայն գուցե այն անցկացվի ավելի հազվադեպ՝ տեղի կարիքները հոգալու համար։ Սովորաբար ճամբարը տևում է հինգ օրից ոչ ավել, չպիտի անցկացվի Հանգստության օրը և հիմնականում չի անցկացվում երկուշաբթի օրը։ Համոզվեք, որ ձեր ճամբարը հետևում է տեղի բոլոր կանոնակարգերին, որոնք սահմանված են երիտասարդների շուրջօրյա ճամբարների համար։

girls at camp

Սահմանել ճամբարի նպատակները

Երբ դուք խորհրդակցեք ուրիշների հետ և ընտրեք նպատակներ ձեր ճամբարի համար, աղոթքով տվեք ձեզ հետևյալ հարցը․ Երկնային Հայրն ի՞նչ է ուզում, որ տեղի ունենա երիտասարդ կանանց կյանքում՝ որպես այս ճամբարի արդյունք։ Այս հարցի պատասխանը պետք է դառնա ձեր ճամբարի նպատակը: Այդ նպատակը կառաջնորդի մնացած բոլոր որոշումները, որոնք դուք կկայացնեք ճամբարի վերաբերյալ։

girls at camp

Ընտրել ճամբարի նշանաբանը

Ճամբարի նշանաբանը կօգնի ձեզ կենտրոնացած մնալ ճամբարի նպատակների վրա։ Թեման իր էությամբ պետք է հոգևոր լինի, երիտասարդ կանանց հիշեցնի ավետարանի որևէ սկզբունք և ոգեշնչի նրանց ապրել համաձայն Երիտասարդ Կանանց արժեքների։ Քահանայության ձեր ղեկավարները պետք է հաստատեն այդ նշանաբանը, նախքան դուք ծրագրեր կկազմեք օգտագործելու այն ճամբարում։

Թեմայի համար որպես ոգեշնչում կարող է լինել․

• Տարվա Ընդհանուր թեման։

• Սուրբ գրության որևէ հատված:

• Մարգարեի կամ առաքյալի խոսքերը։

• Օրհներգը։

• «Երիտասարդներին զորացնելու համար» գրքույկը։

Young Women leaders smiling

Ընտրել միջոցառումներ

«Ես ձեզ տալիս եմ մի պատվիրան, որ երբ ժողովվում եք միասին, դուք պետք է հրահանգեք և շենացնեք միմյանց, որ կարողանաք իմանալ՝ ինչպես գործել» (ՎևՈւ 43․8)։

Երիտասարդ Կանանց նախագահության և չափահասների ու երիտասարդների ճամբարի ղեկավարների հետ միասին խորհրդակցեք, որպեսզի ծրագրեք ապահով, իմաստալից միջոցառումներ, որոնք կիրագործեն ճամբարի ձեր նպատակները։ Ճամբարի լավագույն միջոցառումները հարմարեցվում են բոլոր երիտասարդ կանանց կարիքներին և ունակություններին և նրանց թույլ են տալիս զգալ ու ճանաչել Հոգին, երբ ընկերանում են, գործի են դնում ղեկավարման հմտությունները, զարգացնում են իրենց տաղանդները, բարելավում են իրենց առողջությունը ֆիզիկական գործունեությամբ կամ սովորում են արտակարգ իրավիճակների և դրանց պատրաստ լինելու մասին։

Միջոցառումների որոշ գաղափարներ, որոնք համապատասխանում են այդ չափանիշներին, թվարկված են այս ուղեցույցի «Գաղափարների ճամբարի միջոցառումների համար» բաժնում: Ընտրեք հավասարակշռված հոգևոր, հասարակական, ֆիզիկական և մտավոր միջոցառումներ: Հետևյալ հարցերը կարող են օգնել ձեզ գնահատել ձեր ծրագրած միջոցառումները․

1. Ինչպե՞ս է այս միջոցառումն իրականացնում ճամբարի մեր նպատակները։

2. Ի՞նչ կարևոր դասեր կսովորեն երիտասարդ կանայք այդ միջոցառումից։

3. Ի՞նչ հմտություններ կզարգացնեն երիտասարդ կանայք այդ միջոցառման օգնությամբ։

4. Ինչպե՞ս կամրացնի այդ միջոցառումը երիտասարդ կանանց, նրանց տներն ու ընտանիքները։

5. Արդյո՞ք այդ միջոցառումն ունի հիվանդության կամ վնասվածքի մեծ վտանգ: Արդյո՞ք մենք բավականաչափ ծրագրեր ունենք այդ ռիսկերը նվազեցնելու համար։

Այն տարածքներում, որտեղ երիտասարդ կանայք տարիներ շարունակ մասնակցել են ճամբարին, կարող են լինել որոշ միջոցառումներ, երգեր և սովորույթներ, որոնք ամեն տարի կրկնվել են և դարձել ավանդույթներ: Ուշադրությամբ ուսումնասիրեք այս սովորույթները, որպեսզի համոզվեք, որ դրանք պատշաճ են և համապատասխանում են ճամբարի նպատակին և կարիքներին։

Ահա Երիտասարդ Կանանց ճամբարի սովորական օրվա մի օրինակ։ Ստորև թվարկված որոշ միջոցառումներ գուցե հնարավոր չլինեն ձեր տարածքում։ Հետևեք Հոգուն, մինչ կկազմեք ձեր իսկ ճամբարի օրակարգը, որը հարմարեցված կլինի ձեր երիտասարդ կանանց և ձեր միջավայրին։

girls in hard hats

Ճամբարի սովորական օրվա օրակարգի օրինակ

7․00-7․30 Ճամփորդել դեպի ճամբար կամ արթնանալ ճամբարում։

7․30-9․00 Պատրաստել և մատուցել նախաճաշը։ Մաքրել ուտելուց հետո։

9․00-9․15 Անցկացնել առավոտյան հոգևոր հավաք, որը ներառում է օրհներգ, սուրբ գրություն և աղոթք։

9․15-9․30 Կատարել հայտարարություններ միջոցառումների վերաբերյալ և քննարկել հանձնարարություններն ու անվտանգության կանոնները։

9․30-12․00 Մասնակցել միջոցառումների․ սովորել ջուրը մաքրելու, առաջին օգնության և արտակարգ իրավիճակների ապաստարանների մասին։

12․00-1․30 Պատրաստել և մատուցել կեսօրյա նախաճաշը։ Մաքրել ուտելուց հետո։

1․30-2․30 Հատկացնել հանգստի ժամ սուրբ գրությունների ուսումնասիրության, խորհրդածելու և օրագրում հատուկ թեմայի շուրջ գրելու համար։

2․30-5․00 Մասնակցել միջոցառումների․ խմբակային խաղեր, լողի մրցումներ և զբոսանք բնության գրկում։

5․00-6․30 Պատրաստել և մատուցել ճաշը։ Մաքրել ուտելուց հետո և մաքրել ճամբարի տարածքը։

6․30-7․30 Ներկայացնել տաղանդների շոու։

7․30-9․00 Անցկացնել երեկոյան հոգևոր հավաք և վկայությունների ժողով։

9․00-9․30 Ժամանակ տրամադրել անձնական աղոթքների և ուսումնասիրության համար։

21․30-22․00 Նախապատրաստվել քնելու։ Չափահասների և երիտասարդների ճամբարի ղեկավարները հանդիպում են, որպեսզի գնահատեն օրվա իրադարձությունները և նախապատրաստվեն հաջորդ օրվան։

girls at camp

Տեղեկացնել և ներգրավել ծնողներին

Այն, ինչը երիտասարդ կինը սովորում է ճամբարում, պետք է ամրացնի նրան և օրհնի նրա ընտանիքը։ Երբ պատրաստվեք ճամբարին, կարող եք հրավիրել ծնողներին կիսվել, թե ինչ հոգևոր կարիքներ և հույսեր ունեն նրանք՝ կապված իրենց դստեր հետ, ինչպես նաև կիսվեն միջոցառումների և հմտությունների գաղափարներով, որոնք օգտակար կլինեն իրենց ընտանիքների համար։ Որոշ ծնողներ գուցե ունենան փորձ կամ հմտություններ, որոնցով կարող են օգտակար լինել։ Տեղեկացրեք ծնողներին ճամբարի համար նախատեսված ամսաթվի, վայրի, գնի, թեմայի և միջոցառումների մասին։ Բացատրեք ծնողներին և երիտասարդ կանանց հագուստի և վարքագծի պահանջվող չափանիշները (տես Ա Տիմոթեոս 4․12)։

Նախքան ճամբարը, յուրաքանչյուր ծնողի խնդրեք լրացնել և վերադարձնել Ծնողի կամ խնամակալի թույլտվության և բժշկական տեղեկանքի ձևը յուրաքանչյուր երիտասարդ կնոջ համար։ Ձևը կարելի է գտնել safety.lds.org-ում։ Դուք պետք է ներկայացնեք մանրամասն տեղեկություններ ճամբարի և միջոցառումների վերաբերյալ, որպեսզի ծնողները կարողանան տեղեկանալուց հետո թույլտվություն տալ իրենց դուստրերի մասնակցության համար (տես Ձեռնարկ 2, 13.6.13)։

Անվտանգության և արտակարգ իրավիճակների պատրաստվածության ծրագիր

«Եվ եթե մենք ինչ-որ օրհնություն ենք ստանում Աստծուց, դա այն օրենքին հնազանդվելով է, որի վրա հիմնված է այն» (ՎևՈւ 130.21):

Ճամբարում ձեր ամենակարևոր պարտականություններից մեկն է՝ պահել երիտասարդ կանանց հոգևորապես, բարոյապես, հուզական առումով և ֆիզիկապես ապահով, մինչ նրանք գտնվում են իրենց ընտանիքներից հեռու։ Բոլոր գործողությունները և փոխհարաբերությունները պետք է համապատասխանեն Եկեղեցու չափանիշներին և Քրիստոսանման վարքագծի օրինակ հանդիսանան։ Բացի դրանից, ղեկավարները կարող են հաստատել հատուկ չափանիշներ և ուղեցույցներ ճամբարի համար, ապահովելով անվտանգությունը և ստեղծելով միջավայր, որն անհրաժեշտ է ճամբարի նպատակներն իրագործելու համար։ Երիտասարդները պետք է հասկանան, որ միջոցառման մասնակցությունը իրավունք չէ, այլ արտոնություն, որից կարող են զրկվել, եթե անպատշաճ վարվեն, կամ վտանգ առաջացնեն իրենց կամ ուրիշների համար: Ղեկավարները պետք է այդ ակնկալիքների մասին տեղեկացնեն ծնողներին ու մասնակիցներին, և միասին խորհրդակցեն, թե ինչպես լուծել անպատեհ վարք դրսևորելու դեպքում ծագած խնդիրները:

Ճամբարում պետք է լինեն համապատասխան թվով չափահաս ղեկավարներ։ Յուրաքանչյուր միջոցառմանը պետք է ներկա լինեն առնվազն երկու չափահաս ղեկավար: Ավելի մեծ միջոցառումների ժամանակ գուցե պահանջվեն լրացուցիչ չափահաս ղեկավարներ։ Մելքիսեդեկյան քահանայություն կրող երկու կամ ավելի եղբայրներ պետք է միշտ ներկա լինեն ճամբարում աջակցություն և պաշտպանություն ցուցաբերելու համար (տես Ձեռնարկ 2, 13.6.12)։ Բոլոր ղեկավարները՝ տղամարդ և կին, պետք է խուսափեն երիտասարդների հետ մենակ լինելուց, եթե պարզ չեն երևում մեծահասակ ղեկավարների տեսադաշտում:

Անմիջապես տեղեկացրեք քահանայության ղեկավարներին որևէ պատահարի կամ լուրջ վնասվածքի մասին, որը պահանջում է ավելին, քան հիմնական առաջին օգնությունը։ Բոլորին, ովքեր մասնակցում են ճամբարին, հատկապես չափահաս ղեկավարներին, հորդորում ենք լինել զգոն՝ չարաշահման և անտեսվածության ցանկացած նշան նկատելու համար։ Նրանք, ովքեր նկատում են ֆիզիկական, սեռական կամ էմոցիոնալ չարաշահում, պետք է անմիջապես տեղեկացնեն դեպքի մասին համապատասխան օրինապահ մարմիններին և կապվեն եպիսկոպոսի հետ։

Երիտասարդ կանայք և ղեկավարները պետք է պատրաստված լինեն ճամբարի ֆիզիկական պահանջներին։ Նվազեցրեք վտանգը՝ հնազանդվելով տեղի բոլոր կանոններին և ձեր տարածքի օրենքներին։ Համոզված եղեք, որ տրանսպորտը և կապի միջոցները հասանելի են ամեն պահի։ Հնարավորության դեպքում, հրավիրեք բուժքույր, բժիշկ կամ այլ անհատի, ով ունի նշանակալից առաջին օգնության փորձառություն, որպեսզի հաճախի ճամբար։ Բերեք առաջին բուժօգնության պարագաներ։ Ձեռքի տակ պահեք մոտակա բժշկական հաստատությունների և շտապ օգնության հասցեները և հեռախոսահամարները, ինչպես օրինակ, տեղական իրավապահների, հրշեջ կամ շտապօգնության ծառայությունները:

Նախքան ճամբարը, այցելեք երիտասարդ կանանց ծնողներին և ծանոթացեք յուրաքանչյուր երիտասարդ կնոջ առանձնահատուկ կարիքների հետ, ներառյալ սննդակարգային, բժշկական և էմոցիոնալ կարիքների հետ։ Ակտիվորեն վերահսկեք երիտասարդների վարքը և անհրաժեշտության դեպքում միջամտեք: Անտեղի կատակները, չարաճճիությունները և այլ ոչ բարի, անբարո կամ անհարգալից խոսակցություններն ու վարքագիծը անընդունելի են։ Հասկացեք և ընդունեք ձեր հսկողության տակ գտնվող երիտասարդների ապահովության և բարօրության համար ծրագրեր ունենալու պարտականությունը։ Ներկայացրեք, հայտնեք և պատրաստեք ուղիներ, որպեսզի նվազեցնեք ճամբարում սպասվող ռիսկերը։