Ko e hā te u lava ʻo fakahoko ke fakahaaʻi ai ʻa e ʻofa faka-Kalaisí?

‘Oku mahuʻinga ke mahino “ko e tokotaha kotoa pē ʻoku ʻi ha feituʻu kehekehe ‘i he halá.” ‘Oku fie maʻu ke tau ‘iloʻi ʻa e ngaahi fiema‘u ʻa e ni‘ihi kehe ʻoku tau feohí. ʻOku ʻi ai ʻa e faingataʻaʻia ʻa e tokotaha kotoa pē. ‘Oku ʻi ai ha niʻihi ʻoku ʻi ai honau ngaahi faingataʻaʻia lahi ka ʻoku ʻikai ke tau ʻilo ki ai. ʻOku ʻofaʻi kotoa kitautolu ʻe he ʻOtuá. ‘Oku fie maʻu ke faka-Kalaisi ʻetau feinga ke vakai ki he ni‘ihi kehé. ‘Oku ʻikai totonu ke tau “tuku ʻa e loto-fakamāú ke ne puleʻi ʻa e founga ʻo ʻetau feohi mo e kakaí.” Ko e moʻuí ʻoku ʻikai ʻuhinga pē “ki heʻetau fakalakalaká, ka ke tokoni‘i foki mo e fakalakalaka ʻa e niʻihi kehé.” “‘Oku fokotuʻu kitautolu ʻi he feituʻu ʻoku tau ʻi aí ke tau lava ʻo ʻofaʻi mo hiki hake ʻa e niʻihi kehé.”

Ke hoko ko ha ākonga ʻa Kalaisí, ʻoku ʻuhinga ia ke tau tokoniʻi ʻa e niʻihi kehé ʻi he hala fonongá. “ʻOku fakamahuʻingaʻi ʻe he ongoongolelei ‘o Sīsū Kalaisí ʻa e kakaí. ʻOku ʻikai fakamahuʻingaʻi ʻe he kakaí ʻa e kakaí. Pea ‘oku totonu ke tau fakaleleiʻi ia. ‘Oku fie maʻu ke tau ongoʻingofua pea ʻofaʻi mo ʻoange kiate kinautolu ʻa e faingamālie ke fakalakalaka mo tupulaki pea fakahoko maʻu pē honau lelei tahá. ʻOku ʻi ai honau ngaahi talēniti mo e ngaahi ivi malava pea [mo e ngaahi ʻulungaanga ʻoku] fie maʻu ʻi he puleʻanga ʻo e ʻOtuá.” ʻI he taimi ʻoku omi ai ʻa e kakaí ki he lotú, “ʻoku totonu ke nau ongoʻi he taimi ko iá ʻoku talitali lelei, mo ʻofaʻi, pea hiki hake mo ueʻi fakalaumālie kinautolu.” Hili iá, ‘i he taimi ʻoku nau hū atu ai ʻi he matapaá, ʻoku nau lelei ange “koe‘uhí he ʻoku nau ‘iloʻi ‘oku ʻofeina kinautolu ‘e he ʻEikí. [Pea ‘oku nau ʻilo‘i] ʻoku ‘i ai honau kaungāme‘a ʻi heʻenau tui fakalotú” (Carol F. McConkie, “Lifting Others,” ChurchofJesusChrist.org).