E mafai faapefea ona ou lagolagosua i se tasi ua faailoa mai e ia lava o se ua fesuiai itupa?

Na aoao mai e Elder Ronald A. Rasband e faapea, o tagata ua aafia i lagona o le fesuiai o itupa “e manaomia ona siomia i aao o lo latou Faaola ma iloa e alofaina i latou. E tele lava ina valaau mai le Alii ia i tatou; Ua Ia faamoemoeina i tatou ina ia avea ma Ona aao alofa e talileleia i latou. E manaomia ona tatou fautuaina a latou uo ia faia le mea lava lea e tasi” (“O Iesu Keriso le Tali” [Faasauga ma se Pulega Aoao, 8 Fep. 2019]).

O le talanoa e uiga i lagona o itupa e le onomea, e mafai ona faigata ma fenumiai. Atonu e le iloa e se e pele ia te oe ona talanoa atu ia te oe e uiga i lena mea. Atonu o nisi taimi e te lagona ai le le talafeauga. E ui atonu e te le iloa i taimi uma pe faapefea ona tali atu i tauiviga o feagai ma se isi tagata, o le a e le faamelea le aapa atu ma le alofa ma le malamalama.

Afai e te soona mateletele, oso le ita, pe fai atu mea e te toe tu’itino ai, aua e te faavaivai. E ono faigata foi ia te oe lenei mea. O se taimi tupito lea i se olaga o talatalanoaga o le a e faia ma se e pele ia te oe. Afai e te lagona e tatau ona e faatoese ona o au faatinoga, fai.

Afai o e popole pe lagona le loto nutimomoia i lea tulaga, ia e iloa e le o tuua na o oe. Atonu e te popole faapea ua se’e malie ese atu le lumanai sa e moemiti i ai mo lou aiga. O le faagasologa o le loto nutimomoia e ono umi se taimi. (Tagai i le “Grief,” Gospel Topics, topics.ChurchofJesusChrist.org.)

Na faamalamalama mai e Peresitene Bonnie H. Cordon: “Tatou te mananao uma lava ina ia faailoa aloaia. Tatou te mananao ina ia faatāuaina, ina ia manatuaina, ma ia lagonaina le alofagia. … E mafai ona tatou faalogo ma alofa atu e aunoa ma le faamasino atu ma ofo atu le faamoemoe ma le fesoasoani faatasi ai ma le taitaiga iloatino a le Agaga Paia. … Pe malolosi pe vaivai a tatou mamoe, fiafia pe mafatia, e mafai ona tatou faamautinoa e leai se tasi e savali na o ia” (“O Le Galuega o le Faaleleiga,” Liahona, Nov. 2018, 74, 76).