Te Haamani-Ino-raa
Ua ite oioi râ vau e, no toʻu faaiteraa i taua mau parau ra, ua faahapa puai mai te mau orometua o taua mau faaroo ra iaʻu , e o te tumu hoi te reira no te hamani-ino-raa rahi tei tupu noa i te rahi; e noaʻtu e tamaiti matau-ore-hia vau, i ropu i te ahuru ma maha e te ahuru ma pae o toʻu matahiti, e noaʻtu aita te huru o toʻu oraraa i faariro iaʻu ei taata ite-maitai-hia i roto i teie nei ao, noaʻtu te reira, te vai ra te tahi mau taata tiʻaraa teitei tei hiʻo mai iaʻu e ua faatupu ratou i te riri o te taata i niʻa iho iaʻu e te hamani-ino-raa rahi. Mai te reira te huru o te mau faaroo atoa– ua tahoê ratou no te hamani ino mai iaʻu.
Ua maere pinepine au mai te reira taime, i te mea e, e tamaiti itea-ore-hia vau e te taata, hoê ahuru ma maha e tiʻahapa noa iho toʻu matahiti, e aore hoi e faufaa taʻu no te oraraa nei, maori râ na roto i te rave-noa-raa i te ohipa i te mau mahaha atoa, area râ, i roto i te mata o taua mau taata rarahi no taua mau haapaʻoraa roo maitai ra, e au e, e taata rahi au, i tupu ai i roto ia ratou te varua hamani ino puai roa, e te varua faahapa. Noaʻtu râ e mea maere ïa, o te reira ihoa ïa te huru, e na te reira i faautupu pinepine i toʻu oto rahi.
Area râ, oia mau roa, ua ite au i te orama. Ua manaʻo iho nei au e, ua riro vau mai ia Paulo i roto i toʻu feruriraa a paruru ai oia iaʻna iho i mua i te Arii ra ia Ageripa, e ua faaite oia i te aamu no te orama taʻna i farii i toʻna iteraa i te maramarama e i toʻna faarooraa i te reo; e mea iti roa râ te taata i tiʻaturi iaʻna; ua parau mai te tahi pae, e taata haavare oia, ua parau mai te tahi atu pae, e maamaa toʻna; ua atahia oia, e ua faainohia oia. Aita roa râ te reira i faaore i te parau mau no taʻna orama. I ite na oia i te hoê orama, ua ite oia e ua farii oia i te reira, e aore roa te taatoʻaraa o te hamani-ino-raa i raro aʻe i teie nei raʻi e faahuru ê i te reira; e noaʻtu e hamani ino ratou e tae noaʻtu ua pohe oia; ua ite râ oia, e e ite oia e tae noaʻtu i toʻna hutiraa aho hopea, e ua ite oia i te maramarama, e ua faaroo oia i te hoê reo i te parauraa mai iaʻna, e aore roa te mau mea atoa o teie nei ao e faahuru ê i toʻna feruriraa aore râ, i toʻna tiʻaturiraa.
Oia atoa iaʻu nei. Ua ite mau vau i te maramarama, e i roto i taua maramarama ra, ua ite au i na Taata toopiti, e ua paraparau mai ihoa raua iaʻu; e noaʻtu ua au-ore-hia vau, e ua hamani-ino-hia vau no te mea ua parau vau e, ua ite au i te orama; e parau mau ihoa ïa. E a hamani ino mai ai ratou iaʻu, e a faahapa haavare mai ai ratou iaʻu no toʻu parauraa i te reira, ua parau vau i roto i toʻu aau e: Eaha ratou e hamani ino mai ai iaʻu no te faaiteraa i te parau mau? Ua ite mau vau i te hoê orama; e o vai hoi au e tiaʻi iaʻu ia patoʻi i te Atua, aore râ, eaha hoi to te ao nei i manaʻo ai e, ia huna vau i taʻu i ite mata? No te mea, ua ite mau vau i te hoê orama; ua papu te reira iaʻu , e ua papu atoa iaʻu e ua ite te Atua i te reira, e aita e nehenehe iaʻu ia huna i te reira, e ua papu iaʻu e, na roto i toʻu hunaraa i te reira, e faariri au i te Atua e e faahapahia vau e aʻna.
Ua papu iaʻu toʻu feruriraa i teie nei no niʻa i te mau huru haapaʻoraa o te ao nei– e ere ïa i te mea tiʻa ia amui atu vau i te hoê noaʻtu o ratou, ia haere noa râ vau i toʻu haerea e tae noaʻtu ua parau-faahou-hia vau. Ua ite au e, e parau mau te parau faaite a Iakobo– e te taata tei ere i te ite, e nehenehe taʻna ia ani i te Atua, e roaa iaʻna te ite ma te patoʻi-ore-hia.
Ua rave tamau noa vau i taʻu mau ohipa i mâtauhia e tae roaʻtu i te piti ahuru ma hoê no Setepa, 1823, a hamani-ino-hia ai au e te mau huru taata atoa, to te pae faaroo e to te pae faaroo ore, no te mea ua parau tamau noa vau e i ite na vau i te hoê orama.
I roto i taua area taime ra, mai te taime au i ite ai i te orama e tae noa mai i te matahiti 1823– ua opanihia vau eiaha e amui atu i te hoê noaʻtu o te mau haapaʻoraa i te reira tau, e e taata apî hoi au, e ua hamani ino mai te mau taata o tei au ia riro ei hoa noʻu e ei tauturu iaʻu; e mai te mea e manaʻo ra ratou e ua haavarehia vau, e mea maitai ia ratou ia tamata, na roto i te afaro e te aroha, ia faahoʻi atu iaʻu–Ua vaiiho-noa-hia râ vau i roto i te mau huru faahemaraa atoa. Ua amui au i te mau huru pùpù taata atoa, e ua rave pinepine au i te mau hapehape rii na roto i te huru paruparu o toʻu apîraa e te huru hape noa o te aau taata nei. Te peʻapeʻa nei au ia parau e, o te tumu ïa i topa ai au i roto i te tahi mau faahemaraa au ore i mua i te aro o te Atua. I toʻu tuuraa i teie parau faʻi , eiaha te taata ia manaʻo e ua rave au i te mau hara rahi e te ino. E ere ïa toʻu huru ia na reira.