“Lesona 12 Anomea mo le Sauniuniga o le Vasega: Faafaileleina o le Sootaga o le Faaipoipoga,” Anomea a le Faiaoga O Le Aiga e Faavavau (2022)
“Lesona 12 Anomea mo le Sauniuniga o le Vasega,” Anomea a le Faiaoga o le Aiga e Faavavau
Lesona 12 Anomea mo le Sauniuniga o le Vasega
Faafaileleina o le Sootaga o le Faaipoipoga
Pe ua e vaai i se ulugalii o i ai se faaipoipoga malosi, fiafia ma mafaufau po o le a le ki i lo la manuia? Sa ta’ua e Peresitene Gordon B. Hinckley, “O se faaipoipoga lelei e manaomia ai le taimi. E manaomia ai le taumafaiga. E tatau ona e galue i ai. E tatau ona e atiina ae” (“Matafaioi o le Olaga,” Ensign, Feb. 1999, 4). A o e suesue i aoaoga faavae ma mataupu faavae i lenei lesona, mafaufau po o le a se mea e mafai ona e faia e saunia ai oe lava mo se faaipoipoga fiafia po o le faafaileleina lelei o lau faaipoipoga.
Vaega 1
E mafai faapefea ona ma fausia ma lo‘u toalua se faaipoipoga fiafia ma faavavau?
I se lalolagi lea e foliga mai ai le tele o faaipoipoga o loo tauivi pe faamutaina i le tatalaina o faaipoipoga, atonu e taumanatunatu nisi pe mafai moni lava ona maua le fiafia faalefaaipoipoga mo i latou. Na tuuina mai e Elder Jeffrey R. Holland o le Korama a Aposetolo e Toasefululua, le savali lenei o le faamoemoe:
Sei ou tautino atu ma le manino, a‘ia’i, ma le mautinoa e le gata o loo i ai se mea faapea o se faaipoipoga fiafia, ae o faaipoipoga fiafia o tulafono ia, ae le o le tuusaunoaga.
O i ma‘ua ma Sister Holland o se faamaoniga ola o le, e le mafai ona na ona e fiafia ae e mafai ona e matuai fiafia lava. …
E tatau ona e galue i se faaipoipoga. O mea lelei uma ua ou iloa i lenei lalolagi e tatau ona e galue ai.
O le a fesoasoani Le Atua ia te oe. Mai mea uma i lenei lalolagi o le a Ia fesoasoani ia te oe, o le a Ia fesoasoani ia te oe i a outou faaipoipoga ma o outou aiga, aua e taua ia te Ia e pei lava ona taua ia te oe. (“You Asked—They Answered: Marriage and Family,” New Era, Aug. 2016, 3)
Faitau le saunoaga lenei a Elder L. Whitney Clayton, o le sa auauna atu o se tasi o Fitugafulu, e uiga i le mea e saofaga i se faaipoipoga fiafia ma faavavau. Mafaufau e faailoga mataupu faavae e te mauaina.
Sa ou matauina, i faaipoipoga e aupito sili ona fiafia, e mafaufau le tane ma le ava i la la’ua sootaga, o se penina tautele, o se oa e le mafai e tupe ona faatau. Ua la iloa e leai lava se isi sootaga o soo se ituaiga e mafai ona maua ai le fiafiaga tele, e fua mai ai mea lelei e tele, pe aumaia ai le faaleleia tele faaletagata. …
… O faaipoipoga manuia e faavavau ua fausia i luga o le faavae o le faatuatua i le Alii o Iesu Keriso ma le usiusitai i Ana aoaoga [tagai “O Le Aiga O Se Folafolaga i le Lalolagi,” ChurchofJesusChrist.org]. …
… O faaipoipoga fiafia e faalagolago i le meaalofa o le salamo. …
O le lotomaualalo o le ute lea o le salamo. O le lotomaualalo e le manatu faapito, e le faaloloto. … O le lotomaualalo o lona uiga e taufai saili ia tane ma ava e faamanuia, fesoasoani, ma si’i ae e le tasi le isi, e faamuamua e le tasi le isi i faaiuga uma. …
… O faaipoipoga e aupito fiafia ua ou vaai i ai, e suluia mai ai le usiusitai i se tasi o poloaiga aupito fiafia—ia tatou “nonofo faatasi i le alofa” [Mataupu Faavae ma Feagaiga 42:45. (“Faaipoipoga: Matau ma Aoao,” Liahona, Me 2013, 83, 84, 85)
Talanoa i Sauniuniga mo le Vasega
Mafaufau i se ulugalii e te iloa e fiafia le la faaipoipoga. Aapa atu ia i laua ma fai atu i ai e faasoa mai ni mataupu faavae sa taua i lo laua manuia. A o laua talanoa, tusifaamaumau mea ua e aoaoina ma saunia e faasoa atu i le taimi o le vasega. Afai e le mafai ona e faafesootaia se tasi, matamata le vitio “Expressions of Love” (3:26) ma faalogologo mo ki i se faaipoipoga fiafia.
Vaega 2
E mafai faapefea e le mulimuli i le faataitaiga a Iesu Keriso ona fesoasoani ia te au e faafailele la‘u faaipoipoga?
Na aoao mai Peresitene Russell M. Nelson e uiga i le taua o le faafaileleina o faaipoipoga:
O le faaipoipoga e maua ai avanoa sili atu mo le fiafia, nai lo se isi lava sootaga faaletagata soifua. Ae e i ai nisi ulugalii faaipoipo, e le taunuu i le tulaga atoatoa latou te gafatia. Ua latou tuu lava le alofa logoitino ia elea, ua leai lava ano le tasi i le isi, ua faataga isi mea e fiafia i ai po o ao valevale o le le amanaia e faapogisa ai le vaaiga i le mea moni e mafai ona oo i ai a latou faaipoipoga. E mafai ona sili atu le fiafia o faaipoipoga, pe afai e faafaileleina ma le matua faautauta. (“Faafaileleina o Faaipoipoga,Na aoao mai Russell M. Nelson le Peresitene e uiga i le taua o le faafaileleina o faaipoipoga: Liahona, Me 2006, 36)
Faatasi ai ma le faatonuga na tuuina atu e le Aposetolo o Paulo i tagata o le Ekalesia i Efeso o se fautuaga e faatatau i le faaipoipoga.
Suesue e Sauniuni ai mo le Vasega
Faitau le Efeso 5:25, 28–31, ma mafaufau pe mafai faapefea e le mulimuli i le faataitaiga a Iesu Keriso ona fesoasoani i se tane ma se ava e faafailele le la faaipoipoga.
O le mulimuli i le faataitaiga a le Faaola e mafai ona fesoasoani i se tane ma se ava e faataunuu ai lo la “tiutetauave paia e alofa ma tausi e le tasi le isi” (“O Le Aiga: O Se Folafolaga i le Lalolagi,” ChurchofJesusChrist.org). O nisi o taumafaiga e faafailele se faaipoipoga atonu e tele, ae o nisi o taga e sili ona aoga ma anoa e “laiti ma faatauvaa” (Alema 37:6).). E pei ona aoao mai Peresitene Dieter F. Uchtdorf, a o i ai i le Au Peresitene Sili, “O faaipoipoga maoae e fausia i piliki, i lea aso ma lea aso, i le aluga o le olaga” (“I Le Viia o I Latou o E Laveaina,” Liahona, Me 2016, 78).
Na tuuina mai e Peresitene Linda K. Burton, o le sa avea muamua ma Peresitene Aoao o le Aualofa, ni nai fesili faigofie e mafai ona tatou faaaogaina e iloilo ai a tatou taumafaiga e faafailele a tatou faaipoipoga:
O sina fetuunaiga, e mafai ai ona faatatau nei fesili i le toatele o i tatou, pe ua tatou faaipoipo po o nofofua ma po o le a lava le tulaga o i ai o tatou aiga.
O le a le taimi mulimuli na ou faamalo faamaoni ai i la’u soa, a le na o ia pe i luma o le maua fanau?
O le a le taimi mulimuli sa ou faafetai atu ai, faailoa atu le alofa, pe aioi atu faamaoni mo ia i le tatalo?
O le a le taimi mulimuli sa ou taofia ai au mai le fai atu o se upu ou te iloa e ono faatiga?
O le a le taimi mulimuli sa ou faatoese atu ai ma aioi ma le faamaulalo mo se faamagaloga—e aunoa ma le faaopoopo atu o upu “ae pe ana e” po o le “ae pe ana e le”?
O le a le taimi mulimuli sa ou filifili ai ia fiafia nai lo le pulunaunau ia “sa’o”? …
Tou te fia auai faatasi ma au i le sailia o le fesoasoani a le Agaga Paia e aoao i tatou i le auala e sili ona lelei e siitia ai le tasi ma le isi i a tatou matafaioi faaatoatoaina o ni atalii ma afafine o le feagaiga a ō tatou matua faalelagi alofa? (“O Le A Tatou O Ae Faatasi i Luga,” Liahona, Me 2015, 31–32)
Mafaufau Loloto i Sauniuniga mo le Vasega
Mafaufau i se faataitaiga patino po o se aoaoga mai le soifuaga o le Faaola lea e mafai ona fesoasoani i se tasi e saunia ai pe faafailele lana faaipoipoga.
Vaega 3
E faapefea ona ou pipii atu i lo‘u toalua?
I se faaaliga na tuuina mai i le 1831, na tuuina mai ai e le Alii nisi o tulafono aoao o le amio mo tagata o le Ekalesia. E aofia ai i lenei mea le poloaiga “ia e alofa i lau ava ma lou loto atoa, ma ia e pipii atu ia te ia ae lē o se isi” (Mataupu Faavae ma Feagaiga 42:22; tagai foi Kenese 2:24; Mataio 19:5)..
I tusitusiga paia o le upu pipii atu o lona uiga ia pipiimau, mulimuli, pipii, faakelu, pe auai. “E ala i le faauigaga faatusi paia, ua tatou iloa ai ua faamoemoeina i tatou e le Atua ia ‘pipii atu’ i o tatou taitoalua po o le ‘pipii atu’ ia te ia” (Matthew O. Richardson, “O Mataupu Faavae E Tolu o le Faaipoipoga,” Ensign, Apr. 2005, 22).
Na aoao mai e Spencer W. Kimball peresitene o le ekalesia mea nei e uiga i le fasifuaitau “lē o se isi” (Mataupu Faavae ma Feagaiga 42:22):
O upu lē o se isi e aveesea ai tagata uma ma mea uma. O le toalua la o le faatumutumuga lea o le olaga o le tane po o le ava, ma e le mafai e le olaga tafao po o le olaga faigaluega po o le olaga faaupufai po o se isi mea lava ona suitulaga i luma atu o lau soa, o lou toalua. (O Le Vavega o le Faamagalo Atu [1969], 165)
Sa faamalamalama mai e Elder Clayton le ala e faaaoga ai le pipii atu i o tatou taitoalua a o tatou faaaogaina ala o faasalalauga faaagafesootai:
Ua aoao mai perofeta e faapea o paaga manuia o faaipoipoga e “matuai faamaoni a‘ia’i” le tasi i le isi [tagai Thomas S. Monson, “Mana o le Perisitua,” Liahona, Me 2011, 68; Gordon B. Hinckley, “Matafaioi o le Olaga,” 4]. Latou te tausisia lo latou faaaogaina o ala o faasalalauga faaagafesootai ia agavaa atoatoa i soo se itu. Latou te le faatagaina i latou lava e faia ni mea faalilolilo i le initoneti. La te saoloto e faasoa i le tasi ma le isi a laua uputatala mo upega fesootai faaagafesootai. La te le tilotilo lava i talaaga o se tasi i upega tafailagi i soo se itu e ono faalataina ai le faatuatuaga paia o lona toalua. La te le faia lava pe tautala foi i se mea e atagia mai ai le lē mafaufau, pe na ona faaōlioli pe na tino mai foi. (“Faaipoipoga: Matamata ma Aoao,” 84)
E tusa ai ma le taua o le avea o lou toalua ma au faamuamua aupito maualuga, na aoao mai ai e Peresitene Nelson mea nei i se sauniga perisitua o le konafesi aoao. E ui o lenei fautuaga sa tuuina atu i tane, ae e tutusa lava le faatatau i taitoalua uma.
Alofa ma tausi lou toalua. Ia tasi ma ia. Ia avea ma ana soa. … E leai se isi faanaunauga i le olaga e tatau ona ave i ai le faamuamua i lo le fausiaina o se mafutaga e faavavau ma ia. E leai ma se mea i le TV, se masini feaveai, po o se komepiuta e sili atu ona taua nai lo lona tulaga manuia. Ia fai se sailiiliga o le auala o loo faaalu ai lou taimi ma po o fea foi o tuuto atu i ai lou malosi. O iina o le a ta’u atu ai ia te oe le mea o loo i ai lou loto. Tatalo ia ogatusa lou loto ma le loto o lau avā. Saili ia aumaia ia te ia le olioli. (“E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 68–69)
Faatino
Mulimuli i le valaaulia a Peresitene Nelson e “fai se sailiiliga o le auala e te faaaluina ai lou taimi ma le mea e tuuto i ai lou malosi” (“E Mafai Ona Tatou Faia ia Lelei Atu ma Ia Tatou Lelei Atu,” 68). O a ni fetuunaiga e manaomia ona e faia i le taimi nei ina ia saunia lelei ai e pipii atu i lou toalua i le lumanai po o le pipii atoatoa atu i lou toalua pe afai ua e faaipoipo? Tusifaamaumau se fuafuaga po o se sini e mafai ona e galue ai i lenei vaiaso.