Pene 5

Te Varua Maitai e te heheuraa na te taata hoê

E nehenehe ta tatou e farii i te hoaraa o te Varua Maitai, mai te au i to tatou haapa‘o maitai, no te haamaramarama e no te arata‘i ia tatou i roto i to tatou nei oraraa e no te arata‘i ia tatou i te ora mure ore.

No roto mai i te oraraa o Wilford Woodruff

I te ava‘e atopa 1880, ua parau te peresideni Wilford Woodruff i te Feia Mo‘a e ua haere mai te peresideni BrighamYoung o tei pohe i te matahiti 1877, e te peresideni Heber C. Kimball o tei pohe i te matahiti 1868, e farerei ia’na. Ua faati‘a te peresideni Woodruff e « I to matou taeraa’tu i to matou vahi tape‘araa, ua ani atu vau i te peresideni Young mai te mea e a‘o mai oia ia matou. Ua parau mai oia ‘Eita, ua faaoti au i to‘u iteraa papû i roto i te tahuti. Eita vau e paraparau faahou i teie nei nunaa.’ Ua na ô mai ra oia, ‘Tera râ, ua haere mai au e farerei ia oe; ua haere mai au e tia‘i ia oe, e no te hi‘o eaha ta te nunaa e rave nei.’ I muri iho, ua parau mai oia, ‘Te hinaaro nei au ia haapii oe i te nunaa–e te hinaaro nei au ia pee oe iho i teie nei a‘oraa–ia rave ratou i te ohipa e ia ora ratou ia noaa te Varua Mo‘a ia ratou, no te mea ia ore te reira, eita e nehenehe ia outou e patu i te basileia; ia ore te Varua o te Atua e ro‘ihia outou i te ati i te haereraa na roto i te pouri, e i te ati i te oreraa e rave faaoti i to outou piiraa ei mau aposetolo, e ei mau peresibutero i roto i te Ekalesia e i roto i te basileia o te Atua.’¹

E ere teie nei a‘oraa e a‘oraa apî no te peresideni Woodruff. Ua matau to’na mau taea‘e ia’na mai te « hoê taata o te faaroo ohie i te mau faaiteraa a te Varua a te Fatu, te hoê taata o te arata‘ ihia e te faurûraa i te raveraa i ta’na ohipa, hau atu i te tahi atu horo‘araa no te paari aore râ, no te haava tei mauhia e ana iho. »²Ua faahiti pinepine oia i te hoê ohipa i tupu i ni’a ia’na na roto i te mau faaiteraa a te Varua. Ua tupu te reira a tere ai oia e to’na ra utuafare i te pae hitia o te râ o te Fenua Marite, i reira oia i te pii-raa-hia no te tavini i te hoê misioni. Ua parau oia:

Ua faahoro vau i to‘u nei pereoo puaahorofenua i te hoê pô i roto i te aua o te taea‘e Williams [te hoê melo o te Ekalesia]. Ua faahoro te taea‘e Orson Hyde [no te Tino Ahuru ma Piti Aposetolo] i te hoê pereoo i pihai iho i to‘u pereoo. Tei roto ta‘u vahine faaipoipo e ta‘u mau tamarii i te pereoo. I muri a‘e i to‘u tatararaa i ta‘u mau puaahorofenua e i to‘u tamaaraa, ua haere atu vau e taoto i roto i te pereoo. Aita vau i maoro roa i reira no te tahi noa tau minuti ua parau mai te Varua ia‘u, ‘A ti‘a i ni‘a e a faatea ê i te pereoo’ Ua parau vau i ta‘u vahine e ti‘a ia‘u ia ti‘a i ni‘a e ia faatea ê te pereoo. Ua parau mai oia, ‘No te aha ?’ ua parau vau, ‘Aita vau i ite.’ O tera ana‘e ta’na i ani ia‘u i taua mau taime ra, ia parau ana‘e au e aita vau i ite, ua nava’i te reira. Ua ti‘a vau i ni‘a e ua faatea ê i to‘u pereoo… Ua hi‘o vau na pihai iho ia‘u e ua haere au e taoto. Ua parau faahou mai te Varua, ‘A haere e faatea ê i ta oe mau animala i taua tumu ale ra’… Ua haere au e ua faatea ê i ta‘u mau puaahorofenua e ua tuu atu vau ia ratou i roto i te hoê uru ti‘a’iri. Ua haere faahou atu vau e taoto.

« E toru ahuru minuti i muri mai ua farara mai te hoê mata’i rahi e ua haafati i taua tumu ale e toru avae i nia’tu i te fenua. Ua pee atu te tumu ale na ni‘a e toru aore râ e maha aua e ua ma‘iri ihora i roto i taua aua ra, i pihai iho i te pereoo a te taea‘e Orson Hyde, i te vahi iho i vai na to‘u nei pereoo. Eaha ra ïa te hopea ahani e aita vau i faaroo i taua Varua ra ? E mea papû roa e ua pohe au e ta‘u vahine e te mau tamarii. O tera taua reo iti ha‘iha- ‘i ia‘u ra-aita e aueueraa fenua, aita e patiri, aita e uira; o te reo iti ha‘iha‘i ra o te Varua o te Atua. Ua paruru oia i to‘u nei oraraa. O tera te varua no te heheuraa ia‘u. »³

Ua haapapû te peresideni Woodruff i te hinaaro no te mau melo atoa o te Ekalesia ia arata‘ihia e te Varua Maitai–ia imi i te heheuraa no’na iho. Ua haapapû oia, « Eita e nehenehe i te Ekalesia a te Atua ia ora e piti ahuru ma maha hora e aita e heheuraa. »⁴

Te mau haapiiraa a Wilford Woodruff

E taata varua te Varua Maitai o te faaite i te iteraa no te Atua te Metua, no Iesu Mesia e no te parau mau o te evanelia.

Te Varua Maitai o te hoê ïa o te mau taata o te Toru Tahi. E tino [mau tino i‘o e te ivi] to te Atua te Metua e te Atua te Tamaiti, e ua hamani te Atua iho i te taata mai te au i To’na iho hoho‘a; are‘a te Varua Maitai e taata Varua ïa, o te faaite i te iteraa no te Metua e no te Tamaiti i te mau tamarii a te taata [a hi‘o PH&PF 130:22].⁵

Eaha te iteraa papû rahi roa‘e e nehenehe ta te hoê tane aore râ, ta te hoê vahine e farii no ni‘a i teie nei ohipa a te Atua ? E parau atu ïa vau ia outou e eaha te iteraa papû rahi roa‘e ta‘u i farii, te iteraa hau atu i te papû roa, o te iteraa ïa a te Varua Maitai, te iteraa o te Metua e o te Tamaiti.⁶

E haavarehia paha to tatou mau mata e to tatou mau tari‘a na te paari e te opuaraa huna a te taata; area râ eita roa te Varua Maitai e haavare noa‘e i te hoê noa‘e taata.⁷

Te parau mai nei te mau papa‘iraa mo‘a ia tatou e te vai nei te hoê varua i roto i te taata e na te faauru a te Puaihope ra i noaa’i ia’na te ite [a hi‘o Ioba 32:8]. I ni‘a i teie nei ture i matau ai tatou i te parau mau, e te mana o te evanelia ta tatou i farii. E faaitehia mai ia tatou te mau ture no te ora mure ore na roto i te faaururaa o te Varua Maitai, no te mea e vai taua Varua ra ia tatou, e haamaitai oia i to tatou mau feruriraa e mai te mea e haapa‘o tatou i taua mau haapiiraa ra, ma te farii i roto ia tatou te mana‘o tano, e ite maramarama ïa tatou i te mau mea mai to ratou iho ra huru.⁸

E nehenehe ta te Feia Mo‘a tata‘itahi haapa‘o-maitai i te mau Mahana Hopea nei e farii i te horo‘araa o te Varua Maitai, o te horo‘araa rahi roa‘e ta te hoê taata e nehenehe e farii i roto i te oraraa tahuti nei.

Te mau taata atoa o tei tatarahapa i ta ratou mau hara, e tei bapetizohia ia matara ta ratou mau hara, mai te au i te haapa‘oraa a te Atua, e mai te hoho‘a o Iesu Mesia, tei taumihia i raro i te pape i te huru o to’na ra pohe e tei ti‘a faahou i te huru o to’na ra ti‘afaahou- raa i ni‘a, e ti‘araa ïa to ratou no te farii i te Varua Maitai; ua fafauhia’tu te reira, e na ratou te reira; e ti‘araa te reira no te mau taata atoa ia oaoa i te reira, e mai te mea e farii ratou i te Varua Maitai e [Ta’na] mau horo‘araa tei ia ratou ra ïa te faauru, te maramarama e te parau mau; e mata to ratou no te hi‘o, e taria no te faaroo e e aau no te ite.⁹

I teie nei, mai te mea tei ia outou ra te Varua Maitai– e ti‘a i te mau taata atoa ia farii i te reira-e nehenehe ta‘u e parau atu ia outou e aita’tu e horo‘araa rahi atu â, aita’tu e haamaitairaa rahi atu â i horo‘ ahia i te mau taata atoa i ni‘a i te fenua nei. E utuutuhia paha outou e te mau melahi; e ite mata paha outou i te mau temeio e rave rahi; e ite mata paha outou i te mau ohipa maere i ni‘a i te fenua nei; tera râ te parau nei au e te horo‘araa o te Varua Maitai o te horo‘araa rahi roa a’e ïa e nehenehe e horo‘ahia’tu i ni‘a i te taata nei. E mea na roto i teie nei mana i rave ai tatou i te mea ta tatou i farii. Na teie mea i paturu ia tatou na roto i te mau hamani-ino-raa atoa, te mau tamataraa e te mau ati tei tae mai i ni‘a ia tatou.¹⁰

Te mau tane atoa e te mau vahine atoa tei tomo i roto i te Ekalesia e tei bapetizohia ia matara te hara e ti‘araa ïa to ratou no te farii i te heheuraa, e ti‘araa to ratou no te farii i te Varua o te Atua, no te tauturu ia ratou i roto i ta ratou mau ohipa, i roto i ta ratou faatereraa i ta ratou mau tamarii, i te a‘oraa i ta ratou mau tamarii e i te mau taata o ta ratou e peresideni mai te au i to ratou piiraa. Aita te Varua Maitai i faaherehere-noa-hia no te mau tane ana‘e, aore râ te mau aposetolo aore râ te mau peropheta ana‘e; e fatuhia râ te reira e te mau tane e te mau vahine haapa‘o-maitai-atoa, e te mau tamarii tei tae i te paari no te farii i te evanelia a te Mesia.¹¹

E ti‘a ia tatou ia haamatau ia tatou iho i te reo iti ha‘iha‘i o te Varua Maitai- te reo o te heheuraa.

Te vai nei te hoê rave‘a tei faataahia… na roto i te reira e fariihia’i te heheuraa no ô mai i te Fatu ra no te faatereraa i ta’na Ekalesia. Te vai nei hoê ana‘e taata i ni‘a i te fenua nei, i te hoê taime, tei mau i teie nei mana. Area râ e haamaitairaa to te mau melo tata‘itahi atoa ia farii i te heheuraa no ô mai i te Fatu no te arata‘i ia’na i roto i ta’na iho mau ohipa, e no te faaite papû atu ia’na no ni‘a i te tanoraa mau o te mau haapiiraa e te mau ohiparaa a te taata.¹²

Eaha te heheuraa ? O te faaururaa ïa a te Varua Maitai i te taata nei. Ua parau o Iosepha Semita i te taea‘e John Taylor i to’na ra tau: « E te taea‘e Taylor, e haapa‘o oe i te faaiteraa a te Varua o te Atua; e ara oe i te mau faaiteraa a te Varua ia oe; e faaohipa oe ia ratou i roto i to oe nei oraraa, e e riro [teie] ei ture no te heheuraa na oe, e e ite oe e e taa oe i teie nei Varua e teie nei mana » Teie te taviri, te ofa‘i niu o te mau heheuraa atoa… Ua tutava vau i roto i to‘u iho nei oraraa ia haamatau ia‘u e taua Varua ra, e ia haapii mai i ta’na mau huru raveraa.¹³

E fea o outou tei farii i te heheuraa ? E fea o outou tei farii i te Varua o te Atua i te parauraa’tu ia outou– te reo iti ha‘iha‘i ? … E rave rahi to‘u mau iteraa papû mai te taime i apiti atu ai au i teie nei Ekalesia e teie nei basileia. Ua haamaitaihia vau e rave rahi mau taime e te tahi mau horo‘araa e te tahi mau maitai, te tahi mau heheuraa e te tahi mau utuuturaa; e i roto i teie nei mau mea atoa aita roa a’e au i ite i te tahi mea e nehenehe ta‘u e ti‘aturi rahi atu maori râ te reo iti ha‘iha‘i o te Varua Maitai.¹⁴

E noaa noa i te taata ia hi‘o teitei aore râ, ia tia‘i i te mau mea rarahi e e hape nei ratou e rave rahi mau taime i te Varua o te Atua e te faaururaa a te Manahope. E ere i roto i te patiri aore râ te mata’i rahi e ti‘ai ia tatou ia imi i te Varua o te Atua, i roto râ i te reo iti ha‘iha‘i. [a hi‘o 1 Te mau Arii 19:11–12].¹⁵

E farii tatou na roto i te horo‘araa a te Varua Maitai i te mau haamaitairaa no te arata‘i i to tatou nei mau oraraa i teie nei e no te faaineine ia tatou no te ora mure ore.

E nehenehe ta outou e haati i te hoê tane aore râ, te hoê vahine i te mau faufaa e te hanahana atoa e nehenehe i ta te mana‘o taata e mana‘o, e ua mauruuru anei ratou ? Aita. Te vai noa ra te hoê mea e erehia ra e ratou na roto i te mauiui. I te tahi pae, a faaite mai i te hoê taata taparu i roto i te mau aroa purumu, tei farii i te Varua Maitai, e ua î to’na feruriraa i taua Varua e taua mana ra, e e faaite ïa vau ia outou i te hoê taata e hau to roto i to’na feruriraa, tei farii i te mau tao‘a rahi mau, e taua mau oaoaraa e ore roa e noaa i te taata mai roto mai i te tahi atu vahi.¹⁶

Ia oaoa ana‘e tatou i te Varua Mo‘a, ia tamata ana‘e tatou i te ora i ta tatou haapa‘oraa i ô nei i ni‘a i te fenua nei, e riro ïa tatou te nunaa oaoa roa‘e i ni‘a i te taahiraa avae o te Atua, noa’tu eaha te huru o to tatou oraraa. Aita vau e tau‘a e, e mea moni anei aore râ e mea vêvê anei tatou, i roto anei i te oaoa aore râ i roto i te ati, mai te mea te ora ra te taata i ta’na haapa‘oraa e te oaoa ra i te maitai e te Varua o te Atua, aita e huru-ê-raa no’na no te mau mea e tupu ra i ni‘a i te fenua nei. E tupu paha te mau aueueraa fenua, te tama‘i, te auahi aore râ te ‘o‘e i ni‘a i te fenua, te ite ra râ oia e, e mea maitai te mau mea atoa ia’na. O tera te huru ta‘u e ite nei.¹⁷

Te taata atoa o te farii i taua Varua ra e faaa‘o ïa tei roto ia’na– te hoê faatere o te faaue e o te arata‘i ia’na. E heheu atu teie nei Varua, i te mau mahana atoa, i te taata atoa e faaroo to’na, i taua mau mea e maitai no’na… Teie te faaururaa a te Atua i ta’na mau tamarii i te mau tau atoa o te ao nei o tei riro ei horo‘araa o te titauhia no te paturu i te taata e haerea faaroo to’na, e no te haere e haapa‘o i te mau arata‘iraa e te mau faaueraa e te mau heheuraa atoa ta te Atua i horo‘a i Ta’na mau tamarii no te faaue e no te arata‘i ia ratou i roto i te oraraa nei.¹⁸

E ti‘a i te mau taata atoa ia noaa i te Varua o te Atua, e ia pee i ta’na mau arata‘iraa. Teie te heheuraa. Aita e huru-ê-raa i te mea ta te Varua e parau ia outou ia rave; e ore roa oia e parau ia outou ia rave i te tahi ohipa hape.¹⁹

Ua haatihia tatou… e te mau varua ino e aro nei i te Atua e i te mau mea atoa e patu ra i te basileia o te Atua; e ua hinaaro tatou i teie nei Varua Mo‘a ia nehenehe ia tatou ia upooti‘a i ni‘a i teie nei mau mana iino.

… Teie te Varua e ti‘a ia tatou ia farii no te faahaere i te mau opuaraa a te Atua i ni‘a i te fenua nei. E hinaaro tatou i taua horo‘ araa ra hau atu i te tahi ê atu horo‘araa… Tei rotopu tatou i te mau enemi, i rotopu i te pouri e te faahemaraa, e e hinaaro tatou ia arata‘ihia e te Varua o te Atua. E ti‘a ia tatou ia pure i te Fatu e tae noa’tu ua noaa ia tatou te Faaa‘o. O teie tei fafauhia ia tatou a bapetizohia’i tatou. O te varua o te maramarama, o te parau mau, e o te heheuraa, o te nehenehe e vai mai i pihai iho ia tatou paatoa i te hoê â taime.²⁰

E ite outou mai te mea noa’tu e imi outou i te rave i te tahi ê atu ohipa maori râ te faaohiparaa i te mau faaueraa a te Varua Maitai, e e tomo atu tatou i roto i te rupehu e te pouri e te pe’ape’a, e aita to tatou e arata‘iraa i roto i te oraraa. E hinaaro tatou i te mau mahana atoa ta tatou e ora nei i te mana o te Fatu- te mana no to’na Varua Mo‘a e te puai o te autahu‘araa ia vai i pihai iho ia tatou ia nehenehe ia tatou ia ite i te mea e rave. E mai te mea e na reira tatou i te ora i mua i te Fatu, e heheu mai ïa te Varua ia tatou i te mau mahana atoa eaha râ ta tatou ohipa; e aita vau e tau‘a rahi roa eaha te ohipa ta tatou e rave ra, e ti‘a râ ia tatou ia ite na mua i te hinaaro o te Fatu e ia rave i te reira i muri iho, e i reira ta tatou ohipa e rave-maitai-hia ai e e faariihia ai i mua i te Fatu.²¹

I roto i te taato‘araa o to‘u nei oraraa e ta‘u mau ohiparaa, i te mau taime atoa ua parauhia vau ia rave i te mau mea atoa e te Varua o te Fatu, ua ite noa vau e e mea maitai ia rave i te reira. Ua faahereherehia vau e taua mana ra… Ia noaa te varua o te heheuraa ia outou. E ia ite outou e tei te vahi papû outou, e rave ti‘a ïa outou i te mea ta te Fatu e hinaaro ia outou ia rave.²²

Ua riro te mana‘o e e nehenehe ta tatou e haapa‘o i te faaueraa e e haamo‘ahia e te evanelia, e ia faaineinehia no te fatu ai‘a i te ora mure ore, te hoê te reira o te mau parau tumu hanahana roa‘e tei heheuhia i te taata nei… Te vai nei te ti‘aturiraa i roto ia tatou e aita to te ao nei e ite noa a’e i te reira, e eita taua ti‘aturiraa ra e nehenehe e tomo atu i roto i to ratou mau feruriraa. Ia ore ratou e fanauhia e te Varua o te Atua eita e nehenehe ia ratou ia ite i te basileia o te Atua, e eita e nehenehe ia ratou ia tomo atu i roto i te reira ia ore ratou e fanauhia i te pape e te varua [a hi‘o Ioane 3:5], no reira eita e nehenehe ia ratou ia fana‘o i te tiai’raa e te ti‘aturiraa oaoa ta tatou e farii nei. Aita to ratou mau mata, to ratou mau tari‘a e to ratou mau aau i iritihia no te hi‘o e no te faaroo e no te ite i te mana o te evanelia a te Mesia.²³

E haamaitairaa na tatou ia pee atu i te mau faaue a te Varua o te Fatu, e ia farii i te reira ei arata‘i e ei hoa no tatou, e na roto i te raveraa i te reira e tae vitiviti mai ïa te mau haamaitairaa no te ra‘i mai i ni‘a ia tatou mai te au i to tatou ineineraa i te farii i taua mau haamaitairaa ra.²⁴

E titau te hoaraa tamau o te Varua i ta tatou ohipa e te haapa‘oraa tamau.

Te hinaaro rahi nei au ia tatou… ei hoê nunaa ia rave tatou i ta tatou ohipa, ia ora tatou i ta tatou haapa‘oraa, ia tape‘a tatou i te faaroo, ia haere ti‘a tatou i mua i te Fatu ia nehenehe i te Varua Maitai ia riro ei hoa tamau no tatou no te arata‘i ia tatou i roto i te mau mahana e vai nei i mua ia tatou. Teie ïa ta‘u pure e to‘u hinaaro.²⁵

Ua ite au e e titau te reira i te aroraa tamau, te ohipa e te haapa‘ o-maitai-raa i mua i te Fatu ia nehenehe ia tatou ia tape‘a noa i te hoê auraa e te Varua Mo‘a e ia ora i te hoê huru oraraa e noaa ai ia tatou teie nei mau haamaitairaa.²⁶

Aore e mea e ti‘a ia tatou ia haa hau atu ia noaa i roto i te tino nei maori râ te Varua o te Atua, te Varua Maitai, te Faaa‘o, o ta tatou e ti‘a ia farii no to tatou haapa‘oraa i te mau titauraa a te evanelia.²⁷

Te fafauraa rahi o te apee i te pororaa o te Evanelia, mai tei heheuhia mai te ra‘i mai i to tatou nei anotau, e e horo‘ahia mai ïa te Varua Maitai i te feia tei oto mau no ta ratou mau hara tei haapa‘o i ta’na mau oro‘a mo‘a. Na roto i te Varua Maitai e faaitehia’i te hoê iteraa o te mau mea tei tupu, te mau mea no teie nei mahana e no amuri a‘e e e faaitehia mai ai te mana‘o e te hinaaro o te Metua. Na roto i teie nei rave‘a, e heheu mai te Manahope i Ta’na mau opuaraa i te feia atoa o te haapa‘o nei i Ta’na ra mau faaueraaa e tei mâ to ratou mau oraraa e tei fariihia i mua Ia’na ia nehenehe ia ratou ia faaineinehia no te mau ohipa e te mau tamataraa atoa o te tupu mai i ni‘a i to ratou mau haerea.

Mai te mea te vai nei te mau melo o te Ekalesia o tei ore i ite na roto i ta ratou iho mau ohipa e e parau mau teie, ia papû ïa ia ratou e, aita ratou e ora nei mai te au i to ratou mau haamaitairaa. E ti‘a i te Feia Mo‘a atoa ia vai faatata noa i te Varua Maitai, e na roto i te reira, i te Metua, ia ore râ, e upooti‘a ïa te ino i ni‘a ia ratou e e hahi ê atu ratou.

No reira, te parau atu nei matou i to te Feia Mo‘a i te mau Mahana Hopea nei: E ore roa te Varua Maitai e parahi i roto i te hoê tino viivii. Mai te mea e hinaaro outou ia oaoa i te mau mana e te mau horo‘araa hope a ta outou haapa‘oraa, e ti‘a ia outou ia vai viivii ore noa. Mai te mea ua hape outou i te mau mea paruparu, te mau ohipa maamaa e te mau hara, e ti‘a ïa ia outou ia tatarahapa i te reira; oia ho‘i e ti‘a ia outou ia faaru‘e roa i te reira. Aita’tu e rave‘a ê atu e nehenehe ai ta tatou e faaoaoa i te Atua. « Taata Mo‘a » o To’na ïa i‘oa [a hi‘o Mose 6:57], e oaoa Oia i te mau tutavaraa a Ta’na mau tamarii ia vai viivii ore noa.²⁸

Mai te mea aita ta tatou e heheuraa, no te mea ïa e aita tatou e ora nei mai tei titauhia ia tatou ia ora, no te mea ho‘i e aita tatou e faarahi ra i to tatou mau [piiraa i roto i te] autahu‘araa mai tei titauhia ia tatou ia rave; mai te mea ua faarahi tatou i to tatou mau piiraa eita ïa tatou e vai noa ma te ere i te heheuraa, e ore roa tatou e vai ma te hotu ore aore râ, ma te maa ore.²⁹

E vaiiho na tatou i te hiti te mau peu ino atoa, taua mau peu atoa o te paruru ia tatou ia aparau e te Atua… Mai te mea te vai nei te hinaaro o teie nei mau mea rii e haafîfî i to tatou mau oaoa e e haaviivii ia tatou i mua i te aro o te Fatu, e ti‘a ïa ia tatou ia tuu atu ia ratou i te hiti e ia faaite i te hoê faaotiraa mau ia haapa‘o i te hinaaro o to tatou Metua i te ao ra, e ia rave faaoti i taua ohipa ra tei tuuhia mai i ni‘a iho ia tatou no te rave… Ia rave ana‘e au i te tahi mea o te tape‘a ia‘u ia oaoa i te Varua o te Fatu, e i te taime ihoa a ite ai au i te reira, e faaru‘e oioi au i te reira i te hiti.³⁰

Te tamata nei tatou i te haapa‘o i te ture tiretiera a te Atua; te poro nei tatou i te evanelia a Iesu Mesia e te tautoo nei tatou i te faaohipa i ta’na mau ture. Teie nei, teie te uiraa, e maitai anei to tatou i te raveraa i te reira ? E hoona anei tatou i te haapa‘oraa ? E hoona anei tatou i te haereraa na roto i te mau tamataraa aore râ te mau ati huru rau, aore râ te mau hamani-ino-raa, aore râ te pohe iho, no te basileia o te Atua, no te faaoraraa e te ora mure ore, te horo‘a rahi roa a’e o te mau horo‘a ta te Atua e nehenehe e horo‘a i ni‘a i te mau tamarii a te taata nei ? Te parau nei au e, e te ti‘aturi nei au e te Feia Mo‘a i te mau Mahana Hopea nei, te mau taatamana atoa– e e haapa‘o maitai tatou i mua i te Fatu, e e haamana- ‘o tatou i ta tatou mau pure, e e haa tatou no te Varua Mo‘a e e haa tatou no te ite i te mana‘o e te hinaaro o te Atua, ia ite tatou i te e‘a no te haere atu, ia noaa ia tatou te Varua o te Fatu e te Varua Maitai, e ia upooti‘a tatou i ni‘a i to te ao e ia faarahi tatou i to tatou piiraa e tae noa’tu ua matara mai tatou na roto i teie nei tau tamataraa.³¹

Te mau mana‘o tauturu no te tuatapaparaa e te haapiiraa

A feruri i teie nei mau mana‘o a tuatapapa ai outou i te pene aore râ, a faaineine ai outou i te haapii. No te tahi atu tauturu, a hi‘o i te mau api v-ix.

Eaha ta outou i haapii mai na roto i te mau aamu i te mau api 50-51?
A tuatapapa ai outou i teie nei pene, eaha ta outou i haapii mai no ni‘a i te Varua Maitai e Ta’na mau ohipa ?
A tai‘o faahou i te taato‘araa o te piti o te paratarafa i te api 53. No te aha e mea ti‘a ia tatou ia faariro i te horo‘araa o te Varua Maitai mai te « horo‘araa rahi roa‘e » e nehenehe ta tatou e farii i te tahuti nei ? A tai‘o faahou i te paratarafa hopea i roto i te pene, i te mau api 59-60. Nahea to te horo‘araa a te Varua Maitai e faaineine ai ia tatou no te oraraa mure, « te horo‘araa rahi roa‘e o te mau horo‘araa atoa » ?
Nahea te mau haapiiraa a te peresideni Woodruff e tauturu ai ia tatou ia ite i te mau faaiteraa a te Varua Maitai ? (A hi‘o i te mau api 51, 55; a hi‘o atoa PH&PF 6:15, 22–23; 11:12-14.) No te aha e mea faufaa rahi roa ia haamana‘o e, te paraparau mai nei te Varua Maitai na roto i « te reo iti ha‘iha‘i » ?
A tai‘o i te paratarafa o te haamata i raro i te api 55. Eaha te tahi o te mau « tao‘a rahi mau » ta tatou e farii ia parahi ana‘e te Varua Maitai i roto ia tatou nei ? (A hi‘o i te mau api 55-58.)
A haamana‘o i te hoê ohipa i tupu a arata‘ihia’i outou e te Varua Maitai. Eaha te mau rave‘a i haamaitaihia ai outou na roto i te hoaraa o te Varua Maitai ?
A tai‘o faahou i te tuhaa hopea no te pene (te mau api 58-60). No te aha e tia‘i ia tatou ia haa tamau noa no te farii i te hoaraa tamau o te Varua Maitai ? Eaha te mea e tape‘a ia tatou ia ite i te mana o te Varua Maitai ? Eaha te mea e nehenehe e tauturu ia tatou ia ite i te mana o te Varua Maitai ?

Te mau papa‘iraa mo‘a: Ioane 14:26; 15:26; 16:13; 1 Korinetia 2:9–14; 1 Nephi 10:17–19; 2 Nephi 32:1–5; Moroni 10:5; PH&PF 8:2–3; 14:7