Sa muai faauuina le Peresitene o le Ekalesia i le muai olaga ma valaauina i lenei soifuaga ina ua tuanai se auaunaga umi ma le faatuatua i le Korama o Aposetolo e Toasefululua. Ua vaetofiaina o ia e galueaina ki o le malo o le lagi i luga o le fogaeleele ma lagolagoina aloaia e tagata o le Ekalesia.
Fesoasoani i tamaiti aoga ia malamalama i le taua o le galuega o faaaliga mai le Alii i Lana perofeta i le valaauliaina o Aposetolo. E pei ona faamaonia e le Agaga le faasologa paia, molimau atu ma valaaulia au tamaiti aoga e molimau i le pule ma le faigofie o le faasologa faatulagaina.
Ona o loo i ai ni faamatalaga sii fautuaina i lenei mataupu, atonu e te manao e fai ni kopi e tufa atu mo au tamaiti aoga e aofia ai faamatalaga sii uma ua e fuafua e faaaoga. Atonu foi e te manao e faamasani oe lava i le tala faasolopito o le faasologa i le Au Peresitene Sili o le Ekalesia mai lava i le taimi o Iosefa Samita. O lenei tala faasolopito o loo otootoina atu i le mataupu 3 o le Tusi lesona a Tamaiti Aoga o Aoaoga a Perofeta Soifua i vaega 3.1, 3.2, ma le 3.3.
Ata
faapotopotoga paia
O le faapotopotoga paia i le sauniga amata o le konafesi aoao ia Oketopa 1972. I lenei sauniga, sa taliaina ai e tagata o le Ekalesia se Au Peresitene Sili fou o Harold B. Lee (Peresitene), Marion G. Romney (Fesoasoani Muamua), ma N. Eldon Tanner (Fesoasoani Lua).
O Nisi o Aoaoga Faavae ma Mataupu Faavae
Ua faatulaga e le Alii le faasologa e tofia ai le Au Peresitene Sili o le Ekalesia.
O le Korama a Aposetolo e Toasefululua e pulefaamalumalu i le Ekalesia pe a maliu le Peresitene.
O le na muamua valaaulia i le Korama a Aposetolo e Toasefululua e iloa ai le e pulefaamalumalu.
E lagolagoina e tagata o le Ekalesia le Peresitene fou o le Ekalesia ua valaaulia.
Manatu mo le Aoaoina Atu
Ua faatulaga e le Alii le faasologa e tofia ai le Au Peresitene Sili o le Ekalesia.
Valaaulia tamaiti aoga e talanoa pe faapefea ona filifilia taitai po o peresitene o le tele o faalapotopotoga eseese. Mo se faataitaiga:
E faapefea ona filifilia le peresitene o se kamupani?
E faapefea ona filifilia se taitai fou i se malo faatemokarasi?
E faapefea ona filifilia se taitai fou i se malo e pulea e se aiga tupu?
E faapefea ona avea se tasi ma Peresitene o le Ekalesia? E faapefea ona ese lenei faiga mai le auala e filifilia ai taitai o isi faalapotopotoga?
Tau atu i tamaiti aoga o le Alii lava ia na te filifilia se tasi e taitaiina le Ekalesia. E ala mai faatonuga paia, o le Aposetolo ua sili ona umi lona valaauga o se Aposetolo ua avea ma faitaulaga sili pulefaamalumalu o le Ekalesia. Ua i ai i tagata o le Ekalesia le faatuatua atoa o ia lea ua finagalo le Alii ma tofia ai e avea o le Peresitene o le Ekalesia (tagai i le aitema 3 i le vaega 3:4 o le tusi lesona a tamaiti aoga). Ona o lenei, e tulagaese le auala e tofia ai le Peresitene o le Ekalesia o le Au Paia o Aso e Gata Ai.
Faitau le upu sii a Peresitene Spencer W. Kimball (1895-1985) i le vaega 3.5 o le tusi lesona a tamaiti aoga. Valaaulia tamaiti aoga e talanoa i fesili nei:
E faapefea e le mamanu o le faatulagaga e tofia ai le Peresitene o le Ekalesia ona aveesea mea sese, feteenaiga, manaoga, ma naunautaiga faaletagata?
E faapefea e le iloa o le tofiaina o se Peresitene fou o le Ekalesia i lona ofisa e le Atua, ae le o faatulagaga faalelalolagi, e faatupulaia ai lou faatuatua ma faamalosia ai lau molimau?
Vaevae le vasega i ni vaega se tolu. Tusi mau faasino nei i luga o le laupapa: Ieremia 1:5; Aperaamo 3:22–23; MF&F 138:53-56; Alema 13:1-9. Valaaulia vaega taitasi e suesue se tasi o mau faasino muamua e tolu faatasi ai ma le Alema 13:1-9. Tuuina atu i vaega taitasi se kopi o le saunoaga lenei a le Perofeta o Iosefa Samita (1805–44):
Ata
Perofeta o Iosefa Samita
“O tagata uma e i ai se valaauga e auauna atu i tagatanuu o le lalolagi, na faauuina mo lena lava faamoemoega i le Fono Sili i le lagi a o lei i ai i le lalolagi. Ou te manatu na faauuina a’u i lenei lava tofiga i lena Aufono Sili” (Aoaoga a Peresitene o le Ekalesia: Iosefa Samita [2007], 511).
Fautuaina vaega e vaavaai mo tali i fesili nei a o latou suesue a latou mau ma upu sii:
O anafea na filifilia ai e le Alii e o le a avea ma Peresitene, perofeta, ma taitai o le Ekalesia?
Sa faapefea ona faaali mai e perofeta i latou lava i le muai olaga?
E ese mai i perofeta, o ai nisi sa muai faauuina i le muai olaga?
E faapefea e lenei malamalama ona aafia ai lou talitonuga i le ua filifilia e le Alii e avea ma perofeta?
Filifili se tasi e fai ma failauga mai vaega taitasi. Valaaulia le failauga e faasoa ma le vasega tali na maua e la latou vaega i fesili ma nisi o lagona ua latou maua.
O le Korama a Aposetolo e Toasefululua e pulefaamalumalu i le Ekalesia pe a maliu le Peresitene.
Tusi le fuainumera 3 = 12 i le laupapa. Fai atu i tamaiti aoga e faitau le Mataupu Faavae ma Feagaiga 107:23-24 ma faamatala pe o le a le tulaga e sao ai le fuainumera. (I le tulaga o le Korama o le Au Peresitene Sili ma le Korama a Aposetolo e Toasefululua e tutusa i le tulaga pule.)
Faasoa atu le faamatalaga lenei a Peresitene Iosefa Filitia Samita (1876–1972):
Ata
Peresitene Iosefa Filitia Samita
“Ou te manatu e ao ona taliaina e faapea o aposetolo e le tutusa pule ma le Au Peresitene pe afai ua atoatoa lelei ona faatulagaina le Au Peresitene Sili. E le tatau ona lua—pe tolu ni ulu—e tutusa pau le pule i le taimi e tasi, aua o lenei mea o le a taitaiina atu ai i le le malamalama. O lea e tutusa pau aposetolo, e pei ona faamauina, ua i ai latou le mana e taitaia ai mataupu o le Ekalesia pe a aveesea le Au Peresitene ona ua maliu le Peresitene” (Iosefa Filitia Samita, Aoaoga Faavae o le Faaolataga, Bruce R. McConkie, 3 vols. (1954–56), 1:255).
E tusa ai ma Peresitene Samita, o afea e “tutusa ai le pule ma le mana” o le Korama a Aposetolo e Toasefululua, ma le Au Peresitene Sili?
Aisea o le fasifuaitau “tutusa ae i lalo” ona talafeagai e faamatala ai le faia a le Korama a Aposetolo e Toasefululua ma le Au Peresitene Sili?
Ina ia faamanino o le Korama a Aposetolo e Toasefululua ua avea ma se taitaiga tuufaatasi o le Ekalesia ma o le Ekalesia e le aunoa lava ma taitai paia filifilia, valaaulia se tamaitiiti aoga e faitau le saunoaga a Peresitene Spencer W. Kimball (1895-1985) i le vaega 3.7 o le tusi lesona a tamaiti aoga.
Faitau le saunoaga a Peresitene Gordon B. Hinckley (1910-2008) i le vaega 3.6 o le tusi lesona a tamaiti aoga. Ona fesili atu lea:
O afea e maua ai e le Peresitene o le Ekalesia ki o lona valaauga?
O le a le eseesega i le auala e umia ai e le Korama a Aposetolo e Toasefululua ki uma o le perisitua ma le auala e umia ai e le Peresitene o le Ekalesia ki lava ia e tasi?
O afea e faamatuu atu ai le pule i le sui sinia o le Korama a Aposetolo e Toasefululua e faaaoga ai ki o le perisitua ua tofia i ai o ia?
Faasino atu i tamaiti aoga ina ua tuanai le maliu o le Perofeta o Iosefa Samita, na taitaia e Polika Iaga le Ekalesia o le Peresitene o le Korama a Aposetolo e Toasefululua i le sili ma le tolu tausaga a o le i faatulagaina le Au Peresitene Sili ia Tesema 1847. Fesili atu:
O le a le aia na taitaia ai e Polika Iaga le Ekalesia ina ua tuanai le faamaturoina o le Perofeta o Iosefa?
Fesoasoani i au tamaiti aoga e malamalama o le matafaioi a le Aposetolo sinia le filifili po o afea e toe faatulaga ai le Korama a le Au Peresitene Sili ma o le Aposetolo sinia e pulefaamalumalu i le Ekalesia aoao o ia o le Peresitene o le Toasefululua seia lagona e ia le manaomia e toe faatulaga ai le Au Peresitene Sili. E lagolagoina e le Korama a Aposetolo e Toasefululua lana faaiuga.
O le na muamua valaaulia i le Korama a Aposetolo e Toasefululua e iloa ai le e pulefaamalumalu.
Sauniuniga mamao:A o le i amataina le vasega, atonu e te manao e lisi suafa o le Au Peresitene Sili ma le Korama a Aposetolo e Toasefululua faafefiloi i luga o le laupapa po o luga o se pepa tufaina atu, pe faaali atu foi o latou ata (pe a maua) faafefiloi i luga o le laupapa. Faaaoga se lomiga lata mai o le Ensign po o le Liahona o le konafesi e faaaoga.
Toe iloilo le mataupu faavae e faapea pe a maliu le Peresitene o le Ekalesia, e soloia le Korama a le Au Peresitene Sili ma o le a toe foi fesoasoani o le Au Peresitene Sili i o la tulaga sinia faatulagaina i le Korama a Aposetolo e Toasefululua. Fesili atu:
O le a le tulaga sinia faaaposetolo o fesoasoani i le Au Peresitene Sili o lo o i ai nei?
Faaali atu i tamaiti aoga se lisi faafefiloi o igoa, pe faaali atu ni ata, o sui o le Au Peresitene Sili ma le Korama a Aposetolo e Toasefululua. Fai atu i le vasega e faavasega ia igoa po o ata i le faatulagaga sinia talafeagai. A mavae sina taimi puupuu, fesoasoani latou te faamaeaina sao lenei gaoioiga.
Uunai tamaiti aoga e tauloto igoa o uso o le Au Peresitene Sili ma le Korama a Aposetolo e Toasefululua i le faatulagaga sinia talafeagai.
Fesoasoani i tamaiti aoga e malamalama o uso o le Korama a Aposetolo e Toasefululua sa faatulaga lava e tusa ai ma le tulaga sinia talafeagai. Ina ua faatoa faatulagaina le Korama a Aposetolo e Toasefululua i lenei tisipenisione, o le tulaga sinia sa fuafua i le matua o tausaga o le soifua (tagai Talafaasolopito o le Ekalesia, 2:219-20). Mai lena taimi, sa faavasegaina loa le tulaga sinia e faatatau i le aso ua faauuina ai uso taitasi i le Korama a Aposetolo e Toasefululua. O le faatulagaina sinia e le gata ua iloa ai le faasologa talafeagai i le Au Peresitene ae faapea foi i le faatulagaga o le taitaiga i le korama. Na faamalamalama mai e Elder Russell M Nelson o le Korama a Aposetolo e Toasefululua:
Ata
Peresitene Russell M. Nelson
“O le faatulagaga sinia e faamamaluina e Aposetolo faauuina—e oo lava i le ulufale po o le tuua o le potu. …
“O lenei uiga faaaloalo i Aposetolo o loo faamauina i le Feagaiga Fou. Ina ua tamomoe atu Simona Peteru ma Ioane le soo na alofaina e Iesu e suesue le ripoti e faapea ua aveesea le tino o lo latou Alii na faasatauroina mai le tuugamau, o Ioane, e itiiti ma televave, na taunuu muamua, ae le i ulufale o ia. Sa ia faaaloalo i le Aposetolo sinia, ina ia muamua ona ia ulu atu i le tuugamau. (Tagai Ioane 20:2–6.)” (Russell M. Nelson, “Faamamaluina o le Perisitua,” Liahona, Iulai 1993, 48).
Faamanatu: A i ai se taimi, atonu e te manao e faitau e tamaiti aoga le saunoaga a Peresitene N. Eldon Tanner (1898–1982) o le Au Peresitene Sili i le vaega 3.8 o le tusi lesona a tamaiti aoga. O lo o faamatala ai tulaga sa oo i ai ina ua tali atu Peresitene Marion G. Romney o le Au Peresitene Sili ma Peresitene Spencer W. Kimball, Peresitene o le Korama a Aposetolo e Toasefululua, i le tala o le maliu o Peresitene Harold B. Lee, o le sa auauna o le Peresitene o le Ekalesia.
Faasoa atu le saunoaga a Peresitene Boyd K. Packer (1924-2015) o le Korama a Aposetolo e Toasefululua o faamatala ai le matagofie o le faatulagaga o taitaiga sinia:
Ata
Peresitene Boyd K. Packer
“Pe ua outou manatunatu ea i le mafuaaga na faatulagaina ai e le Alii le Au Peresitene Sili ma le Korama a Aposetolo e Toasefululua ina ia avea pea alii matutua ma taitai sinia o le Ekalesia? O lenei faatulagaga o le faasolo mai le matua e faatauaina le atamai ma le malamalama e sili atu nai lo le talavou ma le malosi faaletino” (Boyd K. Packer, “O Tausaga o le Matua,” Ensign po o le Liahona, Me 2003, 84).
Fesili atu i tamaiti aoga:
Aisea e te manatu ai o le tofa loloto ma le tomai e sili ae le taua i le taitaiga o le Ekalesia nai lo le talavou ma le malosi faaletino?
E lagolagoina e tagata o le Ekalesia le Peresitene fou o le Ekalesia ua valaaulia.
Faamanatu: Afai e le malamalama au tamaiti aoga i le uiga o le “faapotopotoga mamalu” faasino latou i le faamatalaga i le vaega 3.9 o le tusi lesona a tamaiti aoga.
Faamatala atu i au tamaiti aoga o se tasi o sauniga sili ona paia i le Ekalesia o le faapotopotoga mamalu, e lagolagoina ai e tagata o le Ekalesia le Au Peresitene Fou o le Ekalesia. E fautuaina tagata o le Ekalesia mai le lalolagi atoa ina ia auai, i le tino po o le leitio, televise, satelite, po o le initoneti. O korama ma faalapotopotoga o le Ekalesia e tulai taitasi ma palota e talia le Peresitene o le Ekalesia.
Fai i se tamaitiiti aoga e faitau le saunoaga a Elder David B. Haight (1906-2004) o le Korama a Aposetolo e Toasefululua i le vaega 3.9 o le tusi lesona a tamaiti aoga. O lenei faamatalaga o loo faamatala ai le faasologa o le faapotopotoga mamalu.
Fesili atu i tamaiti aoga:
Aisea e te manatu ai e mulimuli le Ekalesia i lenei faatulagaga aloaia mo le lagolagoina o le Peresitene fou valaauina o le Ekalesia?
O a faamanuiaga ua ofoina atu i tagata o le Ekalesia e ala i lenei faatulagaga aloaia o se Peresitene fou o le Ekalesia?
O a tiute ua tuuina atu i tagata o le Ekalesia pe a maea ona latou lagolagoina se Peresitene fou?
Fesili i au tamaiti aoga pe na i ai se tasi o i latou na maua se avanoa e auai i se faapotopotoga mamalu ma auai i le lagolagoina o se perofeta fou. Valaaulia ni nai tamaiti aoga e faasoa mai lagona na latou maua a o auai i lenei sauniga paia.
Faamanatu atu i au tamaiti aoga i konafesi uma o le Ekalesia, ua valaaulia tagata e lagolago le Au Peresitene Sili ma le Korama a Aposetolo e Toasefululua. O le lagolagoina o taitai o le Ekalesia o lona uiga “ua tuuto atu la tatou lagolago ia i latou ua tofia e auauna i tofiga faaletaitai i le lotoifale ma le Ekalesia aoao” (Guide to the Scriptures, “Sustaining Church Leaders,”scripture.lds.org; tagai foi Eperu 13:17; 3 Nifae 12:1; MF&F 1:38; 112:20).
E tusa ai ma lenei fuaiupu, e faapefea ona lagolagoina e tagata o le Ekalesia ia le Au Peresitene Sili?
O le a le uiga o le faamautuina o le Peresitene o le Ekalesia i lo tatou talitonuga?
Lui tamaiti aoga ina ia lagolago le Peresitene o le Ekalesia e ala i le faaali atu o lo latou talitonuga i ana aoaoga ma le faatuatua i lana taitaiga, e ala i le tuuina atu o talosaga mo ia, ma usitaia ana fautuaga.
Molimau atu i faamanuiaga silisili o le lagolagoina ma taliaina o fautuaga mai le tagata ua valaauina e le Alii e avea o le Peresitene o Lana Ekalesia.