Sunod sa mga Pag-aghat sa Espiritu

Ang matag usa sa Simbahan adunay katungod sa inspirasyon sa Espiritu Santo alang sa personal nga giya.

Gikan sa Kinabuhi ni Joseph F. Smith

Si Presidente Joseph F. Smith, kauban ni Bishop Charles W. Nibley, mipauli sakay sa tren gikan sa usa ka biyahe sa sidlakan. Sa duol sa Green River, Wyoming, igo pa lang siyang nakatikang sa pagawas nga tikanganan sa katapusang bahin sa tren nadungog niya ang tingog nga nag-ingon, “Sulod ug lingkod.” Mibalik siya sulod sa tren, nagpanuko sa makadiyut, ug miingon sa kaugalingon, “O, pastilan, siguro usa ra kadto ka imahinasyon.” Unya nadungog na usab niya ang tingog, “ Lingkod.” Sa dali nga pagtuman, si Presidente Smith milingkod sa iyang lingkuranan. Mao gayud ang pagwabol sa tren tungod sa nangabuak nga riles hinungdan nga ang makina ug kadaghanan sa sumpay niini nga tren nangalagpot. Miingon si Bishop Nibley nga grabe gyud untang kadaot ang mahiaguman ni Presidente Smith, kon wala pa kadto niya sunda, kay bisan og ang dapit diin siya nagsakay nagpabilin ra didto, ang tanang sakyanan “grabe kaayo ang pagkapiyapi.”

Si Presidente Smith miingon niini nga kasinatian, “sa makadaghang higayon nadungog nako kana nga tingog sa akong kinabuhi, ug napanalanginan ako sa pagtuman niini.”

Si “[Presidente Smith] nabuhi nga duol kaayo sa pagpakigsulti sa Espiritu sa Ginoo,” paniid pa ni Bishop Nibley, “ug ang iyang kinabuhi usa ka maayo kaayong ehemplo ug limpyo hinungdan nga ang Ginoo dali ra kaayong makapakita sa iyang kaugalingon ngadto sa iyang sulugoon. Sa tinuod siya mahimong moingon nga, ‘Sulti, Ginoo, kay ang imong sulugoon namati.’ [1 Samuel 3:9 .] … Ang kasingkasing ni Presidente Smith naangay ngadto sa mga huni nga Celestial—makabati siya, ug nakabati gayud.”¹

Mga Pagtulun-an ni Joseph F. Smith

Ang tanang miyembro sa Simbahan adunay katungod nga makadawat og personal nga giya gikan sa Espiritu Santo.

Ang espiritu sa pagdasig, ang gasa sa pagpadayag, wala maangkon sa usa ka tawo lamang; dili kini gasa nga alang sa Kapangulohan sa Simbahan ug sa Napulog Duha ka mga apostoles lamang. Dili lamang kini kutob sa mga tigdumalang awtoridad sa Simbahan, anaa kini sa matag usa nga miyembro sa Simbahan; ug mao kini ang katungod ug pribilehiyo sa matag tawo, ug sa matag bata nga moabut na sa edad nga may pagkatulubagon, sa pagtagamtam sa espiritu sa pagpadayag, aron makaangkon sa espiritu sa inspirasyon sa paghimo sa ilang mga katungdanan isip mga miyembro sa Simbahan.²

Ang matag usa sa Simbahan adunay ingon nga katungod sa pagtagamtam sa espiritu sa pagpadayag ug sa panabut gikan sa Dios diin kana nga pagpadayag mihatag kaniya, alang sa kaugalingon niyang kaayohan, sama sa nakapahimo sa usa ka bishop nga mopreside sa iyang ward. Ang matag tawo adunay pribilehiyo sa paggamit niining mga gasa ug niini nga mga pribilehiyo alang sa kaugalingon niyang mga kalihokan, sa pagmatuto sa iyang mga anak sa angay nila nga pamaagi, ug sa pagdumala sa iyang umahan, sa iyang mga binuhi, sa iyang mga hayop, ug sa pagdumala sa iyang patigayon … ; iya nga katungod ang pagtagamtam sa espiritu sa pagpadayag ug inspirasyon sa paghimo sa hustong butang, sa pagkamanggialamon ug sa pagkamabinantayon, sa makiangayon ug kamaayo sa tanang butang nga iyang gihimo. Nasayud ako nga usa kini ka matuod nga baruganan.³

Katungod kini sa matag usa nga madasig ug makadawat sa pag-aghat sa Balaang Espiritu alang sa kaugalingon nilang giya sa pagpalig-on sa ilang pagtuo, ug sa pagdasig kanila sa mga buhat sa pagkamatarung, sa pagkahimong matinud-anon ug sa pagsunod ug sa pagtuman sa mga kasugoan nga gihatag sa Dios kanila; kini ang pribilehiyo sa matag lalaki ug babaye nga makadawat og pagpadayag alang niini nga katuyoan, apan dili sa mas lapas pa. Sa higayon nga ang usa ka indibidwal mobarug sa pagangkon sa katungod sa pagkontrolar ug sa pagdiktar, o sa paglingkod sa paghukom sa iyang mga kaigsoonan, ilabi na niadtong kinsa nangulo, kinahanglan nga siya pugngan dayon, o ang panagbingkil, panagbahin, ug pagkalibug moresulta. Ang matag lalaki ug babaye niini nga Simbahan kinahanglang mas mahibalo pa kaysa pagnunot sa ingon niana nga espiritu.⁴

Kinahanglang magpakabuhi kita nga duol kaayo sa Ginoo, nga mapainubsanon kaayo sa atong mga espiritu, nga masulundon kaayo ug andam nga motugyan, ubos sa impluwensya sa Balaang Espiritu, nga kita mahimong masayud sa hunahuna ug kabubut-on sa Amahan mahitungod kanato isip mga indibidwal ug isip mga opisyales sa Simbahan ni Kristo ubos sa tanang sirkumstansya.⁵

Kinahanglan nga kita … magkinabuhi sa ingon aron ang Espiritu Santo unta mosulod kanato isip usa ka buhing tuburan, nga gituyo aron mogiya kanato ngadto sa kahingpitan sa pagkamatarung, hiyas ug integridad sa atubangan sa Dios, hangtud atong matuman ang atong yutan-ong misyon, nga mopahigayon sa matag katungdanan nga gikinahanglan gikan kanato.⁶

Ang Pagpadayag moabut kanato sa kasagaran pinaagi sa hinay, hinagawhaw nga tingog sa Espiritu.

Dili pinaagi sa katingalahang mga pagpakita ngari kanato aron kita malig-on diha sa kamatuoran, apan pinaagi sa pagpaubos ug matinud-anong pagtuman sa mga sugo ug sa mga balaod sa Dios. Sa dihang ako isip usa pa ka bata unang nagsugod sa pagpangalagad, kanunay ako nga moduol ug mangayo sa Ginoo sa pagpakita kanako og pipila ka katingalahang butang, aron unta ako makaangkon og pagpamatuod. Apan ang Ginoo mipugong sa mga katingalahan gikan kanako, ug mipakita kanako sa kamatuoran, pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto [tan-awa sa 2 Nephi 28:30], hangtud iyang napahibalo kanako ang kamatuoran gikan sa alimpulo sa akong ulo hangtud sa mga lapa-lapa sa akong mga tiil, ug hangtud nga ang pagduha-duha ug kahadlok hingpit nga nawala gikan kanako. Wala na kinahanglana nga magpadala pa siya og anghel gikan sa kalangitan sa pagbuhat niini, ni kinahanglan siya nga mamulong gamit ang trumpeta sa usa ka arkanghel. Pinaagi sa mga paghunghong sa ligdong nga hinagawhaw nga tingog sa Espiritu sa buhi nga Dios, iyang gihatag kanako ang pagpamatuod nga akong naangkon. Ug pinaagi niini nga baruganan ug gahum siya mohatag sa tanang mga anak sa katawhan og usa ka kahibalo kabahin sa kamatuoran nga magpabilin diha kanila, ug kini makahimo kanila nga masayud sa kamatuoran, sama sa pagkasayud sa Dios niini, ug sa pagbuhat sa kabubut-on sa Amahan sama sa gibuhat ni Kristo niini. Ug walay gidaghanon sa katingalahang mga pagpakita ang makapahimo gayud niini.⁷

Dili gayud kamo kinahanglang mahadlok, akong mga kaigsoonan, kon kamo wala makadawat og bisan unsa ka dako o katingalahang pagpakita, o kon kamo wala makadawat og bisan unsang talagsaong mga pagpadayag gikan sa langit, kon kamo lamang magkinabuhi aron ang Dios makapadayag sa Iyang kaugalingondiha kaninyo kon Iyang kabubut-on. Kamo walay angay kabalakan, kamo walay angay kahadlokan, walay makulang diha kaninyo, sa inyong bahin, kon kamo anaa sa dapit nga makadawat sa kabubut-on sa Dios kon Siya andam o gusto nga mopakita niini diha kaninyo. Igo na kana. Ug unya ang Dios mopadayag lamang kaninyo kon unsa ang mga angay sa inyong paglambo, alang sa inyong pagtubo ug sa dugang nga kahibalo sa kamatuoran.⁸

Buhaton nato kon unsa ang gimando sa Espiritu.

Wala ako mobati nga ako makahimo ni sa pisikal o sa hunahuna sa mga katungdanang gisangon kanako kon walay tabang sa Espiritu sa Ginoo. Ako walay nahibaloang tawo nga nakahimo sa buluhaton sa Ginoo nga gisangon diha kaniya, gikan gayud sa Ginoo, o nga walay mga pagdasig ug inspirasyon sa Espiritu nga naggikan sa Amahan sa Kahayag.⁹

Kon maningkamot kitang makadungog ug makasabut sa mga paghunghong sa hinay, hinagawhaw nga tingog sa Espiritu sa Dios, mobuhat kita kon unsa man ang gimando sa Espiritu sa walay kahadlok kon unsa ang sangputan. Wala kini kalainan bisan kon kini nauyon ba sa mga hunahuna niadtong nagpakasayop kanato, o sa mga kaaway sa gingharian sa Dios, o dili. Nahiuyon ba kini sa kabubut-on sa Ginoo? Nahiuyon ba kini sa diwa sa talagsaong buluhaton sa ulahing mga adlaw diin kita nahisakop? Ang katapusan ba nagtumong sama sa pagpalambo sa Simbahan ug sa pagpalig-on niini dinhi sa yuta? Kon ang pag-uswag niini nagpadulong niana nga direksyon, buhaton nato kini, bisan unsa man ang ikasulti o mahunahuna sa katawhan.¹⁰

Dili kini igo alang kanato ang pagkakontento lamang ug pagkatagbaw sa gamay nga kahibalo kon unsa ang husto. Aron mahibalo kon asa niana ang husto, kinahanglan kitang moadto ug mobuhat sa hustong butang, bisan unsa pa kini, bisan unsa pa ang gikinahanglan [ni Jesukristo] kanato. Kon nasayud kita unsay husto, kon kita nasayud sa kamatuoran, kinahanglan kita nga mosunod sa husto ug sa kamatuoran, ug kinahanglan kitang mobuhat sa husto nga butang, kanunay gayud, ubos sa tanang mga kahimtang, ug dili gayud maminaw sa mga pagtintal o motipas gikan sa husto nga dalan, sa higpit ug pig-ot nga dalan nga modala og balik ngadto sa atubangan sa Dios.¹¹

[Ang atong] pagkamasulundon kinahanglang boluntaryo; kinahanglang dili pinugos, kinahanglang walay pagpamugos. Ang mga tawo kinahanglang dili mapugos supak sa ilang kabubut-on sa pagtuman sa kabubut-on sa Dios; kinahanglan silang motuman niini tungod kay nasayud sila nga kini husto, tungod kay tinguha nila ang paghimo niini, ug kalipay nila ang paghimo niini. Ang Dios mahimuot sa matinguhaon nga kasingkasing.¹²

Pinaagi sa pagtugyan sa atong kamasulundon ngadto sa Espiritu, maangkon nato ang mas labaw nga kahibalo ug magtubo uban sa gahum sa pag-ila.

Ang tawo utangan ngadto sa Tinubdan sa tanang salabutan ug kamatuoran, alang sa kahibalo nga iyang naangkon; ug ang tanan kinsa motugyan sa ilang pagkamasulundon sa mga pag-aghat sa Espiritu, nga modala ngadto sa hiyas [virtue], sa dungog, sa gugma sa Dios ug tawo, ug sa gugma sa kamatuoran ug sa butang nga makapatubo ug makapalambo sa kalag, makakuha og mas limpyo, mas makapalapad, ug mas direkta ug bug-os nga kahibalo sa mga kamatuoran sa Dios kay sa maangkon ni bisan kinsa.¹³

Ang mga lalaki ug mga babaye kinahanglang mapahimutang diha sa kamatuoran, ug matukod diha sa kahibalo sa ebanghelyo, dili magsalig sa hinulaman nga kahayag gikan sa ubang tawo, apan magasalig lamang sa Balaang Espiritu, kinsa walay pagkausab, sanag sa kanunay ug kinsa magpamatuod ngadto sa mga tawo ug sa priesthood, kinsa nagpuyo subay sa mga balaod sa ebanghelyo, sa himaya ug sa kabubut-on sa Amahan. Maangkon ra unya nila ang walay katapusang kahayag nga walay pagkapalong.¹⁴

Ang pinakaluwas lamang nga paagi nga atong buhaton, isip mga indibidwal, mao ang pagpuyo nga mapainubsanon kaayo, matarung kaayo ug matinud-anon kaayo atubangan sa Dios nga kita unta makaangkon sa Espiritu niana nga paagi aron kita makahukom sa matarung nga paagi, ug makaila tali sa kamatuoran ug kasaypanan, tali sa husto ug sa sayop.¹⁵

Unsaon man nato sa pagkahibalo nga [ang tambag nga atong nadawat gikan sa mga lider sa Simbahan] husto? Pinaagi sa pagpasulod sa Dios diha sa atong mga kasingkasing, diin ang atong mga hunahuna maabli ug malamdagan, aron kita masayud sa doktrina diha sa atong kaugalingon mismo, ug makahimo sa pagpili sa husto gikan sa sayop, kahayag gikan sa kangitngit ug maayo gikan sa dautan.¹⁶

Ngadto sa matinud-anong mga Santos sa Ulahing mga Adlaw gihatag ang katungod nga makahibalo sa kamatuoran, kay ang Dios nahibalo niini; ug walay gahum ubos sa celestial nga gingharian ang mopatipas kaniya sa dalan, molubog sa iyang hunahuna ug mobuta sa iyang panabut o mopahinay sa iyang hugot nga pagtuo o sa iyang kahibalo sa mga baruganan sa ebanghelyo ni Jesukristo. Dili kini mahimo kay ang kahayag sa Dios nagsanag nga mas hayag pa kay sa sanag sa mga dili tinuod ug sayop; busa, kadtong nakaangkon sa kahayag ni Kristo, ang espiritu sa pagpadayag ug ang kahibalo sa Dios, mopatigbabaw sa tanang dili kasaligan dinhi sa kalibutan; nasayud sila niini nga doktrina, nga kini iya sa Dios ug dili sa tawo.¹⁷

Kon kita mosunod kon unsa ang mga gipadayag, dugangan sa Ginoo ang atong kahayag ug salabutan.

Daghan pang butang ang mahimong ipadayag. Aduna pay mga butang nga ipadayag diin ang Dios mopahibalo niini sa kaugalingon niyang tukmang panahon nga karon wala pa nato masabti. Sa kaugalingon nakong bahin, daghan na kaayo ang napadayag nga daw lisud alang kanako sa pagsabut. Kon mahakop pa lang unta nako ang tanang gipadayag sa Dios, ug makasabut niini kutob sa akong mahimo ug gamiton kini diha sa pagkamatarung sa akong kinabuhi, siguro andam na ako alang sa dugang pang mga butang, kon ako takus pa gihapon niini. Ngano nga, panalanginan ang inyong mga kalag, adunay mga tawo tali kanato nga nabalaka ug nahasol sa mga butang nga wala pa gayud mapadayag ngadto sa mga anak sa tawo…. Kon ang mga tawo mobayad pa lang unta sa ilang ikapulo, kon sila mosunod pa lang unta sa pulong sa kaalam, kon sila unta molitok sa ilang mga pag-ampo, kon sila unta mogahin sa ilang mga kinabuhi ngadto sa mga buhat sa pagkamatarung dinhi sa kalibutan ug motuon sa ebanghelyo alang sa ilang kaugalingon ug motuman niini, mas minus pa unta ang ilang mga pangutana, ug ayaw hikalimti ang kamatuoran nga mas maayo pang butang ang ilang mahibaloan kay sa unsay ilang nahibaloan.¹⁸

Kita walay laing nahibaloan, ug kita walay laing isangyaw sa katawhan gawas lamang sa gipadayag sa Ginoo, ug kami motambag ug mopahimangno sa mga adunay katungod, ug kansang katungdanan ug buluhaton mao ang pagtudlo ug pagsangyaw sa mga baruganan sa ebanghelyo ngadto sa kalibutan ug ngadto sa mga Santos sa Ulahing mga Adlaw, nga ipahiuyon ang ilang mga pagtudlo ug ang ilang mga instruksyon sa pulong sa Dios diha sa mga napadayag na. Aduna pay dakong atubangunon sa mga butang nga napadayag na nga wala pa masunod, ipaniguro ko kaninyo. Aduna pay dakong atubangunon nga nagpabilin pang angay nga kat-unan. Aduna pay dakong atubangunon nga angay pa nga itudlo sa espiritu sa panudlo, ug aduna pay dakong atubangunon sa mga gipadayag na pinaagi ni Propeta Joseph ug sa iyang mga kaubanan nga wala pa madawat sa mga tawo diha sa ilang mga kasingkasing, ug wala pa gayud sila makabig sa angay unta kanila.

Kon kita motuman ug makahimo sa pagsunod sa mga pagtulunan sa ebanghelyo ug sa mga balaod sa Dios ug sa mga kinahanglanon sa langit, nga napadayag na, maayo kini alang kanato ug mas duol ang tumong nga maperpekto sa kaalam, kahibalo ug gahum kay sa unsa kita karon. Kon moabut na kana nga panahon, may mga butang na usab nga mas dako pa nga ipadayag pa unya ngadto sa mga tawo sa Dios. Gawas kon mabuhat nato ang atong katungdanan, hinoon, niana nga atong nadawat, gawas kon kita magmatinud-anon sa mga butang nga karon gisalig sa atong mga kamot, gawas kon mosunod kita sa atong relihiyon nga ania kanato karon, kay gihatag kini sa Ginoo kanato, sa pagdugang sa mga kasugoan, sa pagdugang sa kahayag ug salabutan ngari kanato labaw sa mga butang nga ato nang nadawat, nga wala pa nato matuman sa hingpit, makadugang kini sa tunglo diha sa atong mga ulo. Igo na alang kanato nga mopuyo diha sa kahayag sa karon nga inspirasyon ug sa karon nga pagpadayag ug alang sa kada usa nga miyembro sa Simbahan sa pagsunod sa mga kasugoan sa Ginoo ug maghago sa Simbahan samtang ang Espiritu mohatag kaniya og giya sa paghimo sa iyang katungdanan. Ang matag usa nato nga kalag may katungod sa inspirasyon gikan sa Dios aron masayud unsay atong katungdanan ug kon unsaon nato kini sa paghimo.¹⁹

Ang butang nga atong buhatunon mao ang pagpuyo sumala sa kahayag ug salabutan nga gipadayag kanato sa Dios niini nga dispensasyon, aron kita mahiuyon sa mga gahum sa kalangitan ug sa mga langitnong binuhat, ug ilabi na sa atong Ginoo nga si Jesukristo nga anaa nagbarug sa atong ulohan, kinsa mao ang atong tighatag sa balaod, atong tighatag sa ehemplo, ug sa pamaagi sa kinabuhi ug kaluwasan sa tibuok kalibutan; nga pinaagi kaniya kita makasulod sa celestial nga Gingharian sa Dios, ug kon wala siya dili gayud kita makasulod niana nga kahimtang sa himaya sa mga kalibutang walay katapusan. Siya ang dalan, ang kahayag ug kinabuhi sa kalibutan; ug kon si kinsa man ang motuman sa mga sugo nga Iyang gihatag, ug mobuhat sa mga buluhaton nga Iyang gihimo, ug gimando kanato nga buhaton, dili magalakaw sa kangitngit, hinonoa magalakaw siya sa kahayag nga magahatag og kinabuhi.²⁰

Mga Sugyot alang sa Pagtuon

Kinsa ang aduna niining “espiritu sa pagpadayag”?
Sa unsang mga dapit sa atong kinabuhi nga kita mahimong makatagamtam sa personal nga giya sa Espiritu?
Sa inyong hunahuna ngano kaha nga ang Dios sa kasagaran mogiya kanato pinaagi sa hinay, hinagawhaw nga tingog sa Espiritu kay sa “katingalahan nga mga pagpakita”? (Tan-awa usab sa 1 Mga Hari 19:11–12.) Sa unsang paagi nga ang Dios mogiya kanato pinaagi sa hinay, hinagawhaw nga tingog?
Unsaon man nato sa pagkahibalo nga kita anaa sa impluwensya sa Espiritu sa Ginoo? (Tan-awa usab sa D&6:15, 22–23; 9:8–9; 11:12–14.)
Nganong wala man kita pugsa sa pagsunod sa mga pag-aghat sa Espiritu? Ngano man kaha sa imong hunahuna nga ang Dios “mahimuot sa matinguhaon nga kasingkasing”?
Unsaon man nato sa pagpakabuhi aron makadawat og giya sa Espiritu? Unsa man ang makapugong sa atong katakus sa pagdawat og mga pag-aghat sa Espiritu?
Kanus-a ikaw natabangan sa Espiritu sa pagpalapad sa imong kahibalo sa mga kamatuoran sa Dios?
Unsang mga panalangin ang moabut ngadto sa mga mosalig sa Balaang Espiritu kaysa magsalig sa “hinulaman o sa aninag lamang sa kahayag”?
Unsaon nato sa pag-andam ang atong kaugalingon aron makadawat og dugang nga kahayag ug salabutan? (Tan-awa usab sa Alma 12:10.)