“ສຳລັບຜູ້ນຳ—ການປະຖົມນິເທດ ແລະການສະໜັບສະໜູນຄູສອນ,” ການສິດສອນໃນວິທີຂອງພຣະຜູ້ຊ່ວຍໃຫ້ລອດ: ສຳລັບທຸກຄົນທີ່ສິດສອນຢູ່ໃນບ້ານ ແລະ ໃນສາດສະໜາຈັກ (2022)

“ການປະຖົມນິເທດ ແລະການສະໜັບສະໜູນຄູສອນ,” ການສິດສອນໃນວິທີຂອງພຣະຜູ້ຊ່ວຍໃຫ້ລອດ

ສຳລັບຜູ້ນຳ—ການປະຖົມນິເທດ ແລະການສະໜັບສະໜູນຄູສອນ

ໃນຖານະຜູ້ນຳ, ທ່ານມີໜ້າທີ່ຮັບຜິດຊອບທີ່ຈະ “ພົບກັບຄູສອນທີ່ໄດ້ຮັບການເອີ້ນໃໝ່” ໃນອົງການຂອງທ່ານ ແລະ “ຊ່ວຍໃຫ້ເຂົາເຈົ້າກະກຽມສຳລັບການເອີ້ນຂອງເຂົາເຈົ້າ” (ຄູ່ມືທົ່ວໄປ, 17.3, ຫ້ອງສະໝຸດພຣະກິດຕິຄຸນ). ການປະຊຸມເຫລົ່ານີ້ເປັນໂອກາດແນະນຳຄູສອນຕໍ່ການເອີ້ນທີ່ສັກສິດຂອງເຂົາເຈົ້າ ແລະ ດົນໃຈເຂົາເຈົ້າດ້ວຍວິໄສທັດເຖິງການສິດສອນໃນວິທີຂອງພຣະຜູ້ຊ່ວຍໃຫ້ລອດໝາຍຄວາມວ່າແນວໃດ. ໃນຖານະຜູ້ນຳ, ທ່ານສາມາດຊ່ວຍໃຫ້ຄູສອນໃໝ່ກະກຽມທີ່ຈະຮັບໃຊ້ ໂດຍການເຮັດດັ່ງຕໍ່ໄປນີ້:

ສະແດງຄວາມໝັ້ນໃຈວ່າ ພຣະຜູ້ຊ່ວຍໃຫ້ລອດຈະຊ່ວຍເຂົາເຈົ້າໃນການເອີ້ນຂອງເຂົາເຈົ້າ (ເບິ່ງ ຄຳສອນ ແລະ ພັນທະສັນຍາ 88:78).
ມອບປຶ້ມແຫລ່ງຊ່ວຍນີ້ໃຫ້ຄູສອນໃໝ່, ແລະ ຊຸກຍູ້ໃຫ້ເຂົາເຈົ້າຊອກຫາວິທີທີ່ຈະນຳໃຊ້ຫລັກທຳຂອງມັນໃນການສິດສອນຂອງເຂົາເຈົ້າ.
ແບ່ງປັນກັບຄູສອນໃໝ່ອັນໃດກໍຕາມກ່ຽວກັບອົງການຂອງທ່ານ ທີ່ຈະເປັນປະໂຫຍດສຳລັບເຂົາເຈົ້າທີ່ຈະຮູ້ຈັກ.
ຕາມຄວາມຕ້ອງການ, ໃຫ້ບອກຄູສອນໃໝ່ວ່າເຂົາເຈົ້າຈະສອນໃນຫ້ອງໃດ ແລະ ຄວນເລີ່ມດ້ວຍບົດຮຽນໃດ. ໃຫ້ຂໍ້ມູນໃດໆທີ່ເຂົາເຈົ້າຕ້ອງການກ່ຽວກັບຫ້ອງຮຽນຂອງເຂົາເຈົ້າ ແລະ ສະມາຊິກໃນຫ້ອງຮຽນ.
ອະທິບາຍໃຫ້ຄູສອນໃໝ່ຮູ້ວ່າ ທ່ານສາມາດຊ່ວຍເຂົາເຈົ້າໃນການເອີ້ນຂອງເຂົາເຈົ້າ. ໃຫ້ການສະໜັບສະໜູນໃນຫ້ອງຮຽນ ແລະ ການເຂົ້າເຖິງແຫລ່ງການສິດສອນຖ້າຈຳເປັນ.
ສະເໜີທີ່ຈະສັງເກດຫ້ອງຮຽນຂອງຄູສອນເປັນບາງຄັ້ງ, ແລະ ໃຫ້ຄຳຕິຊົມຕາມການກະຕຸ້ນຈາກພຣະວິນຍານ.
ເຊື້ອເຊີນໃຫ້ຄູສອນເຂົ້າຮ່ວມການປະຊຸມສະພາຄູສອນໃນແຕ່ລະໄຕມາດ.

ຕະຫລອດການອົດຮົມຄູສອນ, ໃຫ້ສືບຕໍ່ພົບກັບເຂົາເຈົ້າເປັນໄລຍະໆ ເພື່ອໃຫ້ການສະໜັບສະໜູນຢ່າງຕໍ່ເນື່ອງ. ຍົກຕົວຢ່າງ, ທ່ານສາມາດສົນທະນາຈັກບຶດໜຶ່ງກັບຄູສອນກ່ອນ ຫລື ຫລັງຈາກຫ້ອງຮຽນ ເພື່ອສົນທະນາຫລັກທຳຂອງ ການສິດສອນໃນວິທີຂອງພຣະຜູ້ຊ່ວຍໃຫ້ລອດ. ຖາມຄູສອນກ່ຽວກັບສິ່ງທີ່ເຂົາເຈົ້າຮູ້ສຶກວ່າເຂົາເຈົ້າກຳລັງເຮັດໄດ້ດີ ແລະ ວິທີທີ່ເຂົາເຈົ້າຢາກຈະປັບປຸງ. ຊຸກຍູ້ເຂົາເຈົ້າດ້ວຍຄວາມເມດຕາ ແລະ ຄວາມກະຕັນຍູສຳລັບການຮັບໃຊ້ທີ່ເຂົາເຈົ້າມອບໃຫ້.

ທ່ານຄວນກະກຽມສຳລັບການສົນທະນາເຫລົ່ານີ້ໂດຍການເບິ່ງຄູສອນສິດສອນ. ສະແຫວງຫາທີ່ຈະເຂົ້າໃຈຄວາມເຂັ້ມແຂງຂອງຄູສອນໃຫ້ດີກວ່າເກົ່າ ແລະ ຄົ້ນຫາວິທີທີ່ທ່ານສາມາດໃຫ້ການສະໜັບສະໜູນ. ການສ້າງຄວາມເຂັ້ມແຂງຂອງຄູສອນກໍສຳຄັນເທົ່າໆກັບການລະບຸໂອກາດສຳລັບການປັງປຸງ.