Para sa mga Lider—Pag-orient kag Pagsuporta sang mga Titser

Bilang lider, may responsibilidad ka sa “pagtipon upod sa bag-o lang gin-call nga mga titser” sa imo organisasyon kag “buligan sila sa paghanda para sa ila mga calling” (General Handbook, 17.3, Librarya sang Ebanghelyo). Ining mga miting isa ka oportunidad para ipakilala ang bag-o nga mga titser sa ila sagrado nga mga calling kag papagsikon sila sa panan-awon kon ano ang buot silingon sang pagtudlo sa paagi sang Manluluwas. Bilang lider, sarang mo buligan ang bag-o nga mga titser nga maghanda sa pagserbisyo paagi sa paghimo sang masunod:

• Magpahayag sang pagsalig nga ang Manluluwas magabulig sa ila sa ila calling (tan-awa sa Doktrina kag mga Kasugtanan 88:78).

• Hatagan ang bag-o nga mga titser sang kopya sining manwal, kag paisugon sila nga magpangita sang mga paagi nga magamit ang mga prinsipyo sini sa ila pagtudlo.

• Ipaambit sa bag-o nga mga manunudlo ang bisan ano parte sa inyo organisasyon nga mahimo makabulig nga ila mahibal-an.

• Kon kinahanglan, sugiri ang bag-o nga mga titser kon diin nga kuwarto magtudlo kag kon ano ang sugdan nga leksyon. Maghatag sang bisan ano nga impormasyon nga ila kinahanglan parte sa ila klase kag mga miyembro sang klase.

• Ipaathag sa bag-o nga mga titser nga mabuligan mo sila sa ila bag-o nga calling. Magtanyag sang suporta sa klase kag pagtigayon sang mga manwal sa pagtudlo kon kinahanglanon.

• Magtanyag sa pag-obserba sa mga klase sang mga titser sing panalagsa, kag maghatag sang komento suno sa inspirasyon sang Espiritu.

• Hagara ang mga titser nga magpartisipar sa kada-tatlo-ka-bulan nga mga miting sang konseho sang mga manunudlo.

Sa bilog nga pagserbisyo sang mga titser, padayona nga magpakigkita sa ila para maghatag sang sige-sige nga suporta. Halimbawa, pwede ka maghiwat sang malip-ot nga diskusyon upod sa isa ka titser antes ukon pagkatapos sang klase para hambalan ang mga prinsipyo sang Pagtudlo sa Paagi sang Manluluwas. Pamangkota ang titser kon kumusta na sila kag ano ang mga butang nga gusto nila panamion pa gid. Paisoga sila nga may kalulo kag pagpasalamat sa serbisyo nga ila ginahatag.

Dapat ginahandaan mo ini nga mga diskusyon paagi sa pag-obserba sang titser nga nagatudlo. Tinguhai nga hibal-on sing mas maayo ang mga kusog sang titser kag diskubreha ang mga paagi nga makahatag ka sang suporta. Ang pagpabakod sang mga ikasarang sang isa ka titser pareho kaimportante sang pagkilala sang mga oportunidad sa pag-uswag.