Ibukiia Taan Kairiiri—Kairakiia ao Boutokaia Tia Reirei

Ngkai te tia kairiiri ngkoe, iai katabeam ni “kaitibo ma taan reirei aika a boou” inanon am bootaki ao “ni buokiia n tauraoi nakon weteaia” (Aeniboki ni Kabuta, 17.3, Gospel Library). Boowi aikai bon taai ni katerea nakoia taan reirei aika boou te wewete ae tabu aio ao n anga te kairi mai iroun te tamnei n noria bwa tera ae nanonaki n reirei n ana Kawai te Tia Kamaiu. Ngkai te tia kairiiri, ko kona ni buokiia taan reirei aika boou n tauraoi ni beku man karaoan bwaai aikai:

• Kaota nanom ni kakoauaa bwa te Tia Kamaiu e na buokiia inanon tibwangaia (taraa Reirei ao Berita aika Tabu 88:78).

• Anganiia taan reirei aika boou kaobiin te boki aei, ao kaungaiia bwa ana kakaei kawai ni kamwakurii tuua ake inanona n aia angareirei.

• Tibwaia ma taan reirei aika boou rongorongon am bootaki are e na rangi ni ibuobuoki nakoia.

• Ngkana e kainanoaki, tuangiia taan reirei aika boou te ruu are a na angareirei iai ao tera te reirei ae a na moanna mai iai. Katauraoi riki rongorongo ake a kainanoi iaon aia kiraati ao kaaina.

• Kabwarabwaraa nakoia taan reirei aika boou ae ko kona ni buokiia ni weteakiia. Aanga te boutoka inanon te umwanreirei ao ni karekean bwaai ni ibuobuoki n te angareirei ngkana e kainanoaki.

• Tuangiia ae n taai tabetai ko na mamataku irouia tia reirei ma aia kiraati, ao n anga mwiin te bwai are ko nooria man ana kairi te Tamnei.

• Kaoiia taan reirei n iriira buakon te boowi ni kauntira n tia reirei ni katoa kuata.

Rinanon aia mwakuri n ibuobuoki taan reirei, reitinako ni kaitibo mangaiia n te tai teuana ma teuana bwa aonga n teimatoa n anganganaki te boutoka. Te katooto, ko kona ni karekea am tai ni marooro ae uarereke ma te tia reirei imwaain ke imwiin te kiraati ni maroroakin tuua n Reirei n ana Kawai te Tia Kamaiu. Titirakina te tia reirei tera ana namakin ngkana e nakoraoi are a karaoia ao aanga are a na kanakoraoia riki iai. Kaungaia ma te akoia ao te kakaitau ibukin mwakuri n ibuobuoki ake a anga.

Ko kona ni katauraoiko ibukin marooro aikai man matakuakinan te tia reirei ngkana e angareirei. Ukorii aanga ni kamataatako raoi iaon korakoran te tia reirei ao kakaei kawai are ko kona n anga iai te boutoka. Boutokaan korakoran te tia reirei ai bon kakawakin naba ataakin aron te rikirake.